Başlık/Title: Necāti Divanı - Gazel Kısmı
Yazar/Author: Necāti
Editör/Editor: Ali Nihad Tarlan
Edisyon/Edition: Elektronik edisyon/Electronic edition
Sorumluluk/Responsibility: OTAP
Kapsam/Extent: 650 manuscript pages
Yayıncı/Publisher: OTAP
Yazılış tarihi/Date of composition: 1500
Basılış tarihi/Date of print publication: 1963
Telif/Copyright: OTAP
Notlar/Notes: The printed version of this divan that is edited by Ali Nihad Tarlan is not exactly the same with the version on the OTAP website. The electronic OTAP text was based on Tarlan's edition (Necāti Beg Divanı, Istanbul: Milli Eğitim Basımevi, 1963); but it was later transcribed by Yeşim Kalpaklı and re-edited by Walter Andrews.
Metin kimlik no/Text ID number: -

Necātī Dīvānı

Hazırlayan: Ali Nihād Tarlan
Copy: Yeşim Kalpaklı
Corrected Text: W. G. Andrews

|B0|PElif|p1
fāʿilātün fāʿilātün fāʿilātün fāʿilün
1.a. Aldum aġzuñ ölçüsini ẕerre deñlü yoḳ vefā
b. Pür-cefāsın hey güneş yüzlü ḥabībüm Muṣṭafā
2.a. Tīġ·i ġam boynum muḥarref çalub eylerse ḳalem
b. Yaza aḳan ḳanum işigüñde āyāt·ı vefā
3.a. Luṭfuña idüb binā yapdum maḥabbet ẖānesin
b. Rence ḳılursañ ḳadem ehlen ve sehlen merḥabā
4.a. Gide mi ey seng-dil zülfüñ ẖayāli sīneden
b. Çün bilürsin muḥkem olur kāfir itdügi binā
5.a. Nāmeye ṣıġmaz Necātīnüñ oransuz ḳıṣṣası
b. Göz yaşı ̮ile ḳapuña ʿarẓ ola bāḳī mā-cerā

|p2
feʿilātün feʿilātün feʿilātün feʿilün
1.a. Es̲er itmez nidelüm āh·ı seḥer-gāh saña
b. Meger inṣāf vire dōstum Allāh saña
2.a. Ḫōş olur ṣoḥbet·i mey gicede meh-tāb olıcaḳ
b. Nūr ṣaç meclise gel kim dimişüz māh saña
3.a. Nidelüm devr ṣunarsa saña şerbet baña zehr
b. Bu cihān böyle olur gāh baña gāh saña
4.a. Levḥ·i çihremde oḳımaġa ḥikāyāt·ı ġamı
b. Giceler ṣubḥa degin şemʿ ṭutar āh saña
5.a. Göz yaşı encümini reh-ber idinmezse eger
b. Şeb·i ġamda iremez ʿāşıḳ·ı güm-rāh saña
6.a. Gice gelmeyecegin ṣoḥbete ey dil bilürüz
b. Hele var gör ki ne yüzden ṭoġar ol māh saña
7.a. Ḫusrevā ḳullaruñuñ eyle revā ḥācetini
b. Ki ebed oldı müyesser ḳamu dil-ẖāh saña
8.a. Ey Necātī ṭaş iken laʿl ide ẖōrşīd bigi
b. Bir naẓar eyler ise himmet ile Şāh saña

|p3
fāʿilātün fāʿilātün fāʿilātün fāʿilün
1.a. Ḫalḳ·ı ʿālem bir yaña oldı bu şeyda bir yaña
b. Cennet·i kūyuñ ḳomazam olsa dünyā bir yaña
2.a. İrmesün dirseñ cemāl·i ber-kemāle bir zevāl
b. Gün gibi ey şāh·ı ʿālem gitme tenhā bir yaña
3.a. Bulımadılar arayub şīve·ı reftāruñı
b. Gitdi Ṭūbā bir yaña serv·i dil-ārā bir yañ
4.a. Devlet·i ʿışḳuñda senden artuḳ olur leşkerüm
b. Bir yaña ṭursa ẓaʿīf olan tüvānā bir yaña
5.a. ʿIşḳa māniʿ olımaz nāṣiḥ kelām·ı hūş-mend
b. Kimsene ḳarşu durımaz aḳsa deryā bir yaña
6.a. Māl·i dünyā ile şerḥ eyler tecerrüd ḥālini
b. Yerde Ḳārūn bir yaña gökde Mesīḥā bir yaña
7.a. Söz ile ben ẖasteye biñ kez müdāvā eyledüñ
b. İtmedüñ ey ʿĪsī·i şekker-leb ammā bir yaña
8.a. Ġamzeñ üstündür lebüñden söz yoḳ ammā ẖastaña
b. İki raḥmetden birisin eyle cānā bir yaña
9.a. Cānına oldı Necātīnüñ ḥavāle çeşm·i yār
b. Ey ecel sen de gelüb itme teḳāẓā bir yaña

|p4
fāʿilātün fāʿilātün fāʿilātün fāʿilün
1.a. Ey saʿādet āfitābı meh ġulām olsun saña
b. Dil-rübālıḳ şūẖluḳ devri temām olsun saña
2.a. Pādişāhum ḳuluñam dimek düşer mi baña hīç
b. Ben kimem yüzbiñ benüm gibi ġulām olsun saña
3.a. Sen ṭururken dil-berā ġayrīye degmez lāf·ı ḥüsn
b. Hey ala gözlüm güzellik müstedām olsun saña
4.a. Ḳavl ü iḳrārına ṭurmaz ʿahd ü peymānı yalan
b. Bī-vefālar çoḳdürür illā selām olsun saña
5.a. Pertev·i ẖorşīd·i ruẖsārı ẖayālin ol mehüñ
b. Ey gözüm ger göresin bensüz ḥarām olsun saña
6.a. Ey Necātī mesned idin āsitān·ı dil-beri
b. Diler iseñ sāye·i devlet maḳām olsun saña

|p5
fāʿilātün fāʿilātün fāʿilātün fāʿilün
1.a. Dil leb·i şīrīnūñ añub nola atsa cān aña
b. Kim göricek kendü cānum gibi ḳaynar ḳan aña
2.a. Açılur genc·i cemālünden ṭılısımı zülfüñüñ
b. Gūyiyā efsūn oḳur urur ṣabā pinhān aña
3.a. Tāra döndi cismüm ider zaẖm·ı tīrüñden fiġān
b. Ṣanasın mıẓrāb olubdur āhenīn peykān aña
4.a. Ḥüsni eyvānın güneşden yuca yapmışdur o māh
b. Āh kim irmez kemend·i nāle vü efġān aña
5.a. Ne ̮idi cānā şemʿ·i ruẖsāruñ getürmek araya
b. Zülf·i ẓālim nisbet idüb baṣmasa ̮idi yan aña
6.a. Zülfi çevgānı görüb ẖōrşīd ṭopın didi kim
b. Hay iñen germ olmasun virdükse biz meydān aña
7.a. Ġamze·i ẖūn-rīzine dil vir ki cān bāzārıdur
b. Ey Necātī dil-ber oġlandur gelür āsān aña

|p6
fāʿilātün fāʿilātün fāʿilün
1.a. Zülf·i dil-ber ṭolamış ayaḳ saña
b. Hay miskīn olmış olıcaḳ saña
2.a. Āşinālıḳ vire diyu ey faḳīr
b. Nice yüzlerden göründi Ḥaḳ saña
3.a. Baḳsaña Ḥaḳdan yaña ey bülheves
b. Nice kerre dimedüm mi ki baḳ saña
4.a. Ey ʿazīzüm Yūsuf·ı bāzār·ı ḥüsn
b. Kendüyi ṣatmaḳ diler aylaḳ saña
5.a. Buyurubdur dört meẕheb dört kitāb
b. Ġayrı ḳoyub Tañrıya baḳmaḳ saña
6.a. Irmaḳ itme serv·i ḳaddüñ dōstum
b. Ḳanlu yaşum ideyim ırmaḳ saña
7.a. Kime şeydādur Necātī dir iseñ
b. Çaḳ saña ey gül-ʿiẕārum çaḳ saña

|p8
fāʿilātün fāʿilātün fāʿilātün fāʿilün
1.a. Sīnem üzre zaẖm·ı ġamzeñ rāḥat·i cāndur baña
b. Ġamzeñ oḳları ̮ile ölmek ẖāb·ı bārāndur baña
2.a. Ey ḳarañu gicelerde gezdügüm menʿ eyleyen
b. Berḳ·i āh·ı tāb-nāküm māh·ı tābāndur baña
3.a. Her kişinüñ ẓulmine sulṭān olanlar dād ider
b. Baña kim dād ide ki ̮iden ẓulmi sulṭāndur baña
4.a. Nāfe dirmiş zülf·i ʿanber-bār·ı dil-ber var iken
b. ʿĀlem içre müşg adı bir ḳuru bühtāndur baña
5.a. Dem-be-dem ḥāsidlerüñ ṭaʿnı oḳın menʿ itmege
b. Dāġ·ı miḥnet sīnemüñ üstinde ḳalḳandur baña
6.a. İçmeyeliden ḳudurdum mı nice ̮oldum bilmezem
b. Ṣāf ü pāk āb·ı revānler ḳıp ḳızıl ḳandur baña
7.a. Yüregümi sīneden yarub çıḳarsunlar benüm
b. Kim ġam·ı tīrüñle ol bir ḳanlu peykāndur baña
8.a. Buldı her bir şeyde ẕihnüm gevher·i maʿnī·i ẖāş
b. Degme bir ḳaṭre Necātī baḥr·i ʿummāndur baña

|p9
mefʿūlü fāʿilātü mefāʿīlü fāʿilün
1.a. Şol yār çünki ʿāşıḳa bīgāne olmaya
b. Ṭaşlamalıdur anı ki dīvāne olmaya
2.a. Kimdür ki bezm·i ḥüsnüñe cān ile baş ile
b. Bir şemʿ gibi yanmaġa pervāne olmaya
3.a. Şol şehr içinde ṭurma ki ḥāẕıḳ ṭabīb yoḳ
b. Bir daẖi şol maḥalle ki meyẖāne olmaya
4.a. Şenlik hemīşe künc·i ẖarābāt içindedür
b. Genc ola mı şu yerde ki vīrāne olmaya
5.a. Ḫaṭ mıdur ol ki çekmeye siḥr ile dāˀire
b. Beñ midür ol ki fitnede bir dāne olmaya
6.a. Ṣıdḳ ile şol ki beklemeye şāh yanını
b. Şaṭrenc·i mihr·i dōstda ferzāne olmaya
7.a. Oḳunmasun Necātī getürmez gözine dōst
b. Şol şiʿr·i dil-firībi ki mestāne olmaya

|p10
fāʿilātün fāʿilātün fāʿilātün fāʿilün
1.a. ʿĀḳıbet cevr ile cān almaḳ çün oldı ẖū saña
b. Ben de geçdüm cān ü dilden ey ṣanem yāhū sañ
2.a. Seyle virüb ʿālemi aḳıtma her dem yaşumı
b. Dōstum ẖayr eylemez āẖır bu ḳanlu ṣu saña
3.a. Çünki alduñ būy·i zülfüñ ṭutma vaṣlından ümīd
b. Yüri ey bād·ı ṣabā ölince yeter bu saña
4.a. Ḳaşlaruñ fikri ile döndi hilāle ḳāmetüm
b. Gerçi cānum ḳılca gelmez ey hilāl-ebrū saña
5.a. Ol gözi mestāneye uyduñ Necātī yüri var
b. Giceler tā ṣubḥa dek olsun ḥarām uyẖu saña

|p11
mefʿūlü fāʿilātü mefāʿīlü fāʿilün
1.a. Göñlüm sefīne ḳatı deñizdür cemāl aña
b. Ḳaradan ālet oñarur ol ẖaṭṭ u ẖāl aña
2.a. Gel mey-kede cenābına mest ol şu resme kim
b. Reşk ide künc·i ṣavmaʿada ehl·i ḥāl aña
3.a. Meclisler içre gül gibi beşşāş olur şarāb
b. Geydürse ʿaks·i ʿārıẓ·ı dil-dār al aña
4.a. Mümkin midür ki vara miyānuñ kinār ola
b. Bī-çāre ʿāşıḳuñ yā vire iḥtimāl aña
5.a. Sözde dehānı görinür ammā miyān ki var
b. Diḳḳatler ile ḳılca irişmez ẖayāl aña
6.a. Terk it Necātī ẖāce·i dünyā-peresti kim
b. Kef geçme māl üstine virdi kemāl aña

|p12
fāʿilātün fāʿilātün fāʿilātün fāʿilün
1.a. ʿĀşıḳ olmışdur güneş ey dil-ber·i raʿnā saña
b. Ṭolanur dünyāyı hergiz bulımaz hem-tā saña
2.a. Gördi sāḳīlik idersin meclis içre ey perī
b. Aġzın açdı ḳaldı ḥayrān sāġar·ı ṣahbā saña
3.a. Ḫōşdürür gül yüzlülerle baña gülşen güşesi
b. Zāhidā ḥūrīler ile cennet·i Meˀvā saña
4.a. Altun üsküfle varub her meclise aġalanur
b. Gör ne yüzden öykünürmiş şemʿ·i bezm-ārā saña
5.a. Aġladuġuñı görüb başın döger ṭaşdan ṭaşa
b. Acıduġından Necātī bu yedi deryā saña

|p13
fāʿilātün fāʿilātün fāʿilün
1.a. Göñlüme zülfüñdürür dām·ı belā
b. Cānuma çeşmüñdürür ʿayn·ı ʿanā
2.a. Ey ġamet ender dilem cāyī gereft
b. Der cihān cüzˀ ū neyābī nīk cā
3.a. Ente maḥbūbuˀl-ḳulūbiˀl-ʿārifīn
b. Ente maʿşūḳuˀl-füˀādiˀl-aṣfiyā
4.a. Cennet içre Sidre·veş Ṭūbā ḳadüñ
b. Başdan ayaġa görinür müntehā
5.a. Ey ẖayāl·i mihr·i ruẖsār·ı mehet
b. Vey cemāl·i cān-fezāyet dilgüşā
6.a. Żāḳa ʿayşī ḳalla ṣabrī yā ḥabīb
b. Żaʿa ʿömrī māta ḳalbī fīˀl-hevā
7.a. Āhum odından olur mūm āhenīn
b. Ḳatı göñlüñe senüñ gelmez ḳaya
8.a. Derd-mend ol ey Necātī derd-mend
b. Derdlü olmayınca olunmaz devā

|p14
fāʿilātün fāʿilātün fāʿilātün fāʿilün
1.a. Geh cefā geh cevr geh nāz oldı çün kim ẖū saña
b. Bī-vefā dil-dār imişsin ey ṣanem yā hū saña
2.a. Ḳıble ḥaḳḳı ṭoğruyam yoluñda ben līkin raḳīb
b. Egri sözler söylemişdür ey hilāl-ebrū saña
3.a. Gördi zülfin öpdüğüm ẖışm eyleyüb dil-ber didi
b. Varasın ögünesin eger ḳalursa bu saña
4.a. Ola cismümde benüm her üstüẖānum māh·ı nev
b. Ger olam ey māh-rū bir gice hem-pehlū saña
5.a. Ey göñül ʿışḳ odına yanmaḳ saña oldı ḥalāl
b. Vey gözüm mihrinde ol māhuñ ḥarām uyẖu saña
6.a. Devr·i ḥüsninde Necātī şād ü ẖandānsın yine
b. Luṭf yüzin gösterübdür beñzer ol meh-rū saña

|p15
fāʿilātün fāʿilātün fāʿilātün fāʿilün
1.a. Gülşen·i ʿışḳuñda āh ü nāle bülbüldür baña
b. Sīnem üzre zaẖm·ı peykānuñ ḳızıl güldür baña
2.a. Dem-be-dem bülbül gibi ben zār zār aġlayayın
b. Sen ferāġat gülşeninde ʿālem·i güldür baña
3.a. Dem-be-dem benlik şarābı ḳoẖusın defʿ itmege
b. Vaṣf·ı ẖālüñ düşmez aġzumdan ḳaranfüldür baña
4.a. Eşk·i sīm ü rūy·i zerden incine ṣanma beni
b. ʿIşḳ yolında begüm bunlar tecemmüldür baña
5.a. Vaṣf·ı ḥālüm nāme nice ʿarẓ ide dil-dāra kim
b. Bāb·ı ʿışḳuñ degme ḥarfi bir teressüldür baña
6.a. ʿĀrıẓ u ruẖsār ü zülfüñ ey leṭāfet gülşeni
b. Biri gül biri ḳaranfül biri sünbüldür baña
7.a. Ey Necātī nice ṣabr idem ki dil-dāruñ işi
b. Gāh nāz ü geh tekebbür geh teġāfüldür baña

|p16
mefʿūlü fāʿilātü mefāʿīlü fāʿilün
1.a. Mümkin midür ki ṣarıla bir sīm-ten baña
b. Ölem gidem meger ki ṣarıla kefen baña
2.a. Cevr ile sevdügümden ayırdı beni ḥasūd
b. Sevdüklerinde bulsun efendi iden baña
3.a. Bāġ·ı cinān zāhide dīdār bendeye
b. Kenʿān aña vü Yūsuf·ı gül pīrehen baña
4.a. Ol hinduvāne beñleri ögmek ḳolay mıdur
b. Virilmese ̮idi luṭf ile naẓm·ı ḥasen baña
5.a. Cānā cihānı ḳısmet iderseñ de rāẓıyuz
b. Dünyā bütün saʿādet ile saña sen baña
6.a. El götürürdüm eyler idüm derdüñi ṭaleb
b. Kendü elümle itmişin ey dōst ben baña
7.a. Cānā Necātī ile gel aġız bir eyle kim
b. Saña şeker-dehen dine şīrīn-suẖan baña

|p17
fāʿilātün fāʿilātün fāʿilātün fāʿilün
1.a. Var iken cānāne göñlüm cāna olmaz āşina
b. Şemʿi ḳoyub ġayr ile pervāne olmaz āşinā
2.a. Cānı yüreklendüren sīnemdeki peykānıdur
b. Ḳalbi āhen olmayan meydāna olmaz āşinā
3.a. Cān ṭabībisin senüñ geldügüñ uman ẖastalar
b. Ḫōş dirilür derd ile dermāna olmaz āşinā
4.a. Ey baña sen aġlamaḳla başa çıḳmazsın diyen
b. Gözi yeñmeyen kişi ʿummāna olmaz āşinā
5.a. Baḳmadı benden yaña sen māha uyaldan göñül
b. İki gün bir kimseye dīvāne olmaz āşinā
6.a. Niçün aẖşamlarsın aġyār ile ey bedr·i temām
b. Seg bilürsün kim meh·i tābāna olmaz āşinā
7.a. Ḳısmet·i bezm·i ezeldür ey Necātī bilmiş ol
b. Āşınā bīgāne vü bīgāne olmaz āşinā

|p18
mefʿūlü mefāʿīlü mefāʿīlü feʿūlün
1.a. Yüzüñ görene irse nola laʿl·i şeker-ẖā
b. Erzān olur ey şīr·dehen Kaʿbede ẖurmā
2.a. İḥyā·yi memāt olduġunı bilse demüñde
b. Cān vire idi irmek içün bu deme ʿĪsā
3.a. Zülfüñ lebe vardı ve gözüñden ḥaẕeri yoḳ
b. Ḫavf·ı ʿases itmeye belī bādede tersā
4.a. Olmaya behā açar iseñ söz dehenüñden
b. Gün yüzde eger ẕerrece aġzuñ ola peydā
5.a. Düşdi bu Necātī yine zülfüñ hevesine
b. Ne ḳara yazı ̮imiş başına bu ḳuru sevdā

|p19
fāʿilātün fāʿilātün fāʿilün
1.a. Yār ola ṣandum göñül virdüm saña
b. Ben baña itdüm dirīġā ben baña
2.a. Didi ġamzem oḳları ̮ile nicesin
b. Nice gelürse didüm ey bī-vefā
3.a. Didi ḳarşu ṭut dil·i bīmāruñi
b. Ġamzem oḳlarına didüm ẖōş ola
4.a. İki gözsüz baḳayın dünyāya ger
b. Ḫāk·i pāyuñ bilmez isem tūtiyā
5.a. Gāh zülfüñ ser-keş olur geh ẖaṭuñ
b. Eksük olmaz her yañadan bir belā
6.a. Dōstlardan yād olubdur cān ü dil
b. Olalı derd ü ġamuñla āşinā
7.a. Gāh mescid gösterür geh mey-kede
b. Olmaduḳ biz ʿışḳuñ ile bir yaña
8.a. Kimdürür dirseñ Necātī dōstum
b. Bende·i muẖliṣ muḥibb·i bī-riyā

|p20
mefʿūlü fāʿilātü mefāʿīlü fāʿilün
1.a. Lāzım degül ruẖuñda ki zülf·i siyāh ola
b. Ḳarañlıḳ olmaz ol gice kim anda māh ola
2.a. Her ḳanġı bezmde ki leb·i laʿlüñ añıla
b. Cām·ı şarābı aġıza almaḳ günāh ola
3.a. Cennet dir idüm işigüñe ḳoḳum oldürür
b. Ḥūrī ile arañda senüñ iştibāh ola
4.a. Dīdār ehli cennete ṣapmaz ʿaleˀl-ẖuṣūṣ
b. Zülf·i dırāz·ı dōst gibi şāh-rāh ola
5.a. Serv·i sihī çekinmeye āzād olmaġa
b. Şol ʿaṣrda ki sencileyin pādişāh ola
6.a. Fettān gözi ġamı ̮ile ben öldükde dōstlar
b. Ṭopraġa ḳarışa çü vücūdum tebāh ola
7.a. Nergis diküñ ki heyʿet·i ṣırf ü elifdürür
b. Tā kim mezārum üsti ḳamu şekl·i āh ola
8.a. Ġamzeñ Necātī sīnesin iñen de delmesün
b. Kimse göre göñüldeki sevgüyi gāh ola

|p21
mefʿūlü fāʿilātü mefāʿīlü fāʿilün
1.a. Çün nev-bahār·ı devlet·i Şāh·ı cihān ola
b. Ḫōrşīd·i bī-zevāl mey·i erġavān ola
2.a. Sāḳī düşerse sāġara ʿaksi ʿiẓāruñuñ
b. Pīr·i ẓaʿīf olanlar içerse cevān ola
3.a. Bir būsesine cān virüb almaḳ olur velī
b. Ol dil-rübāya istemezüz kim ziyān ola
4.a. ʿAşıḳlaruñ çoġ olduġın az görme dōstum
b. Bulımayasın çoġ istiyesin bir zemān ola
5.a. Yüzüm ayaġı tozına şol vaḳtin ire kim
b. Yerden zer ile gök yüzine nerdübān ola
6.a. Sen bī-vefāyi terk·i cefā itdi didiler
b. Gerçekler işidüb didi şallāh yalan ola
7.a. Düşman Necātī ile bir olmaz ʿaleˀl-ẖuṣūṣ
b. Ben zülfüñüñ figendesi ol bir fülān ola

|p22
mefʿūlü fāʿilātü mefāʿīlü fāʿilün
1.a. Ṣaç zülfiñi ruẖuña ki ʿanber ġulām ola
b. Aç gün yüzüñ ki māh·ı nev işi temām ola
2.a. Zülfüñ dünini gün yüzüñe ṣalma raḥm ḳıl
b. Ġam-gīn olur ġarīb göñül çünki şām ola
3.a. Cānānenüñ şarāb·ı leb·i rūḥ-perverin
b. Ger bizden ayru göresin ey dil ḥarām ola
4.a. Miskīnlük ile dilleri zülfüñ alur ele
b. Ṭañ mi ger aña cennet·i rūyuñ maḳām ola
5.a. Yek-reng yār var ise ʿālemde ey göñül
b. Sāḳī·i gül-ʿiẕār ü mey·i lāl-fām ola
6.a. Ḫaṭṭuñı añ ḳo cevri ki āẖır ider ẖurūc
b. Küffār·ı Rūma devr·i ḳamer çün temām ola
7.a. Ḳurtardı cevr·i devrden āẖır Necātīyi
b. Cām·ı lebüñ ẖayāli nigārā müdām ola

|PBāˀ|p23
fāʿilātün fāʿilātün fāʿilātün fāʿilün
1.a. Dil ġarīb olduġı içün yüzine baḳmaz ḥabīb
b. Gerçi kim merġūb olur her nesne kim ola ġarīb
2.a. Gözlerüñ ʿayn·ı ʿināyetdür kime ide naẓar
b. Kirpügüñ sehm·i saʿādetdür kime ola naṣib
3.a. Ṣaḳlaram dilde ẖayāl·i zülfüñ īmānum gibi
b. ʿIşḳa uyan ṭañ midur ḳoynında götürse ṣalīb
4.a. Ruẖlaruñda ẖāl·i ʿanber-bāruñı gören didi
b. Rūma iḳlim·i Ḥabeş sulṭānıdur düşmiş ġarīb
5.a. Ġabġabuñ māniʿ olur didüm zenaẖdān seyrine
b. Didi bu veche görinür düşicek ṣu üzre sīb
6.a. Çihre·i zerd ile irer işigüñe ehl·i derd
b. Kim ṭavāf·ı Kaʿbe olur ḳuvvet·i zerle naṣīb
7.a. Hīç bir kimse dimez kim it midür ādem midür
b. Bezm·i ʿuşşāḳa ne yüz ile gelür bilsem raḳīb
8.a. Luṭf·ı ṭabʿuñdur Necātī saña zaḥmet çekdüren
b. ʿŪdı yaḳar nāfeyi āvāre eyler yaẖşi ṭīb

|p24
mefāʿilün feʿilātün mefāʿilün feʿilün
1.a. Dimez nice sürinürsin ḳapumda sen de ġarīb
b. Kimesne bencileyin olmasun vaṭanda ġarīb
2.a. Helāk ider ẖaṭ u ẖālüñ nice benüm gibiyi
b. Selāmet ol ki ḳomazsın beni iñen de ġarīb
3.a. Egerçi aġır olur ṭaş ḳopduġı yerde
b. Sitāre var ki ʿaḳīḳi ider yemende ġarīb
4.a. Ḳapunda āhuma yir yoḳ ʿaceb ḥikāyetdür
b. Bahār ü mevsim·i gülşen ṣabā çemende ġarīb
5.a. Muḳīm idüm ser·i kūyuñda der-be-der itdüñ
b. Ġarīb işler idersin bu derd-mende ġarīb
6.a. Zihī kemāl·i teraḳḳī zihī cemāl·i celāl
b. Ki ʿışḳ bende ġarīb oldı ḥüsn sende ġarīb
7.a. Yazuḳ degül mi baña gülmemek işigüñde
b. Efendisi ḳapusısunda olur mı bende ġarīb
8.a. Ṣabā gibi yüzi üzre görüb Necātīyi dōst
b. Didi nice sürinürsin ḳapumda sen de ġarīb

|p25
fāʿilātün fāʿilātün fāʿilātün fāʿilün
1.a. ʿĀşıḳ olduġum ṭuyaldan yüzüme baḳmaz ḥabīb
b. Yöresine uġramaz ölümlü bīmāruñ ṭabīb
2.a. Çīn·i zülfümden çekilsün dir imişsin dōstum
b. Hey meʿāẕaˀllāh ne çāre uşda boġaz uşda ip
3.a. Pādişāhum ḳılıcuñla açılur iḳlīm·i ḥüsn
b. Ġamzeñüñ şānında münzel āyet·i fetḥun ḳarīb
4.a. Dil ġarībin urur ayaḳlara zülfüñ gerçi kim
b. Eller üstine ṭutarlar anı kim ola ġarīb
5.a. Ḳısmet olmaġ ister iseñ derd u ġam cān ü dile
b. Oḳ bıraḳsun ġamzeñ ey ebrū-kemānum yā naṣīb
6.a. Mest olıcaḳ ḳan içer dirler senüñçün dōstum
b. Hey gözi mestüm şarāb·ı nāzı neylersin içib
7.a. Żaʿf ile görünmez oldum kimden umayın viṣāl
b. Görmeyicek ẖastayı kime ʿilāc eyler ṭabīb
8.a. Acır iseñ gel Necātī derd-mende acı kim
b. Ne leb·i dil-ber naṣīb oldı ne ḥalvā·yi raḳīb

|p26
fāʿilātün fāʿilātün fāʿilātün fāʿilün
1.a. Āh kim düşdüm diyār·ı ġurbete tenhā ġarīb
b. Bī-dil ü bī-cān olub şūrīde vü şeydā ġarīb
2.a. Geh Mıṣır iḳlīmlerin seyr itdürür geh Rūm ilin
b. Geh ʿacem mülkin temāşā ḳıldurur sevdā ġarīb
3.a. Baġrı başlu gözi yaşlu yılduzı alçaḳ olur
b. Her kişi düşman olur ger eylese ġavġā ġarīb
4.a. Dürlü nüktesin çekerem ben raḳībüñ dōstum
b. Mūrdan olur zebūn olursa ejderhā ġarīb
5.a. Ḥasretüñle bu Necātī ölür ise diyesüz
b. Ā ġarīb ü vā ġarīb ü hā ġarīb eyvā ġarīb

|PTāˀ|p27
fāʿilātün fāʿilātün fāʿilātün fāʿilün
1.a. Aldı göñlüm bir perī-peyker melek-sīmā yigit
b. Ḳaṣd·i dīn itdi meded hey ol büt·i tersā yigit
2.a. Ḫūblar sulṭānısın kimden ne derdüñ var senüñ
b. Eyleseñ nāz ile dil mülkin nola yaġmā yigit
3.a. Ġamze·i ẖūn-rīzüñe uyub nidersin cengi ḳo
b. Şol güzel başuñçün itme yoḳ yere ġavġā yigit
4.a. Pīrler pendini ṭut ser-keşlik itme ʿāşıḳa
b. Pāy-dār olmaz güzellik gibi bu dünyā yigit
5.a. Gördügüñ yerde Necātīyi tecāhül idesin
b. Ḥüsnüñe maġrūrsın ne-y-ki bu istiġnā yigit

|p28
fāʿilātün fāʿilātün fāʿilün
1.a. Ey cemāl·i ferruẖ·i ferẖunde-ẕāt
b. Bir güzelsin ʿömr gibi bī-s̲ebāt
2.a. Pādişāhum boynı baġlu ḳuluñam
b. Dile öldür dile ṣaḳla dile ṣat
3.a. Şöhret āfetdür gözet şaṭrenci kim
b. Şehden ayruġa gelür mi şāh-māt
4.a. Būseñ ölünce baña dirlik yeter
b. ʿÖmre sürer dōstum Āb·ı Ḥayāt
5.a. Bir havāyī aḳ gögercindür uçar
b. Nāme dil-berden yaña büküb ḳanat
6.a. Şehleri māt itmek içün zülf·i dōst
b. Ruẖların açmaza ḳodı iki ḳat
7.a. Bir iş it kim añılasın dünyede
b. Ey Necātī fāʿilātün fāʿilāt

|p29
fāʿilātün fāʿilātün fāʿilātün fāʿilün
1.a. Bezm·i ġamda ʿaḳl ü cānı itdi laʿl·i yār mest
b. Cām iki oldı ne var olsa ḳamu hüş-yār mest
2.a. Ḥüsn ü ẖulḳ ile olur tesẖīr·i dil kim cām·ı gül
b. Reng ü būy ile ider bülbülleri her bār mest
3.a. Sāġarı devr itdüren sāḳī şarāb·ı nābdur
b. Ḥālet·i ʿışḳ olduġı ̮içün raḳṣ ider nāçār mest
4.a. Ṣōfīyā ʿaḳlı saña ben ʿışḳa yārem kim olur
b. Ehl·i Cennet hūş-yār ü ṭālib·i dīdār mest
5.a. Çeşm·i maẖmūruñ şarāb·ı nāz içüb ḳanum döker
b. Cenge bünyād eylemez olmayıcaḳ küffār mest
6.a. Nola ḥüsnüñden Necātī olsa bī-hūş ey ṣanem
b. Būy·ı güldendür dem-ā-dem bülbül·i gül-zār mest

|p30
fāʿilātün fāʿilātün fāʿilātün fāʿilün
1.a. Pāre pāre eyler ise baġrumı peykān·ı dōst
b. Dīdeden her pāresi çıḳub diye kim ḳani dōst
2.a. Ol boyı şimşāda yarın yapışursa dād-ẖāh
b. Serv gibi her ṭarafdan dest ola dāmān·ı dōst
3.a. Külbe·i aḥzānumuz ġamla müşerrefdür yine
b. Şād ol ey dil şād ki ̮oldu dōstlar mihmān·ı dōst
4.a. Rūmdur bu Rūmda ʿömr·i dırāz olmaz dimeñ
b. Uzasun ḳoñ ruẖlarında zülf·i müşg-efşān·ı dōst
5.a. Vaṣla dermān isteyenler derde dermān itmesün
b. Derde dermān eylesün kim derddür dermān·ı dōst
6.a. Kaʿbe·i der-gāhda kimdür Necātī dir iseñ
b. ʿĪd·i vaṣla cān virici yaʿnī kim ḳurbān·ı dōst

|p31
mefʿūlü fāʿilātü mefāʿīlü fāʿilün
1.a. Terk eyle varı dōst yolına gedālıġ it
b. ʿĀlem içinde başı açuḳ pādişālıġ it
2.a. Ey pīr·i mey-fürūş başumda ẖumār var
b. Gel bir ayaġ ṣun elümi al atalıġ it
3.a. ʿAḳl ister imiş ayıra göñlümi ʿışḳdan
b. Kim dir aña ki araya gir ketẖudālıġ it
4.a. Dirler cihān güzelleri ḳuluñ ḳulı olub
b. Ey pādişāh·ı ḥüsn bize gel aġalıġ it
5.a. Göñlüm ḥarāretinde uşan ey dür·i yetīm
b. Bu gözlerüm deñizine gel āşinālıġ it
6.a. Ġarḳ oldı baḥr·ı miḥnete dil zevraḳı meded
b. Ey Ḫıẓr·ı pey-ẖuceste yetiş dil-rübālıġ it
7.a. Cānā Necātī çoḳ seni dünyā ḳadar sever
b. Dünyā gibi gel imdi yeter bī-vefālıġ it

|p32
mefʿūlü fāʿilātü mefāʿīlü fāʿilün
1.a. Cān işigüñe dil ser·i zülfüñe çekdi raẖt
b. Ey dōst himmet eyle ki yā taẖt ola yā baẖt
2.a. Başumdan eksük olmadı ġavġā·yi zülf·i dōst
b. Sulṭān·ı ʿışḳ idineli göñlümi pāy·i taẖt
3.a. Ṣabr it firāḳa tā çekesin ʿışḳ yayını
b. Nerm olur āteş ile dilā her kemān·ı saẖt
4.a. İtmege zāġ·ı zülfüñi dil ṭıflı āşinā
b. Baġrumı itdi ṭuʿme içün aña laẖt laẖt
5.a. Bāzār·ı mihr germ iken alub Necātī mey
b. Cāyuñ kenār·ı cūy gerek sāye·i dıraẖt

|p33
mefʿūlü fāʿilātü mefāʿīlü fāʿilün
1.a. Ġamzeñ oḳını gāh dile gāh cāna at
b. Ey ḳaşları kemān iki başdan nişāna at
2.a. Ṣandūḳasında sīnemüñ olsun nişāne dil
b. Ögret elüñi gel berü taʿlīm-ẖāne at
3.a. Beñzetdilerse çihre·i dil-dāra ey güneş
b. Şevḳ ile germ olub külehüñ āsumāna at
4.a. Meyl it gözüm yaşına eyā serv·i ẖōş-ẖırām
b. Dirler ki eyle iylügi āb·ı revāna at
5.a. Utduñ cemīʿ varumı yārā ḥarīf iseñ
b. Bu defʿa kaʿbeteyn·i ġamı naḳd·i cāna at
6.a. Çün serv dōst nāz ile gülşende ṣalına
b. Ey bāġ-bān çināruñ elin al yabana at
7.a. Ġamdan ẖalāṣ ister iseñ gel Necātīyā
b. Dil cürʿasını cām·ı mey·i erġavāna at

|p34
fāʿilātün fāʿilātün fāʿilātün fāʿilün
1.a. Ġonca cāmından olubdur ʿandelīb·i zār mest
b. Bilmeyen şöyle ṣanur kim yoḳ yere aġlar mest
2.a. Her kişi bezm·i ezel mestidürür ammā ki ben
b. Cürʿa·i cām·ı lebüñle olmışam tekrār mest
3.a. Dilde sırr·ı ʿışḳuñı ṣaḳladuġum ʿayb eyleme
b. Olıgelmişdür ider keyfiyyetin inkār mest
4.a. Gözlerüñ ile degişdüm göñlümi bir ġamzeye
b. Aldamaḳ āsān olur çünkim ola ʿayyār mest
5.a. Ḳan içelden gözleri oldı müselmānlar zebūn
b. Ḳatı ceng eyler Necātī olıcaḳ küffār mest

|p35
mefʿūlü mefāʿīlü mefāʿīlü feʿūlün
1.a. ʿĀşıḳlaruñ öldürmek ise sende mürüvvet
b. Taḥsīn senüñ bāzūña ḳollaruña ḳuvvet
2.a. Raḥm eyleyüben dār·ı şifasında ṭabībüm
b. Nāfiʿ diyü içürdi bu dīvāneye şerbet
3.a. Dāˀim baña cevr ile cefādur işüñ ammā
b. Şimdengirü ḳıl mihr ü vefā kār be-nevbet
4.a. Ḫışm ile naẓar eyleyüb āşüfteñe her dem
b. Öldürmeye ḳaṣd itme behey gözleri āfet
5.a. Cānına cezālar ideyin dir imiş ol yār
b. Andan ne gelürse görürem cānuma minnet
6.a. Ḳaddüm bükülüb çenge döner sīnem olur def
b. Aġyār ile ol yār ḳaçan kim ide ṣoḥbet
7.a. Ger ẖār ü ḥaḳīr itse Necātī seni yāruñ
b. İncinme ki ʿuşşāḳa budur ʿizzet ü ḥörmet

|p36
fāʿilātün fāʿilātün fāʿilātün fāʿilün
1.a. Gül yüzüñde zülfüñ örter ẖaṭṭ·ı reyḥānı dürüst
b. Kim görübdür kāfiri ḥıfẓ ide Ḳurˀānı dürüst
2.a. Şöyle kim ardıncadur dāˀim Züleyẖā-veş
b. Sezmezem gül Yūsufınuñ ḳala dāmānı dürüst
3.a. Ḥüsn meydānında ṭōp olalı zülf·i müşg-bār
b. Ḳalmadı bir şehriyāruñ elde çevgānı dürüst
4.a. Eyledi şīrīn lebüñ ẕikrini pīr·i ẖāniḳāh
b. Ol ḳadar kim ḳalmadı aġzında dendānı dürüst
5.a. Didi başuñ kāse·i Mecnūn gibi ṣınmaḳ nice
b. Didüm ey ʿāşıḳlaruñ dīni ve īmānı dürüst
6.a. Olamaz ṭabʿ·ı Necātī gibi bülbül beẕle-gūy
b. Fiˀl-mes̲el ḥıfẓ itse ebyāt·ı gülistānı dürüst

|p37
mefāʿīlün mefāʿīlün feʿūlün
1.a. Virelüm şīve·i Ferhāda ṣūret
b. Ki artubdur birāder şimdi ṣanʿat
2.a. Leb·i sāḳīye itdük cānı teslīm
b. Belī ıṣṣında yaraşur emānet
3.a. Lebüñ yādına yıllarla dirildi
b. İki gün olmayan ʿĪsāya ümmet
4.a. Ayaġuñ ṭopraġına secde itdüm
b. Cebīnümde görinür nūr·ı ṭāʿat
5.a. Götürdüñ bezm·i kes̲retden ayaġı
b. Necātī var imiş başuñda devlet

|PS̲āˀ|p38
fāʿilātün fāʿilātün fāʿilün
1.a. Oldı burḳaʿ zülf·i müşgīn el·ġıyās̲
b. Ġālib oldı kāfir·i Çīn el-ġıyās̲
2.a. Zülf·i miskīni perīşān itdi bād
b. Ḫalḳ miskīn oldı miskīn el-ġıyās̲
3.a. Ger ʿināyet eylemezse ʿayn·ı dōst
b. Öldürürler bizi taʿyīn el-ġıyās̲
4.a. Şol ḳadar çekdüm belā·yi hecri kim
b. Ṣabr·ı Eyyūb itdi taḥsīn el-ġıyās̲
5.a. Ḳaldı miḥnetde Necātī derd-mend

|PCīm|p39
fāʿilātün fāʿilātün fāʿilātün fāʿilün
1.a. Cām·ı hecrüñ nūş ider mestāneler gördüñ mi hīç
b. Yoluña cānlar virür merdāneler gördüñ mi hīç
2.a. Zülfüñüñ zencīr·i sevdāsın ṭolayub boynına
b. Şehr·i ḥüsnüñ cerr ider dīvāneler gördüñ mi hīç
3.a. İtmege aġyārdan pinhān bu ʿışḳuñ gencini
b. Bu yıḳıḳ göñlüm gibi vīrāneler gördüñ mi hīç
4.a. Göreliden ṣūretüñ naḳşın der ü dīvārda
b. Ṣuretüñ naḳş itmedük büt-hāneler gördüñ mi hīç
5.a. Bezm·i ḥüsnüñde Necātī gibi yüzüñ şemʿine
b. Bāl ü perler yandurur pervāneler gördüñ mi hīç

|p40
fāʿilātün fāʿilātün fāʿilātün fāʿilün
1.a. Dil-berā sevmek seni ne ̮içün ola ʿuşşāḳa ṣuç
b. Ben bu ṣuç ile cemālüñden ıraġ olmaḳ ne güç
2.a. Tīr·i ġamzeñ ḳatlüme ḳaṣd itmesün ikide bir
b. Miḥnet ü cevr ü cefā bī-dillere bir iki üç
3.a. Ḥasret eyyāmında nola ārzū itsem lebüñ
b. Ṭatlu yinür ey yüzi bayram çün ola oruc
4.a. Ruẖlaruñda zülfüñ ucından neler çekdüm didüm
b. Didi bes ġavġālu olur Rūmda elbette uc
5.a. İremezsin zāhidā vaṣlına ol ʿĪsī-demüñ
b. Dem-be-dem saʿy·i riyāẓetle gerekse göke uç
6.a. Aġzı ġonca beli ince dil-rübālar yoḳ dimez
b. Ey Necātī iṣte baḳ gerekse öp gerekse ḳoc

|p41
feʿilātün feʿilātün feʿilātün feʿilün
1.a. Rişte·i cānı fetīl eyledi göñlümi zücāc
b. Ḫufte baẖtum ruẖı devrinde uyarmaġa sirāc
2.a. Yimeyince ġamuñı göz yaşi bozar tenümi
b. Ṣu mizācına ziyān ider anuñ kim ola ac
3.a. ʿIşḳ meydānına Manṣūr olımaz zāhid·i saẖt
b. Çekemez her nice nerm ise kemānı ḥallāc
4.a. Cān ü dil almaġa hecrüñ yüregüme od urur
b. Ki yaḳa yıḳa evüm varumı ide tārāc
5.a. Ḥüsn ü ẖulḳ ile cihān ẖalḳı başı üzre ṭutar
b. Ey Necātī anuñ için didiler dil-bere tāc

|p42
mefāʿīlün mefāʿīlün mefāʿīlün mefāʿīlün
1.a. Gel ey ġamze kerem eyle raḳīb·i pür-fitenden geç
b. Beni anuñla bir itme yā andan geç yā benden geç
2.a. Dilā cān ise maḳṣūdūñ var ol ġonca-dehenden ṣor
b. Yā ẖōd laʿl·i lebi ise murādūñ mey diyenden geç
3.a. Kemān ebrūlaruña incinüb peykānuña geçdüm
b. Gel ey tīr·i müje biˀllāhi luṭf eyle geçenden geç
4.a. Gülistān mevsimi geldi nidersin çār dīvārı
b. Ruẖ·i cānāna ʿazm eyle göñül ḳayd·ı bedenden geç
5.a. Ṣanevber ayaġuñ öpmege Ṭūbā gibi baş egmiş
b. Ṣu gibi bir kez ey serv·i revān ṣaḥn·ı çemenden geç
6.a. Didüm rūz·i ezel oldum bu bezm·i ḥüsne pervāne
b. Gülüb didi ki gelmedi bu bezme kimse senden geç
7.a. Levend olduñsa baş egme Necātī vaẓʿ u destāra
b. Özüñ meydān·ı ʿışḳ içre şehīd eyle kefenden geç

|PḤāˀ|p43
mefʿūlü fāʿilātü mefāʿīlü fāʿilün
1.a. Devr·i zemāne itmez imiş ādemi feraḥ
b. Devr eylesün piyāle gidersün ġamı feraḥ
2.a. Ḍaḥḥāk gibi biñ yaşamaḳ ārzū ise
b. Gül gibi gül hemīşe geçür her demi feraḥ
3.a. Müşkil olurdı gülmese gül bigi leblerüñ
b. Ne ̮olurdu zīnet itmese Cām·ı Cemi feraḥ
4.a. Fürḳat diyārınuñ eñ eyüsidürür melāl
b. Vuṣlat bahārınuñ nitekim eñ kemi feraḥ
5.a. Sāḳī lebüñ zülālidürür mūcib·i ḥayāt
b. Cām·ı şarāb·ı nāb beni ide mi feraḥ
6.a. Āb·ı neşāṭ ile ṭolanur zevraḳ·ı ḳadeḥ
b. Bād·ı murād ile yürür ey meh gemi feraḥ
7.a. Göz yaşı ̮ile Necātīye ġamdan gelür sürūr
b. Virse ʿaceb midür kişiye hem-demi feraḥ

|PḪāˀ|p44
mefāʿilün feʿilātün mefāʿilün feʿilün
1.a. Gözüñ ḥarīm·i cemālüñde ḳan ider güstāẖ
b. Belī hemīşe olur mest·i bī-ẖaber güstāẖ
2.a. Serīr·i ḥüsne geçürdüñ bu deñlü yüz virdüñ
b. ʿAceb mi ger ola zülf·i ziyāde-ser güstāẖ
3.a. Ṣurāḥī ḳan ile ṭoldurdı sāġaruñ içini
b. Ki dem-be-dem leb·i yārı niçün öper güstāẖ
4.a. Niçün yabanda ḳala Kaʿbe gibi her maḥcūb
b. Piyāle gibi el üzre ṭutula her güstāẖ
5.a. ʿAceb degül ṣanemā türk içinde ḳopmışdur
b. Ḫaṭuña beñzemede olsa müşg·i ter güstāẖ
6.a. Kim ola kim ide saña yavuz naẓar çelebī
b. Ki kimsene güneşe idemez naẓar güstāẖ
7.a. Mes̲eldürür bu ki göz görmese yüz utanmaz
b. Necātīyā ne ʿaceb nergis ola ger gütāẖ

|PDāl|p45
feʿilātün feʿilātün feʿilātün feʿilün
1.a. Ele girmez mi begüm aye ḳadar aḳ kāġıd
b. Ḳaralama nice ̮ola ̮idi iki parmaḳ kāġıd
2.a. Başladum leşker·i hicrān ile ceng eylemege
b. ʿAlemüm elde ḳalem oldı ve bayraḳ kāġıd
3.a. Oyuna ṭaldı kebūter gidemez nice ̮ola ḥāl
b. İl temāşāmuza baḳar uçurursaḳ kāġıd
4.a. Üstüẖānum seg·i kūyuña yeter nāme·i ʿarẓ
b. Kiçiden ʿādet ise uluya varmaḳ kāġıd
5.a. Bārī hīç olmaz ise bir iki kez aġzuma sög
b. Dōstum güç degül a ʿāşıḳa yazmaḳ kāġıd
6.a. Yazılub irmeye pāyānına dek nāme·i şevḳ
b. Hep aġaçlar ḳalem olsa ḳamu yapraḳ kāġıd
7.a. Sen şeker-lebden umar vaṣl Necātī·i ẓaʿīf
b. Ki ṣarılur eyü ḥalvālara alçaḳ kāġıd

|p46
mefāʿīlün mefāʿīlün feʿūlün
1.a. İdersin bize ṣōfī çehreñi zerd
b. Kim olur senden andan derdüñe derd
2.a. Yüzine göredür sözi raḳībüñ
b. Yüzi ekşinüñ olur sözleri serd
3.a. Senüñ zībā cemālüñe hey ādem
b. Firişte öykünürse baña gösterd
4.a. Lebüñ ẖaṭṭı mıdur yā Ḫıẓr elile
b. Yazılmış çeşme-sār üstinde bir ferd
5.a. Dögünler ḳara pullar cān ü dil zār
b. Elifler birle sīnem taẖta·i nerd
6.a. Gelelden ẖaṭṭ·ı müşgīnüñ nigārā
b. Kim ola ẖāṭırına ḳonmaya gerd
7.a. Yüzini görmege cān vir Necātī
b. Açar cennet ḳapusın çünki cömerd

|p47
feʿilātün feʿilātün feʿilātün feʿilün
1.a. Eşiginden gider oldı dil·i āvāre meded
b. Dōstlar olmaya mı bu ġama bir çāre meded
2.a. Derdüm ol deñlü degüldür ki ̮ola şerbetle ʿilāc
b. Beni size gerek ise meded ol yāra meded
3.a. ʿĀḳıl·i ṣābir idüm ʿāşıḳ·ı şeydā ḳıldı
b. Yüz urub yalvaruñ ol gözleri saḥḥāra meded
4.a. Ey göñül dōstlaruñ uşañ u dil-ber fāriġ
b. Meger Allāhdan ire dedüñe bir pāre meded
5.a. Ey ḥarīm·i ḥaremüñ dār·ı şifā her derde
b. Şerbet·i vaṣl ile iriş dil·i bīmāra meded
6.a. Tāb·ı ḥasretler ile yaḳdı beni nār·ı firāḳ
b. Serv·i nāz olmaz ise sāye·i dīvāra meded
7.a. Zār zār aġlamaġa ẖasta Necātī ḥālin
b. Dil·i ġam-dīde ile dīde·i ẖūn-bārā meded

|p48
fāʿilātün fāʿilātün fāʿilün
1.a. Ben gedāyem pādişāhumdur nemed
b. ʿĀr zaẖmından penāhumdur nemed
2.a. Cānum ile başumı ṣaḳlamaġa
b. Hem libāsum hem külāhumdur nemed
3.a. Meskenet ṭopraġına her ṣubḥ u şām
b. Döşenübdür secde-gāhumdur nemed
4.a. Ṣāf ṣaḳlar göñlümüñ āyīnesin
b. Māniʿ·i jengār·ı āhumdur nemed
5.a. Ölür isem ben bu yoldan dönmezem
b. Menzil·i maʿşūḳa rāhumdur nemed
6.a. Bir ḳıl ile her yaña yeder beni
b. Devletümdür ʿizz ü cāhumdur nemed
7.a. Gerçi kim güstāẖlıḳ çoḳ ḳılmışam
b. Ey Necātī ʿöẕr-ẖāhumdur nemed

|p49
fāʿilātün fāʿilātün fāʿilātün fāʿilün
1.a. Şol ḳara ẖālüñ zenaẖdānuñda ey ẖōrşīd-ẖad
b. Bir ḥabeşdür Mıṣr zındānında maḥbūs·ı ebed
2.a. Mīm aġzuñ dāl zülfüñ cānum u ʿömrümdürür
b. Hey elā gözlüm meded şol mīm ü dālüñden meded
3.a. Ey boyı servüm elif gibi yoluñda doġruyam
b. Rā ḳaşuñla dāl zülfüñ itmesünler beni red
4.a. Ḳılletümden añlamañ peşmīne-pūş olduġumı
b. Zeng·i ġamdan göñlümüñ āyīnesin ṣaḳlar nemed
5.a. Ey göñül bir sen degülsin derd·i yāra mübtelā
b. Bu cihānda bu belādan ḳurtulımaz hīç aḥad
6.a. Bellüdür kim bād·ı āhından yanar ʿāşıḳlaruñ
b. Āteş·i ruẖsārı her ḥüsn ehlinüñ ey lāle-ẖad
7.a. Her kişi bir mesned ile irişür bir devlete
b. Pādişāhum işigüñ oldı Necātīye sened

|p50
mefʿūlü fāʿilātü mefāʿīlü fāʿilün
1.a. Gülmek saña yaraşur eyā ḥūr·ı meh-nijād
b. Kim güldügüñce gül gibi ḥüsnüñ olur ziyād
2.a. Ey pādişāh·ı mülk·i melāḥat güzelligüñ
b. Bünyādı bir ḳıl üstinedür ḳılma iʿtimād
3.a. Uydurdı göñlümi göze ʿışḳuñ kerāmeti
b. Gör nice virdi āteş ile āba ittiḥād
4.a. Ḳaddüñ elifdürür iki yanında dāl·ı zülf
b. Lāyıḳ budur ki ʿāşıḳa senden irişe dād
5.a. Ḫusrev gibi göre durur iken püserleri
b. Şīrīne meyl eyleyenüñ bilmez aġzı dad
6.a. Bir veche unuduldı Necātī ki kimsene
b. Miḥnet-serāsı ḳapusın açmaz meger ki bād

|p51
mefʿūlü mefāʿīlün feʿūlün
1.a. Ṣād olmadı ʿışḳ işinde Ferhād
b. Meşhūrdürür ki uñmaz üstād
2.a. Dil mülki ẖarāb olmayınca
b. Olmadı cihānda ʿışḳ ābād
3.a. Ayaġına ṣu inübdür ey dōst
b. Ṭuralı hevā yolında şimşād
4.a. Raḥm eyle ki aldı dört yanum
b. Zārī vü fiġān ü āh ü feryād
5.a. Ḳaddüñ elif iki zülf iki dāl
b. Dād eyle ki aldı dört yanum yād
6.a. Dil murġını zülfi bend·i ġamdan
b. Başına çevürdi ḳıldı āzād
7.a. İşi ḳızıl altun oldı tā kim
b. Bāde ̮ile Necātī oldı muʿtād

|p52
mefʿūlü fāʿilātü mefāʿīlü fāʿilün
1.a. Yıllarla yeldüm irmedi sen māhdan meded
b. Gören didi ki hey yazuġ Allāhdan meded
2.a. Bilmezlik ile uġramışın dil belāsına
b. Yā Rabbī baña bir dil·i āgāhdan meded
3.a. Müşkil olurmış ol ki içinden belā ṭura
b. Yandum yaḳıldum āh·ı ciger-kāhdan meded
4.a. Ġam leşkeri irişdi şebīẖūn ider dile
b. Sulṭānum Allāh āh·ı seḥer-gāhdan meded
5.a. Rūm illerinde gibi hem alur hem öldürür
b. Yollar baṣıcı kākül·i güm-rāhdan meded
6.a. Kendüyi gördi cennet·i kūyuñda ol raḳīb
b. Şeyṭān gibi sürülmedi der-gāhdan meded
7.a. Miskīn Necātīyi ẖaṭ·ı ẖōş-bū türāb (Bū-Türāb) ider
b. Ey zülfi ḳara irmez ise Şāhdan meded

|PẔāl|p53
mefʿūlü fāʿilātü mefāʿīlü fāʿilün
1.a. Zībā ruẖuñdan oldı lebüñ ey ḳamer leẕīẕ
b. Gün germ olınca lā-cerem olur s̲emer leẕīẕ
2.a. ʿIşḳ odıdur ruẖuñla lebüñden ṣafā viren
b. Mihrüñ ḥarāretinden olur gül-şeker leẕīẕ
3.a. Riḥlet güninde derdüñi dünyāya virmezin
b. Zīrā olur müsāfire zād·ı sefer leẕīẕ
4.a. Aġladuġumı zülfüñ ider gülmege bedel
b. Acı deñiz ṣuyını bulutlar ider leẕīẕ
5.a. Ġam acısı Necātīye ẖōş geldi öyle kim
b. Gelmez meẕāḳa şehd ü şeker ol ḳadar leẕīẕ

|p54
mefʿūlü fāʿilātü mefāʿīlü fāʿilün
1.a. ʿIşḳuñla ölmek oldı baña ey püser leẕīẕ
b. Yār·ı muvāfıḳ ile olur her sefer leẕīẕ
2.a. Gül yapraġıdürür şekerīn leblerüñ velī
b. Ḫōrşīd·i ḥüsn ile olur gül-şeker leẕīẕ
3.a. Nergislerüñi ḳo uyusun gül yüzüñde kim
b. Olur bahār günleri ẖāb·ı seḥer leẕīẕ
4.a. Ṣoḥbetde baña būselerüñ ṣun kim olmaya
b. Gül-zār içinde ṣoḥbet·i mey ol ḳadar leẕīẕ
5.a. Boynuña ḳol dolayu lebüñ emdügüm bu kim
b. Peyvend olınca şāẖ·ı ter olur s̲emer leẕīẕ
6.a. Şīrīn-ter eyle maẖlāṣ·ı şiʿrüñ Necātīya
b. Ki ̮olur ṭaʿām ṣoñına ḥalvā·yi ter leẕīẕ

|PRāˀ|p55
fāʿilātün fāʿilātün fāʿilātün fāʿilün
1.a. Ol perī perçemlerinden çengine çevgān alur
b. Her kimüñle ḥüsn ṭopın oynasa meydān alur
2.a. Nūş ider bīgānelerle Rūm ili ṭoluların
b. Āşinālar bezm·i ġamda cān virüben cān alur
3.a. Bülbülüñ āhından almaz ol gül·i raʿnā dirīġ
b. Ḥüsnine maġrūr olub çoḳ nāle vü efġān alur
4.a. Derd-mend olanlaruñdur devlet·i dārüˀş-şifā
b. Ḳanḳı bī-devletdür ol kim derdi ḳor dermān alur
5.a. Rūzigārā idemezsin yārumı benden cüdā
b. Fāriġ ol ey müddeʿ cānı viren sulṭān alur
6.a. Hep Ḳaraman baẖşişidür rūzigāruñ virdügi
b. Ḥāẓır ol kim virdügin senden girü devrān alur
7.a. Gerci ṣaf çekdi Necātī ʿaḳl ü nāmūs u ṣalāḥ
b. Ġamze·i sāḳī bu resme düşmanı āsān alur

|p56
fāʿilātün fāʿilātün fāʿilātün fāʿilün
1.a. Ol güneş yüzlü ḳamer ẖaylıca şehr oġlanıdur
b. Her ne yüzden dir iseñ ṭoġrı cihān fettānıdur
2.a. Et gül·i pākīze-dāmen bön mi ṣanursın beni
b. Oḳuyub unutduġum bülbüllerüñ destānıdur
3.a. Ey baña neñdür seversin dil-beri diyen sefīh
b. Cānumuñ cānānesidür derdümüñ dermānıdur
4.a. ʿIşḳuñ adın işidürdüm fāriġ idüm şimdi ah
b. Bir güç işe uġradum kim ölmek eñ āsānıdur
5.a. Şöyle oldum kim ecel yaṣduġına baş ḳoyanı
b. Ṣanuram uyẖusı gelmiş memleket sulṭānıdur
6.a. Bir perī-zād olmayınca dirlik olmaz dünyede
b. Şimdi bildük biz bu güzeller ādem cānıdur
7.a. Oyna başuñ işiginde ṭōpuñ aġsun göklere
b. Ey Necātī gördügüñ merdāneler meydānıdur

|p57
mefʿūlü fāʿilātü mefāʿīlü fāʿilün
1.a. Öykündi nāfe zülfüñe kürkin devirdüler
b. Ṣu ʿārıẓuñı añdı yüziñ yire sürdiler
2.a. Göstermez idi gözine dil-ber melekleri
b. İñen göke çıḳardılar iñen uçurdılar
3.a. Meclisde sāḳī destī ile el bir eyleyüb
b. Şol gül gibi şarābı ayaġa düşürdiler
4.a. Boġazına çıkardı ḳadeḥler ṣurāḥīyi
b. Laʿlīn lebüñ ṣafāsını başına gördiler
5.a. Meclisde şīşeler gibi miskīn Necātīnüñ
b. Ḳan doldurub yüregini boynını burdılar

|p58
mefʿūlü fāʿilātü mefāʿīlü fāʿilün
1.a. Ey ḳaşı yay olan beni iñletme ḳıl ḥaẕer
b. Kim āhum oḳı naʿl·i hilāle ider güẕer
2.a. Cān gider oldı gel seni görsün ḳo cevri kim
b. Oruc revā degüldür iderken kişi sefer
3.a. Ben saña ḥālüm aġladuġum zaḥmet olmasun
b. Bir ẖasta kim ṭabībe gele derdini döker
4.a. Ṣıçrar yüzüme yapışur andaḳ gözüm yaşı
b. Sen māhı ḳoyub eyler isem mihre bir naẓar
5.a. Kevs̲er lebüñ zülālini görüb ezildi ḳand
b. Şīrīn budur ki kāġıda burar daẖi ṣatar
6.a. Varub ḥarīm·i kūyuña yüzüñi görmeyen
b. Saʿy ile nūr göremedük ḥācīya döner
7.a. Ṭoġruldıcaḳ Necātīden ayruġa tīrüñi
b. Allāh bilür ki ẖasta göñülden neler geçer

|p59
fāʿilātün fāʿilātün fāʿilātün fāʿilün
1.a. Ey meh·i bī-mihr şehrüñ pādişāhı yoḳ mıdur
b. Zülfüñe hey dimege ẓıll·i İlāhı yoḳ mıdur
2.a. Sevdügümçün ḳaṣd idermişsin beni öldürmege
b. Bī-günāh öldürmegüñ yā Rab günāhı yoḳ mıdur
3.a. Nice bir ey lāle-ruẖ beñzüm zaʿafrān eylemek
b. ʿĀşıḳ·ı bī-çārenüñ küynüklü ahı yoḳ mıdur
4.a. Mülk·i cāna leşker·i miḥnet şebīẖūn itmesün
b. ʿĀşıḳ·ı miskīnüñ āh·ı ṣubḥ-gāhı yoḳ mıdur
5.a. Ey göñül Rūm ile Şāma ṭaʿn iden dil-berlerüñ
b. ʿĀrıẓ·ı sīmīn ile zülf·i siyāhı yoḳ mıdur
6.a. Leşker·i ġam ben gedāyi öldürür yoldaşlar
b. Pādişāh·ı ʿışḳa tābiʿ bir sipāhī yoḳ mıdur
7.a. Azmasun göster Necātī derd-mende zülfiñi
b. Pādişāhum şehr·i ḥüsnüñ şāh-rāhı yoḳ mıdur

|p60
fāʿilātün fāʿilātün fāʿilātün fāʿilün
1.a. İşüñi altun iden meydür gümiş peymānedür
b. Ol ẖarābāt ey birāder şimdi devlet-ẖānedür
2.a. Hep yidügüñ içdügüñ üstüñe ṣayar bilmiş ol
b. Bu cihān·ı bülʿaceb bir tuḥfe mihmān-ẖānedür
3.a. ʿÖmrinüñ eksildügini isteyen mersūm içün
b. Ārzū·yi māh·ı nev iden kişi dīvānedür
4.a. Māle maġrūr olma ey ẖāce ki bu dünyā diyen
b. Sencileyin nice bayḳuş uçuran vīrānedür
5.a. Sāḳiyā bezm·i behişt-ābāddan feryād kim
b. Āşinālar yād olubdur yādlar bīgānedür
6.a. Bir ġazālüñ siḥr·i çeşminden Necātī ẖastedür
b. Anuñ içün söyledügi sözleri yabanadur

|p61
mefāʿīlün mefāʿīlün mefāʿīlün mefāʿīlün
1.a. İşi altun iden sāḳī gümiş peymānedür dirler
b. Ḫarābātı görenler hep bu devlet-ẖānedür dirler
2.a. Dolular nūş idüb ider güzeller āşinālıḳlar
b. Egerçi meclis·i meyden melek bīgānedür dirler
3.a. Açılmış gülleri bāġuñ senüñ bu ḥüsn ile çaġuñ
b. Mey ü maḥbūbı terk eyleyene dīvānedür dirler
4.a. Yüzüme baḳ göziñi aç ġurūr·ı salṭānatdan geç
b. Nice begler uyutmışdur cihān efsānedür dirler
5.a. Geçüb meyẖāne ṣadrına ḳadeḥ nūş eyle beglik sür
b. Necātī pīş-ẖān taẖtın bu gün şāhānedūr dirler

|p62
mefʿūlü mefāʿīlü mefāʿīlü feʿūlün
1.a. İtdi gözümüñ yaşını ʿummāna berāber
b. Ol lāle-ruẖuñ işleri var ḳana berāber
2.a. Gerçi ṭamunuñ adı yedidür evet ey dōst
b. Olmaya senüñ dūzaẖ·ı hicrāna berāber
3.a. Allāh ziyāde ide ki ̮el irmez olubdur
b. Ḳaddüñ olalı serv·i ẖırāmāna berāber
4.a. Senden baña bir būse ve benden saña bir cān
b. ʿAyş eyleyelüm ki ̮oldı ḥarīfāne berāber
5.a. Dil aldı yüze gelmedi ol kākül·i ṭarrār
b. Daʿvācı ile ṭurmadı sulṭāna berāber
6.a. Gün yüzi ḳatında bilüb eksüklügini ay
b. Bedr olmayıcaḳ gelmedi meydāna berāber
7.a. Bu ḳuş dilinüñ oldı Süleymānı Necātī
b. İletdi sözi Ḥaẓret·i Selmāna berāber

|p63
feʿilātün feʿilātün feʿilātün feʿilün
1.a. Āh kim ḳıldı felek mihr ü mehüñ nūrını nār
b. Yaḳmaġa ḥasret·i yār ile beni leyl ü nehār
2.a. Eyledi sen meleki dīv·i recīme şāġird
b. Gör ne rīv ile ayırdı beni çarẖ·ı ġaddār
3.a. İki ṣanma depele bir ben isem ey yüzü gül
b. Ki sen ol ġonca degülsin ki yanuñ bekleye ẖār
4.a. Gün gibi seyre çıḳub ʿarẓ·ı cemāl eyler iken
b. Eyledüñ Kaʿbe gibi āh ki bir yerde ḳarār
5.a. Bir ḳadem-rence buyur yoluña olsun şāhum
b. Zer ü sīm ü ser ü cān ü dil ü dīnüm ne ki var
6.a. Tāc·ı ser seng·i belā yüz ṣuyı ẖāk·i ḳademüñ
b. Yeter ey dōst yeter baña ne nāmūs u ne ʿār
7.a. Öliyor ẖaste Necātī kerem it bir ṣora gel
b. Ġam bucaġında esīr oldı esirge hey yār

|p64
feʿilātün feʿilātün feʿilātün feʿilün
1.a. Ey saʿādet güneşi dil yüzüñi māh bilür
b. İşigüñi feleke virmezin Allāh bilür
2.a. Bizi dünyā bigi ey dōst yalancı ṣanma
b. Bu gün iẖlāṣ ile gerçek ḳuluñuz şāh bilür
3.a. Her dem ey ḳaşı kemān sīnede peykānuñdan
b. Dil·i bī-çāre neler çekdügin Allāh bilür
4.a. Kimse aġlamaġı göz yaşı ne bilsün bilmez
b. Anı ey zöhre-cebīn āh·ı seḥer-gāh bilür
5.a. Dil·i ferzānemi ẖāl·i ruẖuñuñ beydaḳına
b. Ferz-bend idebilürsem yeñerim şāh bilür
6.a. Ṭarḳ ilāˀllāhi bi-enfāsi ẖalāˀiḳ dirler
b. Ḳani bir pāk-ḳadem ki ̮ol ṭarafa rāh bilür
7.a. Sīnede ṣırf u elif dāġını benden ṣormañ
b. Kim anuñ sırrını yürekde olan āh bilūr
8.a. İşüm Allāha ḳalubdur benüm ey tāze bahār
b. Bu deme irecegüm bir daẖi Allāh bilür
9.a. Mescid ü mey-kede bir cümle yolından şākir
b. Dünyede kimsene yoḳ kendüyi güm-rāh bilür
10.a. Lutf idüb ṣorar iseñ ẖasta Necātī ḥālin
b. Gāh olur bilmez olur kendüzini gāh bilür

|p65
feʿilātün feʿilātün feʿilātün feʿilün
1.a. Eyü ider müjesi sīnemi ifgār eyler
b. Ḫōş ider ġamzeleri göñlümi bīmār eyler
2.a. Beni ẖaste-ciger ol ġamze·i ġammāz ḳılur
b. Beni āşüfte-dil ol ṭurra·i ṭarrār eyler
3.a. Ġam metāʿın ṣaçı dil boynına ṣarmasun iñen
b. Ṣanur ol kimesne kim ḳalb ile bāzār eyler
4.a. Lebi yāḳūtına ben cānumı āsān virürin
b. Baña bir būseyi ol güç ile iḳrār eyler
5.a. Yār işiginden alayın gideyin başumı uş
b. Ki ̮olur olmaz yire itler gibi āzār eyler
6.a. Yine dolāb gibi īñledügüm bu ki raḳīb
b. Gülşen·i kūyına gelmege beni zār eyler
7.a. Ey Necātī ṣaçı dārından anuñ geñ yüri var
b. Yoḳsa bu dār·ı cihānı başuña ṭar eyler

|p66
feʿilātün mefāʿilün feʿilün
1.a. İşigüñ yaşum ile hem-demdür
b. Meger ol Kaʿbedür bu zemzemdür
2.a. Ẕerre deñlü dehān ü ḳılca miyān
b. Dil-ürbālar içinde neñ kemdür
3.a. Ḳaçma bizden senüñle buluşuruz
b. Ey yüzi tāze gül bu ʿālemdür
4.a. Gerçi kim ẖūbdur firişteh ü ḥūr
b. Ol perī-rūyi gör ne ādemdür
5.a. Uralı zülfi kāfirī bünyād
b. Sevgüsi dilde ḳati muḥkemdür
6.a. Mey ü neyle seḥer demin ẖōş gör
b. Ki cihān bu bir iki üç demdür
7.a. Āferīnler Necātī ṭabʿuña kim
b. Ṭarz·ı eşʿārda müsellemdür

|p67
feʿilātün feʿilātün feʿilātün feʿilün
1.a. Bir alay oldı perī şīveli āhū begler
b. Gözi āhūlaruñ alayına yāhū begler
2.a. Bir perī içün aḳar iki gözüm çeşmeleri
b. Ṣaḳınuñ bilmiş oluñ ılıdur ol ṣu begler
3.a. Kimseye uymasun ulaşmasun Allāh Allāh
b. Zülf·i bī-dīn ile ol ġamze·i cādū begler
4.a. Bī-vefālıḳlar ider yolına cānlar virene
b. ʿAcebā böyle mi ̮olur dünyede hep bu begler
5.a. Raẖt u baẖtum götüri oda urursañ dutmaz
b. Bir iki gūn beni bu dünyede maḥbūb egler
6.a. Ne güzeller ne Necātī ne selāmün ne ʿaleyk
b. Fāriġuz idemezüz kimseye ṭapu begler

|p68
mefʿūlü fāʿilātü mefāʿīlü fāʿilün
1.a. Perhīz ögredür baña zāhid kişilenür
b. Miskīn ġam·ı nigārı ne bilsün yenür ṣanur
2.a. Gören düşinde bir gice mestāne gözlerüñ
b. Nergis gibi ẖumār ile bir yılda uyanur
3.a. Ol şīve-ger ki fitne·i āẖır zemān geçer
b. Ben bildügüm zemāne ise bir gün uṣlanur
4.a. Sāḳī götür bu ʿādeti dirlik degül bu kim
b. Būseñ alınca bir kişi cānından uṣanur
5.a. Gündüz görine diyu duẖān itmezin velī
b. Āhum ḳarañu gicede çaḳ göke boyanur
6.a. Göz yaşını Necātī ider yüzine niḳāb
b. Miskīn meger ki itdügi işlerden utanur

|p69
mefāʿīlün mefāʿīlün mefāʿīlün mefāʿīlün
1.a. Beni cevr ile öldürse dimeñ ol yāra ḳanludur
b. Ḥalāl olsun aña ḳanum yigitdür deliḳanludur
2.a. İşitdüm kim raḳīb ölmiş ḥabībüñ ʿömri çoġ olsun
b. Ḳapudan bir seg eksilmiş anı ṣanmañ ziyānludur
3.a. O māhı nā-gehān görsem baña söylemeyüb geçse
b. Ḳalur barmaġum aġzumda gören dimez ki cānludur
4.a. Dimişdi öldürem seni feraḥ ol tīġ·i ẖışmumla
b. Dirīġā ʿahdine ṭurmaz ṣanasın Ḳaramanludur
5.a. Necātī ey perī-çihre iñen üftāde olmışdur
b. Yüzinüñ rengi zerd olmış gözinüñ yaşı ḳanludur

|p70
mefʿūlü fāʿilātü mefāʿīlü fāʿilün
1.a. Biñ ṣayd idince yayını her pehlevān aṣar
b. Ḳāşuñ bu resme gün başına bir kemān aṣar
2.a. Ḳılca murāda irmedük ol zülfden dirīġ
b. Bir ḳılca cānum ol meh·i nā-mihr-bān aṣar
3.a. Göz degmemege ṭurrası ṣaġına ṣolına
b. Boyınca iki heykel·i ʿanber-feşān aṣar
4.a. Zülfi ḳatında būse uġurlamaġa göñül
b. İtme heves ki duyduġı gibi hemān aṣar
5.a. Bāzār·ı ḥüsn içinde göñülden ṣınur ṣaçuñ
b. Zīrā metāʿ·ı ḳalbdür āẖır ziyān aṣar
6.a. Gördüñ ḳad·i nigārı eyā bāġıbān·ı luṭf
b. Var sende bir şunuñ gibi serv·i revān aṣar
7.a. Yazıldı müşg ile şeref·i āfitābda
b. Ṭūmārlar ki ṭurra·i ʿanber-feşān aṣar
8.a. Zencīr·i zülfi cāmiʿ·i ḥüsninde dil-beruñ
b. Ḳandīl·i āfitāb ü meh·i āsumān aṣar
9.a. Yārān·ı ʿışḳ ḥāẓır oluñ kesmege ipin
b. Cellād·ı ġamze zülfine bir nā-tüvān aṣar
10.a. Bir gün ṣaçinda boġınuraġar şikeste dil
b. Çoḳlar Necātī kendüzini nā-gehān aṣar

|p71
fāʿilātün fāʿilātün fāʿilün
1.a. Būse ile ġayre dil-ber cān virür
b. Ḳatlümi ol şūẖ ister cān virür
2.a. Yoldaşı īmān ile Ḳurˀān olur
b. Şol ki ẖadd ü ẖaṭṭuñ añar cān virür
3.a. Ṭopṭolu ̮iken rūḥ·ı s̲ānī yaʿnī mey
b. Leblerüñ öpmege sāġar cān virür
4.a. Görmege yāruñ leb ü dendānını
b. Çeşm·i ter-dāmen dür ü mercān virür
5.a. Ben nice cān virmeyem şol dil-bere
b. Kim Ḫudā·yi bende-perver cān virür
6.a. Lebleri ölümlüsi bir ben degül
b. Çeşme·i Ḫıẓr·ı Peyember cān virür
7.a. Gerçi virür dil-bere her kişi cān
b. Ey Necātī saña dil-ber cān virür

|p72
feʿilātün feʿilātün feʿilātün feʿilün
1.a. Baña yāruñ yañaġı vü lebi vü ḳaddi yeter
b. Üzül ey gül açıl ey ġonca yıḳıl ey ʿarʿar
2.a. Baña ol ḳāmeti Ṭūbā lebi ʿunnāb gerek
b. Nideyin görmek ile serv·i çemenden ne biter
3.a. Bir iki gün daẖi sen māha irişmezse elüm
b. Yaşum u āhum ider yiri göki zīr ü zeber
4.a. Göricek derd ile ḳan aġladuġumı ter olur
b. Ḳızarur çihre·i zībāsı nitekim gül·i ter
5.a. İncinürse ne ʿaceb zülf·i ṣanemden ṣōfī
b. Gökdeki ḳara bulut bilmeze yükdür dirler
6.a. Başını durmayuban ṣalduġı şimşād·ı çemen
b. Ġālibā ḳāmetüñüñ vaṣfını ider ezber
7.a. İşidürsin dün ü gün āh ü fiġān eyledügüm
b. Hīç bir kerre dimezsin ki Necātī neyler

|p73
fāʿilātün mefāʿilün feʿilün
1.a. Bir gülüñ gülşen·i cinānā deger
b. Sünbülüñ ʿömr·i cāvidāna deger
2.a. Ḳulluġuñ salṭanat berāberidür
b. İşigüñ kevn ile mekāna deger
3.a. Bir gice işigüñi yaṣdananuñ
b. Ḳadr ile başı āsumāna deger
4.a. Cān ü dil leblerüñle zülfe çıḳar
b. Beni öldürmedin saña ne deger
5.a. Vireyin vaṣluña bu bir cānı
b. Nice bir cān iki cihāna deger
6.a. Ey Necātī güzel dime ḥūra
b. Nā-gehān bu ẖaber fülāna deger

|p74
fāʿilātün fāʿilātün fāʿilātün fāʿilün
1.a. Bir dem iken devlet·i dünyāyı bir dem ṣandılar
b. Bu fenā gül-zārınuñ ʿayşını ʿālem ṣandılar
2.a. Şol ḳadar zārīlıġ itdüm kim cihān bünyādını
b. Ḫāneḳāh·ı şīven ü eyvān·ı mātem ṣandılar
3.a. Ehl·i diller göricek āyīnede taṣvirüñi
b. Baġrına baṣmışdürür ʿĪsāyi Meryem ṣandılar
4.a. Çāk çāk itdi ḳara zülfüñle Kaʿbe cübbesin
b. Jendeler geymişdür İbrāhīm Edhem ṣandılar
5.a. İncelikde bilüñe mānendi yoḳdur didiler
b. Yoġ olalar ki ̮ol hilāl ebrūlaruñ kem ṣandılar
6.a. Yüzine kefler urub yire sürüb acıtdılar
b. Bilmezin deryā·yi ʿUmmānı benüm nem ṣandılar
7.a. Ṣundılar bir cürʿa kim biñ yıl yaşar içen temām
b. Bu perī-rūlar Necātī bizi ādem ṣandılar

|p75
mefʿūlü mefāʿīlü mefāʿīlü feʿūlün
1.a. Ben ẖaste içün laʿl·i leb·i gül-şekerüñ var
b. Ben müflis içün zer kemer ü sīm berüñ var
2.a. Bir daẖi benüm sencileyin pādişehüm yoḳ
b. Ey dōst senüñ nice benüm bigilerüñ var
3.a. Aġyār diken gibidür andan üzülürseñ
b. Ey ġonca-dehen gül gibi baş üzre yirüñ var
4.a. Nergis gibi göz dikmiş idüm izi tozına
b. Bir kez dimedi sūẖte ḥaḳḳ·ı naẓaruñ var
5.a. Ey dil yā ser·i zülfi çeker yā ṣu yā ṭopraḳ
b. Bārī hele yār işigine bir çekerüñ var
6.a. Didüm ki müjeñ tīrine sīnem siper olsun
b. Taḥsīnler idüb didi Necātī cigerüñ var

|p76
fāʿilātün fāʿilātün fāʿilātün fāʿilün
1.a. Bāġ·ı ʿışḳūñda perīşānlıḳ baña sünbül yeter
b. Sīnemüñ üstinde nāẖun zaẖmı berg·i gül yeter
2.a. ʿÖmrüm aġlamaḳla geçdüġin ḥalāl itemek içün
b. Nāz ile ey ġonca-leb bir kez yüzüme gül yeter
3.a. Bezmümüz gülşen gibidür cām·ı māl-ā-māl gül
b. Mest olanlara ṣurāḥī ḳulḳuli bülbül yeter
4.a. ʿIşḳ eger dāˀim ola Leylīyi Mecnūn eyleye
b. Ḥüsn eger bāḳī ḳala Maḥmūd Ayaza ḳul yeter
5.a. Ḥüsni vaṣfı ̮ile Necātī tāzele eşʿāruñı
b. Yādigār·ı gül belālu bülbüle ġulġul yeter

|p77
mefʿūlü fāʿilātü mefāʿīlü fāʿilün
1.a. Bī-vaḳt geldi yār işigine meh·i münīr
b. Şeb-revlik anuñ uşda getürdi yüzine kir
2.a. Nā-geh düşümde görine diyu mis̲āl·i dōst
b. İtdüm ferāġat uyẖudan ey māh·ı bī-naẓīr
3.a. Ṣaḳladum idi göñlümi buldı çıḳardı ẖāl
b. Ẓāhir budur ki noḳṭa ile bilinür ẓamīr
4.a. Zülf ü ruẖuñda baġlu göñüller dizin dizin
b. Rūm illerinde nite ki zencīr ile esīr
5.a. Meclisde dek dururken eridi döküldi şemʿ
b. Bir derdi var içinde ki yidügi anı yir
6.a. Cān ü dilini şol ki virür iki bir dimez
b. Lāyıḳ mıdur ki ẖışm ide ġamzeñ ikide bir
7.a. Ben ṣaḳladuḳca sīnede sırr·ı maḥabbeti
b. Bir bir yüzüm gözüm saña mā fiˀẓ-ẓamīridir
8.a. Teˀs̲īr iderdi kevkeb·i ʿizzet Necātīye
b. Nārencī çizme kebkebi itse yüzinde yir

|p78
mefʿūlü fāʿilātü mefāʿīlü fāʿilün
1.a. Bildüñ ki ben ölince dil ü cān saña çıḳar
b. Anuñ içün didüñ ki ölürseñ baña çıḳar
2.a. Ġarḳ olmadın gözüm yaşı baḥrına fülk·i ten
b. Ey bād·ı şurṭa gel bizi al bir yaña çıḳar
3.a. Gül-zārı ġonca yüzüñe beñzetse itme ʿayb
b. Yañılmaġ ile anca aġızdan ẖaṭā çıḳar
4.a. Öykündi çünki laʿlüñe ḳalsun ayaḳda mey
b. El üzre ṭutma yirini bilmez başa çıḳar
5.a. Bir yaña olmadın ġam·ı zülfüñ belürdi ẖaṭ
b. Ḳanda ̮ise baña her yañadan bir belā çıḳar
6.a. Ey māh-çihre ʿāşıḳuñ āhından it ḥaẕer
b. Bilmez misin ki göklere tīr·i duʿā çıḳar
7.a. Her dilde arasañ bulınur ʿışḳdan es̲er
b. Her ṭopraġı ki ḳazsalar elbette māˀ çıḳar
8.a. Bu ẖalḳ ile Necātī nice itsün iẖtilāṭ
b. Her kimi söyledürse saña mübtelā çıḳar

|p79
mefʿūlü fāʿilātü mefāʿīlü fāʿilün
1.a. Bed-nām·ı ʿışḳ oldum ölürsem belā budur
b. Maḥşerde daẖi diyeler ol mübtelā budur
2.a. ʿAyb itme ben gedāñı yeñilmez göñül begüm
b. Bir yaña oldı cümle cihān bir yaña budur
3.a. Bedr olmış idi ay gice ṭoġdı añsuzın
b. Gören didi ki var ise ol meh-liḳā budur
4.a. Laʿl·i lebüñ añıldı ṭutuşdum şarāb ile
b. Pīr·i muġān öñinde bu gün mā-cerā budur
5.a. Girdi elüme ṭutmayayın mı şarābı kim
b. Maẖmūrem ü ẖarāb hep iden baña budur
6.a. Bunca belāña ṣabr iderem biñ belā ile
b. Bir kez yüzüñi görimez oldum belā budur
7.a. Gösterdi bāġ·ı vaṣldan ol serv-ḳad kenār
b. Didi Necātī āẖır olacaḳ saña budur

|p80
feʿilātün feʿilātün feʿilātün feʿilün
1.a. Bir gün ölümlü dirilenlere cānān görinür
b. Nite kim öldügi demde kişiye cān görinür
2.a. Yüri var mey-kedede ḳarşuma gelme nāṣiḥ
b. Ki ̮elüme sāġar alıcaḳ gözüme ḳan görinür
3.a. İki zülfüñ iki ejder gibi göründügi ̮içün
b. Orta yirinde lebüñ möhr·i Süleymān görinür
4.a. Ḫārdan ḥavlı düzüb ṣaḳlayımaz seni raḳīb
b. Nereden baḳar iseñ serv·i ẖırāmān görinür
5.a. Yine ol gözleri āhū seni Mecnūn itmiş
b. Ey Necātī gözüñe yine beyābān görinür

|p81
mefʿūlü fāʿilātü mefāʿīlü fāʿilün
1.a. Bir ben degülem ol ṣaneme mübtelā geçer
b. Āşüfte aña şāh ü vezīr ü gedā geçer
2.a. Gögsüme tīr·i ġamzesin ol ḳaşları kemān
b. Şöyle urur ki bir yañadan bir yaña geçer
3.a. Dilden geçerdüm andan öte cāna geçmese
b. Doġrusı bu ki ġamzeñ oḳı artuġa geçer
4.a. Ey māh-çihre olma cefāya dilīr kim
b. Eflāk cevşenine ẖadeng·i duʿā geçer
5.a. Hay ümmet·i Muḥammed esirgeñ Necātīyi
b. Yıllardürür ki ẖāk·i reh·i Muṣṭafā geçer

|p82
fāʿilātün fāʿilātün fāʿilātün fāʿilün
1.a. Ṭañ yeli şimşād-ḳadler ṭurrasından ẖastedür
b. Żaʿfı ġālib olduġı ̮içün nālesi āhestedür
2.a. Ey gül·i raʿnā ḳulaḳdan ʿāşıḳ itmişdür beni
b. Ol perī-ruẖsār gözler görmedük nā-rüstedür
3.a. Uş Gülistān oḳuyıcaḳ göresin ḳatlan daẖi
b. Ġonca aġzın açmamışdur rāz·ı gül ser-bestedür
4.a. Ben faḳīr olduġum içün yaḳdı yandurdı beni
b. Āh kim germiyyet·i ẖōrşīd dāˀim pestedür
5.a. Ben gedā şey liˀlleh itdügüm taʿaccüb itme kim
b. Ḫırmen·i ḥüsnüñde ẖālüñ dāne zülfüñ destedür
6.a. Yaşlu gözüm oldı rūḥ·ı tūtiyādan maşraba
b. Kim demādem ayaġuñ ṭopraġına peyvestedür
7.a. Ḳocalıġında Necātī oldı oġlan ẖastesi
b. Ḥayf kim bī-çāre hem dīvānedür hem ẖastedür

|p83
mefʿūlü fāʿilātü mefāʿīlü fāʿilün
1.a. Terkitdi kūyuñı yine aġyār idüb sefer
b. Her kim işitdi didi ki fiˀn-nāri fiˀs-saḳar
2.a. Dil-berler içre gün gibi çün bī-naẓīrsin
b. Göster cemālüñi görelüm biz de bir naẓar
3.a. Gül nisbet itdügi özini ẖaddüñe bu kim
b. Nāzüglüg ile ẖalḳa şehā kendüyi ṣatar
4.a. Bezmüñde şevḳ ile ezilür dāˀimā saña
b. Bilmez miyem ki ne boġazı iplüdür şeker
5.a. Tīġ·i cefā ile depelersin Necātīyi
b. Ölsün mü ne ̮eylesün seni ey bī-vefā sever

|p84
mefʿūlü mefāʿīlün mefʿūlü mefāʿīlün
1.a. Tā ol büt·i şīrīn-leb şekker-şiken olmışdur
b. Gül ġoncasınuñ vallāh yiri diken olmışdur
2.a. Ḳaddüñle ʿiẕāruñdan ayru düşeli cānā
b. Tābūt u kefen baña serv ü semen olmışdur
3.a. Ḥüsnüñ ṣıfatın tā kim diye işide dāˀim
b. Gülşende gül ü ġonca gūş ü dehen olmışdur
4.a. Ḫaddüñde görüb zülfüñ ben güni ḳara ʿāşıḳ
b. ʿĀlemde perīşānlıḳ bildüm neden olmışdur
5.a. Bīmār·ı ġamem benden bī-çāre ṭabīb el çek
b. İtme emegüñ ẓāyiʿ baña olan olmışdur
6.a. Ey Rūma ʿaḳīḳ ilten ṣaḳın ki ziyān eyler
b. Ḳanlu yaşum ucından ʿālem Yemen olmışdur
7.a. Biˀllāhi Necātīye bu luṭf u ʿaṭāyi gör
b. Şeyẖī olalı şeyẖi naẓmı ḥasen olmışdur

|p85
fāʿilātün fāʿilātün fāʿilātün fāʿilün
1.a. Baña göz açdurmayan ol nergis·i şehlāsıdur
b. Baña gün göstermeyen bu zülf·i müşg-āsāsıdur
2.a. Pādişāhem sancaġum āh ü ʿalemdür māh·ı nev
b. Kim şafaḳ anuñ nigārā ḳırmuzı vālāsıdur
3.a. Ġayrı dil-berler gibi cānā vefāsuz olma kim
b. ʿĀşıḳa lutf eyleyen dil-berlerüñ raʿnāsıdur
4.a. Yıḳmaġa göñlüm evin ẖaṭṭı getürmişdür berāt
b. Ki beyāẓıdur cebīni ḳaşları ṭuġrāsıdur
5.a. İşiginde cemʿ olub ʿuşşāḳ efġān itdiler
b. Ṣanma kūyinde Necātī itleri ġavġāsıdur

|p86
mefāʿīlün mefāʿīlün feʿūlün
1.a. Çınaruñ ḳadd·i yāra nisbeti var
b. Eli yufḳa velī ẖōş himmeti var
2.a. İki şīşe gözüm izüñ ḳūmından
b. Dolısar bir gün ammā sāʿati var
3.a. Lebüñe beñzedügi ̮içün mey·i nāb
b. El üstinde ṭutarlar ḥörmeti var
4.a. Elüñ depret yürüt sāḳī ayaġı
b. Ki devrānuñ beġāyet sürʿati var
5.a. Ṣunılur ṣola sāġar ṣaġa tevbe
b. Belī her bir ilüñ bir ʿādeti var
6.a. Ṣarardur beñzini zāhid ve līkin
b. Riyāẓetle degüldür ʿilleti var
7.a. Ayaġuña yüzin sürer Necātī
b. Eyü varur başında devleti var

|p87
mefʿūlü fāʿilātü mefāʿīlü fāʿilün
1.a. Cānā cefānı ʿāşıḳ·ı bī-dil vefā bilür
b. Her ṭaş kim ata reddüñ eli merḥabā bilür
2.a. Ḫōrşīde nisbet eyleyen ol gül yañaḳları
b. Ey lāle-çihre yüzüñe nice baḳa bilür
3.a. Sīnemden aldı cānı eli ̮ile ḳomış gibi
b. Ġam-ẖānemi bucaḳ bucaḳ ol dil-rübā bilür
4.a. Serv·i ümīde irmez eli şol kimesnenüñ
b. Bālā·yi dōst şīvelerini belā bilür
5.a. Zülfüñ hevāsı ile göñül düşdi ġurbete
b. Boynı uzaḳ yola giden işin Ḫudā bilür
6.a. Cām·ı şarāb ile işin altun ide şu kim
b. Pīr·i muġān işigi tozın kīmyā bilür
7.a. Āẖır kemān ḳaşuñı eger āhum āteşi
b. Ya ʿilmini Necātī ḳuluñ müntehā bilür

|p88
fāʿilātün fāʿilātün fāʿilün
1.a. Çünki yār aġyār ile dem-sāzdur
b. Baña günde biñ kez ölmek azdur
2.a. Dürlü dürlü derde uġradan beni
b. Ḳalb·i māyil çeşm·i şāhid bāzdur
3.a. Ġamzeñüñ itdüklerin zülfüñ bilür
b. Giceler uġrı ile hem-rāzdur
4.a. Nice bir yile yanınca it raḳīb
b. Gel bizümle git ol iti azdur
5.a. Çoḳ cefā eyler bilüb çoḳ sevdügüm
b. Nola nola bu da bize azdur
6.a. Ġuṣṣadan maẖlāṣ dilerseñ ey göñül
b. Aduñı dīvān·ı ʿışḳa yazdur
7.a. Ol gözi mestānenüñ itdüklerin
b. Ey Necātī cevr ṣanma nāzdur

|p89
mefʿūlü fāʿilātü mefāʿīlü fāʿilün
1.a. Çarẖun güneş egerçi ki görki güvencidür
b. Kūyuñda ḳapu ḳapu gezer bir dilencidür
2.a. Bir şīve ile yıḳdı ẖarāb eyledi beni
b. Ṣol gencecük güzel ki bu gün ḥüsn gencidür
3.a. Kirpüklerüñ ẖayāli bu mecrūḥ sīnede
b. Ey ḳaşları kemān uvacuḳ ḳara ṣancıdur
4.a. Derd·i nigārı el götürüb eyledüñ ṭaleb
b. Şād ol göñül ki kendü özüñ dest-rencidür
5.a. Kimden ṭutar imiş yüzinüñ ḳarasın raḳīb
b. Kendüzi itdi kime ne kendü ḳazancıdur
6.a. Dün gördi cürʿa dökdügümi pīr·i mey-kede
b. Bu gün beni oñarmayan anuñ ilencidür
7.a. Servi Necātī ḳaddüñe beñzer didi ise
b. Luṭf it sen aña ḳalma ki şāʿir yalancudur

|p90
mefʿūlü fāʿilātü mefāʿīlü fāʿilün
1.a. Gerçi güzeller ipini zülfüñ uzatdılar
b. Ḥaḳḳā ki boylarınca yazuḳlara batdılar
2.a. Yāruñ ayaġı tozına beñzer diyu bu gün
b. Bāzār içinde ʿanberi Allāh ki ṣatdılar
3.a. Şimşād ü serv irdügine dik gelürdi līk
b. Reftār·ı yārı göreli bir pāre yatdılar
4.a. Bezm·i belāda bir kişi hüş-yār ḳalmadı
b. Cām·ı mey·i maḥabbete sāḳī ne ḳatdılar
5.a. Pisteh dehān·ı dil-bere öykündi ehl·i bezm
b. Söyletmediler urdılar aġzın uşatdılar
6.a. Ḳaddüñ ḳatında ṭurmaġa yaraşmadı diyu
b. Servüñ alub elini yabanlara atdılar
7.a. ʿĪd·i viṣālüñ istedügi ̮içün Necātīyi
b. Güzeller üşe geldiler öget ṭonatdılar

|p91
mefāʿīlün mefāʿīlün mefāʿīlün mefāʿīlün
1.a. Çemende baġladuġınca çiçekler ḳarşuña ṣaflar
b. Gülüm nergis senüñ şol ṣād gibi ʿaynuña kefler
2.a. Saña öykündügin lüˀlüˀ işitmiş bād·ı ẖacletden
b. Deñizler burtarub yüzin urur ruẖsārına kefler
3.a. Ögüb göklere çıḳarma şeb olmaz bu diyu cennātı
b. Ki rūy·i sādeden yigdür ḥaḳīḳatde müzellefler
4.a. Ḳo rusvā eyleme ʿaḳlı ki möhr·i mihr ẖānuñdur
b. Süleymān ẖātemini ṣaḳlayu bilmezler Āṣaflar
5.a. Teʿālāˀllāh ne ḥüsn olur bu kim tezyīnidür ẖaṭṭuñ
b. Cemālüñ āyetin ider rivāyet yedi muṣḥaflar
6.a. Necātī āhına āheng ider Zöhre didügi ̮içün
b. Ḳulaġı çıñladı şöyle ṭabancalar yidi defler

|p92
mefʿūlü fāʿilātün mefʿūlü fāʿilātün
1.a. Çekdükce ḳara ṣaçlar ḳulac ḳulac sünerler
b. Ol iki ejdehālar bir gün baña ṣunarlar
2.a. Ol ḥüsn āteşinüñ şevḳi ̮ile ṭutışuram
b. Ay ü güneş felekler hep üstüme dönerler
3.a. Ṭaʿn itme baña vāʿiẓ ol iki türk·i ser-mest
b. Eylük ile güc ile yer bulıcaḳ ḳonarlar
4.a. Dek durur yirüñde epsem ḥaddüñ bil ey ṣanevber
b. Dik gelme ḳadd·i yāra yoẖsa seni yonarlar
5.a. Meyl itse ẖadd·i yāra cān ü göñül baña ne
b. Bir iki çıplaḳ abdāl od buldılar çönerler
6.a. Ol zerḳ-pīşe ṣōfī şeyẖ oldı mı ṣanursın
b. Yanına düşmek ile bir iki üç bön erler
7.a. Añmışsın eski pīşeñ olmışsın ile rusvā
b. Neyki yine Necātī yeñi yeñi hünerler

|p93
fāʿilātün fāʿilātün fāʿilātün fāʿilün
1.a. Çün çemen üzre ṣabā bōstāna berg·i gül döşer
b. ʿĀrif olanlara nūşānūş·ı cām·ı mül düşer
2.a. Bezme gelseñ ehl·i ʿışḳ içinde ḳopar zemzeme
b. Gülistāna vaḳt·i gülde nitekim ġulġul düşer
3.a. Bāġ-bān·ı luṭf zülf ü ʿārıẓ ü ruẖsārdan
b. Āb üzre gül döşer gül üstine sünbül döşer
4.a. Baña düşmez kim ruẖuñ gül-zārına şeydā geçem
b. Ne ḳılub neyleyeyin çārem nedür göñül düşer
5.a. Gülşen içre oḳusa muṭrib Necātī şiʿrini
b. Gül yüzine bī-ẖōd olub şāẖdan bülbül düşer

|p94
mefʿūlü fāʿilātü mefāʿīlü fāʿilün
1.a. Ey cān işigüñe gözi yaşlu revān olur
b. Gökler yüzine aḳçe ile nerdübān olur
2.a. Zülf ü ruẖuñ ẖayāli ile bāġa uġrasam
b. Gülşen diken görinür ü sünbül yılan olur
3.a. Gencīne·i cemāle kilīd urdı ṣaçlaruñ
b. Bu bir şikeste-dil anı açmaḳ ḳaçan olur
4.a. Gel ya ḳaşuña zıh gibi çek rişte·i dili
b. Gören disün ki oẖ nice dil-keş kemān olur
5.a. Zülfüñ ḳatında nergis·i bīmāruña di kim
b. Aẖşama ḳarşu uyımasun nā-tüvān olur
6.a. Pīr·i muġān işigi ki devlet cenābıdur
b. Ṣıdḳ ilekim ki süre yüzin kām-rān olur
7.a. Küynüklüsin nigāra ruẖ·i zerd ilet göñül
b. Köynüklü armaġanı ḳamu zaʿferān olur
8.a. Bir şeftaluya cānı azırġanma dōstum
b. Sermāyeden ḥisāb idegör neñ ziyān olur
9.a. Derde ṣataşdı ṭañlamañ āhın Necātīnün
b. Ḫāşāke āteş uġradı lābüd duẖān olur

|p95
mefʿūlü mefāʿīlü mefāʿīlü feʿūlün
1.a. Cedvelden iñen çıḳma ki pergāra çekerler
b. Ṭoġrı yolına gitmeyeni dāra çekerler
2.a. Ġālil yürüme ayaġı tozında gözüñ aç
b. Ki ̮ol sürmeyi şol dīde·i bīdāra çekerler
3.a. Gül devridürür ġonca-leb ü ḥoḳḳa-dehenler
b. Terk eyler iseñ bādeyi esrāra çekerler
4.a. Āşüfteler ol ġamze·i ẖūn-rīzüñ ucından
b. Ḫançerler ile sīnelere yara çekerler
5.a. Şimşād ṣalınmaḳda elüm var dimesün kim
b. Güzeller anı şīve·i reftāra çekerler
6.a. Gül Yūsufı devrüñde güzellik ṣatamaz hīç
b. Gün başına bir gerçi ki bāzāra çekerler
7.a. Bülbül çaġırur ṣalar elin ṭurra·i şimşād
b. ʿĀḳılları hep cānib·i gül-zāra çekerler
8.a. Gül devridürür ser-ẖōş ol utanma Necātī
b. Ḫaclet raḳamın cebhe·i hüş-yāra çekerler

|p96
feʿilātün mefāʿīlün feʿilātün
1.a. Ḥācib·i dōst dil-rübā görinür
b. Ṭoġar ay gibi vaḳtehā görinür
2.a. Genc·i ḥüsnüñ ṭılısmını gör kim
b. Her ḳılı zülfüñ ejdehā görinür
3.a. Geh firişteh gehī perī dirsin
b. Bir gün ol dil-rübā saña görinür
4.a. Vaṣlı māẖūlyāsın eylersin
b. Teşne-dilsin düşüñde māˀ görinür
5.a. İnce belüm ḳoluñda bil dirsin
b. Dirsin ammā yoġ ortada görinür
6.a. Fāluña lām·ı zülfi geldi göñül
b. Saña bu yolda çoḳ belā görinür
7.a. Ḳaderüñden ziyāde söylersin
b. Meger ey dil saña ḳaẓā görinür
8.a. Pādişehdür Necātī maʿnīde
b. Ṣūretā gerçi kim gedā görinür

|p97
fāʿilātün fāʿilātün fāʿilātün fāʿilün
1.a. Ḫalḳ·ı ʿālem ʿışḳumı āh ü fiġānumdan duyar
b. Gice āteş şuʿlesi gündüz duẖānumdan duyar
2.a. Ṭınmamaġ ile yeñer ol ġonca-leb ben bülbülin
b. Her seḥer derd·i derūnum dāsitānumdan duyar
3.a. Aġzı remzin beli sırrın şerḥ iderdüm mū-be-mū
b. Kimsene yoḳdur benüm rāz·ı nihānumdan duyar
4.a. Çeşm ü ebrūsı ẖayāli fāş ider sırrum cihān
b. Beg ḳulı olduġumı tīr ü kemānumdan duyar
5.a. Ben Necātīyem didügümdür giriftār olduġum
b. Cümle güzeller beni nām ü nişānumdan duyar

|p98
fāʿilātün mefāʿilün feʿilün
1.a. Ḫastadur yārumuz şarāb özler
b. Ol ciger vaṣlası kebāb özler
2.a. Gör ne ẓālimdürür ki ucdan uca
b. Bu göñül mülkini ẖarāb özler
3.a. Şeb·i zülfüñde ẖaddüñ özleyen ah
b. Ḳarañu dünde māh-tāb özler
4.a. Raḥm it ey dōst cān ġarībine kim
b. Teşne-dildür lebüñden āb özler
5.a. Çoḳ şükürler ki çeşm·i bīmāruñ
b. Gördi ṣıḥḥat yüzini ẖāb özler
6.a. Ḫasta göñlüm lebüñ ṭabībinden
b. Dil ü cān derdine cevāb özler
7.a. Bezm·i vaṣluñda cām·ı laʿlüñden
b. Bu Necātī şarāb·ı nāb özler

|p99
fāʿilātün fāʿilātün fāʿilün
1.a. Ḫaṭṭ·ı reyḥān ile ol zībā ʿiẕār
b. Ṣanasın muṣḥafdur āyet-ber-kenār
2.a. Ḫōş yaratmışdur dehānuñda lebüñ
b. Cānı yoḳdan var iden Perverdigār
3.a. Şevḳ·i bezmüñle nice āh itmeyem
b. Şemʿ·i dil-sūzem başumda od yanar
4.a. Aġıza gelmiş ṣulu şeftālular
b. Bāġ·ı ḥüsnüñ çaġıdur ey gül-ʿiẕār
5.a. Çeşm·i āhū dāġ·ı ḥasret gibidür
b. Leylī olmayınca Mecnūna şikār
6.a. Yoḳ ḥisābındadur aġzuñla belüñ
b. Anları öpmekde ḳocmaḳda ne var
7.a. Bir ıl öñdin olıgör ẖāk·i ḳadem
b. Minnet itmedin Necātī rūzigār

|p100
mefʿūlü fāʿilātü mefāʿīlü fāʿilün
1.a. Ḫalḳuñ kimisi ṣōfī kimi mey-perest olur
b. Ey ẖāce bu muʿāmele rūz·i Elest olur
2.a. ʿIşḳum selefden artuġ olursa ʿaceb mi kim
b. Bezm·i şarāba ṣoñra gelen ḳati mest olur
3.a. Dil-dāra yapışursa ḳıyāmetde dād-ẖāh
b. Dāmānı serv gibi ser-ā-pāy dest olur
4.a. Şeh nāz ider ẖuceste cemāline yaṣdanub
b. Şeh-nāz iken fiġānum anuñçün ẖucest olur
5.a. Olsun Necātī naẓmuñuñ āvāzesi bülend
b. Ki ̮anuñ ḳatında bülbülüñ elḥānı pest olur

|p101
mefʿūlü mefāʿīlü mefāʿīlü feʿūlün
1.a. Ḫaṭṭuñda kim ol zülf·i perīşān yazılubdur
b. Gūyā ki ġubār üstine reyḥān yazılubdur
2.a. Ol ḥoḳḳa·i mercān üzerinde ẖaṭ·ı müşgīn
b. Dil-ẖastelerüñ derdine dermān yazılubdur
3.a. Dil-teng ü perīşān idi vaṣfuñ işidicek
b. Güller açılub ġonca·i ẖandān yazılubdur
4.a. Naḳş oldu ẖaṭuñ dilde yazuḳdur oda yaḳma
b. Şol ṣafḥayı kim āyet·i Ḳurˀān yazılubdur
5.a. Cān ṣūretini görmege meylüñ var ise gel
b. Cān heyʿetine ṣūret·i cānān yazılubdur
6.a. Ey ḥüsn diyu ʿāşıḳ olan göz ile ḳaşa
b. Bu şīve kilīsāda firāvān yazılubdur
7.a. Gül defteri dürsün ki ruẖ·i dōst yüzinden
b. Eşʿār·ı Necātī ile dīvān yazılubdur

|p102
mefʿūlü mefāʿīlü mefāʿīlü feʿūlün
1.a. Ḫaṭṭ·ı ruẖ·i yār ehl·i maḥabbet ecelidür
b. Ġāfil yürüme aç gözüñi gün gicelüdür
2.a. Nergis gözüñe öyküneli ḳaddüñe şimşād
b. Bāġuñ bu görür gözi ve ol ṭutar elidür
3.a. Yazıldı ẖaṭuñ üzre iki ṭurra·i meftūl
b. Gūyā ki ġubār üstine reyḥān·ı celīdür
4.a. Görse yüzüñi cümle melekler diye Allāh
b. Bu ḥüsn iyesi şāh güzeller güzelidür
5.a. Ey dōst bu günlük yā yarınlıḳ degülüz biz
b. Şol ʿışḳa fedā cān ü cihān kim ezelīdür
6.a. Sīb·i ẕeḳani naḳd·i ḥayātuñ ʿivaẓıdur
b. Laʿl·i lebinüñ būsesi cānuñ bedelidür
7.a. Ṣōfī ki bu gün çāresi yoḳ ḳara başına
b. Heyhāt ki bī-fāˀide zühd ü ʿamelidür
8.a. Maḥbūb u meye tevbelüyem dirse Necātī
b. İnanmayasuz sözine zīrā ki delidür

|p103
fāʿilātün fāʿilātün fāʿilātün fāʿilün
1.a. Dil-berā kūyuñ senüñ gūyā ki cennet bāġıdur
b. Cilve ḳıl ṭāvūs-veş ṣalın ki ḥüsnüñ çaġıdur
2.a. Ruẖları nāzüglügi ol ʿömri çoḳ olasınuñ
b. Ṣanasın şimdi açılmış tāze gül yapraġıdur
3.a. Her gice tā ṣubḥa dek rūşen çerāġuñda şehā
b. ʿĀşıḳ·ı dil-ẖastenüñ yanan yüregi yaġıdur
4.a. Ḫılʿat·i ḥüsnin geyüb ṣalınduġınca ol ṣanem
b. Zīnet içün ruẖları üstine zülfin ṭaġıdur
5.a. Didiler ẖōrşīde kim ne ̮içün baḳılmaz yüzüñe
b. Didi bu şol bir güzeller şāhınuñ yasaġıdur
6.a. Ġamzeñ oḳları ẖayālin neyleyem didüm didi
b. Ṣaḳla anı dilde kim mihr ü maḥabbet dāġıdur
7.a. Ġamzesi öldürdügine ey Necātī ġam yime
b. Ḳatlüñe ḥoccet yazan sīmīn eli parmaġıdur

|p104
mefʿūlü mefāʿīlü mefāʿīlü feʿūlün
1.a. Dirsin ki beni ṣarmaġa cānā ne virürler
b. Biˀllāhi bunuñ gibi yalana ne virürler
2.a. Ḳurbāna beni Kaʿbe işigüñe ḳomazlar
b. Cevr eylemege devr·i zemāna ne virürler
3.a. Maʿnā gerek ey dil ki vire ādeme ṣūret
b. ʿĀlemde fülān ibn·i fülāna ne virürler
4.a. Zārīlıġ idüb devr·i felekden meded umma
b. Yoḳ yirlere bu āh ü fiġāna ne virürler
5.a. Eşʿār·ı güher-bār ile müflis dirilürsin
b. Biˀllāhi Necātī bu yalana ne virürler

|p105
mefʿūlü fāʿilātü mefāʿīlü fāʿilün
1.a. Devr·i ruẖuñda ʿāşıḳa ṣun laʿl·i nāblar
b. Gül mevsiminde içilür ince şarāblar
2.a. Elden ḳoma ayaġı diyu muttaṣıl baña
b. Cām·ı Cemüñ ḥikāyetin eyler ḥabāblar
3.a. Añlamayan ẖayālini mecmūʿa·i gülüñ
b. ʿĀrif degüldür oḳusa yüz biñ kitāblar
4.a. Göstermesün ṣaḳın saña parmaḳ ḥisābını
b. Māh·ı felek ki naḳd·i ḥayātuñ ḥisāblar
5.a. Bir yaña oldı ẖāl ü ẖaṭ ü zülf·i müşg-bār
b. Cān gülşenini ḳapladı ṭutdı ġurāblar
6.a. Faṣl·ı bahār ʿayn·ı behişt olmaya idi
b. Yazmazdı Şeyẖ Saʿdī gülistāna bāblar
7.a. Yāruñ cemāli nūrı güneşden ʿayān iken
b. Kimdendürür Necātīye bunca ḥicāblar

|p106
mefʿūlü mefāʿīlün feʿūlün
1.a. Dili bir dil-rübāya yandurıgör
b. Maḥabbet şemʿini uyandurıgör
2.a. Doġubdur āfitāb·ı sāġar·ı ʿışḳ
b. Çerāġın ʿaḳluñuñ diñlendürigör
3.a. ʿAṣā·yi tīrüñ ile ey cefā-kīş
b. Żaʿīf oldı yürek ṭayandurıgör
4.a. Ḳız oldı duẖter·i rez sāḳīyā gel
b. Bir iki cām·ı mey ṭolandurıgör
5.a. Ṭolaşur degme bir zencīr·i mūya
b. Ögüt vir göñlüñi uṣlandurıgör
6.a. İnanmaz ṣōfī meyden geçdügüñe
b. Necātī and içüb inandurıgör

|p107
fāʿilātün fāʿilātün fāʿilātün fāʿilün
1.a. Devr·i güldür Allāh Allāh bu ne nāzüg çaġ olur
b. Gül yañaġından semen penbe ̮ile ḳan almaġ olur
2.a. Gözlerümden ayaġuñ ṭopraġın armaġ istesem
b. Gözlerümde ayaġuñ ṭopraġına irmaġ olur
3.a. Yüzüñ añub aġladuġumca viṣāl özler göñül
b. Kim bahār eyyāmınuñ yaġmurı bal ü yaġ olur
4.a. Ḳo temāşā eylesünler ʿārıẓ u ruẖsāruñı
b. Ḳanda ise āb ü āteş dōstum aylaġ olur
5.a. Sīnemüñ dāġın görüb raḥm eylese ṣarılsa yār
b. Bunca derdüm var iken daġ üsti baña bāġ olur
6.a. Ruẖları āyīnesin gösterse ol ḥūr·ı behişt
b. Ṭūṭī·i cāna ten·i ẖākī-ḳafes uçmaġ olur
7.a. Yāra cān virdüñ Necātī ẖōş ẖalāş itdüñ yine
b. Vay ne ḳurtulduñ seni kimse dimezdi ṣaġ olur

|p108
mefʿūlü fāʿilātü mefāʿīlü fāʿilün
1.a. Dil kişverine zülf·i siyāhuñ belā yeter
b. Yıḳmaġa bu vilāyeti ol ejdehā yeter
2.a. Geh yaş gelür gözümden ü geh yaş yirine ḳan
b. Derd·i derūnı bilmege bu mā-cerā yeter
3.a. Çoḳlar semend·i nāz binüb yeldürür velī
b. Meydān·ı ḥüsn içinde bulunmaz saña yeter
4.a. Laʿlüñ ẖayāl ile dile zülfüñ sitemleri
b. Ger bal eger belā ise ey dil-rübā yeter
5.a. Ey çarẖ sen de yār gibi olma bī-vefā
b. Zīrā bu deñlü ʿāleme bir bī-vefā yeter
6.a. Bīmār·ı ʿışḳa şerbet ile eyleme ʿilāc
b. Var ey ṭabīb ḳo beni derdüm baña yeter
7.a. Cānuma geçdi ġamzeñe hey di teraḥḥum it
b. Oldı ġaraẓ cefā ise ey ḳaşı ya yeter
8.a. Tek yirde gökde ẕerre ḳadar minnet olmasın
b. Örti döşek Necātīˀye bir būriyā yeter

|p109
feʿilātün feʿilātün feʿilātün feʿilün
1.a. Didüm ol şūẖ·ı cefā-pīşe iñen nāzlanur
b. Nāz ile güldi didi nāzüg olan nāzlanur
2.a. Ṭoġradı ẖār·i cefā baġrını bülbüllerinüñ
b. Bir aġız söylemez ol ġonca-dehen nāzlanur
3.a. Ḳanlu yaşdan gözümüñ iki ḳabaġı ṭoludur
b. Bir ṭolu içmege ol baña neden nāzlanur
4.a. Rūzigāra ne içün baş ege ol ḳaddi bülend
b. Nev-bahāra bilürüz serv·i semen nāzlanur
5.a. Gözi ḳanum dökicek gül gibi dürer yüzini
b. Şol güzeller gibi kim içer iken nāzlanur
6.a. Āhumı işideli bād·ı ṣabā ile ṭurub
b. El ucı ̮ile görişür serv·i çemen nāzlanur
7.a. Lebüñe inmek içün düşer ayaḳlara şarāb
b. Bir denīdir mey·i gül-çihre neden nāzlanur
8.a. Ben Necātī iderem kendümi yolında şehīd
b. Ol baña ṣarmaġa bir ḳanlu kefen nāzlanur

|p110
feʿilātün feʿilātün feʿilātün feʿilün
1.a. Didüm ol yüzde neden ẖāl·i muʿanber çoġ olur
b. Didi bu Rūm ilidür bunda güzeller çoġ olur
2.a. Dil getürdüm diyu dil-dāra göñüllenme ṣaḳın
b. Pādişāh işigidür bunda dil-āver çoġ olur
3.a. Bize cānāne gibi ḥüsn·i cihān-gīr gerek
b. Yār·ı dil-dār gerekdür bize dil-ber çoġ olur
4.a. Zülfüñ ucında göñül dirilemez kim zülfüñ
b. Bir olıcaḳ ẖaṭ ile ẖāl ile kāfer çoġ olur
5.a. Olıgör Ḫıẓr gibi ṣāḥib·i iḳlīm·i ḥayāt
b. Yoḳsa devlet bulınur milk·i Sikender çoġ olur
6.a. İki ʿālemde Necātī saña bir yār yeter
b. Ber-murād olmaz ol iş anda ki server çoġ olur

|p111
feʿilātün feʿilātün feʿilātün feʿilün
1.a. Dehenüñden ṣanemā hīç alınmadı ẖaber
b. Nice kez ġoncanuñ aġzın aradı bād·ı seḥer
2.a. Yaḳayın hecr odına küllī tenüm kül ideyin
b. Ol nihāl·i gül·i raʿnā beni çün ẖāk ister
3.a. Göñül aydur baña kim ʿaḳlı unut ʿışḳı gözet
b. Vācib oldı kim işidem delüden uṣlu ẖaber
4.a. Ger ayaḳlamaz ise bāde ġamuñ leşkerini
b. Bu ayaḳ kişver·i tenden yine bir toz ḳopar
5.a. Göñlüme zülfi ġamı güç gelür ögrenmemegin
b. Bu mes̲eldür ki bulut bilmeze yükdür dirler
6.a. Gülşen·i kūyuña ʿazm eylese ey dōst yaşum
b. Şöyle taʿcīl gider kim her adım yirde düşer
7.a. Būseye vaʿdeler idüb leb·i cān perver·i dōst
b. Yine ṭatlu dil ile aġzumuza ezdi şeker
8.a. Lebüñüñ şerbetini başına görürse şeker
b. Dehenüñ āẖır anuñ yirini teng eyleyiser
9.a. Baña ol ḳāmeti Ṭūbā lebi ʿunnāb gerek
b. Nideyin görmek ile serv·i çemenden ne biter
10.a. Nice kez ḳanına girmişdür anuñ ġamzeñ oḳı
b. Ḳo Necātī ki ṭuta ḳanlusını ẖaste-ciger

|p112
feʿilātün feʿilātün feʿilātün feʿilün
1.a. Devr·i meclis ki bu gün ẕevḳ u ṣafā ẖırmenidür
b. El açuñ vaḳt·i ṣabūḥ oldı duʿā ẖırmenidür
2.a. Gögsümi ṭaşlar ile dögdügümi ṭañlama kim
b. Gördügüñ sīne degül derd ü belā ẖırmenidür
3.a. Ḫaṭṭı sünbül uvaġı dāneleridür beñler
b. Ḫāl ü ẖaṭ ṣanmañ añı cevr ü cefā ẖırmenidür
4.a. Nice ̮olur ẖaṭ çekicek çevresine ẖaddüñ ol ay
b. Bedr aġıllanıcaḳ ḥüsn ü bihā ẖırmenidür
5.a. Baʿẓılar ḥalḳa olub dāne·i tesbīḥ ṣayar
b. Ṣōfī ol zühd degül belki riyā ẖırmenidür
6.a. Devr·i ḥüsnüñde daẖi deste yatur sünbüller
b. Meger ol bu dil·i maḥrūm u gedā ẖırmenidür
7.a. Şükürün liˀllāh Necātī yine bir dānedürür
b. Pādişāh işigi gerçi ẓurefā ẖırmenidür

|p113
mefāʿīlün mefāʿīlün feʿūlün
1.a. Dem-ā-dem maṭlaʿ·ı şiʿrüm eyā ḥūr
b. Olur Kaʿbe yüzüñle Beyt·i Maʿmūr
2.a. Cihānuñ cānısın ey gevher·i pāk
b. Ṣaḳın degme ẖasīse olma meʿmūr
3.a. Çerāġuñ virmesün bir bezme şuʿle
b. Yañaġuñ olmasun her şaẖṣa manẓūr
4.a. Anuñçün Kaʿbe rāciḥdür güneşden
b. Kim ol her-cāyīdürür Kaʿbe mestūr
5.a. Baḳub her ʿāşıḳa seg dime zāhid
b. Eyā maġrūr yiter kendüñi gör
6.a. Şarāb·i nāb ile dīdār·ı sāḳī
b. Zihī devlet zihī nūrün ʿalā nūr
7.a. Maḥabbet āteşine yaḳ vücūduñ
b. Necātī müddeʿī çeşmine kül ur

|p114
feʿilātün mefāʿilün feʿilün
1.a. Cān ü dil ki ̮ol semen-bere çekilür
b. Pīş-keşdür ki beglere çekilür
2.a. Dūd·ı āhum hevā·yi zülfüñ ile
b. Ejdehādur ki göklere çekilür
3.a. Her seḥer āh ü nāle ḳāfilesi
b. Kaʿbe·i kūy·i dil-bere çekilür
4.a. Ṣaçı zencīrine ṣabā ṭolaşur
b. ʿĀşıḳuñ adı yoḳ yire çekilür
5.a. Ḫaṭṭı vaṣfın Necātī yazmaz iseñ
b. Ḫaṭṭ·ı nisyān o deftere çekilür

|p115
feʿilātün feʿilātün feʿilātün feʿilün
1.a. Dil yine ̮ol şūẖ·ı cihān üstine dir dir ditrer
b. Dil nedür kevn ü mekān üstine dir dir ditrer
2.a. Teşne-dil laʿli zülāli ṣuyın ol Ḫıẓr-demüñ
b. Gördügi yirde hemān üstine dir dir ditrer
3.a. Çeşm·i pür-fitnesi ʿālemlere ġavġā bıraġur
b. Ḫūnī·i ġamzesi ḳan üstine dir dir ditrer
4.a. Murġ u māhī melek ü ins ü perī vaḥş ü ṭuyūr
b. Ol Süleymān·ı zemān üstine dir dir ditrer
5.a. Dil·i miskīn·i Necātī yine ey cān·ı cihān
b. Bir fülān ibn·i fülān üstine dir dir ditrer

|p116
feʿilātün mefāʿilün feʿilün
1.a. Ẕeḳan·i yārda vefā neyler
b. Ser-nigūn çāh içinde māˀ neyler
2.a. Dimedüñ yād idüb beni bir gün
b. ʿAceb ol derde mübtelā neyler
3.a. Bülbülüñ dūd·ı āhı ey yüzi gül
b. Göresin ʿāḳıbet saña neyler
4.a. Hele derd ü belāya ṣabr idelüm
b. Görelüm ṣoñ ucı Ḫudā neyler
5.a. Şol ki Naḳḳāş·ı Lem-yezel özler
b. Dil-berüñ ḥüsnini bahāne ̮eyler
6.a. Şol çemende ki ̮ide Necātī fiġān
b. ʿAndelīb·i suẖan-serā neyler

|p117
mefāʿilün feʿilātün mefāʿilün feʿilün
1.a. Revā mıdur ki güneş yüzüñe ḳamer diyeler
b. Gice ̮ile seyre çıḳarsañ daẖi neler diyeler
2.a. Yüzümi ayaġuña süreyin nice ̮olsa gerek
b. Nihāyeti bu ki sen serveri sever diyeler
3.a. Mesīḥa ṭaʿne urub leblerüñ didi ne ʿaceb
b. Ki bir ölüyi diri ḳılmaġa hüner diyeler
4.a. Lebüñ ḳatında ne lāzım ki ġoncayı añalar
b. Bir iki yaẖası açılmaduḳ ẖaber diyeler
5.a. Levend ü müflis ü dīvāne vü faḳīr ü ḥaḳīr
b. Necātīyem umaram daẖi beş beter diyeler

|p118
fāʿilātün fāʿilātün fāʿilātün fāʿilün
1.a. Ruẖlaruñuñ şemʿine yanmaġa dil pervānedür
b. Āteşe meyl eyler ise ṭañ degül dīvānedür
2.a. Ārzū·yi pertev·i mihr·i ruẖuñla dōstum
b. Yıllar olmışdur göñül maʿmūresi vīrānedür
3.a. Gül yüzüñe beñzedürse kendüyi bilmezligi
b. Mül lebüñe öykünürse ḳıbḳızıl dīvānedür
4.a. Cām·ı zerrīn ü mey·i yāḳūt-rengi neylesün
b. Şol gedālar kim şafaḳ bāde güneş peymānedür
5.a. Ḳoñ beni yolumdan ayrup daʿvet itmeñ mescide
b. Lāˀübālī ʿāşıḳam ser-menzilüm mey-ẖānedür
6.a. Ḥālümi dirsem varur nāz uyẖusına gözlerüñ
b. ʿĀşıḳuñ ḥālātı ḳatuñde hemān efsānedür
7.a. Cān ile cānān ḳavuşdı diñ Necātī gelmesün
b. Aşinālar cemʿidür bu bundañ ol bīgānedür

|p119
fāʿilātün fāʿilātün fāʿilātün fāʿilün
1.a. Ruẖlaruñ ʿuşşāḳa ol zülf·i perīşān ʿarẓ ider
b. Kāfiri gör parmaġın ḳaldurdı īmān ʿarẓ ider
2.a. ʿĀlem·i ʿışḳı dile gösterdi ḥüsnüñ nitekim
b. Kāˀinātı dīdeye mihr·i dıraẖşān ʿarẓ ider
3.a. Devlet·i ʿışḳuñda umaram ḳapuñda yer bulam
b. Baẖtı mūra gāh olur taẖt·ı Süleymān ʿarẓ ider
4.a. Yār derdi ̮ile ölürken baña şerbet ey ḥakīm
b. Şol ṣudur ki ̮īmān içün bīmāra şeyṭān ʿarẓ ider
5.a. İtüñ ürüb bildürür ḳapuñ gedāsı geldügin
b. Ehl·i ḥācet geldügin sulṭāna der-bān ʿarẓ ider
6.a. İşigüñe irmek içün dīde·i ter-dāmenüm
b. Göz yumub açınca yüz biñ dürr ü mercān ʿarẓ ider
7.a. Būse ʿahd itdi Necātīye lebüñ gūyā Mesīḥ
b. Muʿciz iẓhār itmek içün mürdeye cān ʿarẓ ider

|p120
fāʿilātün fāʿilātün fāʿilātün fāʿilün
1.a. Zāhidā adı ẖarābātuñ cihān-ābāddur
b. Bu esās·ı mey-kede bir kāfirī bünyāddur
2.a. Arı ad altında ölmek devlet·i sermeddürür
b. Atam anam ölmez oġul ister iseñ addur
3.a. Yüri var ṭaʿnı ḳo kim maʿnīde pīr·i mey-kede
b. Her ayaġı kim ṣunar el virmedür irşāddur
4.a. Ṣanʿat·i ʿışḳa dimeñ Ferhād idi ṣūret viren
b. Dünyede her uñmaduḳ kim göresin üstāddur
5.a. İki zülfi dāla beñzer ortada ḳaddi elif
b. Vay bu ẓālim şöyle başdan ayaġa dek dāddur
6.a. Ṣoḥbetüñde añılur dāˀim Necātī didiler
b. Didi yoḳ vallāhi yoḳ bī-çāre benden yāddur

|p121
fāʿilātün fāʿilātün fāʿilātün fāʿilün
1.a. Zülf·i dil-ber kim ʿiẕār·ı dil-rübā üstindedür
b. Sūre·i veˀl-leylü dür kim veˀḍ-ḍuḥā üstindedür
2.a. Gün yüzinde zülf·i ʿanber-bār·ı misk-āsā·yi dōst
b. Ebr gibidür ki cism·i Muṣṭafā üstindedür
3.a. Zülfüñe nisbet yā alnuñ ola cennet yā ruẖuñ
b. Çünki Şāmuñ bāġ·ı ẖuld altında yā üstindedür
4.a. Ẕerre gibi ben meẕellet ṭopraġında pāymāl
b. Gün gibi dil-ber sipihr·i kibriyā üstindedür
5.a. Diller alur kirpügüñ cānlar baġışlar leblerüñ
b. Lā-cerem ʿāşıḳlaruñ ẖavf ü recā üstindedür
6.a. Raḥm ḳıl dervīşüñe ey pādişāh·ı ḥüsn kim
b. Pāy·i taẖt·ı salṭanat dest·i duʿā üstindedür
7.a. Nice ayrılsun Necātī ʿışḳ·ı dil-berden kim ol
b. Bir hümādur ki ̮āşiyānı ol hevā üstindedür

|p122
fāʿilātün fāʿilātün fāʿilātün fāʿilün
1.a. Zülfüñüñ her bir ḳılında ey nice diller ṭurur
b. Ṣan selāsil bürcidür kim her birinde er ṭurur
2.a. Zülfüñ altında görüb ẖaṭṭuñı ẖavf itsem nola
b. Kim dil almaġa kemīn-gehde iki leşkerdürür
3.a. Ger şikeste olmadı ̮ise zülfüñ ucından nesīm
b. Her nefesde ẖasteler gibi niçün düşer ṭurur
4.a. Nergisi bezeme getürmez oldı erbāb·ı naẓar
b. Şol sebebden kim eline sāġarı ṭutar ṭurur
5.a. Bāġa gel kim mesned·i ḥüsne geçüb sulṭān·ı gül
b. Ḳarşusına ḳul gibi el ḳavşurub ʿarʿar ṭurur
6.a. İre diyu ẖavf ider bād·ı ṣabādan ṣovuḳ el
b. Ey Necātī serv gül-zār üstine ditrer ṭurur

|p123
fāʿilātün fāʿilātün fāʿilātün fāʿilün
1.a. Zülfüñe kimdür diyen kim ẓulme şimdi başlar
b. Zülfüñ ucından degül mi bu kesilen başlar
2.a. Çīn·i zülfini görelden sen Ḫıṭāyī-beççenüñ
b. Ḳıl ḳalemlerin el ucı ̮ile ṭutar naḳḳāşlar
3.a. Ḳara Kaʿbe örtüsi ̮ile örtesüz tābūtumı
b. Ölicek zülfi ġamından dōstlar ḳardaşlar
4.a. Ḳatı göñlinden şikāyet itdügümçün dōstuñ
b. Üşe gelür ẖalḳ·ı ʿālem ben delüyi daşlar
5.a. Baḳmaz oldı ben gedāya işigüñde itlerüñ
b. Gerçi yıllardur ki bir yaṣduġa ḳoruz başlar
6.a. İdemezdüm ḥabs·i tenden ben kekez cānı ẖalāṣ
b. Derd ü ġam itdi baña yoldaşlıḳ şāpāşlar
7.a. Ġuṣṣa vü ġamdan Necātī iḥtiyāṭ it key ṣaḳın
b. Çoġ olur kim öldürür yoldaşını yoldaşlar

|p124
fāʿilātün fāʿilātün fāʿilātün fāʿilün
1.a. Zülfüñ altında siñüb ẖaṭṭ·ı muʿanber gizlenür
b. Ṣan ki dil almaġ içün puṣıda leşker gizlenür
2.a. Yaşumı görüb teraḥḥum idesin dirdüm velī
b. Aġladuġum bu ki gün görinse aẖter gizlenür
3.a. Gözlerüñ içün göñül zülfüñi bekler ẖākde
b. Çünki āhū ṣayd idenler böyle yir yir gizlenür
4.a. Kirpügüñ şevḳi ̮ile sīnem çāk olubdur şöyle kim
b. Degme nāẖun zaẖmınuñ içinde ẖançer gizlenür
5.a. Sīnede zülfüñ ẖayālin göricek didi göñül
b. Bir ḳarınca ininüñ içinde ejder gizlenür
6.a. Ḫāceden ol serv āzād olıcaḳ görse güneş
b. Ditrer endāmı ṣararur beñzi ḳaçar gizlenür
7.a. Yandı kül oldı Necātī eyle āhından ḥaẕer
b. Gāh olur ẖākister arasında aẖker gizlenür

|p125
feʿilātün feʿilātün feʿilātün feʿilün
1.a. Sevin ey dil ki seni dest·i ġam·ı yār yıḳar
b. Ne ġam ol ẖāne içün kim anı miʿmār yıḳar
2.a. Doludur ḳanlu yaşumdan iki gözüm ḳabaġı
b. Sāḳī āẖır beni bu sāġar·ı tekrār yıḳar
3.a. Gülşenüñ güllerini āteş·i ruẖsār yaḳar
b. Çemenüñ ʿarʿarını şīve·i reftār yıḳar
4.a. Ġamzelerle dil ü cān naḳdini bir bir aluben
b. Āẖır-ül-emr beni ol gözi ʿayyār yıḳar
5.a. Yaşı bir serv içün ırmaġa dönübdür dir imiş
b. Yine aġyārı görüñ üstümüze yar yıḳar
6.a. Kerem it ġamze·i ẖūn-rīzüñe hey di yoḳsa
b. ʿĀlemi ucdan uca ol iki tātār yıḳar
7.a. Girme ortasına gel ẖāne·i dilden çek elüñ
b. Ey Necātī saña ne yār yapar yār yıḳar

|p126
mefʿūlü fāʿilātü mefāʿīlü fāʿilün
1.a. Sāḳī piyāle iki gözümüñ birisidür
b. Bir rūḥdur ki bezmümüz anuñ dirisidür
2.a. Rengīn lebi ̮ü dişi ẖayāli ̮ile gözlerüm
b. Birisi laʿl aḳıdur oldı birisi dür
3.a. Zülfüñ ġamı perī gibi bī-ẖōd ider beni
b. Gerçi perīdür ey meh evet kāfirīsidür
4.a. Şeh-bāz·ı dil ki ṣayd-gehidür feẓā·yi ḳuds
b. Uşbu güzeller anuñ uçurma derisidür
5.a. İtmedi gitdi murġ·i dil·i Leylīyi şikār
b. Mecnūn·i şāh-bāz ki deşt ispirisidür
6.a. Iṣırdum idi leblerini sögdi aġzuma
b. Maʿzūr dut Necātī hele diş kirasıdur

|p127
mefʿūlü fāʿilātü mefāʿīlü fāʿilün
1.a. Sözde bu resm ile olıcaḳ zīnet·i dürer
b. Gül defterini kendü eli ̮ile ṣabā dürer
2.a. Biñ ḥādis̲e ̮ile ḥāmiledür devr·i rūzigār
b. Zinhār ġāfil olma ki ḳanuña aş yirer
3.a. Gül-zār·ı dehr içinde güler ṣanma gülleri
b. Ḫār·ı belā batub ayaġına yüzin dürer
4.a. Yār işigine varmaġı ʿafv eylemez raḳīb
b. Söyletmeñ ol iti kerem eyleñ ki söz ürer
5.a. Gül ṣanma sen Necātī bu rengīn varaḳlarını
b. Evrāḳ·ı şiʿrdür begenüb gül yüze sürer

|p128
fāʿilātün fāʿilātün fāʿilātün fāʿilün
1.a. Serv gibi seyr iderken yāri gördüm bir naẓar
b. Baḳmadı benden yaña yalvarı gördüm bir naẓar
2.a. Gözlerüm ferş ü müjem cārūb olubdur dōstlar
b. Şol yire kim ol gözi ʿayyārı gördüm bir naẓar
3.a. ʿÖmr uzunluġından āẖır fāˀidem bu oldı kim
b. Ol boyı şimşād ü ẖōş-reftārı gördüm bir naẓar
4.a. Şākirem devr·i ḳamerden başuma gün ṭoġdı kim
b. Ol perī peyker melek-ruẖsārı gördüm bir naẓar
5.a. Gülşen·i kūyın yüz üzre ṣu gibi ṭolanduġum
b. Bu ki nā-geh ol ṣafā-dīdārı gördüm bir naẓar
6.a. Ölmiş idüm nev-bahār·ı ʿışḳ irüb virdi ḥayāt
b. Göz açub nergis gibi gül-zārı gördüm bir naẓar
7.a. Ḥaḳ bilür kim bir gice kirpüklü gözüm yummadum
b. Ey Necātī tā kim ol dil-dārı gördüm bir naẓar

|p129
mefāʿīlün mefāʿīlün feʿūlün
1.a. Saña ancaḳ ḳamer çāker degüldür
b. Güneş daẖi aña beñzer degüldür
2.a. Göñül şol aya küni eylemez kim
b. Semen-sīmā vü sīmīn-ber degüldür
3.a. Deger ẖāl ü ruẖuñ Rūmuñ ẖarācı
b. Kek ile beklenür kāfer degüldür
4.a. Gerekse günde biñ ṣūret degişsün
b. Efendi āyīne dil-ber degüldür
5.a. Lebi vü sözleri būs u kinārı
b. Bularuñ ḳanġısı şekker degüldür
6.a. Cihān·ı pīre-zāle baş ḳoşanlar
b. Necātī er degüldür er degüldür

|p130
mefʿūlü fāʿilātü mefāʿīlü fāʿilün
1.a. Şol dil-rübā güzel ki ̮aña begler paşalanur
b. Maḥbūblar bölügi anuñdur aġalanur
2.a. Didüm ruẖuñ güneş gibi şehri araladı
b. Didi metāʿ·ı ḥüsn dem olur aralanur
3.a. Tīr·i müjeñle birlige yitmedüm āh āh
b. Añduḳca tīġ·i ġamzeñi baġrum paralanur
4.a. Bir kerre ġonca aġzın açub gel dimiş degül
b. Bülbüllere ki ṣaḥn·ı çemende yuvalanur
5.a. Biñ biñ selām şol ṣanem·i bī-vefāya kim
b. Redd elleri ̮ile atduġı ṭaş merḥabālanur
6.a. Ey lebleri şeker bu göñül ṭūṭīsi senüñ
b. Āyīne·i cemālüñe baḳsa ṣafālanur
7.a. Māyildürür Necātī hevāña şu deñlü kim
b. Merhem urursa yüregi başı havalanur

|p131
mefʿūlü fāʿilātü mefāʿīlü fāʿilün
1.a. Şol dil-rübā ki ʿāşıḳa yüzbiñ cefāsı var
b. Ḥaḳḳā ki her cefāsına biñ biñ ṣafāsı var
2.a. Yüz biñ belāsı vardurur ʿışḳuñ belā budur
b. Kim her belāsınuñ nice biñ mübtelāsı var
3.a. Erbāb·ı ʿışḳ āh ider aṣḥāb·ı zühd hū
b. Lābüd cihānda her kişinüñ bir hevāsı var
4.a. Sāyem raḳīb ola diyüben gice varuram
b. Gün yüzlümüñ benüm gibi biñ mübtelāsı var
5.a. Her gördügini yüz pekidüb baġrına baṣar
b. Āyīnenüñ güzeller ile ẖōş ṣafāsı var
6.a. Aġyār ile dirilmez isem ölme (ölüme) ḥāẓıram
b. Şükr·i Ḫudā ki her maraẓuñ bir devāsı var
7.a. Yā Rab ne götürür bu Necātī ki her güzel
b. Aña söger meger ki mücerreb duʿāsı var

|p132
fāʿilātün fāʿilātün fāʿilātün fāʿilün
1.a. Şīve·i reftāruña serv·i ẖırāmān imrenür
b. Leẕẕet·i güftāruña ser-çeşme·i cān imrenür
2.a. Ṭurra·i pür-tābuña reyḥān ü sünbül cān virür
b. Lāle·i sīr-ābuña gül-berg·i ẖandān imrenür
3.a. Ḥamdü liˀllāh pādişāhum devletinde ḥüsnüñüñ
b. Şādīye ġuṣṣam güler derdüme dermān imrenür
4.a. Ben nice cān virmeyem şol lebleri mercāna kim
b. Böyle baġrı ṭaş iken laʿl·i Bedaẖşān imrenür
5.a. Mihr ü māhı ḥüsn ile meydāna çekseñ yaraşur
b. Sen ki zülf ü ġabġabuña gūy u çevgān imrenür
6.a. Geydürelden ʿadl·i Şeh emn ü ferāġat ẖılʿatin
b. Rūm iline milket·i Īrān u Tūrān imrenür
7.a. Ey Necātī sāḳīler ẖandān olubdur gül gibi
b. Uşbu bezm içinde kim ṣaḥn·ı gülistān imrenür

|p133
mefʿūlü fāʿilātü mefāʿīlü fāʿilün
1.a. Şol ġoncalar ki laʿlüñ añub aġzın açalar
b. Bād·ı ṣabā irişi gelüb aġzına çalar
2.a. Sen gün ṣıfatlu ay içün ey müşterī-cebīn
b. Āheng idince nāleye ben Zöhre na çalar
3.a. Mıẓrāb·ı ʿūd·ı şevḳ iken bülbülüñ dili
b. ʿIşḳum Zebūrını oḳuyamaz dili çalar
4.a. Her kime ġamze eylese ol türk·i nīm-mest
b. Tīġ·i cefā ile ṣanasın kim beni çalar
5.a. Gülşende serv ḳarṣar elin ha ṣalar başın
b. Kendüzi oynar eblehi gör kendüzi çalar
6.a. Ġam leşkeri ki mülk·i dile ḳonmaḳ isteye
b. Ġamzeñ ḳulaġuzı gelür evvel yeri çalar
7.a. Bezm·i belāda ḳaddümi çeng eyledüñ diyu
b. Çoḳdan bu derd-mend Necātī anı çalar

|p134
feʿilātün feʿilātün feʿilātün feʿilün
1.a. Şol ki ʿışḳ āteşinüñ şevḳıne pervāne geçer
b. Şemʿ-veş ʿömri anuñ yana gelür yana geçer
2.a. Cānı yoḳdur ki ṣanem ide senüñle daʿvā
b. Gerçi bu ṣūret ile şāhid·i kāşāne geçer
3.a. Saña cān virdügüm oldur ki ̮idicek baña revān
b. Ġamzeñüñ oḳlarınuñ her biri bir cāna geçer
4.a. Ele cān alub urar kendüyi dīvārlara
b. Gün daẖi bencileyin kūyuñı mestāne geçer
5.a. Baş ḳoşub zülfüñe göñlüm ṭolanur genc·i ruẖuñ
b. Boynı bir gün ol aṣılasınuñ urġana geçer
6.a. Göricek ẖalḳ Necātīyi der·i Āṣafda
b. Didiler mūrı görüñ taẖt·ı Süleymāna geçer

|p135
mefʿūlü fāʿilātü mefāʿīlü fāʿilün
1.a. Şol ʿāşıḳuñ ki dil-ber·i zībā cemāli var
b. Şādolsun ol hemīşe ki dünyāca māli var
2.a. Luṭf eyle ey ṭabīb buyur zaḥmeti götür
b. Dil derd-mendinüñ bu gün ayruḳsı ḥāli var
3.a. Bülbüllerüñüz ey lebi ġonca yañaġı al
b. Āli ḳo bizi gülşen·i ḥüsnüñe alı var
4.a. Aẖşama dek maḥalleñi ṭolanur āfitāb
b. Her kim görürse dir ki şunuñ bir zevāli var
5.a. Bedr·i münīr gün yüzüñe ḳarşu gelmedi
b. Eksüklügin bilenlerüñ olsun kemāli var
6.a. Ey dōst leblerüñ ile ḳaddüñe ney-şeker
b. Öykündi gerçi līk ne dadı ve dalı var
7.a. Gāhī dehānuñ aldı dile geh miyānuñı
b. Yine Necātī uñmaduġuñ ne ẖayāli var

|p136
mefʿūlü mefāʿīlü mefāʿīlü feʿūlün
1.a. Şevḳuñle yanan dillere pervāne disünler
b. Sen şemʿ olıcaḳ ʿāşıḳuña yā ne disünler
2.a. Uş cān vireyin sen delü ḳanlunuñ öñinde
b. Öldi yine şol bir delü dīvāne disünler
3.a. Ḳanumı içer cürʿa diyu ġamze·i sāḳī
b. Ṣıḥḥatler ola hey gözi mestāne disünler
4.a. Zülf·i siyehüñ göñlümüz almamaġ iderse
b. Zencīrüñe çek ola ki uṣlana disünler
5.a. Kūyuñda baña itlerüñ ürürse ḳayırmaz
b. Ulularumuz ḥālümi sulṭāna disünler
6.a. Bir vech ile ṣūret virelüm şiʿre Necātī
b. Kim ẖalḳ be baḳ maʿnī·i Selmāna disünler
7.a. Ey bād·ı ṣabā var yüri yārāna ẖaber vir
b. Ṭarz·ı ġazeli şöylece rindāne disünler

|p137
mefāʿīlün mefāʿīlün mefāʿīlün mefāʿīlün
1.a. Şu günden kim boyuñ serv ü ser·i zülfüñ semen būdur
b. Çinār ölmişdürür gider benefşe ḳara yaṣludur
2.a. Ne yüzle yüze yüz olmaḳ dilersin ey güneş yāra
b. Güzellikden murād olan bilürsin çeşm ü ebrūdur
3.a. Nigārā göñlümüñ cānı lebüñden būse almaḳdur
b. Ve līkin cānumuñ göñli bir öget sāde-pehlūdur
4.a. Şu dīvānedürür ʿāḳıl ki ̮ola ʿışḳuñla şeydā ol
b. Ṣaçuñ zencīriniḳomaz elinden her ki uṣludur
5.a. Gözüm yaşın ayaġuñdan sen ırmaġ istedüñ ammā
b. Neler ider saña ey serv bu göz yaşı durudur
6.a. Göricek göz yaşı gibi aḳar her serv·i bālāya
b. Necātī bu göñül göñül degüldür bir aḳar ṣudur

|p138
feʿilātün feʿilātün feʿilātün feʿilün
1.a. Ṣōfīyā çün senedüñ gūşe·i miḥrābuñdur
b. Seni bir yaña çıḳarur ḳoma kim bābuñdur
2.a. Ḫōş olur ḥalḳa·i ẕikr ü dem·i tesbīḥ velī
b. Faṣl·ı gül-zārdürür devr mey·i nābuñdur
3.a. Yolumı baġlayan ol zülf·i siyeh kāruñmış
b. Cigerüm dāġlayan lāle·i sīrābuñdur
4.a. Baẖtumuñ gözleri uyẖudan uyanmaz mı didüm
b. Gülüb ol ġamze·i ser-mest didi ẖābuñdur
5.a. Ġam·ı zülfüñle ḳarañu idi ʿālem gözüme
b. Anı rūşen iden ol mihr·i cihān-tābuñdur
6.a. İñledüb çekdi çevirdi beni kūyuñda raḳīb
b. Meger ol ẖar bu Necātī aña dōlābuñdur

|p139
fāʿilātün fāʿilātün fāʿilātün fāʿilün
1.a. Ṭutalum zenbīl ile gökden iner meh-pāreler
b. A begüm yerden mi çıḳdı ʿāşıḳ·ı bī-çāreler
2.a. İḥtiyāt itmez misin andan ki aṣḥāb·ı niyāz
b. Baş açub zārī ḳılub yerden göge yalvaralar
3.a. Cām·ı laʿlüñle şarāb·ı nāb hem-reng olmasa
b. Küleyüb düşmezdi sāġar üstine āvāreler
4.a. Āfitābum yüzüñ aġ alnuñ açuḳdur gerçi kim
b. Sāye-vār arduñcadur bir nice yüzi ḳaralar
5.a. Ey Necātī çıḳma yoldan aldanub güzellere
b. Şemʿ gibi ṣanma kim dāˀim öñüñce varalar

|p140
mefʿūlü fāʿilātü mefāʿīlü fāʿilün
1.a. Ṭurduġı yerde bencileyin şemʿ·i cemʿ erir
b. Bir derdi var içinde ki yidügi anı yir
2.a. Ḫālüñ bulub çıḳardı dili sīneden belī
b. Her ḳanda ise noḳṭa ile bilinür ẓamīr
3.a. Ser-nāme·i cemāle ne noḳṣān ola eger
b. Mektūb·ı luṭf gūşesine yazıla faḳīr
4.a. Cān ü dilini şol ki virür iki bir dimez
b. Lāyıḳ mıdur ki ẖışm ide ġamzeñ ikide bir
5.a. Ben ṣaḳladuḳca şīşede sırr·ı maḥabbeti
b. Bir bir yüzüm gözüm saña mā fiˀẓ-ẓamīridir
6.a. Bir gice görmez uyẖuyı kirpüklü gözlerüm
b. Nā-geh düşinde görine diyu saña naẓīr
7.a. Teˀs̲īr iderdi kevkeb·i devlet Necātīye
b. Nārencī çizme kebkebi itse yüzinde yir

|p141
fāʿilātün fāʿilātün fāʿilātün fāʿilün
1.a. Daġları Ferhād anuñçün ẖāk ile yek-sān ider
b. Kim ġam·ı Şīrīn içün dāˀim yeler efġān ider
2.a. Gel berü ey ʿışḳ·ı dil-berden kerāmet isteyen
b. Az mıdur bu kim kişiye ölmegi āsān ider
3.a. Ben gedā·yi dil-ber olduġumı çoḳ mu gördünüz
b. Ḥaḳ Teʿālā isteyicek bir ḳulı sulṭān ider
4.a. Ṭañ mı her aẖşam yire gömülse tīġ·i āfitāb
b. Çünki cellād·ı felek gün başına biñ ḳan ider
5.a. Var perī ʿālemde ammā ṣanma ādemden ḳaçar
b. Ḫıdmetüñden utanub kendüzini pinhān ider
6.a. Göz ucı ̮ile merḥabā itdüm dimiş ol bī-vefā
b. Pādişehdür ḥāşa liˀllāh anı kim yalan ider
7.a. Bī-vefādan merḥabā gelmez Necātī kimseye
b. Ġalibā utanduġından kendüye bühtān ider

|p142
mefʿūlü fāʿilātü mefāʿīlü fāʿilün
1.a. ʿArʿar ṣanevber ile iñen başdan aşdılar
b. Defʿī gelüb çemende güzeller yanaşdılar
2.a. Bir ben ḳalub durur idüm el-ḥaḳ dolaşmaduḳ
b. Şol zülf·i bī-naẓīrüñe Allāh dolaşdılar
3.a. Aḳçe ʿazīzdür evet anca ʿāzīzler
b. Dünyā televvüs̲ine anuñla bulaşdılar
4.a. ʿUşşāḳ böyle baġlamalu olmaya idi
b. Şol zülf·i bī-naẓīri görüb böyle şaşdılar
5.a. Nefs iti ile birlige yitüb iti şarāb
b. ʿAḳl ile ey Necātī bular çoḳ ṣavaşdılar

|p143
mefʿūlü mefāʿīlü mefāʿīlü feʿūlün
1.a. ʿUşşāḳ yā şol çāh·ı zenaẖdāna girürler
b. Yā bir nice kez ʿışḳ ile zındāna girürler
2.a. Ayruḳ daẖi diñ boyacıya boyamasun al
b. Güzeller anı geymek ile ḳana girürler
3.a. Ṭurub gidicek oḳ gibi yabana giderler
b. Dönüb gelicek luṭf ile çoḳ cāna girürler
4.a. Ruẖsāruñı ārāste görüb meh ü ẖōrşīd
b. Deryūze içün ṭās ile devrāna girürler
5.a. Çevgān·ı ser·i zülfe şu merdān irişür kim
b. Ṭōp eyleyüben başını meydāna girürler
6.a. Vaṣl ister iseñ aġlamadan ḳaçma Necātī
b. Dür-dāne içün derd ile ʿummāna girürler

|p144
fāʿilātün fāʿilātün fāʿilātün fāʿilün
1.a. ʿĀşıḳa cānından ise vaṣl·ı cānān ṭatludur
b. Cümlesinden derd-mend olana dermān ṭatludur
2.a. Ġamze·i ẖūn-rīz·i cānān acıdubdur cānumı
b. Leblerine meyl idersem ṭañlamañ cān ṭatludur
3.a. Ḫadd ü ẖaṭṭuñ devridür yanub yaḳılsun ḳo göñül
b. Nev-bahār ü sebzeler vaḳtinde biryān ṭatludur
4.a. Vuṣlat umanlar duyar mı acısını fürḳatüñ
b. Ṭālib·i gevher olana baḥr·i ʿUmmān ṭatludur
5.a. Ārzū·yi būse itsem ol şeker-leb diş ḳıṣar
b. Bellüdür cām·ı şarāb·ı nāb pinhān ṭatludur
6.a. Devr·i ḥüsnüñde maḳām iden ser·i kūyuñ yeger
b. Nev-bahār u ʿişret·i ṣaḥn·ı gülistān ṭatludur
7.a. Ġamzeñ oḳları yaġarken cān virürin ölmege
b. Her kişi anı bilür kim ẖāb·ı bārān ṭatludur
8.a. Rāh·ı ʿışḳuñda senüñ peykānuña cān virdügüm
b. Bu ki Kaʿbe yollarında ḥabb·ı rümmān ṭatludur
9.a. Bāde şīrīn leblere öykündügini işidüb
b. Acısındandur didügi laʿl ü mercān ṭatludur
10.a. Maʿrifet virmez Necātī cāhile fāẖir libās
b. Kimse dimez rengine baḳub zaʿafrān ṭatludur

|p145
mefʿūlü fāʿilātü mefāʿīlü fāʿilün
1.a. ʿĀşıḳ ḳaçan ki nāvek·i āh·ı seḥer çeker
b. Göklerde mihr ü māh yüzine siper çeker
2.a. Gāhī kemān·ı miḥnet ü gāhī ẖadeng·i āh
b. Meydān·ı ġamda ʿāşıḳ·ı miskīn neler çeker
3.a. Bir gün sen āfitāba muḳārin olam diyu
b. Māh·ı felek yıl on iki aydur sefer çeker
4.a. Aṣ bārī dār·ı zülfüñe bir kezden it ẖalāṣ
b. Cellād·ı ġamze bizi nice bir iler çeker
5.a. Zülfüñ ki ʿārifāne egilüb öper lebüñ
b. Bir rinddür ki cām·ı şarābı çöker çeker
6.a. Rāz·ı lebini mest gözinden ṣorar göñül
b. Nāzüglük ile aġzını arar ẖaber çeker
7.a. İtme iñende dīde vü dilden şikāyeti
b. Kim cevr·i ʿışḳı pādişeh·i baḥr ü ber çeker
8.a. Rāġıb görür ḳaşuñ ile zülfüñ kemendini
b. Anuñ içün Necātī bu deñlu gerer çeker

|p146
feʿilātün feʿilātün feʿilātün feʿilün
1.a. ʿĀrıẓuñ gözleyelüm berg·i semenden ne biter
b. Ḳāmetüñ özleyelüm serv·i çemenden ne biter
2.a. Şekerīn būseleri vardur o şīrīn-dehenüñ
b. Biˀllāh ey bād·ı ṣabā ġonca diyenden ne biter
3.a. Hem-dem olmayıcaḳ ol āhū·yi müşgīn-ẖaṭ ile
b. Ey nesīm·i seḥerī deşt·i Ḫutenden ne biter
4.a. Hem-nişīn olmaz isem serv·i semen-berler ile
b. Sebze ẖançer görinür serv ü semenden ne biter
5.a. Yüzi cennet lebi kevs̲er boyı Ṭūbā var iken
b. Zühd·i ẖuşgi nideyin ben baña andan ne biter
6.a. Ey Necātī gül·i maḳṣūd girür ṣanma ele
b. Dehr bāġında vefā yoḳ bu dikenden ne biter

|p147
feʿilātün mefāʿilün feʿilün
1.a. Ġoncanuñ aġzı ḳatı yapraḳdur
b. Bülbülüñ ṣayrulıġı yañşaḳdur
2.a. Anuñ içün biri birine düşüb
b. İşleri ʿışḳ rāzın açmaḳdur
3.a. Ġam·ı ẖālüñ Ḳaraca Daġ gibidür
b. Ḳanlu yaşum Ḳızılca Irmaḳdur
4.a. Güher·i şeb-çerāġ olursa ḳamer
b. Gün yüzüñüñ ḳatında alçaḳdur
5.a. Ne ʿaceb murġ imişsin ey zāhid
b. Ki hemīşe murāduñ uçmaḳdur
6.a. Çoḳ günāhuma çoḳ gözüm yaşı var
b. Yüzi ḳara ̮ise aḳçesi aḳdur
7.a. Şīve·i ʿışḳı bāṭıl añlayana
b. Ey Necātī ne dir iseñ ḥaḳdur

|p148
mefʿūlü mefāʿīlü mefāʿīlü feʿūlün
1.a. Ġamzeñ çalışur laḥẓada ḳan eylemek ister
b. Būseñ dürişür anı yalan eylemek ister
2.a. Her ādemi bir būsede biñ yıl yaşadurlar
b. Sāḳīlerümüz ṭayy·ı zemān eylemek ister
3.a. Cānāne gelür ṣoḥbete gelmez degül ammā
b. Kendüzini cān gibi nihān eylemek ister
4.a. Ben ḳaṣd iderin ṣaḳlamaġa ʿışḳuñı ammā
b. Göñlüm ṭalabur āh ü fiġān eylemek ister
5.a. El virmiş iken ayaġına baş ḳo Necātī
b. Ki ̮ol şūẖ·ı cihān servi revān eylemek ister

|p149
fāʿilātün fāʿilātün fāʿilātün fāʿilün
1.a. Ġamzeler kim cān iline tīr·i müjgān yaġdurur
b. Beñzer ol tātāra kim siḥr ile bārān yaġdurur
2.a. Fürḳatüñden gözlerüm geh yaş aḳıdur gāh ḳan
b. Yoluña īs̲ār içün dürr ile mercān yaġdurur
3.a. Dūd·ı āhumdan duyar aġladuġum ẖalḳ·ı cihān
b. Ḳara yil esdükce bilürler ki ṭūfān yaġdurur
4.a. Ol ḳadar aḳdı gözümüñ yaşları kim geldi ḳan
b. Şimdiden geru aḳan seyl-ābı ḳandan yaġdurur
5.a. Leblerüñüñ sāġarından sāḳī·i ʿīsī-nefes
b. Cürʿa diyu ehl·i meclis üstine cān yaġdurur
6.a. İşigüñde āhum işiden döker göz yaşların
b. Nitekim ḳıble yili esse firāvān yaġdurur
7.a. Ṣan yaġar bārān·ı ẖışm ile tekerk·i pür-belā
b. Ol kemān-ebrū ḳaçan tīr ile peykān yaġdurur
8.a. Zülfüñ ucından göñüller düşdügin gören ṣanur
b. Ejdehādur kim aġızdan nār·ı sūzān yaġdurur
9.a. Ey Necātī kilk·i gevher-bāruña ḳıymet mi var
b. Dür olur her ḳaṭre kim ol ebr·i nīsān yaġdurur

|p150
fāʿilātün fāʿilātün fāʿilātün fāʿilün
1.a. Ġamzesine çeşm·i ẖāb-ālūd·ı dil-ber yaṣdanur
b. Şol dil-āver gibi kim yatduḳca ẖançer yaṣdanur
2.a. Ḫaṭṭ u ẖaddüñ ḥasretinden ey leṭāfet gülşeni
b. Sebzeler ṭopraḳ döşenür lāle ṭaşlar yaṣdanur
3.a. Kūyuña gelmege senden raḥm umar bī-dīn raḳīb
b. Cennete girmek içün ʿĪsāya kāfer yaṣdanur
4.a. Nice göñüllenmesün hindū·yi zülfüñ dōstum
b. Girde bāliş yirine ẖāl·i muʿanber yaṣdanur
5.a. Kām-gārā umaram ḳapuñda bende yir bulam
b. İşigüñde bende gibi anca çāker yaṣdanur
6.a. Bu mes̲eldür dōstum ṣaġ baş yaṣduġ istemez
b. Bir zevāli var ḳapuñ ẖōrşīd·i ẖāver yaṣdanur
7.a. Ḫāk·i pāyuñ üzre düşdügüm ṣabādan ḳorḳarın
b. Düzd ẖavfi olıcaḳ tüccār cevher yaṣdanur
8.a. Ḳaşuñ ile zülfüñi añub duʿālar itmege
b. Bu Necātī rūz u şeb miḥrāb ü minber yaṣdanur

|p151
mefʿūlü fāʿilātü mefāʿīlü fāʿilün
1.a. Ġamzeñ ki bir bir kirişme ile cāna ḳaṣd ider
b. Maḳṣūdı dil degülse nedür yā ne ḳaṣd ider
2.a. Ḳo çeksün acı dilleri deryā şol acı kim
b. Ḳor dişlerüñi lüˀlüˀ·i ʿummāna ḳaṣd ider
3.a. Çek ẓulm elini ġamze·i mestine hey di kim
b. Bir būse içün iki gözüm ḳana ḳaṣd ider
4.a. Vallāhi öldüre ̮idi yazuġı yoġ idi hīç
b. Şunlar ki derdi ḳor daẖi dermāna ḳaṣd ider
5.a. Derdā ki ʿādet eyledi gözler yabanları
b. Āhū gözüñ ki cānlara şīrāne ḳaṣd ider
6.a. ʿIşḳuña mālik olmaġı ister yegāne dil
b. Şol bir fedāyī gibi ki sulṭāna ḳaṣd ider
7.a. Ḳuluñ Necātīye ideli şāhum iltifāt
b. Şeyẖīyi ḳodı şī ve·i Selmāna ḳaṣd ider

|p152
feʿilātün mefāʿilün feʿilün
1.a. Ġaraẓum ʿışḳdan ḥaḳīḳatdür
b. Meyl·i naḳş·ı nigār ṣūretdür
2.a. Ṣōfī miḥrāb·ı ʿışḳa baş egmez
b. Bilmezüz anı kim ne milletdür
3.a. Sāḳiyā devri ḳo ṭolu ṣunıver
b. Nūş idelüm getür ki furṣatdur
4.a. Zāhide añma ẖūbı ki ̮āyīneye
b. Baḳmaz anlar ki zişt-ṣūretdür
5.a. İrevüz ʿāḳıbet öli dirili
b. Ḳāmet·i yāra kim ḳıyāmetdür
6.a. ʿIşḳ kim olmadı ḳıyāmete dek
b. ʿĀşıḳuñ boynına ġarāmetdür
7.a. Bir selāmet yaḳasına çıḳaran
b. Beni bu dāmen·i melāmetdür
8.a. Gerçi ẖōşdur Necātī zühd ü ṣalāḥ
b. Ḥālet·i ʿışḳ özge ḥāletdür

|p153
mefʿūlü fāʿilātü mefāʿīlü fāʿilün
1.a. Fānī cihānda gerçi ki çoḳ ġonca-leb güler
b. Her kim gülerse gül gibi hep bī-sebeb güler
2.a. Baş götürürken iki omuzında mār·ı zülf
b. Ḍaḥḥāk gibi lebleri nice ʿaceb güler
3.a. Biˀllāhi ey bahār nice ʿadldür bu kim
b. Bülbül hep aġlamaḳla geçer ġonca hep güler
4.a. Germ olduġınca meclis·i ʿuşşāḳ·ı mey-perest
b. Aṣḥāb·ı şevḳ girye ider bī-edeb güler
5.a. Ḫōrşīd·i rūzı şemʿ·i şeb-efrūzı neylesün
b. Bir ḥüsn ister ehl·i naẓar rūz u şeb güler
6.a. Pervāne gerçi ẖandesine şemʿuñ aldanur
b. Bilmez anı ki çoḳ kişi vaḳt·i ġaẓab güler
7.a. Gül-zār·ı ḥüsn içinde açılur gül·i murād
b. Her ġonca-leb ki būse idicek ṭaleb güler
8.a. Aġlar Necātī ḥasret ile çaḳ şu ḥadde kim
b. Bezm·i ṣafāda Ḫusrev·i ʿālī-neseb güler

|p154
mefʿūlü fāʿilātü mefāʿīlü fāʿilün
1.a. Ḳaddi ẖırāmı rūḥ·ı revāndan ẖaber virür
b. Ṭatlu kelāmı Çeşme·i Cāndan ẖaber virür
2.a. Ne gördi ne işitdi lebüñ gibi bir güher
b. Göñlüm gözüm ki baḥr ile kāndan ẖaber virür
3.a. Dirler ki cānı ḥoḳḳaya ḳoymış o bir ṭabīb
b. Yāruñ dehān ü lebleri andan ẖaber virür
4.a. ʿIşḳuñ ne deñlü ṣaḳlasam ol deñlü fāş olur
b. Nālem budur ki rāz·ı nihāndan ẖaber virür
5.a. Gel gel ki gökde istedügüñ yirde bulmışuz
b. Bezm·i şebāne özge cihāndan ẖaber virür
6.a. Menşūr·i ḥüsni olmaġa ḥükm·i cihān-muṭāʿ
b. Zülf ü dehānı möhr ü nişāndan ẖaber virür
7.a. Zülfi ki ʿarẓ ider dil·i dīvāne ḥālini
b. Bir zāġdur ki ġāˀib olandan ẖaber virür
8.a. Sāḳī firişte nuḳl sitāre mey āfitāb
b. Bezm·i piyāle kevn ü mekāndan ẖaber virür
9.a. Bülbül gibi çemende dil ü cān ẖurūş idüb
b. Sen serv-ḳadd ü ġonca-dehāndan ẖaber virür
10.a. Dāˀim Necātī gülşen·i kūyuñ añar durur
b. Vāʿiẓ gibi ki bāġ·ı cināndan ẖaber virür

|p155
mefʿūlü fāʿilātü mefāʿīlü fāʿilün
1.a. Ḳan itse müjeñ laʿl·i güher-zāyi ḳınarlar
b. Mūsā içün olur bu ki ʿĪsāyi ḳınarlar
2.a. Eksükligini yüzine urma ḳamerüñ kim
b. Yoẖsula ʿitāb eyleyicek bayı ḳınarlar
3.a. Aʿdāya hüner ʿaybdürür göge çıḳarsam
b. Gice ̮ile gezermiş diyicek ayı ḳınarlar
4.a. Cevr eyleme kim vaṣl güni utanısarsın
b. Mīve gelicek serv·i dil-ārāyi ḳınarlar
5.a. El-minnetü liˀllāh ki bu gün devr·i lebüñde
b. Nūş eyleyicek sāġar u ṣahbāyı ḳınarlar
6.a. Feryād ü fiġān eylemelüdür ki güzeller
b. Aʿdā sözine uyub aḥibbāyi ḳınarlar
7.a. Meyẖānelere küp düşer iken yine ṣōfī
b. Mescidde varub bāde·i ḥamrāyi ḳınarlar
8.a. Yoẖ yirlere ẖarc eyleme sözüñi Necātī
b. Söyler diyu ṭūṭī·i şeker-ẖāyi ḳınarlar

|p156
mefʿūlü fāʿilātü mefāʿīlü fāʿilün
1.a. Ḳaşuñ kemānı ḥālini iller ḳaçan bilür
b. Ḳatı baġırlu olduġın anuñ çeken bilür
2.a. Cellād·ı ġamzelerle dirilmek ḳolay mıdur
b. Öldürmege bir ādemi biñ dürlü fen bilür
3.a. Aġzın biçaḳlar açmaya ṣoḥbetde pistenüñ
b. Anuñ dilini ol büt·i şekker-şiken bilür
4.a. Ol cāduvāne gözleri ben bildügüm bu kim
b. Mekkār·ı ġamze-zendürür anı bilen bilür
5.a. ʿUryānlıġ ile cānı çıḳubdur Necātīnüñ
b. Tābūtı ẖılʿat ü kefeni pīrehen bilür

|p157
mefāʿilün feʿilātün mefāʿilün feʿilün
1.a. Ḳapuñ cihānda şehā ben ḳula penāh yiter
b. Ṭavāf·ı kaʿbe gerekmez bu secde-gāh yiter
2.a. Ġam·ı zemāndan emīn olmaġa saña ey dil
b. Ḥarīm·i dergeh·i pīr·i muġān penāh yiter
3.a. Melūl olma göñül devr virse cāhile cāh
b. Saña çü ehl·i hüner olduġuñ günāh yiter
4.a. Ḳarañu gicelerüm itmege benüm rūşen
b. Derūn·ı dilden irişen şuʿāʿ·ı āh yiter
5.a. İrerse başı Necātīnüñ ey meh eflāke
b. İşigi tozı anuñ başına külāh yiter

|p158
mefʿūlü fāʿilātü mefāʿīlü fāʿilün
1.a. Ḳaddüñe luṭf ẖılʿat·i ḥüsn ü bihā biçer
b. Bir kez yüzüñi görmege cānlar behā biçer
2.a. Ey sidre saña beñzemesün yoẖsa bāġ-bān
b. Servi yonar ṣanevberi ẖōş müntehā biçer
3.a. Nāsün maʿaˀl-libāsü veraʿ ehli oḳuyub
b. Tezvīr eliyle cāme·i zerḳ u riyā biçer
4.a. Yır itdi yüzüm üstine aḳmaġla göz yaşı
b. Seyl-āb olur ki yolları ey reh nümā biçer
5.a. Dünyā Necātīyā yime içmekdürür velī
b. Yimez zemāne ġuṣṣasın ol kim şarāb içer

|p159
mefāʿilün feʿilātün mefāʿilün feʿilün
1.a. Ḳaşuñla kirpügüñ elbette cānı gözlerler
b. Ṣan iki atıcılardur nişānı gözlerler
2.a. Şol iki ṭurra boyun virdi ʿāşıḳa ammā
b. Ol iki āhū·yi miskīn yabanı gözlerler
3.a. Bulımayınca beni ġuṣṣa vu ġam āhumdan
b. Gice ̮ile āteşi gündüz duẖānı gözlerler
4.a. Ḳara ṣaçuñ yüzüñe düşse uşbu ẖalḳ·ı cihān
b. Güneş ṭutuldı diyu āsumānı gözlerler
5.a. Yine güni görecek gözi yoḳ sitārelerüñ
b. O māh·ı bürc·i saʿādet olanı gözlerler
6.a. Yüzin görince güneş ṭoġdı diyu maġribden
b. Bu zülf·i fitne·i āẖır zemānı gözlerler
7.a. Necātī ol meleke yol bula mı dīv·i raḳīb
b. Felek firişteleri cümle anı gözlerler

|p160
fāʿilātün fāʿilātün fāʿilātün fāʿilün
1.a. Ḳocmaġa el virmeyen serv·i dil-ārādan nolur
b. A benüm çoḳ sevdügüm ḳurı temāşādan nolur
2.a. Başdan ayaġa günāh olursa düşmez boynuma
b. Ṣaġlu ṣollu ṣalınan zülf·i semen-sādan nolur
3.a. Māniʿ olma ḳo ṣalınsun cān ile dil zülfüñe
b. Ol sevād·ı Şāmdur bir iki şeydādan nolur
4.a. Geldi ẖaṭṭ·ı müşg-bāruñ ḳıl vefā didüm didi
b. Daʿvī·i tezvīrden bāṭıl temennādan nolur
5.a. Çünki bir gice ḳavuşmaz sen meh·i bī-mihr ile
b. Yire geçsün nideyin eşk·i s̲üreyyādan nolur
6.a. Rind·i ser-meste naṣīḥat ẖalḳ içinde eyleme
b. Vāʿiẓā ẖüşyār iseñ ṣoḥbetde ġavġādan nolur
7.a. Vāḳıʿa ̮ile baġlayımazsın Necātīnüñ gözin
b. Düşüñ ise ẖayr ola ṣōfī bu rüˀyādan nolur

|p161
feʿilātün feʿilātün feʿilātün feʿilün
1.a. Gülşene serv·i çemen şöyle eli ḳurı varur
b. Anuñ içün bir adım yir gidemez ṭurı varur
2.a. Dik gelürmiş ḳad·i cānāneye yabanda çinār
b. Gelüñ inṣāf idelüm kim ḳati aşurı varur
3.a. Bulanur ḳanlu yaşum ḥüsn bahārında velī
b. Hele sen sev ayaġına varıcaḳ ṭurı varur
4.a. Yine ẖışm ile ṭurub gitdüñ eyā serv·i revān
b. Saña yol kesmek içün göz yaşı arḳurı varur
5.a. Ḥüsnüñüñ çavı bütün ʿālemi ṭutdı ṣanemā
b. Gün gibi kim yedi iḳlīme degin nūrı varur
6.a. Şöyle burdı ḳulaġın dehr Necātīnüñ kim
b. İñlese Zöhreye dek naġme·i ṭanbūrı varur

|p162
fāʿilātün fāʿilātün fāʿilātün fāʿilün
1.a. Gülşen·i ḥüsnüñde kim ṭāvūs·ı zülfüñ bāl açar
b. Ṭāliʿüm mesʿūd olur baẖtum der·i iḳbāl açar
2.a. Dāl·i devlet gösterür zülf·i dil-āvīzüñ senüñ
b. Cān cemālüñ muṣḥafından her ḳaçan kim fāl açar
3.a. Yüzüñi göstermesün aġyāra zülfüñ key ṣaḳın
b. Mār olan şeyṭāna cennet ḳapusın derḥāl açar
4.a. Sāḳiyā göñlüm ḳarardı luṭf idüb bir būse vir
b. Ḳayġulu göñülleri dirler şarāb·ı āl açar
5.a. Dil-berā ẖāl·i lebüñ rāz·ı dehānuñ ḳıldı fāş
b. Şöyle kim esrār·ı ġaybı noḳṭa·i remmāl açar
6.a. Nitekim ẓulmet çerāġuñ rūşenāsın arturur
b. Rengini ruẖsāruñuñ zülf ile ẖaṭṭ u ẖāl açar
7.a. Şād olur olsa Necātī işigüñde rūy-māl
b. Ehl·i dünyā gibi kim göñlini rūy·i māl açar

|p163
mefāʿilün feʿilātün mefāʿilün feʿilün
1.a. Göñül cemāl·i muʿanber-niḳāb ile oynar
b. Ḥaḳīr ẕerreyi gör ki ̮āfitāb ile oynar
2.a. Niçün hemīşe egilüb öper lebüñ zülfüñ
b. Ne hindūdur bu ki yāḳūt·ı nāb ile oynar
3.a. Yetīmler gibi şāhā iki gözüm bebegi
b. Maḥalleñ içre oturmış türāb ile oynar
4.a. Faḳīr iken ḳademüñde ġanī olub çeşmüm
b. İkisi de bile dürr·i ẖōş-āb ile oynar
5.a. Ruẖ u lebin ḳo göñül kim ẕübāb ü pervāne
b. Çün ölümi gele şemʿ ü şarāb ile oynar
6.a. Ġamuñla āhumı görüb raḳīb raḳṣ eyler
b. Ḳarañu gicede Şeyṭān şihāb ile oynar
7.a. Raḳīb ile işigüñde Necātī ṣubḥ ideli
b. Çemende bülbüli gördüm ġurāb ile oynar

|p164
fāʿilātün fāʿilātün fāʿilün
1.a. Kendüyi taʿrīf idermiş müşg·i ter
b. Öksüz oġlan göbegin kendü keser
2.a. Terk·i ser ider ezilür ḳarşuña
b. Rāstı ṣarb aṣılasıdur şeker
3.a. Bī-vefādur itdügi ̮içün çoḳ günāh
b. Ḳalbüñi ṭaş itdi Allāhum meger
4.a. Ḥālümi eşküm didi gūş eyle gūş
b. Söz güherdür pādişāhum söz güher
5.a. İdeyin rusvā ne ʿavretdür cihān
b. Ẕerre deñlü himmet itsün baña er
6.a. ʿIşḳ bezminde mey·i ġamdan murād
b. Bī-ẖaber olmaġ imiş aldum ẖaber
7.a. Göze görünmez Necātī şiʿri līk
b. Bir perīdür ādemi bī-hūş ider
8.a. Dimezin şiʿre hünerdürür velī
b. Buncılayın şiʿr dimek key hüner

|p165
mefʿūlü fāʿilātü mefāʿīlü fāʿilün
1.a. Güller çemende kendülerin nāzenīn ṭutar
b. Nāz ile gülse aġzına ġonca yeñin ṭutar
2.a. Ol ḥüsn·i dil-fürūz ile bu ẖaṭṭ·ı müşg-bār
b. Bir bāġdur ki dāˀiresin yasemīn ṭutar
3.a. Ey ẖāce vāʿiẓ oḳuduġı ṭutsun anı kim
b. Gül mevsiminde tevbeyi meyden yegin ṭutar
4.a. Şīrīn lebüñle germ olur ol çeşm·i hāb-nāk
b. Tātārlar gibi ki mey·i engebīn ṭutar
5.a. Pīr·i muġān ayaġını menʿitme ey faḳīh
b. ʿĀḳıl mi dirler aña ki cömerd elin ṭutar
6.a. Yüz gösterür hemīşe müselmānlıġa ẖaṭuñ
b. Kāfir dimeñ siz aña ki maẖfīce dīn ṭutar
7.a. Ruẖsār·ı dil-firībe zırıhlar geyürdi ẖaṭ
b. Beñzer yine Necātī·i miskīne kīn ṭutar

|p166
mefʿūlü fāʿilātü mefāʿīlü fāʿilün
1.a. Gülşenden ise ʿāşıḳa dil-dār ẖōş gelür
b. Cennetden ise ʿārife dīdār ẖōş gelür
2.a. Depretme servi aġzını açdurma ġoncanuñ
b. Reftār·ı yār ü şīve·i güftār ẖōş gelür
3.a. Çün bülbüli gül açdı güli ẖār besledi
b. ʿUşşāḳa yār ü yāra da aġyār ẖōş gelür
4.a. Dirler ki yār ile ṣatu bāzār eylemeñ
b. Vallāhi baña yār ile bāzār ẖōş gelür
5.a. Ben derd·i dilden iñlerin ol şādumān olur
b. Zīrā ṭabībe nāle·i bīmār ẖōş gelür
6.a. Zehr içüb ölmeyeyin ü dirileyin diyu
b. Ben ẖastasına yār·ı dil-āzār ẖōş gelür

|p167
fāʿilātün fāʿilātün fāʿilātün fāʿilün
1.a. Dilleri yirden götürmek zülfüñüñ āyīnidür
b. Ḥaḳḳını yitirmek olmaz ẖaylı yol miskīnidür
2.a. İşigüñ dünyāda cānā ʿāşıḳuñ miʿrācıdur
b. Āẖıretde cennet·i aʿlā·yi ʿilliyyīnidür
3.a. Ey yüzi ṣuḥf·i İlāhī dīnüm īmānum ḥaḳı
b. Ehl·i ḥālüñ yüzüñ īmānı ve ʿışḳuñ dīnidür
4.a. Sen melek yüzüñ güneş alnuñ ḳamer ḳaşuñ hilāl
b. İşigüñ gök yüzidür yaşum anañ pervīnidür
5.a. Uçsa bu ẖākī ḳafesden ṭañ mı dil şeh-bāzı kim
b. Bir ḳara gözlü saʿādet şāhīnuñ lāçīnidür
6.a. Ölicek üstümde bulunsun īmām·ı ʿışḳ kim
b. Ḳurtaran Şeyṭāndan īmānum anuñ telḳīnidür
7.a. Ruẖlarından şākirüz Ḥaḳ bir günin biñ eylesün
b. Cevr iden bī-dillere şol kākül·i bī-dīnidür
8.a. Menbaʿ·ı Āb·ı Ḥayāt ol laʿl·i rūḥ-efzāsıdur
b. Maṭlaʿ·ı ṣubḥ·ı saʿādet ṭurrasınuñ çīnidür
9.a. Pāklikden ġayrı nem gördüñse söyle dōstum
b. Kimseye yüz virmemek āyīnenüñ āyīnidür
10.a. Yaraşur dinse Necātī ṭabʿına meşşāṭa kim
b. Bir gelincikdür ẖayāl elfāẓ anuñ tezyīnidür

|p168
feʿilātün feʿilātün feʿilātün feʿilün
1.a. Gülleri bād·ı ṣabā ḳanda bulursa yaḳalar
b. Çaḳ olubdur ṣanemā ʿışḳuñ elinden yaḳalar
2.a. Cūş idüb ḳanlu yaşı lāle gibi Ferhāduñ
b. Ḳızarubdur yine ṭaġlar etegi ̮ile yaḳalar
3.a. Ne revādur bu ki ben hecr odına yanmış iken
b. Degme ḥayvānı ̮iledüb vaṣl ṣuyına yıḳalar
4.a. Sevinür ellerini ḳana boyaduḳca nigār
b. Şol güzeller gibi kim eline ḥınnā yaḳalar
5.a. Ey Necātī hele ben gördügümi söyleyeyin
b. Nice ̮ola neyleyeler ġāyeti bu kim yaḳalar

|p169
mefāʿilün feʿilātün mefāʿilün feʿilün
1.a. Güzeldür iki cihāndan murād söz bir olur
b. Şu kim iki diye bir sevdügine ḳāfir olur
2.a. Mesīḥ-vār virürken ḥayāt mürdelere
b. ʿAceb budur leb·i cān-baẖşı ḳan içer diri ̮olur
3.a. İşigi tozı ne iksīr olur ki şems ü ḳamer
b. Yüzini sürmeyicek altun adı baḳır olur
4.a. Şu kim güzeller içün cān·ı pāk ide teslīm
b. Cenāzesine anuñ çoḳ firişte ḥāẓır olur
5.a. Bir azçuḳ egleni dur gitme ey çerāġ·ı ümīd
b. Ki bir ġarīb·i belā-keş bu gün müsāfir olur
6.a. Ayaġı ṭopraġına cān ü başı terk itmek
b. Ben ey göñül saña biñ biñ didüm ki bir bir olur
7.a. Necātī Mıṣra bedeldür cenāb·ı cānāne
b. Gelüb ḳul olıbilenler ḳati ekābir olur

|p170
mefʿūlü fāʿilātü mefāʿīlü fāʿilün
1.a. Göñlüme gāh nestren ü geh semen gelür
b. Dervīş ölüsine nice yerden kefen gelür
2.a. Cānlar virürin ölmege hecrüñde şöyle kim
b. Tābūt ile kefen baña serv ü semen gelür
3.a. Sünbül ṣaçuñla nergis·i bīmāruñ özleyen
b. Bād·ı ṣabā gibi ḳamu yoldan esen gelür
4.a. Ben ol dehāna yoḳ dir isem süz gelür baña
b. Yoḳ yirden ādemī söz işitmek neden gelür
5.a. Seng·i cefāyı yazmaz urur çarẖ·ı bī-vefā
b. Ben muʿteḳid aña ki başa yazılan gelür
6.a. Meyl iderüz Necātī gibi tevbeye velī
b. Ey ẖāce ḳorḳaruz yine vaḳt·i çemen gelür

|p171
mefʿūlü fāʿilātü mefāʿīlü fāʿilün
1.a. Göklerde āh ü yirde yaşum mā-cerāsıdur
b. Her bir diyāruñ añılan āb u havāsıdur
2.a. Ṭaġlar ḳadar niyāz u tevaḳḳuʿ yiter baña
b. Ferhāda Bīsütūn temennā ḳayasıdur
3.a. Peykānlarını yaralarum gözle yidiler
b. Gizlendügi içerde hep anuñ belāsıdur
4.a. Miske ṣatarsa bād·ı ṣabā ayaġuñ tozın
b. Çoḳ nāfenüñ derisine dolu behāsıdur
5.a. Aġzına dil ṣoḳar egilüb şīşe sāġaruñ
b. Ṣaḳın öper lebüñi cihān bī-ḥayāsıdur
6.a. Aydın içinde tīre (Tīre) dürür ẖāl·i ʿārıẓuñ
b. Ruẖsār Germiyan ẖaṭ·ı müşgīn (Ḳarası) dür
7.a. Bildüm Necātī şiʿrüñe şöhret viren nedür
b. Rengīn ẖayāl ü şīve ile ẖūb edāsıdur

|p172
fāʿilātün fāʿilātün fāʿilātün fāʿilün
1.a. Gül-be-şekker ki ̮āfitāb·ı ḥüsn ile perverdedür
b. Var ise ol ḥoḳḳa·i laʿl·i leb·i dil-berdedür
2.a. Āyet·i ḥüsni yüzine baḳabilmez müddeʿī
b. Gel berü bir bir işit kim ḥarf ḥarf ezberdedür
3.a. Gözüñ aç kim tūtiyā·yi ẖāk·i pāy·i dil-bere
b. Ey ḥāḳīḳatden ẖabersüz kendü gözüñ perdedür
4.a. Şīve·i reftār ile ḳadd·i dil-ārā rāstı
b. Egdi serv·i ser-keşi şimdi naẓar ʿarʿardadur
5.a. Sīne dāġın dāġ ṣanmañ möhr urubdur mihr·i dōst
b. Genc·i ʿışḳı üstine kim sīne·i çākerdedür
6.a. Faḳr evinden yüz çevürme ey dil·i dervīş kim
b. Derd bu derd ise derdüñe devā bu derdedür
7.a. Meskenet yolın güneşden ögren ey meh-pāre kim
b. Göklere irişdi başı daẖi yüzi yerdedür
8.a. Maʿnī·i ẖāṣṣa Necātī yaraşur terkīb·i ṣāf
b. Gūşvāre zīnet olmaz olmayınca zerde dür

|p173
feʿilātün feʿilātün feʿilātün feʿilün
1.a. Gülşen·i ḥüsn ü cemalüñ ki ḳış u yaz açılur
b. Ṣan İrem bāġıdurur gülleri durmaz açılur
2.a. Bilmezem nice diyem vaṣf·ı dehānuñ ẖaberin
b. Söylemezsem ölürem söyler isem rāz açılur
3.a. Her ḳaçan kim iderem ḥüsni kitābına naẓar
b. Her varaḳda nice biñ mesˀele·i nāz açılur
4.a. Girih·i zülfüñi çözseñ dil ü cān almaġ içün
b. Ṣayd şeklinde hezārān per·i şeh-bāz açılur
5.a. Ey Necātī bu cihānda açılur çoḳ gül·i ter
b. Ruẖ·ı dil-ber gibi gül līkin iñen az açılur

|p174
mefʿūlü mefāʿīlü mefāʿīlü feʿūlün
1.a. Güzelde murād ān olur endām degüldür
b. Keyfiyyet olur meyde ġaraẓ cām degüldür
2.a. Ṭoġrusı bu kim ḳāmet·i dil-dārum öñinde
b. Serv·i çemenüñ ṭurışı endām degüldür
3.a. İlerde delü ḳanlu idi bāde be-ġāyet
b. Duruldı biraz şimdi iñen ẖām degüldür
4.a. Ḳış günleri geldi hele ben bildügüm oldur
b. Ḥasretle geçen giceler eyyām degüldür
5.a. Zülf ü ruẖı şeydāsına kim diye Necātī
b. Kim düni güni ḳadr ile bayram degüldür

|p175
mefāʿīlün mefāʿīlün feʿūlün
1.a. Güzeller ġamzeyi tekrār iderler
b. Kişiyi dünyeden bīzār iderler
2.a. Anuñ içün ṣınur kākülleri kim
b. Varurlar ḳalb ile bāzār iderler
3.a. Dehānın añma zülfinden ḥaẕer ḳıl
b. Ki gördüm diyeni ber-dār iderler
4.a. Ser·i zülfüñ var iken ḳurı yiter
b. Hevā·yi nāfe·i tātār iderler
5.a. Güneş yüzlülerüñ yanduḳ elinden
b. Yanınca sāyesinden ʿār iderler
6.a. Cefāya ṣabr iden irer vefāya
b. Ki bīmār olana tīmār iderler
7.a. Güzellerden vefā gelmek ne mümkin
b. Cefā dirseñ iñen bisyār iderler
8.a. Necātī ẖūb-rūlardan ṣaḳın kim
b. Alurlar göñlüñi inkār iderler
9.a. Bu muʿciz naẓmı görüb ehl·i eşʿār
b. Ġazel dimekden istiġfār iderler

|p176
müfteʿilün mefāʿilün müfteʿilün mefāʿilün
1.a. Gerçi ki şeyẖ·i ṣavmaʿa tevbeye dest·i ḥaḳ ṣunar
b. Sāḳiyi gör ki luṭf idüb el diyene ayaḳ ṣunar
2.a. Gülşene gel ki cām·ı mey nūş idicek öpüşmege
b. Gül yañaġın ṭutıvirür ġonca gelür ṭudaḳ ṣunar
3.a. Ḳaşları baş bir eyleyüb çeşmine ġamze ögredür
b. Ḳana şerīk olur şu kim mest eline yaraḳ ṣunar
4.a. Bezm·i cemāl·i dōstda içmege rind·i pārsā
b. Ġonca lebi şarāb·ı ter gül yañaġı ʿaraḳ ṣunar
5.a. Cān ile saña göñlini virse Necātī ṭañ degül
b. Ḥüsn ü bihā çerāġısın her kişi bir adaḳ ṣunar

|p177
fāʿilātün fāʿilātün fāʿilātün fāʿilün
1.a. Laʿl·i şīrīnüñ ki Ḫıẓruñ Çeşme·i Ḥayvānıdur
b. Ṣaḳınursın ẖasta dilden ṣan kim ādem cānıdur
2.a. Geldügince ġam göñül mülkine cān ḳarşu çıḳar
b. Nice ʿizzet itmesün bir memleket sulṭānıdur
3.a. Meyl iderse ḥadd ü ḳaddine raḳīb uşanmasun
b. Ki ̮ol gül·i şimşād-perver gülşeni rūḥānīdür
4.a. Ẕerre gibi revzenüñden her seḥer düşer güneş
b. Şöyle beñzer ki ̮āfitāb·ı ḥüsn ser-gerdānıdur
5.a. Kaʿbe ise ʿārıẓuñ zülf·i siyehdür örtüsi
b. Cennet ise ruẖlaruñ s̲uʿbān ṣaçuñ der-bānıdur
6.a. Çeşm·i ser-mesti Necātī gerçi ḳattāl añılur
b. Ol leb·i şīrīni gel gör kim ne ādem cānıdur

|p178
fāʿilātün fāʿilātün fāʿilātün fāʿilün
1.a. Luṭf idersin sen gelürseñ mürde cisme cān gelür
b. Nāme yazub gönderirseñ bendeye ʿunvān gelür
2.a. Dün gice beytüˀl-ḥazende fürḳati ̮ile āh kim
b. Ol ḳadar aġlamışam kim yaş yirine ḳan gelür
3.a. Ġamzeñe ıṣmarla ḳatlüm kirpügüñ gözden ṣavar
b. Çün mesīḥādur lebüñ ölmek iñen āsān gelür
4.a. Müddeʿīler ḳorḳusından dil-ber·i ʿāşıḳ-nevāz
b. Gün gibi rūşendür ammā cān gibi pinhān gelür
5.a. Rişte·i naẓma naṣīḥat dürlerin düzdüñ velī
b. Ey Necātī dil-bere ol sözlerüñ yalan gelür

|p179
feʿilātün feʿilātün feʿilātün feʿilün
1.a. Lebüñe cān ü dili ẖaṭṭ·ı semen-bū getürür
b. Ki meyüñ ṣoḥbetine ādemi ḳayġu getürür
2.a. Ser·i kūyuña şarāb içmeyicek varımazın
b. Ten·i ẖāşākümi ol gülşene bu ṣu getürür
3.a. Nice bir zühd ü veraʿ ṣaflarını bozmaġ içün
b. Ḫaṭ u ẖālüñle müjeñ leşker·i hindū getürür
4.a. Baña sensüz feleküñ şehd ü şeker ṣunduġını
b. Ṣanuram kim yedi ṭasdan geçer aġu getürür
5.a. Ḫaṭ u ẖālüñ ẖaberin virdi ṣabā zülfüñden
b. Döndi ol ẖāce·i hindūya ki dārū getürür
6.a. Ser·i kūyuña alub gelse Necātī göñlin
b. Aña benzer ki şifā-ẖāneye ṣayru getürür

|p180
feʿilātün feʿilātün feʿilātün feʿilün
1.a. Mest olur murġ·ı çemen gül yaḳalar çāk eyler
b. ʿĀrif·i vaḥdet olanlar bunı idrāk eyler
2.a. Kimi kim bād·ı fenādan ṣaḳına pīr·i muġān
b. Bir iki cürʿa ile ẖākini nem nāk eyler
3.a. Dūd·ı āhı ̮ile şirār·ı cigerinden ʿāşıḳ
b. Ṭaʿne·i kār-geh·i encüm u eflāk eyler
4.a. Yoḳ dime ẖāṣıyet·i bādeye kim luṭf·ı Kerīm
b. Gülde bū yaradur u efʿīde tiryāk eyler
5.a. Ṭutamaz ṣōfī melāmet oḳına sīne siper
b. Yine bu şīveleri ʿāşıḳ·ı bī-bāk eyler
6.a. Hele cārūb·ı müjem ḳomadı yoluñda ġubār
b. Ki miyān-beste olanlar yolını pāk eyler
7.a. Yā Rab ol ḥoḳḳa·i laʿlīn ne müferriḥdür kim
b. Her nefes nice Necātīyi feraḥ-nāk eyle

|p181
feʿilātün mefāʿilün feʿilün
1.a. Müjde ey dil gelen ḥabībüñdür
b. Dil ü cān derdine ṭabībüñdür
2.a. Leb ü laʿlinden anuñ ayrılma
b. Ezelī ḳısmet ü naṣībüñdür
3.a. Aḳıdan aġzı ṣuyını cāmuñ
b. Leb·i cān-baẖş ü dil-firībüñdür
4.a. Ġabġabuñdur turunc·ı ter ẕeḳānuñ
b. Bāġ·ı ḥüsnüñde tāze sībüñdür
5.a. Dil·i miskīn ṣaçuña varduġı bu
b. Bilür anı ki dün ġarībüñdür
6.a. Didi kimdür şu it gibi dalaşan
b. Didüm ey dōst uş raḳībüñdür
7.a. Güle baḳsañ Necātīnüñ yüzine
b. Nola ey dōst ʿandelībüñdür

|p182
mefʿūlü mefāʿīlün mefʿūlü mefāʿīlün
1.a. Laʿl·i güher-engīzüñ şekker-şiken olmışdur
b. Gīsū·yi dil-āvīzüñ müşg·i Ḫuten olmışdur
2.a. Gözüm ile göñlümüñ ẖōş āb u havāsı var
b. Sulṭān·ı ẖayālüñe tā kim vaṭan olmışdur
3.a. Yā Rab ne cemāl olur bu çihre ki müştāḳı
b. ʿĪd ayı gibi dāˀim her merd ü zen olmışdur
4.a. Meydān·ı viṣālüñde ṣalınmaġa ʿāşıḳlar
b. Bayram·ı cemālüñde zülfüñ resen olmışdur
5.a. Ḫāl·i ruẖi dil-dārūñ ẖōd bir ḳara ḳulluḳcı
b. Şol Mıṣra ʿazīz olmaḳ ya Rab neden olmışdur
6.a. Ḫusrev ideli himmet bī-çāre Necātīye
b. Şeyẖī gibi eşʿārı ẖūb ü ḥasen olmışdur

|p183
fāʿilātün fāʿilātün fāʿilātün fāʿilün
1.a. Müntehā ḳaddine çün ʿālī-naẓarlar baḳdılar
b. Ṣu gibi ol serv·i nāzuñ ayaġına aḳdılar
2.a. Ṭaşradur başuñ diyu bāġ·ı ḥarīm·i yārdan
b. Murġ·ı gülşen başına serv·i revānuñ ḳaḳdılar
3.a. Ḫusrevā şīrīn lebüñe ̮öykündügi ̮içün şekkerüñ
b. Aṣdılar bāzārda boynına urġan daḳdılar
4.a. Ol mehüñ öykündügi ̮içün mihr·i ruẖsārına şemʿ
b. Cemʿ olub pervāneler başına odlar yaḳdılar
5.a. Ey Necātī çün ezeldendür maḥabbet yār ile
b. Pes ne maʿnīden seni ol dil-rübāya çaḳdılar

|p184
fāʿilātün fāʿilātün fāʿilātün fāʿilün
1.a. Nāz ile cānānumuz kim laʿl·i cān-perver ṣunar
b. Şūẖ dil-berdür aġzından ṣanasın şekker ṣunar
2.a. Bezm·i ḥüsn içinde dāˀim mest·i nāz olmaġ içün
b. Lebleri her laḥẓada cām·ı mey·i aḥmer ṣunar
3.a. Gerçi çeşmüñ bī-muḥābā öldürür ʿāşıḳları
b. Ġamzeñüñdür ṣuç ki mestüñ destine ẖançer ṣunar
4.a. Çeşm·i giryānum sevindürsin izüñ tozı ̮ile bād
b. Sāyile ʿādetdürür erbāb·ı himmet zer ṣunar
5.a. Cānı bī-hūş itmek içün gözlerümden dem-be-dem
b. Bezm·i ġamda sāḳī·i miḥnet iki sāġar ṣunar
6.a. Baḥr·ı ġamda serv ile gülden nola umsam meded
b. Ġarḳ olanlar ẖār ile ẖaşāke ey dil-ber ṣunar
7.a. Ḳapuña it bigi varurdum ulumasa raḳīb
b. Ḳorḳum oldur baña bir gün ol seg·i kāfer ṣunar
8.a. Leblerüñ senbūsesine diş bilermiş it raḳīb
b. Niʿmetine ḥüsñüñüñ biˀllāhi gör kimler ṣunar
9.a. Nolduñ ölürsin Necātī laʿl·i rūḥ-efzā·yi dōst
b. Āb·ı Ḫıẓr ile leb-ā-leb cām·ı İskender ṣunar

|p185
fāʿilātün fāʿilātün fāʿilātün fāʿilün
1.a. Mīvesi her şīvenüñ luṭf ile būstānuñdadur
b. Fitnesi āẖır zemānuñ çeşm·i fettānuñdadur
2.a. Ey naṣīḥat eyleyen ben bī-dile dil-dār içün
b. Hey ne derdüñ var senüñ göñülcügüñ yanuñdadur
3.a. Derd ile çāk·i girībān eyleyen eller bugün
b. Rūz·i maḥşerde senüñ ser-cümle dāmānuñdadur
4.a. Vaṣl·ı yār olmayıcaḳ saña ne dermān ey göñül
b. Ḫalḳ·ı ʿālem ṭutayın kim cümle dermānuñdadur
5.a. Laʿl·i cānān şevḳine yansañ yaḳılsañ nola kim
b. Ey Necātī āteş·i fürḳat senüñ cānuñdadur

|p186
fāʿilātün fāʿilātün fāʿilātün fāʿilün
1.a. Nev-bahār eyyāmı geldi ʿayş ü ʿişret çaġıdur
b. Tevbelerle gül ḳızıl düşman sucı ḳan yaġıdur
2.a. Ḳani ol ʿālī-naẓar kim sīm ü zer didüklerin
b. Nergis·i şehlā gibi gözi görürken ṭaġıdur
3.a. Nice ölmesün bir ādem nice döysün bir kişi
b. Ey felek fiʿlüñ yedi ḳat ṭası geçmiş aġıdur(aġu)
4.a. İtmeyem sensüz ayaḳ seyrin çemenden yaña kim
b. ʿĀşıḳ·ı dīdār olana cennet ayaḳ baġıdur
5.a. Ġam belürsüz olduġınca buldururlar göñlüme
b. Hep bilürler kim ezelden yiridür yataġıdur
6.a. Güneşe didüm ki niçün kimse baḳmaz yüzüñe
b. Didi bu şol bir güzeller şāhınuñ yasaġıdur
7.a. Ṭopraġı altun ider cānā eyü baḳışlaruñ
b. Bende·i muẖliṣ Necātīde ayaḳ ṭopraġıdur

|p187
fāʿilātün fāʿilātün fāʿilātün fāʿilün
1.a. Nice bir dil şīşesin seng·i firāḳ·ı yār ṣır
b. Gel teraḥḥum ḳıl ki ġurbet içre göñlüm yarṣır
2.a. Bildügini ʿaḳlumuñ ol zülf·i ser-keş ṭaġıdur
b. Leşkerini ṣabrumuñ ol ġamze·i ẖūn-ẖār ṣır
3.a. Ḥāşe liˀllāh kim nigāruñ ḥüsnini eksilde ẖaṭ
b. Hey maʿāẕaˀllāh ḳaçan gül revnaḳını ẖār ṣır
4.a. Zülfe di ṭolaşmasun dil naḳdini almaġ içün
b. Ġāfil olmasun kişiyi ḳalb ile bāzār ṣır
5.a. Muṣḥaf·ı ḥüsnüñde ẖaṭṭuñ yazduġı āyet bu kim
b. Rūm ili yaġmāya varub müˀmini küffār ṣır
6.a. Ḳāmet·i servi havā·yi ḳadd·i ẖōş-reftār eger
b. Nāfe·i tātārı būy·i zülf·i ʿanber-bār ṣır
7.a. Rūy·i ẖūba baḳma ölürsin dimiş nāṣiḥ dile
b. Öldügine baḳmayub perhīzin ol bīmār ṣır
8.a. Sen zebūn olma Necātī gerçi kim çoḳdur günāh
b. Biñini ʿıṣyān çerisinüñ bir istiġfār ṣır

|p188
mefāʿilün feʿilātün mefāʿilün feʿilün
1.a. Nihāli ḳāmetüñüñ rūzigāra nāzlanur
b. Ki serv·i nāz hemīşe bahāra nāzlanur
2.a. Leb·i şeker-şikenüñ būseye olur ḳāyil
b. Belā budur ki miyānuñ kināra nāzlanur
3.a. Gözüñdedür yine sāḳī şarāb·ı nāz senüñ
b. Ne ẖōş bu mest mey·i ẖōş-güvāra nāzlanur
4.a. Öge öge lebüñi göklere çıḳarmışdur
b. Mesīḥ şimdi mey·i ẖōş-güvāra nāzlanur
5.a. Sitāresüz görinür ay yüzüñe baḳsa güneş
b. Nesine germ olur ol bī-sitāre nāzlanur
6.a. Gözüme gelmege nāzüglenürse ṭañlama kim
b. Perī güzel olıcaḳ çeşme-sāra nazlanur
7.a. Müjeñ ki dil-keş ola Seyf·i Ẕüˀl-yezen ḳulıdur
b. Gözüñ ki ser-ẖōş ola Ẕüˀl-ẖımāra nāzlanur
8.a. Necātī nāz nigāruñdürür velī ʿāşıḳ
b. Yolında ṣādıḳ olıcaḳ nigāra nāzlanur

|p189
mefāʿīlün mefāʿīlün mefāʿīlün mefāʿīlün
1.a. Nigārā tūtiyā·yi ẖāk·i pāyuñ özge dārūdur
b. Çekilse sürmeden eksük degüldür göz terāzūdur
2.a. Acı ṭatlu zemān yek-ser senüñle geçsün ey dil-ber
b. Dudaġuñ şehd ile şekker ve līkin ġamzeñ aġudur
3.a. Ġam·ı ʿışḳuñla bīmārem öñüñde cān virem şāhā
b. Ümīdüm ṣoñ nefesde ẖançerüñden bir içim ṣudur
4.a. Gözüm yaşın ayaġuñdan sen ırmaġ istedüñ ammā
b. Neler eyler saña ey serv bu göz yaşı ṭurudur
5.a. Ḫayāl·i çeşm·i fettānı uyandı gözüñ aç miskīn
b. Necātī ʿāşıḳa bu yolda büyük düşman uyẖudur

|p190
mefāʿilün feʿilātün mefāʿilün feʿilün
1.a. Nigāra gāh güneş gāh olur ḳamer dirler
b. Görüñ o bī-bedelüñ yüzine neler dirler
2.a. Yüzüñ görüb sevinenler ṣaçuñdan aġlamasun
b. Ki ṭañladan gülen aẖşama dek güler dirler
3.a. Hevā·yi ʿışḳ ile ẖāk olanuñdürür meydān
b. Bu od ile ṭutuşub ṣabr iden yeñer dirler
4.a. Ölür isem berü gel yüzüñi görüb öleyin
b. Bahār günleridür mevsim·i sefer dirler
5.a. Güzeller aġlamayana ne derdi var dirler
b. Ḳan aġlayana gülerler zī bī-ẖaber dirler
6.a. Necātī ser-ẖōş olur zāhid olımaz yārān
b. Mes̲eldürür ki ere bir hüner yiter dirler

|p191
mefāʿīlün mefāʿīlün mefāʿīlün mefāʿīlün
1.a. Nola bī-mihr ise dil-ber bi-ḥamdiˀllāh ki meh-rūdur
b. Şu deñlu şöhreti vardur hemān bir şehr bir odur
2.a. Bu gün ol fitne·i āẖır zemāna ḥaşr olan ölmez
b. Ḳıyāmet-ḳadd ü ḳāmetdür ḳıyāmet-çeşm ü ebrūdur
3.a. Benüm sīnemdeki dāġ·ı siyāh olmışdur eglencem
b. Meger Mecnūn·ı şeydānuñ enīsi çeşm·i āhūdur
4.a. Gel ey pīr·i muġān biˀllāh ne bī-ḥad luṭfdur bu kim
b. Eli boş olan abdāluñ müdām ayaġı ṭoludur
5.a. Ben izüñ tozını gördüm ayaġuñ ṭopraġı ḥaḳḳı
b. Çekilse sürmeden eksük degüldür göz terāzūdur
6.a. Senüñ būy·i mey·i laʿlüñ ṣabādan işidüb ġonca
b. Didi kim ʿāḳıbet bizi yaḳasuz ḳoyacaḳ budur
7.a. Necātī baḥr·i eşʿāruñ nedendür pür-güher bu ẖōd
b. Selāsetde leṭāfetde hemānā bir aḳar ṣudur

|p192
mefāʿīlün mefāʿīlün feʿūlün
1.a. Nedīmi bezm·i dünyānuñ nedemdür
b. Gel ey ney bir dem it kim dem bu demdür
2.a. Cihān bir demdürür gerçek dimişler
b. Velīkin hem-dem·i ʿayn·ı ʿademdür
3.a. Yine bir pādişāhuñ ḳulıyuz kim
b. Cefāsı luṭfdur cevri keremdür
4.a. Yüz urub ayaġınuñ ṭopraġından
b. Ne deñlü alıbilürseñ ḳademdür
5.a. Muḳarrerdür dil ü cān avlamaḳda
b. Ser·i zülfüñ ġamuñ ile be-hemdür
6.a. Miyānuñı kinār itmek diler dil
b. Mecāzī ʿışḳuñ ey dil ṣoñı kemdür
7.a. Kimi ṣōfī dirildi kimi ṣāfī
b. Necātī ara yirde müttehemdür

|p193
mefāʿilün feʿilātün mefāʿilün feʿilün
1.a. Hezār pāre göñül oldı yine yār ile bir
b. Şu resme kim gül·i ṣad-berg ola hezār ile bir
2.a. Yüzüme gül ki olam bülbül·i hezār-nevā
b. Hezār olur ṣanemā çünki iˀtibār ile bir
3.a. Zemāne eylemez idi benüm niyāzuma nāz
b. Sen olmaya ̮idüñ iki yüzlü rūzigār ile bir
4.a. Göñül kināra getürmek diler miyānuñı līk
b. Cihānda olduġı yoḳdur miyān kenār ile bir
5.a. Birisi ṣordı baña kim güzellerüñ ʿāşıḳ
b. Cihānda ḳaçını sevdüñ didüm nigār ile bir
6.a. Ṣafā·yi āh ile bulur havā·yi ʿışḳ feraḥ
b. Ṣabā gibi kim ola tāze nev-bahār ile bir
7.a. İkide bir dil·i dīvānemi çeker çevirür
b. Beñüñ olalı ser·i zülf·i tāb-dār ile bir
8.a. Necātīyā nice bir ʿışḳuñ āẖırın ṣanasın
b. Gör evvelā çıḳışur mısın intiẓār ile bir

|p194
fāʿilātün fāʿilātün fāʿilātün fāʿilün
1.a. Her ḳaçan bād ile zülf·i ʿanber-efşān ṣarmaşur
b. Dil perīşān olı başlar rişte·i cān ṣarmaşur
2.a. Ben libās·ı ʿömrüm itdüm dest·i hicrān ile çāk
b. Āh kim kākülleri her gice ʿuryān ṣarmaşur
3.a. Ḳāmet ü zülfüñ nesīmi ile ḥasretler gibi
b. Ḳoca ḳoca görişür şimşād ü reyḥān ṣarmaşur
4.a. Vaṣf·ı ḥālümden yazardum yāra ammā ḳorḳaram
b. Nāme ile bile gider rişte·i cān ṣarmaşur
5.a. Ḳoma elden kārbān·ı kūy·i ʿışḳuñ dāmenin
b. Kaʿbeye gidenlere ẖār·ı muġaylān ṣarmaşur
6.a. Sen ṣanevber-ḳāmete ʿāşıḳ olalıdan göñül
b. Ḳanda kim görürse bir serv·i ẖırāmān ṣarmaşur
7.a. Zülfüñ ile kākülüñ el bir idüb ayaḳ ṭolar
b. Ol sebebden rişte·i ḳalb·i perīşān ṣarmaşur
8.a. Yāra ḥasret-nāme yazsam bilesince gitmege
b. Ṣarı ibrişim gibi bu cism·i bī-cān ṣarmaşur
9.a. Yapışurlar itlerüñ durmaz benüm dāmānuma
b. Pes kerīm olan kişiler görse mihmān ṣarmaşur
10.a. Ey Necātī yirde gökde bir belāsuz bal yoḳ
b. Māh·ı tābāna seḥāb ü gence s̲uʿbān ṣarmaşur

|p195
fāʿilātün fāʿilātün fāʿilātün fāʿilün
1.a. Her ḳaçan kim ẖāli ol yāruñ yañaġın yaṣdanur
b. Ṣanuram pervānedür düşmiş çerāġın yaṣdanur
2.a. Bezm·i ḥüsnüñde lebüñ devrinde ġamzeñ sāḳiyā
b. Bir ḳadeḥden mest olub düşmiş ḳabaġın yaṣdanur
3.a. Yaṣdanursa çeşm·i ẖūn-rīzüñ ʿaceb olmaz müjeñ
b. Çāpük uġrudur ki uyẖuda biçaġın yaṣdanur
4.a. Müntehā ḳadd üzre kim zülfüñ düṣübdür ṭoġrısı
b. Sidre ṭāvūsıdürür Ṭūbā budaġın yaṣdanur
5.a. Var ise devlet Necātī dünyede şol başdadur
b. Ḫāba varduḳca ḥabībinüñ ayaġın yaṣdanur

|p196
fāʿilātün fāʿilātün fāʿilātün fāʿilün
1.a. Her seḥer gülşende kim murġ·ı lāṭīf-elḥān oḳur
b. Ḫūb-rūlar meclisinde ṣanasın ẖōş-ẖān oḳur
2.a. Bülbüle diñ diñmesün zārīlıġ itsün iñlesün
b. Çünki günler defterinde nāme·i hicrān oḳur
3.a. Yār ḥüsnin ẕikr iderken cenneti añmaz göñül
b. Söylemez dünyā sözin şol kimse kim Ḳurˀān oḳur
4.a. Āyet·i ḥüsnüñi dil ẖōş vech ile taḳrīr ider
b. Ṣan ki Yūsuf Sūresini Ḥaẓret·i ʿOs̲mān oḳur
5.a. Bī-niḳāb olma ḥabībüm görmesün yüzüñ raḳīb
b. Muṣḥaf açuḳ olıcaḳ dirler anı şeyṭān oḳur
6.a. Cemʿ oluñ āşüfte-diller kim bu gice bir ġarīb
b. Dil otaġına ġam·ı cānānesin mihmān oḳur
7.a. Ḥasret ābādını göñlüm ẖūn ile zeyn eyledi
b. Sīneye ġamzeñ ẖayālin ġālibā mihmān oḳur
8.a. Öldügine ʿāşıḳ·ı ṣādıḳ olanlar ẕevḳ ider
b. Faẖr ider şol bende ki ̮anı ḥaẓret·i sulṭān oḳur
9.a. Ḳıġırur göñlüm ḳuşın dil-ber ḳara zülfin ṣalub
b. Hey bu ne şeh-bāzdur kim kendüsin sulṭān oḳur
10.a. Ṭarz·ı eşʿāra Necātī bir leṭāfet virdi kim
b. Her melek meyl·i ẓarāfet idüben dīvān oḳur

|p197
fāʿilātün fāʿilātün fāʿilātün fāʿilün
1.a. Hem-dem olan ġamze·i ẖūn-rīzüñe başdan çıḳar
b. Gizlü rāzı ʿāşıḳuñ ol türk·i ser-ẖōşdan çıḳar
2.a. Her ne siḥr olursa ol ebrū·yi sāḥirden gelür
b. Her ne fitne var ise bu zülf·i ser-keşden çıḳar
3.a. ʿĀrıẓ u ruẖsār içinde ẖaṭṭ·ı ʿanber-bār·ı dōst
b. Dūd·ı müşg-āsādürür kim āb u āteşden çıḳar
4.a. Laʿl·i dür-pūşına cānuñı nis̲ār itseñ nola
b. ʿĀşıḳ·ı ser-bāz olanlar cān ile başdan çıḳar
5.a. Ṭolanur āşüfte diller künc·i ruẖsāruñ senüñ
b. Bir gün ol bī-çāreler zülfüñ gibi başdan çıḳar
6.a. Göñlini nerm idegör ḥüsni bahārı geçmeden
b. Ey Necātī lāle gibi rızḳuñı ṭaşdan çıḳar

|p198
feʿilātün feʿilātün feʿilātün feʿilün
1.a. Lāle-ẖadler yine gülşende neler itmediler
b. Servi yürütmediler ġoncayı söyletmediler
2.a. Ṭaşradan geldi çemen mülkine bīgāne diyu
b. Devr·i gül ṣoḥbetine lāleyi iletmediler
3.a. ʿĀdeti ẖūblaruñ cerv ü cefādur ammā
b. Baña itdüklerini kimselere itmediler
4.a. Ḥamdü liˀllāh mey·i cān-baẖş ile sāḳīlerümüz
b. Āb·ı Ḥayvān ile kevs̲er ṣuyın istetmediler
5.a. Hele ol ḳaşları ya oḳları peykānlarını
b. Sīneden çekmediler yüregi oynatmadılar
6.a. Biñ güzeller bulınur Yūsufa mānend ammā
b. Bu ḳadar var ki bular kendülerin ṣatmadılar
7.a. Ey Necātī yüri ṣabr eyle elüñden ne gelür
b. Ḫūblar cevr ü cefāyı kime ögretmediler

|p199
feʿilātün feʿilātün feʿilātün feʿilün
1.a. Yine yüzüñ güneşine meh·i tābān ezilür
b. Meh·i tābānı görüb nite ki kettān ezilür
2.a. Teb·i hicrān ile başumda bir od yanar kim
b. Şemʿ-vār aġladuġumca ten erir cān ezilür
3.a. Aṣlı ser-bāz aña dirler ki şeker gibi gelüb
b. Başın ortaya ḳoyub laʿlüñe andan ezilür
4.a. Duyaruz bir kişi ḳarañuda göz ḳırpduġını
b. Bilürüz leblerüñe Çeşme·i Ḥayvān ezilür
5.a. Ḳarışur gül-be-şeker gibi olur anuñ içün
b. Şekkerīn leblerüñe ġonca·i ẖandān ezilür
6.a. Şekker·i vaṣluña hicrān aġlusın ḳatma şehā
b. Yoẖsa ol şerbet ile ey nice sulṭān ezilür
7.a. Bu cihān aġzına sen bir şeker ezdüñ neykim
b. Ey Necātī sözüñe anca suẖan-dān ezilür

|p200
feʿilātün feʿilātün feʿilātün feʿilün
1.a. Yüzüm üstine baṣub kebkebüñ itse nola yir(yer)
b. Şimdi itdi şeref·i kevkebi ẖāke teˀs̲īr
2.a. Ben iki bir dimeyem cān virem ü ḳarşuma sen
b. Çifte ṭolular içüb öpüşesin ikide bir
3.a. Baña ʿunvān gelür ol gün ki belā nāmesinüñ
b. Ala bir gūşesine adını s̲ebt ide faḳīr
4.a. Ḳorḳar oldum giceler yummaġa kirpüklü gözüm
b. Ki düşüme düşe nā-geh görine saña naẓīr
5.a. Bezm·i ʿışḳuñda benüm ġuṣṣa vu ġamdur yidügüm
b. Şemʿ gibi bir odum var ki yidügüm beni yir
6.a. Dōst düşmanlar ile soḥbet·i ẖāş eyleyicek
b. Baña şemʿüñ özi küynür ḳadeḥüñ içi acır
7.a. Dil ü cān gūşelerin sildi süpürdi müjesi
b. Aldı gitdi ne ki buldı ̮ise naḳīr ü ḳıṭmīr
8.a. Ehl·i ʿışḳ oldı Necātī olımaz ʿaḳla muṭīʿ
b. Hīç mecẕūb olan abdāl īde mi ẖıdmet·i pīr

|p201
fāʿilātün fāʿilātün fāʿilātün fāʿilün
1.a. Yār māyil olıcaḳ mihr ü maḥabbet az olur
b. Anuñ içündür niyāz ehline dāˀim nāz olur
2.a. Sāḳiyā ṣoḥbet emānet sırrumuz fāş itmesün
b. Mey gibi bezm·i ṣafā-baẖşa şu kim hem-rāz olur
3.a. Ṭālib·i germiyyet·i ʿışḳ olduġum ʿayb eylemeñ
b. Kim faḳīr olan sevinür her ḳaçan kim yaz olur
4.a. Būse luṭf idüb gözümüñ ḳanlu yaşın sildi dōst
b. Rūm ili dil-berleri dāˀim ḳadeḥ-perdāz olur
5.a. Gölgelikde idemezsin derd-mendüñle ḳarār
b. Sen hümāsın dāˀimā işüñ senüñ pervāz olur
6.a. Fitne·i āẖır zemān oldı Necātī sözleri
b. Her ġazel kim diye bir maḥbūb·ı ẖōş-āvāz olur
7.a. Āferīn olsun benüm siḥr-āferīn eşʿāruma
b. Ḫūb-rūlar içre ben sevdüklerüm mümtāz olur

|p202
fāʿilātün fāʿilātün fāʿilātün fāʿilün
1.a. Yār kim kāküllerinden dūşına çevgān alur
b. Her kimüñle ḥüsn ṭopın oynaya meydān alur
2.a. Laʿline ʿömr·i girāmī ẖarc iden üftādeler
b. Gūşe·i miḥnetde şimdi cān virüben cān alur
3.a. Aldı ṣōfīnüñ ḳarārın gösterüb yüzüñ raḳīb
b. Ṣan ki şeyṭān ẖastaya ṣu gösterüb īmān alur
4.a. Ṣan ki Rūm ili ḥarāmīsidürür ẖāl·i ruẖuñ
b. Ki ̮öldürür cān kār-bānın varını andan alur
5.a. Bir ṭarāvet ṭutdı gülşen kim semen-berler gelüb
b. Faṣd iderse gül yüzinden penbe ile ḳan alur

|p203
mefʿūlü fāʿilātü mefāʿīlü fāʿilün
1.a. Yāruñ cefāsı ġayriye derd ü belā gelür
b. Ben mübtelā muḥibbine luṭf u vefā gelür
2.a. Her ṣubḥ u şām işigine benden duʿā varur
b. Andan baña melāmet ü zecr ü ʿanā gelür
3.a. Bir şerbet içdi leblerüñüñ fürḳatinde kim
b. Her derd ẖasta göñlüme şimdi devā gelür
4.a. Görsem raḳīb yüzini artuḳ yirem ġamuñ
b. Lābüd ṭaʿāma turşu ile iştihā gelür
5.a. Ol māh·ı dil-fürūza şebīh olduġı içün
b. Baḳduḳca mihr yüzine gözüm dola gelür
6.a. Ol serv kimüñ āhına meyl eyledi ʿaceb
b. Ḳanġı yil esdi ki ̮ol yüzi gül bu yaña gelür
7.a. Miskīn Necātī āh ider ü kendüden gider
b. Yāruñ meger ki cennet·i kūyın aña gelür

|p204
mefʿūlü fāʿilātü mefāʿīlü fāʿilün
1.a. Yār ile ḳoñ beni beni ol yār yeg bilür
b. Bī-çāre ʿandelībini gül-zār yeg bilür
2.a. Zülf·i dırāz derdini benden ṣor ey ṭabīb
b. Uzun gice belāsını bīmār yeg bilür
3.a. Arturmaz ādemīyi meger kim mezād·ı ʿışḳ
b. Her nesnenüñ behāsını bāzār yeg bilür
4.a. İzüñ tozın ṣabā yili ṣatar direm direm
b. Misk ü ʿabīr ḳadrini ʿaṭṭār yeg bilür
5.a. Ey gül bu ġuṣṣa ḳıṣṣasını ṣor Necātīye
b. Ki ̮aḥvāl·i ʿışḳı bülbül·i bīdār yeg bilür

|p205
mefʿūlü mefāʿīlü mefāʿīlü feʿūlün
1.a. Yanında kimüñ sencileyin bir ṣanemi var
b. Kāfirdür eger ẕerrece göñlinde ġamı var
2.a. Ayaġı tozı gözleredür kuḥl·i cevāhir
b. Ol serv·i revānuñ ne mübārek ḳademi var
3.a. Aġzuma söger būsesin alsam kereminden
b. Ol ẖusrev·i şīrīn-dehenüñ ẖōş keremi var
4.a. Görünmeyeli ḳāmet ü zülfüñe dehānuñ
b. ʿĀşıḳlaruñuñ ḥālini ṣor kim elemi var
5.a. Bir tāze güzel sevdi cihān içre Necātī
b. Kim servi boyı lāle ruẖı ġonca femi var

|p206
feʿilātün feʿilātün feʿilātün feʿilün
1.a. Yaraşur kim seni ser-defter·i ẖūbān yazalar
b. Nāme·i ḥüsnüñ için bir yeñi ʿunvān yazalar
2.a. Nola gelse ẖaṭ·ı sebzüñ ne ẖaṭāsı ola kim
b. Kaʿbenüñ çevresine āyet·i Ḳurˀān yazalar
3.a. Ḳorḳaram kim lebüñüñ örnegin alub ṣanemā
b. Çīn muṣavvirleri bir ṣūret ile cān yazalar
4.a. Diñ eṭibbāya ki Ḳanūn u Şifā yazmaḳdan
b. Hüner oldur ki ġam·ı dil-bere dermān yazalar
5.a. Ekevüz gibi raḳībi gelicek ẖaṭṭ·ı lebüñ
b. Dīv redd olmaġ içün möhr·i Süleymān yazalar
6.a. Baña dirlik yiter ol kim ölicek derdüñle
b. Meşhedüm mermerine küşte·i cānān yazalar
7.a. Beni ser-defter·i ʿışḳ iden erenler umarın
b. Sen Şehi Pādişeh·i milket·i ʿOs̲mān yazalar
8.a. Şiʿr·i dil-sūz·i Necātī var iken ḥayf ola kim
b. Ḫalḳ yazub yañılub defter ü dīvān yazalar

|p207
mefāʿīlün mefāʿīlün mefāʿīlün mefāʿīlün
1.a. Yine ʿālem yüzi güldi yine Allāha minnetler
b. Ki Ḥaḳdan oldı erzānī vücūd·ı Şāha ṣıḥḥatler
2.a. Ḥaḳīḳat bilmek isterseñ cihānuñ cānısın cānı
b. Senüñ ẕāt·ı şerīfüñdür saʿādetler selāmetler
3.a. Bi-ḥamdiˀllāh elem gitdi libās·ı ʿāfiyet geydüñ
b. Cihāna dest·i cūduñla biçilsün yeñi ẖılʿatler
4.a. Ġamuñdan ḳulcaġuzlaruñ hep öldi yine dirildi
b. Mesīḥā şīvesin geçdüñ senüñdür hep bu ṣanʿatler
5.a. Ser-ā-ser ḳaplayubdürdi ṣafā göñlini jeng·i ġam
b. Cihān āyīnesine virdi ḥüsnüñ yine ṣūretler
6.a. Ḳapuña sürmeyen yüzin eger ay ü eger gündür
b. Muḳarrer bī-saʿādetlerdürürler bī-saʿādetler
7.a. ʿAceb midür bütün dünyā ḳapuñdan himmet umarsa
b. Nice ̮olmış yoḳ mıdur sende Begüm dünyāca himmetler
8.a. Yine dünyā yüzi güldi Necātī tehniyet söyle
b. Bilürsin devr·i gülde çoġ olur bülbülde ṣoḥbetler
9.a. Cihān durduḳca var olsun benüm devletlü Sulṭānum
b. Kim ol ferr·i İlāhīdür cihāna zīb ü zīnetler
10.a. Saña Şāh·ı cihāndan nūş-dārū geldi ṣıḥḥatler
b. Ġamuñ dārüˀl-bevārında ʿadūlar içdi şerbetler
11.a. Ṭabīb·i ḥāẕıḳ·ı Şāhī ne tedbīr itdi yā Rab kim
b. Selāmetler virüb güc ile ḳurtuldı seḳāmetler
12.a. Yaḳın olma muẖālif olana devletlü başuñçün
b. Iraġ olsun ayaġuñ ṭopraġından cümle āfetler

|p208
fāʿilātün fāʿilātün fāʿilātün fāʿilün
1.a. Sīneme seng·i cefā ur kim maḥabbet arturur
b. Dōstum ḍarb·ı mes̲eldür loḳma şefḳat arturur
2.a. Derd ü miḥnetdür benüm derdüme dermān ey ṭabīb
b. Derd ü miḥnet sīneme geldükce rāḥat arturur
3.a. Ḳalbi ṣāfīdür şarābuñ ṣōfīyā sen ṭutma ẖār
b. Ḳalbi ṣāf olan kişi keşf ü kerāmet arturur
4.a. Ṣōfīyā perhīzi ḳo nūş eyle cām·ı lāle-reng
b. Ādeme çün her zemān perhīz ʿillet arturur
5.a. Ey Necātī ḥaḳ budur maʿnīde pīr·i mey-kede
b. Her ayaḳ kim ṣunsa ʿizzet birle ḥörmet arturur

|p209
fāʿilātün fāʿilātün fāʿilātün fāʿilün
1.a. Rūze-dār olanlara zülfüñ ṣalā·yi şām ider
b. Ehl·i şevḳ ile hilāl ebrūlaruñ bayram ider
2.a. ʿĀrıẓuñ bir vech ile ẖōrşīdi ḳıldı şerm-sār
b. Rā ḳaşuñ bir ḥarf ile māh·ı nevi ilzām ider
3.a. Elde bilür sāʿid·i sīmīnüñi miskīn göñül
b. Ġāyet·i iflāsdan māẖūlyā·yi ẖām ider
4.a. Luṭf gül-zārında ḳaddüñ müntehādur şöyle kim
b. Sidre ayaġ üzre duruben aña ikrām ider
5.a. Ḳanına ṣusar Necātī laʿl·i yāra bilmiş ol
b. Ġamzesinden ẖavf ḳılmayub şu kim ibrām ider

|p210
fāʿilātün fāʿilātün fāʿilātün fāʿilün
1.a. Zülf·i müşgīnüñ ki cānā māh-tāb üstindedür
b. Ṣanasın ṭāvūs·ı ḳudsī āfitāb üstindedür
2.a. Fitne vü āşūb·ı çeşmüñ göreli nergis müdām
b. Mest·i lā-yaʿḳıl olub her demde ẖāb üstindedür
3.a. Ġoncadan vaṣf·ı dehānuñ işidüb ey gül-ʿiẕār
b. Ḫançer·i bürrān çeküb sūsen ʿitāb üstindedür
4.a. Vaṣf·ı ḥüsnüñ her seḥer gülşende bülbül bir varaḳ
b. Oḳıduḳca ġonca vü güller ḥicāb üstindedür
5.a. Dāne·i ẖāl·i siyāhuñ ʿaksi çeşmümde şehā
b. Ḫōş vaṭan dutmış velī bünyādı āb üstindedür
6.a. İñledügüm dil-berā dōlāb gibi ṣubḥ u şām
b. Bu ki cismüm dem-be-dem yaşumla āb üstindedür
7.a. Ey Necātī laʿl·i nābı üzre ẖāli dil-berüñ
b. Bir mekesdür kim maḳāmı ḳand·i nāb üstindedür

|p211
mefʿūlü fāʿilātü mefāʿīlü fāʿilün
1.a. Ṣarrāf·ı dīdemüzde o dil-ber güher sezer
b. Yüzüme güldügi bu ki boyunda zer sezer
2.a. Meclisde sāġar almaġa laʿlüñ ẖaberlerin
b. Nāzüglig ile aġzumuz arar ẖaber sezer
3.a. Cān atdı gitdi dil leb·i şīrīnüñe yine
b. Ben ẖasta içün anda meger gül-şeker sezer
4.a. Düşmezdi rāh·ı ʿışḳa göñül görmese yüzüñ
b. Gün doġmayınca yolda müsāfir ẖaṭar sezer
5.a. Ḳan içmek istedükce gözi yār menʿ ider
b. Bīmāra bāde içmegi zīrā ẓarar sezer
6.a. Ben bülbülini görse yüzin gül gibi dürer
b. Beñzer Necātī sevdügüñ ol ʿişve-ger sezer

|PZāˀ|p212
feʿilātün feʿilātün feʿilātün feʿilün
1.a. Aġladur ādemi ġurbet kişi kendin yeñemez
b. Nitekim ẖasta çeküb nāle kemendin yeñemez
2.a. Aġlamak ṭutdı beni serv ü gül añmañ baña kim
b. Bu ṣunuñ kimse ẖas ü ẖār ile bendin yeñemez
3.a. Mevc urur baḥr·i ḥüsün fitne ḳoparur ẖaṭ u ẖāl
b. Bu deñiz yüzlerinüñ kimse levendin yeñemez
4.a. Ruẖı gül-gūnına Şebdīz ṣaçın ḳoşmaġ ile
b. Çignedür ẖalḳı yürür nāz semendin yeñemez
5.a. Boyuñ añub çemene dökse Necātī gözi yaş
b. Bāġbān ol yörenüñ serv·i bülendin yeñemez

|p213
mefʿūlü mefāʿīlü mefāʿīlü feʿūlün
1.a. Ey rind·i ẖarābāt bize ʿār gerekmez
b. Mest·i mey·i ʿışḳ olana inkār gerekmez
2.a. Zülfi ẖaberin bād·ı ṣabādan ne ṣorarsın
b. Bir misk adını bilmege ʿaṭṭār gerekmez
3.a. Ol laʿl·i revān-baẖş ile ʿĪsī·i zemānsın
b. Ḳapuñda senüñ nāle·i bīmār gerekmez
4.a. Tenhā ṣalın ey dōst sen aġyārı nidersin
b. Cennet gülinüñ bilesine ẖār gerekmez
5.a. Öle yaluñuz diyu Necātīyi uşanmañ
b. Bu ʿışḳ ṭarīḳinde hevā-dār gerekmez

|p214
fāʿilātün fāʿilātün fāʿilātün fāʿilün
1.a. Biz senüñ ḥüsn·i cihān-efrūzuña ʿāşıḳlaruz
b. Anuñ içün ḳanda güzel görsevüz ʿāşıḳlaruz
2.a. Göñlümüz ister şarāb·ı laʿlüñ ammā virmez el
b. Ehl·i bezm içinde biz maḥrūm olan fāsıḳlaruz
3.a. Ehl·i ḥüsn içinde sen her nice müstes̲nā iseñ
b. Ehli diller arasında biz daẖi fāyıḳlaruz
4.a. Nola sen bir beg güzelseñ biz de beg ḳullarıyuz
b. Terbiyetler eyle kim her himmete lāyıḳlaruz
5.a. İçerüz sāḳī elinden bāde·i hel min mezīd
b. Bizi ser-ẖōşluḳdan aġlar ṣanma biz ayıḳlarız
6.a. Aġladuḳca ṣıḳluġı artar gül ile bülbülüñ
b. Bilmiş ol şimden giru biz daẖi aġlar ṣıḳlaruz
7.a. Ṣōfī sen rüʿyā ile baġlayımazsın gözümüz
b. Biz Necātī meşrebinde dāˀim uyanıḳlaruz

|p215
fāʿilātün fāʿilātün fāʿilātün fāʿilün
1.a. Būse alduġın lebinden zülf·i misk-āsā dimez
b. Başını kesseñ bu yolda rāzını ḳaṭʿā dimez
2.a. Lām·ı zülfüñle elif ḳaddüñ nihāli var iken
b. Kimsene ḥüsn ü cemāl içinde saña lā dimez
3.a. Ben nice ölmeyeyin ḥasretle laʿl·i nāb·ı yār
b. Hey meded öldüm bir içim ṣu dir isem māˀ dimez
4.a. Giceler irteye dek senden yanub yaḳılduġın
b. Boġazından aṣılursa şemʿ·i bezm-ārā dimez
5.a. Cān ü dil bend·i belādan nice baş ḳurtara kim
b. Ṭolaşur zülfüñ kemendi ʿāḳıl ü şeydā dimez
6.a. Göreyin Ṭūbā-veş olsun iller içre ser-nigūn
b. Müntehā ḳaddüñ nihālin kim görüb Ṭūbā dimez
7.a. Şehd yaġar lebleri vaṣfında aġzından müdām
b. Kim Necātī.......... ṭūṭī·i şekker-ẖā dimez

|p216
mefāʿilün feʿilātün mefāʿilün feʿilün
1.a. Beni ḥabīb dilerse raḳībler dilemez
b. Ölünce sürüneyin yolına diler dilemez
2.a. ʿİẕār ü ʿārıẓı devrinde ḳoñ beni öleyin
b. Bahār günleri göñli kimüñ sefer dilemez
3.a. Ne ʿāşıḳ ola ki dīdāra olmaya müştāḳ
b. Cihānda var mı ki bīmār ola seḥer dilemez
4.a. Viṣāli ẖāni gerek loḳma ʿāşıḳı degülüz
b. Lebüñ ẖayāli ile göñlümüz şeker dilemez
5.a. Zemān mı var ki bu dehr·i ʿacūze vü mekkār
b. Şu pehlevān gibi meydāna girüb er dilemez
6.a. Delülügi ḳo göñül kim rıẓādürür tedbīr
b. Ḳaẓā ẖadengine uṣlu olan siper dilemez
7.a. Necātīnüñ yüzi gözi şehādet eyler kim
b. Ḥuẓūrdur ġaraẓı daẖi sīm ü zer dilemez

|p217
mefʿūlü mefāʿīlü mefāʿīlü feʿūlün
1.a. Cān ḳıldı sefer hecr ile cānān ele girmez
b. Dil yandı gider derd ile dermān ele girmez
2.a. Gezmekle çemen gūşelerin düşdüm ayaḳdan
b. Bir sencileyin serv·i ẖırāmān ele girmez
3.a. Iṣındı göñül āteş·i hicrāna ẓarūrī
b. Kim ol yañaġı şemʿ·i şebistān ele girmez
4.a. Ṣōfīlıġ ile ḳardaş oḳuşmaduġ idi ya
b. İllā ki mey·i nāb ile oġlan ele girmez
5.a. Güller açılur oldı dikenlerde Necātī
b. Ben bülbüle bir ġonca·i ẖandān ele girmez

|p218
feʿilātün feʿilātün feʿilātün feʿilün
1.a. Cevher·i cāndan ola dil-ber·i dil-dār ʿazīz
b. Mihrine mesken olaldan dile dil dār·ı ʿazīz
2.a. Ḥoḳḳa·i sırr·ı ẖafīdür ṣıma göñlüm ṣanemā
b. Ḳorḳaram kim düşe nā-ehle bu esrār·ı ʿazīz
3.a. Ādemī olmaya bu ḥüsn ile bu ẖulḳ ile ẖalḳ
b. Yā melek yāẖū perī yā sen ola yār·ı ʿazīz
4.a. Baña zārī ve aña nāz ile ʿizzet yaraşur
b. Çünki Ḥaḳ bülbüli zār eyledi gül-zārı ʿazīz
5.a. Mey-fürūṣa bu Necātī dil ü cān itdi girev
b. Mey·i ʿışḳ aldı zihī assılu bāzār·ı ʿazīz

|p219
mefāʿīlün mefāʿīlün feʿūlün
1.a. Cihānda ādem olan bī-ġam olmaz
b. Anuñçün bī-ġam olan ādem olmaz
2.a. Göñül göz yaşını yaġdurmayınca
b. Maḥabbet sebze-zārı ẖurrem olmaz
3.a. Güzeller ṭaş baġırlu olmayınca
b. Binā·yi ʿışḳ iñende muḥkem olmaz
4.a. Lebi ġonca beli ince güzeller
b. Öpüb ḳocmaġ içün ġālib kem olmaz
5.a. Gelem aẖşamlayam dimişdi ol māh
b. Sitāremde dirāġā aẖşam olmaz
6.a. Dikildüm serv gibi ṭoġrı geldüm
b. İṣigüñden bir adım gitsem olmaz
7.a. Necātī tevbeñi bozmaḳ dilerler
b. Çemende lāle vü gül epsem olmaz

|p220
mefʿūlü fāʿilātü mefāʿīlü fāʿilün
1.a. Cām·ı şarāb·ı ʿışḳuñ ile Cem degül miyüz
b. Bezm·i ġamuñ ṣafāsına ẖurrem degül miyüz
2.a. Bāġ·ı ruẖuñda dāne·i ẖālüñe ey perī
b. Meyl eylesek ʿaceb midür Ādem degül miyüz
3.a. Ger ẕerre-vār itmesek ol āfitāba meyl
b. Bir ẕerreden bu yolda daẖi kem degül miyüz
4.a. Bezm·i neşāṭa ne ̮içün iletmez bizi raḳīb
b. Çeng·i ġamında nāy ile hem-dem degül miyüz
5.a. Dil-ber cemāli vaṣfın idelden Necātīyā
b. Üslūb·ı naẓm içinde müsellem degül miyüz

|p221
mefāʿilün feʿilātün mefāʿilün feʿilün
1.a. Ḥabīb ʿāşıḳa cevr itmese ḥabīb olmaz
b. Ṭabīb nicesin öldürmese ṭabīb olmaz
2.a. Gözüm yaşından umardum ḳapuñ ṭavāf itmek
b. Velī çoḳ aḳçelü olur ki ḥac naṣīb olmaz
3.a. Ḥabīb işigi raḳībe şeref virürdi velī
b. Çemende gezmek ile zāġ ʿandelīb olmaz
4.a. Bilād·ı Çīne senüñ gibi bir ṣanem heyhāt
b. Diyār·ı Rūma ṣaçuñ gibi bir ṣalīb olmaz
5.a. Bütün cihānda göñül ʿışḳ ile olur maḳbūl
b. Ḳamu diyārda ehl·i hüner ġarīb olmaz
6.a. Ḥabīb vaṣlını dil kendünden daẖi küniler
b. Necātīyā kim ola böyleye raḳīb olmaz

|p222
mefāʿīlün mefāʿīlün mefāʿīlün mefāʿīlün
1.a. Dem olmaz kim feleklerde melekler āhdan ḳorḳmaz
b. Beni yaḳduñ günāhum ne be hey Allāhdan ḳorḳmaz
2.a. Göñül sulṭān olur ʿışḳuñ siyāset-gāhını añmaz
b. ʿAlāˀüˀd-devle gibi kim hücūm·ı Şāhdan ḳorḳmaz
3.a. Cefā vü şīve vü nāz ü ʿitābın hep bilür göñlüm
b. Dirīġā yār ġāfildür dil·i āgāhdan ḳorḳmaz
4.a. Ṣaçuñuñ şāh-rāhında göñül ġamdan yocunmaz kim
b. Kişi bildügi yollarda iñen hem-rāhdan ḳorḳmaz
5.a. Ḳara başına ṣōfīnüñ ne günler geldi ḥüsnüñden
b. Necātī şeb-rev olanlarda kimdür māhdan ḳorḳmaz

|p223
feʿilātün feʿilātün feʿilātün feʿilün
1.a. Sāḳiyā çün leb·i şīrīnüñedür nisbetümüz
b. Gider e bādeyi telẖ eylemesün ṣoḥbetümüz
2.a. Bizi yirden götüren eşk·i revāndur ammā
b. Ayaġuñ ṭopraġınadur yine hep minnetümüz
3.a. Ḳulıyuz kendümizi ṣatamazuz anuñ içün
b. Bilmez ol Yūsuf·ı gül-çihre bizüm ḳıymetümüz
4.a. Sīnede ġamzeñ oḳın devlet·i sermed bilürüz
b. Bir kez ey ḳaşı kemān işlemedi devletümüz
5.a. Çevreme dāˀire çekdi yaşum aġlamaġ ile
b. Bir perī daʿvetini itmegedür niyyetümüz
6.a. Muṭṭaṣıl ṣavmaʿada pīr·i muġāndur çekilen
b. Rind·i ʿālem geçerüz ḳani bizüm ġayretümüz
7.a. Göge çıḳarsa görinmez benüm uçmaḳ gözüme
b. Devletüñde daẖi aʿlālaradur himmetümüz
8.a. Ey Necātī ḳadeḥi ḥörmet ile ṭutmayıcaḳ
b. Pīr·i meyẖāne elümüze virür ḥörmetümüz

|p224
feʿilātün feʿilātün feʿilātün feʿilün
1.a. Şol ki tecrīd olımaz tāc ü ḳabādan geçemez
b. Ḥalḳa·i bezm gibi ehl·i ṣafādan geçemez
2.a. Geçmelü oldı göñül ẓaʿf ile çenberlerden
b. Ne havdādur bu ki ol zülf·i dü-tādan geçemez
3.a. Meyl ider dāne·i ẖālüñe göñül murġı velī
b. Zülf·i miskīni ḳoyub dām·ı belādan geçemez
4.a. Vaṣla māniʿ yoġ idi olmasa seyl-āb·ı sirişk
b. Ḳamudan geçdi göñül ẖastası mādan geçemez
5.a. Beli miḥrāb·ı ʿibādetde iki büküldi
b. Zāhidi gör ki daẖi bāb·ı riyādan geçemez
6.a. Sīneme vaʿde·i vaṣl itmiş idi tīr·i müjeñ
b. Dil teḳāẓā ide diyu bu yañadan geçemez
7.a. Sāḳiyā bezm·i maḥabbetde Necātī·i levend
b. Bādeden geçdi leb·i rūḥ-fezādan geçemez

|p225
fāʿilātün fāʿilātün fāʿilātün fāʿilün
1.a. Şevḳ·i ruẖsāruñla dil zülf·i dü-tādan ḳorḳmaz
b. Ārzū·yi genc idenler ejdehādan ḳorḳmaz
2.a. Eydüñüz ʿuşşāḳı zāhid nār ile ḳorḳutmasun
b. ʿĀrif olan irteye ḳalan belādan ḳorḳmaz
3.a. ʿIşḳ elinden ʿaḳl ʿāciz olduġın ʿayb eylemeñ
b. Bir raʿiyyet var mıdur kim pādişādan ḳorḳmaz
4.a. Riḥlet eyyāmında ġamdan incine ṣanma beni
b. Ḳorḳulu yollarda kişi āşinādan ḳorḳmaz
5.a. Eşk ü āhumdan ṣaḳınmaz lā-cerem serv ile gül
b. Cūydan incinmez ü bād·ı ṣabādan ḳorḳmaz
6.a. Ol cefā-gār eylemez feryād ü āhumdan ḥāẕer
b. Cennetüñ ẖandān güli bād·ı ṣabādan ḳorḳmaz
7.a. Düşmanı yār idinüb yārum unutdı yārını
b. Yārını añmaz dirīġā ol Ḫudādan ḳorḳmaz
8.a. Ḫavf ider ṣanma maḥalleñde Necātīden raḳīb
b. Pādişāhum bellüdür kim seg gedādan ḳorḳmaz

|p226
fāʿilātün fāʿilātün fāʿilātün fāʿilün
1.a. Şiʿrümi mecmūʿalarda yazasuz şevḳ ile siz
b. Tā kim ola her varaḳ ʿışḳ odına bir bād-bīz
2.a. Sebze-zāruñ ṣafḥasında naḳş idemezdi bahār
b. Bād·ı ṣubḥ izüñ tozından itmese ̮idi ẖāk-rīz
3.a. Yig görürmişsin güzellerden bu dünyā çirkini
b. İʿtiḳād itdüm ki ẖāce yoġ imiş sen de temīz
4.a. Ey cihān·ı pür-sitemden isteyen mihr ü vefā
b. Doġurur mı bir ʿaḳīm·i pīre-zen andan ikiz
5.a. Mıṣr·ı ʿizzetde el üzre ṭutmadılar Yūsufı
b. Zer gibi tesbīḥi tekrar itmeyince yā ʿAzīz

|p227
mefʿūlü fāʿilātü mefāʿīlü fāʿilün
1.a. Ṣunub lebini dil-ber·i ġonca-dehānumuz
b. Nāzüglüg ile ḥoḳḳaya ḳoymasa cānumuz
2.a. Gūyā nigīn·i laʿlde zehr oldı taʿbiye
b. Çün telẖ ide cevābını şīrīn-zebānumuz
3.a. Ger cān giderse vuṣlat·ı cānān girer ele
b. Assıdurur bu yolda ḥaḳīḳat ziyānumuz
4.a. Var dimişüz miyānına zerrīn-kemer gerek
b. Gerçekden ilerü görinür bu yalanumuz
5.a. Her ḳanda ise tīr·i belāña nişāneyüz
b. Ey kāş olmaya idi nām ü nişānumuz
6.a. Yār işiginde çün işidilmez ne fāˀide
b. Ṭut kim Necātī göklere çıḳdı fiġānumuz

|p228
mefāʿīlün mefāʿīlün feʿūlün
1.a. Ġam·ı cānāneyi her cān götürmez
b. Ki degme memleket sulṭān götürmez
2.a. Kimüñ başında yoḳ sevdā·yi ẖaṭṭuñ
b. Kim ol āyet·i Ḳurˀān götürmez
3.a. Alursañ cān deger bir būse ṣōfī
b. Leb·i dil-ber senüñçün cān götürmez
4.a. Seni ser-ẖōşlanub öper piyāle
b. Begüm bu şīveyi yārān götürmez
5.a. Belümi bükdi bār·ı dāġ·ı ḥasret
b. Ḳara daġı kişi āsān götürmez
6.a. Necātī bezm·i ẖāṣ ü cürʿa·i dōst
b. Bu ululuḳları devrān götürmez

|p229
mefāʿilün feʿilātün mefāʿilün feʿilün
1.a. Ġıdā·yi cān gerek ehl·i dil olana şeksüz
b. Güzelsüz olmazuz oluruz etsüz etmeksüz
2.a. Göreyin iki yaḳa ıssı olmasun ġonca
b. Ki böyle ol ḳodı ben bülbülini göñleksüz
3.a. Ne cān ḳodı ne göñül ġamzeñ oḳları ṣanemā
b. Neler ider baña görˀe bir iki yileksüz
4.a. Baña da bir dilek itsüñ raḳibüñ itüñden
b. Ḳapuñda çünki bir iş bitmez oldı dileksüz
5.a. Necātī yüregüñi ḳarşu ṭut belā oḳına
b. Ki saña dimeyeler yüri bire yüreksüz

|p230
mefāʿīlün mefāʿīlün feʿūlün
1.a. Fiġān ü āh ü nāle bir dem olmaz
b. Ki sāz·ı Zöhreye zīr ü bem olmaz
2.a. İşigüñ terkin urub ben güneh-gār
b. Dönüb bāġ·ı cināna varsam olmaz
3.a. Sözüm ṭutmaz uyar dil her perīye
b. Gözine görinür var epsem olmaz
4.a. Perī yüzlüler insāna yaḳışmaz
b. Raḳīb·i dīv-sīret ādem olmaz
5.a. Yıḳıldı zāhidüñ virdüġi tevbe
b. Dirīġā ḳışda yapu muḥkem olmaz
6.a. Her İbrāhīm ʿizzet Kaʿbesinde
b. Ḫalīlüˀllāh yā ẖōd Edhem olmaz
7.a. Belā yurdına ḳonmasun Necātī
b. Şu ʿāşıḳ kim ġam ile ẖurrem olmaz

|p231
feʿilātün feʿilātün feʿilātün feʿilün
1.a. Göñül ögrendi ġama beyt·i ḥazenden çıḳamaz
b. Degme bir nesne ile kişi vaṭandan çıḳamaz
2.a. Dil Ḫalīli işigüñ Kaʿbesini terk idemez
b. Menʿ ider ḥubb·ı vaṭan Veys Ḳarenden çıḳamaz
3.a. Serv ser-keş dirilür aşurı gözler līkin
b. Cānı yoḳdur bir adım ṣaḥn·ı çemenden çıḳamaz
4.a. Dişlerüñle ṣaçuña virmese bāc ile ẖarāc
b. Dür ʿAdenden gelimez nāfe Ḫutenden çıḳamaz
5.a. Nā-resīdem severem diyene ṭınmaz gūyā
b. Daẖi söz gevheri ol ḥoḳḳa-dehenden çıḳamaz
6.a. Çoḳdan ölürdi bu derd ile Necātī ammā
b. Zaʿfı ġālibdür anuñ cānı bedenden çıḳamaz

|p232
mefʿūlü mefāʿīlü mefāʿīlü feʿūlün
1.a. Gül yüzüñi gördükce söze başlaruz biz
b. Bülbüller ile şimdi sebaḳ-dāşlaruz biz
2.a. Her-cāyī dile eylemişüz ḥüsnüñi taṣvīr
b. Aḳar ṣuya naḳş idici naḳḳāşlaruz biz
3.a. Ḫōrşīd·i cihān-tābı ḳızıl manġıra ṣaymaz
b. İksīr·i fenā ṭālibi ḳallāşlaruz biz
4.a. Saḳf·ı feleke germ olıcaḳ cürʿa ṣaçaruz
b. Kāşāne·i miḥnetde şu ʿayyāşlaruz biz
5.a. Ḳorḳutmasun öldürmek ile tīġ·i müjeñ kim
b. Tīġ ile dirilür nice yoldaşlaruz biz
6.a. Ben ḳan yudaram ġamzeñ içer ḳanumı gūyā
b. Bir ḳan yalaşur iki ḳarındaşlaruz biz
7.a. Mey-ẖāneye evden geli gör yoḳsa Necātī
b. Evler yıḳıcı bir nice evbāşlaruz biz

|p233
fāʿilātün fāʿilātün fāʿilün
1.a. Kim dürür kim sen büti emsen dimez
b. Leblerüñ cān derdine emsem dimez
2.a. Kūyuña varmaḳ diler cān ile dil
b. Kim ola kim cennete varsam dimez
3.a. Ey gözüm ḳan aġla kim ol dürr·i pāk
b. Baḥr·i seyl-āb·ı sirişke nem dimez
4.a. Tīġ·i ġamzeñ yarası ẖōşdur baña
b. ʿĀşıḳ olan zaẖmına merhem dimez
5.a. Sen bu ḥüsn ile dururken ey perī
b. Ḥūr u ġılmāna göñül ādem dimez
6.a. Cānuma geçdi niçün fettān gözüñ
b. Ġamze·i ẖūn-rīẓüñe epsem dimez
7.a. Düşme zülfinüñ uzun sevdāsına
b. Hīç kimse ʿömr ipin muhkem dimez
8.a. Ẕerreye teşbīh itmiş aġzuñı
b. Vāḳıʿā miskīn Necātī kem dimez

|p234
mefʿūlü fāʿilātü mefāʿīlü fāʿilün
1.a. Maẖmūr gözler olalı mest·i şarāb·ı nāz
b. Her gūşede benüm gibi biñ var ẖarāb·ı nāz
2.a. Gül dürlü dürlü nāz ile göñlini bülbülüñ
b. Alsa ʿaceb mi düşmez elinden kitāb·ı nāz
3.a. Maḥşer temām ola vü temām olmaya henūz
b. Yarınki gün ṣorulsa ol aydan ḥisāb·ı nāz
4.a. Güller çemende şīve ile burtarur yüzin
b. Gūyā ki lāle-çihreler içer şarāb·ı nāz
5.a. Başı ayaġı oldı belürsüz Necātīnüñ
b. Sāḳī meger kim itdi ayazınuñ ābın az

|p235
feʿilātün feʿilātün feʿilātün feʿilün
1.a. Nice bir böyle yabandan gelene ʿizzet ü nāz
b. Hele ey Kaʿbe gibi işigi bīgāne-nevāz
2.a. Ḳo ben aġlayayın ey serv·i semen-ber sen gül
b. Ki saña nāz virilmiş ezelī baña niyāz
3.a. Ser·i kūyūñda ḳoma hecr ḥarāmīsini kim
b. Ḳullara emn ü emān ile olur şarṭ·ı Ḥicāz
4.a. Ġam·ı ʿışḳuñ ḳulıyuz begligümüz var bizüm
b. Bize virildi meger devlet·i Maḥmūd u Ayaz
5.a. Ḳapuña secde iderken añarın cenneti ben
b. Unudulmışları zīrā getürür ḳalbe namāz
6.a. Allāh Allāh nice ruẖsār olur Allāh nice zülf
b. Kim görübdür kim ola devr·i ḳamer ʿömr·i dırāz
7.a. Añıcaḳ ʿışḳ odını ẖuşg olanlar ṭutuşur
b. Her kişi saña göñül olmaz imiş maḥrem·i rāz
8.a. Ey Necātī o güneş çihrelü çoḳ sevdügümüñ
b. Döyemez gözlerümüz yüzine baḳmaġa bir az

|p236
feʿilātün feʿilātün feʿilātün feʿilün
1.a. Nola bir kerre seni ṣayd ü şikār eyleyevüz
b. Ṣoravuz leblerüñi būs u kinār eyleyevüz
2.a. Şöyle merdānelerüz ṣanma ki bir ẕerre ḳadar
b. Ṣanma kim ẖalḳ·ı cihāndan bizi ʿār eyleyevüz
3.a. İşigüñde hele ḥasret yaşını aḳıdalum
b. Şāyed ey yüregi mermer saña kār eyleyevüz
4.a. Didiler ʿāşıḳa yā māl ola yā ṣabr u sefer
b. Çün budur bārī hemīn terk·i diyār eyleyevüz
5.a. Ey Necātī saña meyl eylese bir kerre ḥabīb
b. Biz raḳībüñ gözine ʿālemi dar eyleyevüz

|p237
mefāʿilün feʿilātün mefāʿilün feʿilün
1.a. Nice ḥayāt umayın ben o serv-ḳāmetsüz
b. Ölü dirildügini görmedin ḳıyāmetsüz
2.a. Ne şemʿ olur ruẖ·ı sāḳī ki kellesi ḳızıcaḳ
b. Dil uzadur ḳamer ü āfitāba minnetsüz
3.a. Güne zevāl irer ayuñ sitāresi bozulur
b. Ḳapuñ yine ṭolanur bir iki saʿādetsüz
4.a. Diri ṭutub giceyi ṣubḥ olınca aġların
b. Ölürin olımazın şemʿ gibi ṣoḥbetsüz
5.a. Kitāb·ı ʿışḳda gördüm ne ḳati yazuġ imiş
b. Raḳīb adını añmaḳ kimesne lāʿnetsüz
6.a. Ḳomaz mey içmege ṣōfīyi şeyẖ ṣavmaʿada
b. Yoġ ola ancılayın bir evinde ḥörmetsüz
7.a. Necātī mey-kede ṣadrına geçdi devletle
b. Ne ẖōş bilür görˀe yirini vay bu devletsüz

|p238
mefāʿilün feʿilātün mefāʿilün feʿilün
1.a. Gözüñe nergis·i şehlā ḳul oldı ʿilletsüz
b. Sözüñe şekker·i Mıṣr öykünür evet ṭatsuz
2.a. Bir iki yüzi ḳaralar nola ögerse seni
b. Ki zer miḥaksüz olımaz çerāġ ẓulmetsüz
3.a. Müdām mey-kedelerde yatur durur ṣōfī
b. Unutdı ṣavmaʿayı ol evinde ḥörmetsüz
4.a. Raḳīb gibi ne var ʿaḳlı ālet itdüm ise
b. Bu ʿışḳ ṣanʿatidür başa varmaz āletsüz
5.a. Umardum ey şeh·i devrān ferāġat ehli olub
b. Müseyyeb ola geze ̮idüm cihānda ẖıdmetsüz
6.a. Duʿāya ḥāẓır ola ̮idüm ḥuẓūr·ı Ḥaẓret içün
b. Muḥāl imiş baña Şāhum ḥuẓūr Ḥaẓretsüz
7.a. Ciger ḳanı dolusın şol nigār içün içelüm
b. Necātī olımazuz şemʿ gibi ṣoḥbetsüz

|p239
müstefʿilün feʿūlün müstefʿilün feʿūlün
1.a. Nūş itdi cām·ı ʿışḳı bir kendüzini bilmez
b. Cūş itdi ẖūn·ı eşki ṭopraḳ ṣaçub yeñilmez
2.a. Gül dāmenini ṭutdum güldürmedi beni gül
b. Kim āsitīn·i ġonca ḳanlu yaşumı silmez
3.a. Meydān·ı ʿārıẓuñda tozub tozub gelür ẖaṭ
b. Şebdīz·i zülfe beñzer ṭutub ṭutub yeñilmez
4.a. Göz ucı ile baḳub görmezlige urur ah
b. Ġamzeñ geçer yanumdan şöyle ki hīç ilmez
5.a. Ferhād ṣanʿati ̮ile ʿışḳı iletdi başa
b. Senüñ gibi Necātī yoẖdur işini bilmez

|p240
fāʿilātün fāʿilātün fāʿilātün fāʿilün
1.a. Nice dirsin ey göñül kim hecrden cān aġlamaz
b. Yaʿnī kimse var mıdur bu derd ile ḳan aġlamaz
2.a. Ey gözüm ebr·i bahārī geh yaġar geh açılur
b. ʿĀlem içre sencileyin kimse yek-sān aġlamaz
3.a. Āh ü zārum işidürsin nev-bahār·ı ḥüsn içün
b. Şöyle bil bād·ı havādan ebr·i nīsān aġlamaz
4.a. Her biri bir gevher olsa eşk·i bī-pāyānumuñ
b. Yoluña ẖarc eylemekden çeşm·i giryān aġlamaz
5.a. Nice gice ola kim yaş yirine encüm döküb
b. Derd-mendüñ ḥāline gerdūn·ı gerdān aġlamaz
6.a. Gönlüm ol zülf·i dil-āver key ḳati itdi zebūn
b. İki kāfirden egerçi bir müselmān aġlamaz
7.a. Nāle ḳıl kim alasın nā-merd dünyāda murād
b. Ana süd virmez Necātī tā kim oġlan aġlamaz

|p241
fāʿilātün fāʿilātün fāʿilātün fāʿilün
1.a. Yirleri seyl-āba virdi dīde·i bīdārumuz
b. Göklere dikdi ʿaṣāyi āh·ı āteş-bārumuz
2.a. Ḫalḳ·ı ʿālem hep senüñçün düşman olmışdur baña
b. Sensin ey meh-rū bizüm dünyāda ancaḳ varumuz
3.a. Vaʿde ile virdi zāhid kāsid olmaġın metāʿ
b. Naḳd iledür ey yüzi cennet bizüm bāzārumuz
4.a. Şāhid·i islām ise ṣōfī bu tāc ü ṭaylesān
b. Baş açuḳ abdālıyuz birdür bizüm iḳrārumuz
5.a. Zülfi sevdāsından idersem tecāvüz ḳıl ḳadar
b. Gel bizi pergāra çek kim dārdur pergārumuz
6.a. Ḳadd ü ẖaddüñ añılaldan ṭurdı serv oṭurdı gül
b. Gel ki bir yüzden daẖi yüz gösterür gül-zārumuz
7.a. Dōstum naẓm·ı Necātīden naẓar menʿ itme kim
b. Göñül açar bir aḳar ṣudur bizüm eşʿārumuz
8.a. Bir perī-peyker semen-sīmāyi tesẖīr itmege
b. Ney-şeker gibi şīrīnlik ṭoludur ṭūmārumuz

|p242
feʿilātün mefāʿilün feʿilün
1.a. Yā Rab ol serv·i nāzı kim sevmez
b. Veylī ʿömr·i dırāzı kim sevmez
2.a. Nāz eyler ḳadeḥ ṣurāḥī niyāz
b. Böyle nāz ü niyāzı kim sevmez
3.a. ʿIşḳ ile āh ü zārı kim dilemez
b. Bezmde söz ü (sūz ü) sāzı kim sevmez
4.a. Çünki ʿışḳuñ hümāsın itdi şikār
b. Ḫātır·ı şāh-bāzı kim sevmez
5.a. Ḫāṭırın gözleyince Maḥmūduñ
b. ʿİzz ü nāz·ı Ayazı kim sevmez
6.a. Luṭf u ġam her ne geldi ẖōş geldi
b. Yār·ı ʿāşıḳ-nevāzı kim sevmez
7.a. Çün Necātī maḳām ola dem-sāz
b. Naġme·i şāh-nāzı kim sevmez

|p243
mefāʿīlün mefāʿīlün mefāʿīlün mefāʿīlün
1.a. Ṣaçılsun sünbülüñ cānā gül üstine niḳāb olmaz
b. Kim ol şemʿ·i şeb-ārādur aña ẓulmet ḥicāb olmaz
2.a. Ḫayāl·i genc·i ruẖsāruñla ābād olmaz ol dil kim
b. Anuñ maʿmūresi derd ü belā ile ẖarāb olmaz
3.a. Saʿādet ṣadrınuñ her kim cenābın mesned idinmez
b. Bu gün devlet serīrinde ʿazīz ü kām-yāb olmaz
4.a. Ṣıġındum āsitānına cefā vü cevr·i devrāndan
b. İşidelden beru anı ki cennetde ʿaẕāb olmaz
5.a. Eline gūşe·i dāmān·ı himmet tā-ebed girmez
b. Ḳapuñuñ āsitānında ne ṭālib kim türāb olmaz
6.a. Ḳapuñı ḳıble·i erbāb·ı ḥācāt eyledi Bārīˀ
b. Aña yüz uranuñ kim dir duʿāsı müstecāb olmaz
7.a. Ne müşkildür ki sevdügi Necātī yüzine baḳmaz
b. Ḳaçan kim iltifāt·ı Āṣaf·ı ʿālī-cenāb olmaz

|p244
mefāʿīlün mefāʿīlün mefāʿīlün mefāʿīlün
1.a. Yüzüñ gül-zārına sünbül ṣaçuñ ṣaç kim niḳāb olmaz
b. Çerāġ·ı meclis-efrūza ẓalām·ı şeb ḥicāb olmaz
2.a. Gidersün ḳō ḳara zülfüñ ṣabā yili yañaġuñdan
b. Ki nev-rūz olıcaḳ dirler güneş üzre seḥāb olmaz
3.a. Ġam·ı miḥnetle yanardum ẖaṭuña tābiʿ olmasam
b. Ne şübhe yanar odlara şu kim ehl·i kitāb olmaz
4.a. Hidāyet nūrına māniʿ degüldür cām·ı yāḳūtī
b. Ki ṣırça ḥāˀil·i ferr·i ẓıyā·yi āfitāb olmaz
5.a. Ḳaçan lāyıḳ olur ehl·i ṣafā bezmine şol kimse
b. Ki ḥasret odına baġrı döne döne kebāb olmaz
6.a. Didüm yoluñda ey dil-ber ne çoḳ ʿaşıḳlaruñ ölmiş
b. Didi kim Kaʿbe yolında ölenlere ḥisāb olmaz
7.a. Gözi yaşlu gider dāˀim Necātī kūy·i cānāna
b. Ṭarīḳ·ı Kaʿbe müşkildür ḳamu yirlerde āb olmaz

|PSīn|p245
fāʿilātün fāʿilātün fāʿilātün fāʿilün
1.a. Aṣılub dil ḳarşuña eyler ser·i zülfüñ heves
b. Gel murādını vir ol bī-çārenüñ ipini kes
2.a. Yıllar oldı yollar üstine düşüb ẖāk oldum ah
b. Bulmadum ol zülf·i ser-keş dāmenine dest-res
3.a. Hīçe ṣaymaz gözlerümüñ bir yumub biñ dökdügin
b. Olmaz āhum yiline ol serv māyil bir nefes
4.a. Biˀllāh ey servüm giyāh·ı nā-tüvāndan çekme ser
b. Ki ̮ol ḳad·i raʿnādan ancaḳ sāyedürür mültemes
5.a. Nicesi yanmaya ġayret odına pervāne kim
b. Ḳarşusında şerbet·i vaṣl ile ʿayş eyler mekes
6.a. Ṭalʿatuñ mihri ṭoġub māhuñ bitirdi işini
b. Ḳāmetüñ servi bitüb ʿarʿarlara düşürdi kes
7.a. Ḥüsni devrinde ruẖ·ı zerd oldı ancaḳ ḥāṣılum
b. Uşbu ẖırmende Necātī baña berg·i kāh bes

|p246
fāʿilātün fāʿilātün fāʿilātün fāʿilün
1.a. Dil kesilmez ʿışḳ·ı dil-berden ḳo nāṣiḥ sözi kes
b. Veh ki bu ẖāb·ı eceldür olımaz māniʿ mekes
2.a. ʿĀşıḳ olmayınca itmez kimsene dilden fiġān
b. Yola girmeyince ḳılmaz nāle vü zārī fiġān
3.a. ʿĀşıḳ içün aġlayanlar ayruġ acı görmesün
b. Müstedām olsun benümçün āh idenler bir nefes
4.a. Aẖşamın gel dünle gel itme raḳībüñden ḥaẕer
b. Gice gezdüñ diyebilmez māh·ı tābāna ʿases
5.a. Ḥüsn gül-zārında cān bülbüllerin aṣmaġ içün
b. Ḳara tellerden düzetmiş zülf·i müşgīnüñ ḳafes
6.a. Luṭf meydānında sen burduñ çināruñ pençesin
b. Didi el arḳası yirde ey boyı şimşād pes
7.a. Ey Necātī ʿāşıḳ olanlarda neyler ārzū
b. Kendüñi daġıtma cemʿ olmaz hevā ile heves

|PŞīn|p247
mefāʿīlün mefāʿīlün mefāʿīlün mefāʿīlün
1.a. Benüm serv·i ẖırāmānum cemālüñ tāze bāġ olmış
b. Ruẖuñ güllerinüñ ḳızılı ḳızıl aġı aġ olmış
2.a. Maḥabbet sebze-zārında biter çoḳ lāleler ammā
b. Bulunmaya benüm gibi cefādan baġrı dāġ olmış
3.a. Yüzüni gösterüb gizler leb·i laʿlini cānāne
b. Dirīġā mevsim·i gülde mey·i nāba yasaġ olmış
4.a. Egilmesün diyu āhum yilinden ṣaḳınub her dem
b. Raḳīb·i kelb ol servüñ nihāline dayaġ olmış
5.a. Göñül çün ʿāşıḳuñ işi yaḳılmaḳdur yıḳılmaḳdur
b. Cihānda kimse var mı ʿışḳ ucından od ocaġ olmış
6.a. Necātī derd-mend iken ḳapuñ dārüˀş-şifāsından
b. ʿİnāyet şerbetin nūş eyleyüb fiˀl-ḥāl ṣaġ olmış

|p248
fāʿilātün fāʿilātün fāʿilātün fāʿilün
1.a. Ḫāk·i pāyuñ tūtiyā·yi dīde·i ẖūn-bār imiş
b. Ḥamdü liˀllāh kim görecek gözlerümüz var imiş
2.a. Neylesün gül-zārı ʿāşıḳ olmayınca gül-ʿiẕār
b. Būstān·ı cennete ṣūret viren dīdār imiş
3.a. Ṭıfl iken bir būseñi azırġanurduḳ cāna ah
b. Ey dirīġā bilmedük bāzār ilk bāzār imiş
4.a. Bir ben isem de gerekmez kimseye yār olduġuñ
b. Ey gül·i pākīze-dāmen dimesünler yār imiş
5.a. Būseñi görmez Necātī kendüye lāyıḳ velī
b. Ey lebi sükker ne çāre cāndürür umar imiş

|p249
fāʿilātün fāʿilātün fāʿilātün fāʿilün
1.a. Ṭutalum ol zülf müg-efşān ü ʿanber-būy imiş
b. Ey göñül lāzım degüldür diyesin iş büyümiş
2.a. Devr·i ḥüsnüñde ḳati bīmār olubdur gözlerüñ
b. Hindū·yi bed-mesti gör yatmış güneşde uyımış
3.a. Ḳanlu peykānuñ ciger biryānların yir dāˀimā
b. Beñzinüñ ḳızarduġını şimdi bildüm o imiş
4.a. Gel gözümde bulınur gāhī göñülde gizlenür
b. Ġamze·i ẖūn-rīzi bir siḥr-āferīn cādū imiş
5.a. Gözlerümden göñlüme geldi ẖayāl·i ġamzesi
b. Ṣu yolından bāġa girdi ūstād uġru imiş
6.a. Baġladı göñlin Necātī zülfüñüñ zencīrine
b. İşidenler didiler kim ol kişi uṣlu imiş

|p250
mefāʿīlün mefāʿīlün mefāʿīlün mefāʿīlün
1.a. Ṭutubdur zülfüñ ucından cemālüñle cihān āteş
b. Gice ̮ile olıcaḳ ẖalḳa ḳati eyler ziyān āteş
2.a. ʿAceb midür naṣīḥat eyledükce iñlese göñlüm
b. Bilürsin üstine ṣu sepseler eyler fiġān āteş
3.a. Ġam u ġuṣṣa üşüb göñlüm evin yıḳduḳları budur
b. Ki eṭrāfa ulaşmaya derūnumda yanan āteş
4.a. Eger dīdār ümīdi olmaya ̮idi bāġ·ı cennetde
b. Cehennem gibi ola ̮idi gül ile erġavān āteş
5.a. Gerek aġla gerekse gül cihān fāriġdür ey bülbül
b. Kimine āteş olur gül kimine gül-sitān āteş
6.a. Beni senden ṣovutmaġa sevādın ekşidür nāṣiḥ
b. Bilür kim sirke ile yig söyünür bī-gümān āteş
7.a. Necātī göñlini her dem ider bir lāle-ruẖ yaġmā
b. Ṣanasın Bursa şehridür ki yaḳar her zemān āteş

|p251
mefāʿīlün mefāʿīlün mefāʿīlün mefāʿīlün
1.a. Yine derd ile bir āh eyledüm ṭoldı cihān āteş
b. Felek bir ṭāsa dönmişdür kim ola dermiyān āteş
2.a. Gözüm göñlüm elinde ẖuşg ü terden nesne ḳalmadı
b. Ne bulur nem yaḳar bilsem ki gitmez cāvidān āteş
3.a. Ṣaç ile ruẖların örter bilür kim ol açar anı
b. Yoġ ise perde·i şebde ḳaçan olur nihān āteş
4.a. Yañaġuñ ẖāl·i hindūsı ne sāḥirdür nigārā kim
b. Semender-vār olmışdur aña dün gün mekān āteş

|p252
fāʿilātün fāʿilātün fāʿilātün fāʿilün
1.a. ʿAks·i laʿlüñden dükānın (dü kānın) çeşm·i ter zeyn eylemiş
b. Şīşede ḳannādlar rengīn şeker zeyn eylemiş
2.a. Ḫōş yaraşmış çevresinde ẖaddüñüñ ẖaṭṭ·ı ġubār
b. Ḥāşiye ḥüsnüñ kitābın ey püser zeyn eylemiş
3.a. Ḥüsn bāzārında iş aṣmış perīşān kākülüñ
b. Gözlerüm dükkānına laʿl ü güher zeyn eylemiş
4.a. Sāyesin ṣalmaġ içün serv·i ser-efrāza ḥabīb
b. Güller ile gülşeni bād·ı seḥer zeyn eylemiş
5.a. Ḥalḳa ḥalḳa şeh-per·i ṭāvūs gibi ṣaçlaruñ
b. Muṣḥaf·ı ḥüsnüñ kitābın ser-be-ser zeyn eylemiş
6.a. Almışam her lāle-ẖaddüñ başuma ġavġāsını
b. Dönmüşem şol meste kim güllerle ser zeyn eylemiş
7.a. Ḳolların dāġ eylemiş yer yer Necātī derd-mend
b. Belüñe ey sīm-ber yaʿnī kemer zeyn eylemiş

|p253
mefʿūlü fāʿilātü mefāʿīlü fāʿilün
1.a. Ḳanlara döndi göz yaşı ey bī-vefā yetiş
b. Bir dürlü daẖi oldı begüm mā-cerā yetiş
2.a. Ẓulmetde ḳaldı ṭālib·i Māˀüˀl-Ḥayāt·ı ʿışḳ
b. Ey Ḫıẓr·ı dil-nevāz ū Sikender-liḳā yetiş
3.a. Derdüm ḳatidür āfet·i hicrān·ı yār ile
b. Dermān it ey ecel demidür gel baña yetiş
4.a. Ben derd-mende itmiş idüñ vaʿde·i vefā
b. Luṭfeyle vaʿde irmedin ey bī-vefā yetiş
5.a. Pend·i refīḳ u ṭaʿn·ı raḳīb aldı araya
b. Ortada ẓāyiʿ oldı dil·i mübtelā yetiş
6.a. Bir būse istedüm dil·i bīmāra güldi dōst
b. Açıldı ey göñül der·i dārüˀş-şifā yetiş
7.a. Ḫaşmum ġamuñda gāh elem oldı gehī ölüm
b. Al ellerinden eyle beni bir yaña yetiş
8.a. Hep ümmet·i Muḥammed olanlar esirgedi
b. Vaḳtidürür Necātīye gel Muṣṭafā yetiş

|p254
mefāʿīlün mefāʿīlün feʿūlün
1.a. Güzeller geldi bayrama beg olmış
b. Donanmış biribirinden yeg olmış
2.a. Güzeller gibi bayram ile nev-rūz
b. Bezenmiş bir birinden yegrek olmış
3.a. Güzeller gibi bayram ile nev-rūz
b. Semenler sebzede göñlekcek olmış
4.a. Güzeller ʿārıẓından yandı lāle
b. Libāsı aña oddan göñlek olmış
5.a. Güzel sāḳī yükin yitürdi ẖalḳuñ
b. Yine ṣāfī ile ṣōfī hek olmış
6.a. Güzeller yine ṣūret virdi ʿışḳa
b. Didüklerüñ Necātī gerçek olmış

|PṢād|p255
mefāʿilün feʿilātün mefāʿilün feʿilün
1.a. Duẖān·ı āh ile oldum şerer gibi raḳḳāṣ
b. Sirişk·i çeşm ile oldum güher gibi ġavvāṣ
2.a. Bu āh ile çıḳışursam bu yaşı nice ̮ideyin
b. Yuḳaru ḳorsam is olur aşaġa ḳorsam paṣ
3.a. Ḫalaṣ olımadı dil ḳayd·ı bend·i zülfüñden
b. Ḫaṭuñdan oḳıdı biñ kerre sūre·i İẖlāṣ
4.a. Ṣuçın bilüb düşer ayaġa zülf·i fettānuñ
b. ʿAzīz başuñ içün eylük eyle fitneyi baṣ
5.a. Ne üzilür ne kesilür ṣaçuñla ġamzeñden
b. Gerek boġazla Necātī ḳuluñ begüm gerek aṣ

|p256
fāʿilātün fāʿilātün fāʿilātün fāʿilün
1.a. Yāra yol iki ḳademdür birisi cāna baṣ
b. Çünki bu meydāna geldüñ ayaġuñ merdāne baṣ
2.a. Üstüñe dönmek murād olursa çevgān·ı felek
b. Başuñı ṭop eyle andan ṣoñra bu meydāna baṣ
3.a. Bāġ·ı ḥüsne el ṣunarsın āh kim bīgānesin
b. Āşinā ol ayaġuñı sünbül ü reyḥāna baṣ
4.a. Düz baṣınca ayaġuñ ṣalınma ey ser-mest·i nāz
b. Muḥtesib yüzine geldüñ nāzüg ü rindāne baṣ
5.a. Gül yüzüñe öykünürse lāle·i ṣaḥrā-nişīn
b. Yüregine dāġ·ı ḥirmān ur yüzini ḳana baṣ
6.a. Al geymiş girmiş ortaya şarāb·ı lāle-reng
b. Duẖter·i rez çekmek isterseñ yüri meyẖāne baṣ
7.a. Aġzūñ esrārın Necātī duydı duymasun raḳīb
b. ʿAnberīn ẖaṭ ẖātemini ḥoḳḳa·i mercāna baṣ

|PŻād|p257
feʿilātün feʿilātün feʿilātün feʿilün
1.a. Cānumı virür idüm būse·i cānāna ʿivāẓ
b. Mümkin olsa yaradılmışda eger cāna ʿivaẓ
2.a. Būseñe cān virürüz gerçi ki dünyā duralı
b. Görmemişdür bir aḥad baẖşiş·i sulṭāna ʿivaẓ
3.a. Naḳd·i ʿömr oynadı bir kez eñegüñ oẖşamaduḳ
b. Bārī bir alma vir ol genc·i firāvāna ʿivaẓ
4.a. Yārı terk eyle ẖalāṣ ol bu belādan dirler
b. Nice bīmār ola cānın vire dermāna ʿivaẓ
5.a. Dil virüb vuṣlat umar ise Necātī heyhāt
b. Kimse gödüñ mi vire āteş·i sūzāna ʿivaẓ

|PṬāˀ|p258
mefʿūlü fāʿilātü mefāʿīlü fāʿilün
1.a. El ṣundı ḥüsn dāmenine ey nigār ẖaṭ
b. Ḳoma ki çıḳa dāˀireden zinhār ẖaṭ
2.a. Ortaya atdı beñlerüñi ḳapdı fitneler
b. Nāzüglüg ile kendüzi ṭutdı kenār ẖaṭ
3.a. Bir toz ḳoparmayınca ḳomadı görür misüz
b. Zülf ü ruẖ arasında zihī nā-be-kār ẖaṭ
4.a. Yaḳışdı ḥüsni şemʿine pervāne oldı ẖāl
b. Yazıldı gül yañaḳlarına perde-dār ẖaṭ
5.a. Cāˀiz midür ki ẖaṭṭ·ı lebüñ örte laʿlüñi
b. Yāḳūta vire gelmiş iken iştihār ẖaṭ
6.a. Derd ehline getürdi maḥabbet selāmını
b. Dürdi cefā varaḳların ey gül-ʿiẕār ẖaṭ
7.a. Vaṣf itme istedükce ẖaṭ·ı müşg-bāruñı
b. İñler ḳalem dili ̮ile begüm zār ü zār ẖaṭ
8.a. Ḫaṭṭı ḳararduġına Necātī gücenme kim
b. Merġūb olur naẓarda bulıcaḳ ḳarār ẖaṭ

|PẒāˀ|p259
mefʿūlü mefāʿīlün mefʿūlü mefāʿīlün
1.a. Doldur var iken sāḳī yāḳūt·ı revāndan ḥaẓ
b. Çün ʿömr degül bāḳī al ḳūt·ı revāndan ḥaẓ
2.a. Ey şeyẖ nedür tedbīr alnuma benüm taḳdīr
b. Yazmış kim alam dāˀim bir ḳaşı kemāndan ḥaẓ
3.a. Gül-zār·ı cinān ise vuṣlat yolınuñ bāġı
b. İtmeye maʿāẕaˀllah dil bāġ·ı cināndan ḥaẓ
4.a. Ḫaṭṭuñ geleli meylüm laʿlüñe ziyād oldı
b. Artar ecel irdükde her kişiye cāndan ḥaẓ
5.a. Nāz ile geçüb bir gün sögmedi duʿācıya
b. Geçdi günüm almadum ʿömr·i güẕerāndan ḥaẓ
6.a. Gün gicelüdür zülfüñ belüñi ḳuşatmasun
b. Ḳo ḳılca ḳolum ḳılsın ol mūy·i miyāndan ḥaẓ
7.a. Ol serv Necātīnüñ baḳmaz yüzine zīrā
b. Şimşād·ı bahār itmez evrāḳ·ı ẖazāndan ḥaẓ

|PʿAyin|p260
fāʿilātün fāʿilātün fāʿilün
1.a. İtmedüm cān içün aġzuñla nizāʿ
b. Yoḳ behāya gitdi ol nāzüg metāʿ
2.a. Kūyuña vardılar andaḳ dōstum
b. Cennet evṣāfın idenler istimāʿ
3.a. Zülfüñüñ baş oynaram çevgānına
b. Baldan ṭopı ben itdüm iẖtirāʿ
4.a. Dönme ehl·i derdden görüb beni
b. Kim ḳıyāsı olmaz ey ṣōfī semāʿ
5.a. İki doludan olur bir būse fāş
b. Küllü sirrin cāvezeˀl-is̲neyne şāʿ
6.a. Ya gibi bükdüñ Necātīnüñ belin
b. Bārī ayrulduḳda itme imtināʿ
7.a. Ḳara baġruma çekeyin oḳ gibi
b. Öpe ḳoca eyleyeyin el-vedāʿ

|p261
feʿilātün feʿilātün feʿilātün feʿilün
1.a. Ḥalḳa ḥalḳa idüb ol kāküli bu ḥüsn·i bedīʿ
b. Yazdı menşūr·ı cemāl üstine tevḳīʿ·i refīʿ
2.a. Yine yazıldı ẖaṭuñ üzre muʿanber zülfüñ
b. Yine derc oldı ġubār üstine ẖaṭṭ·ı tevḳīʿ
3.a. Luṭf idüb dōst duʿācılarına sögdükce
b. Dile tekrār gelür āyet·i Allāhü semīʿ
4.a. Leb·i cānāneyi terk eyleme ey tāze cüvān
b. Devr·i gülde meyi terk itme şenīʿ ola şenīʿ
5.a. Ölmedüġine Necātīnüñ utanduġı yiter
b. Gine ẖaclet umarın ki ̮ola günahına şefīʿ
6.a. Vech·i taʿrīf baña şiʿr·i cihān-gīr yiter
b. Aṣlı is̲bāt ider çünkim ola ferʿ refīʿ

|p262
fāʿilātün fāʿilātün fāʿilātün fāʿilün
1.a. Ḳāmetüm yā itdügine itmezem hergiz nizāʿ
b. Oḳ gibi bir kez çekersem baġruma rūz·i vidāʿ
2.a. Sīnem üzre dāġlar görüb elif ṣanmañ ki ġam
b. ʿÖmrümüñ ser-defterine çekdi ḥarf·i inḳıṭāʿ
3.a. Ḳaddüñe beñzetdügüm işitdi beñzer bāddan
b. Kim ṣalub ḳollarını şevḳ ile serv eyler semāʿ
4.a. Aġlamaḳda iñlemekde doġramaḳda baġrını
b. Daġlar Ferhād ile hem müşterekdür hem müşāʿ
5.a. Dōstum ẖadd·i ʿaraḳ-rīzüñden irmezse gül-āb
b. Gülşen·i cennet güli virür Necātīye ṣudāʿ

|p263
mefāʿilün feʿilātün mefāʿilün feʿilün
1.a. Gel itme ser-ẖōş iken ol leb·i ṭamaʿ
b. Münāsib olmaz iñen daẖi ehl·i ḥāle ṭamaʿ
2.a. Viṣāl içinde firāḳ u firāḳ içinde viṣāl
b. Mülāḥaẓa ideli itmedüm viṣāle ṭamaʿ
3.a. Belüñi görse aceb mi dil·i daḳīḳa-şinās
b. Hemīşe şāʿir olanlar ider ẖayāle ṭamaʿ
4.a. Dehānı ḳıl yaruben her suˀāle virdi cevāb
b. Daẖi o ġamze·i fettān iden cidāle ṭamaʿ
5.a. Murāda irdi müjeñden iden cidāle heves
b. Cevābın aldı lebüñden ider suˀāle ṭamaʿ
6.a. Miyānuñ ile daẖānuñ olubdürür bāʿis̲
b. Ki müstaʿidd·i naẓar itdi ḳīl ü ḳāle ṭamaʿ
7.a. İşidürüz ġam·ı Şeddād ü māl·i Ḳārūnı
b. Nedür bu mülke heves yā nedür bu māle ṭamaʿ
8.a. Cihān·ı pīr ki Rüstemleri zebūn itdi
b. Bir eski ḳaḥbedür itme bu pīre-zāle ṭamaʿ
9.a. Necātī nüktelerinden duya ̮idi rūḥ·ı Kemāl
b. Düşerdi uşbu kelāmı görüb Kemāle ṭamaʿ

|PĠayin|p264
fāʿilātün fāʿilātün fāʿilātün fāʿilün
1.a. Zülf·i ṭarrāruñ ẖamından sünbülüñ boynında baġ
b. Ḫāl·i ruẖsāruñ ġamından lālenüñ baġrında dāġ
2.a. Sen ḳaşı mekkār yayın kimse çekmez dünyede
b. Sen gözi bīmār oḳından ḳurtulımaz kimse ṣaġ
3.a. Teşneyem ḳandur viṣālüñ çeşme-sārından beni
b. Çün geçer serv·i revānum ṣu gibi bu çaġ çaġ
4.a. Dāġ·ı dilde ideliden gül yüzüñ şevḳi maḳām
b. Oldı ben Mecnūna ey Leylī-ṣıfat daġ üsti bāġ
5.a. Nola benden ḳapuña var ise yirden gökce farḳ
b. Olmaz ey Mıṣr·ı melāḥat ʿāşıḳa Baġdād ıraġ
6.a. Nūr·ı ruẖsāruñ ḳatında āfitābuñ ferri yoḳ
b. Yā ne deñlü şuʿle vire gündüzin yanan çerāġ
7.a. Ey Necātī der-geh·i ʿālem-penāh·ı Şāha var
b. Ger dilerseñ derd·i yār ü cevr·i devrāndan ferāġ

|p265
fāʿilātün fāʿilātün fāʿilātün fāʿilün
1.a. Māh çekmiş sīnesine gün yüzüñ şevḳı ̮ile dāġ
b. Lāle daẖi māh·ı mihr-efrūzdan yaḳar çerāġ
2.a. Olalı sen yāra aġyār·ı bed-endīşüm yaḳın
b. Āh ü efġān oldı işüm işdenlerden ıraġ
3.a. Bezm·i ḥüsnüñe ıraḳdan baḳar iken āfitāb
b. Kendüyi bilmezlik ile ortaya atar çerāġ
4.a. Dil-berā vuṣlat güninde eyleme būseñ dirīġ
b. Dōstum bayram olıcaḳ bādeye olmaz yasaġ
5.a. Nāṣiḥüñ bārid sözinden üşüdüñse dōstum
b. Sīneme gel kim senüñçün germ olubdur bu ocaġ
6.a. Ġabġabuñda ẖāl·i ʿanber-bāruñı görüb didüm
b. ʿĀşıḳına ṣunmaġ içün eylemiş sīb üzre dāġ
7.a. Tīr ü ẖançer çekme ġamzeñden Necātī ḳaṣdına
b. Bir ḳarınca ḳatline lāzım degül bunca yaraġ

|p266
fāʿilātün fāʿilātün fāʿilātün fāʿilün
1.a. Olalı hicrān ile der-gāh·ı dil-berden ıraġ
b. Āh ü zārī oldı işüm işidenlerden ıraġ
2.a. Ey benüm ḥālüm ṣoranlar ne ̮idügüm bilmez misüz
b. Ẕerrenüñ aḥvālini ẖōrşīd·i enverden ıraġ
3.a. Dögeyin kendü elümle leblerüñçün başumı
b. Şol mekes gibi kim ola teng·i şekkerden ıraġ
4.a. Almayam devrānı sensüz virseler bir ḥabbeye
b. Ḳıymeti olmaz ṣadef kim ola gevherden ıraġ
5.a. Görinür nūr·i cemālüñden dehānuñ ẕerresi
b. Gerçi olur Āb·ı Ḥayvān şems·i ẖāverden ıraġ
6.a. Ey ġam·ı dil-ber ṣaḳın cān ü göñülden çıḳma kim
b. Pādişeh cāˀiz degüldür ola leşkerden ıraġ
7.a. Pāy-būs·i Şehriyāra saʿy it olma nā-ümīd
b. Ey Necātī kimse görmez devleti erden ıraġ

|p267
fāʿilātün fāʿilātün fāʿilātün fāʿilün
1.a. Olalı hicrān ile sen māh-peykerden ıraġ
b. Āh ü efġān oldı işüm işidenlerden ıraġ
2.a. Ayaġuñ ṭopraġına sürsem yüzüm gözüm nola
b. Görmek olmaz her murādı sīm ile zerden ıraġ
3.a. Ben faḳīr olduġum içün gelmez olmazsın yaḳın
b. Pādişāhum neyki ḳaçmaḳ böyle çākerden ıraġ
4.a. Ben ġubāruñ olmaḳ olmaz āsitānuñdan cüdā
b. Olabilmez ṣayrafī ṣandūḳ·ı cevherden ıraġ
5.a. Ẕerreyi mihr·i cihān-tāba hevā-dār eylemiş
b. Yaradan gökler yüzin bu vech ile yirden ıraġ
6.a. Laʿl·i şīrīn ü güher-rīz ü ẖayāl·i ẖaṭṭ u ẖāl
b. Hey maʿāẕaˀllah mekesler teng·i sükkerden ıraġ
7.a. Ḫāk·i pāyuñı Necātī itmek ister tāc·ı ser
b. Görmek olmaz Pādişāhum devleti erden ıraġ

|PFāˀ|p268
müstefʿilün müstefʿilün müstefʿilün müstefʿilün
1.a. Düriş erenler yolına tā olasın ẖayrüˀl-ẖalef
b. Özge kemāle ṭālib ol māl üstine kef geçme kef
2.a. Bir yire ẖarc it ʿömrüñi ki ̮ola ḥayātuña bedel
b. Bu nāzenīn evḳātuñı dünyā içün itme telef
3.a. Ḳurˀān dersin dāˀim it ṭā noḳṭa ḳonmaya saña
b. Āẖır zemāndur olıgör ẖāl ü ẖaṭ ile ber-ṭaraf
4.a. Dāˀim ẖamūş ol ey püser gör kim nice dürler döker
b. Ki ̮aġzını bir kerre açar yıllarla deryāda ṣadef
5.a. Çekmez benüm çoḳ sevdügüm mihr ü maḥabbet yayını
b. Şol kim melāmet oḳına kendüzini itmez hedef
6.a. Bāb·ı keremdür işigüñ geldi Necātī yüz sürer
b. Anuñ uñulmaz dedine himmet gerek Şāh·ı Necef

|p269
mefʿūlü fāʿilātü mefāʿīlü fāʿilün
1.a. Redd itme derd-mendi eyā Ṣāḥibüˀn-Necef
b. Virsün ḥarīm·i ḥörmetüñe ẖastalar tuḥaf
2.a. Cānā ʿaleˀl-ẖuṣūṣ ki Dürreyn·i Ezhereyn
b. Ems̲ālini getürmedi bu nīl-gūn ṣadef
3.a. Ḥaḳ iki başda iki nişān diküb eyledi
b. İki cihānda tīr·i murādātuña hedef
4.a. Ẕerrāt ile güneş gibidür geldi bā-vücūd
b. Senden cihāna her ne ḳadar dir iseñ şeref
5.a. Ẕāt·ı Muḥammedī senün ile bilinmegin
b. Maʿrūf oldı ʿāleme maʿnā·yi men ʿaref
6.a. Ḳorḳuyı ḳoy Necātī recā ile buldılar
b. Lā teyˀesū maḳāmını aṣḥāb·ı lā taẖaf

|p270
mefāʿilün feʿilātün mefāʿilün feʿilün
1.a. Ṣabā gibi ser·i zülfüñi kim ider taʿrīf
b. Hemīşe nāfe·i çīni nesīm ider taʿrīf
2.a. Ḳarañu giceler öger çerāġı anuñ içün
b. Ruẖını kākül·i ʿanber-şemīm ider taʿrīf
3.a. Ṣafā·yi vaṣlını dāˀim añar belā·yi firāḳ
b. Havā·yi cenneti nār·ı caḥīm ider taʿrīf
4.a. Yegāne aḥsen·i taḳvīm diyu her yirde
b. Cemāl·i yārı Kelām·ı Ḳadīm ider taʿrīf
5.a. Necātī şiʿrüñe zīnet ẖayāl·i ẖāş virür
b. Ne baḥr olur bu ki dürr·i yetīm ider taʿrīf

|p271
mefʿūlü fāʿilātü mefāʿīlü fāʿilün
1.a. Erbāb·ı ʿışḳa nāle vü efġān olur ḥarīf
b. Göñlüme ġuṣṣa göz yaşına ḳan olur ḥarīf
2.a. Az ḳaldı kim viṣālüñe vāṣıl ola göñül
b. Çoḳ vaḳt olur gedālara sulṭān olur ḥarīf
3.a. Aġzın biçaḳlar açmaya ṣoḥbetde pistenüñ
b. Kim leblerüñe ġonca·i ẖandān olur ḥarīf
4.a. Aġzı egildi ġoncalaruñ gülmeden şehā
b. Kim ḳāmetüñe serv·i ẖırāmān olur ḥarīf
5.a. Var mı Necātī gül gibi gülşende yüzi berg
b. Kim her dem aña bülbül·i nālān olur ḥarīf

|PḲāf|p272
mefʿūlü fāʿilātü mefāʿīlü fāʿilün
1.a. Ey muṣḥaf·ı cemāl yüzüñde sebaḳ sebaḳ
b. Āyāt·ı ḥüsn ẖaṭṭ·ı ruẖuñ beñlerüñ duraḳ
2.a. Tems̲īl olursa ġamzeñ ecelden iñen yaḳın
b. Teşbīh olursa yüzüñe Kaʿbe iñen ıraḳ
3.a. Zülf ü ʿıẕārı tevbeleri bāṭıl itdi ah
b. Ḥaḳ budurur ki farḳ idemezven ḳaradan aḳ
4.a. Engüşt·i Aḥmed olmasa gül yüzde zanbaġuñ
b. Bedr ayı eylemez idi ey dōst iki şaḳ
5.a. Ser-mest·i cām·ı ʿışḳ olubdur Necātī çün
b. Mest·i şarāb diyu aña ṣōfī dutma daḳ

|p273
mefʿūlü fāʿilātü mefāʿīlü fāʿilün
1.a. Oldı ve olısar ne ki yazıldı mā-sebaḳ
b. Leyl ü nehār içün ne ḳara diyelüm ne aḳ
2.a. Ḳıymazdı baña ġamze·i bed-mest sāḳiyā
b. Ḳoltuḳ vezīri olmasa yanuñdaġı ḳabaḳ
3.a. Ḳorḳarın ola serv gibi dāmenüñ hep el
b. Şol günde kim gele bir ayaġ üzre biñ ayaḳ
4.a. Yüz sürmez isem işigi tozına ṣıdḳ ile
b. Biñ kez ṣabā gibi varayın Kaʿbeye yayaḳ
5.a. ʿĀşıḳlara ki ʿarẓ·ı cemāl eyleye ḥabīb
b. Ṣan bir feriştedür ki ṭutar nūrdan tabaḳ
6.a. Ḳuluñdurur Necātī eyā kīmyā-naẓar
b. İşini altun eyle biricik yüzine baḳ

|p274
mefʿūlü fāʿilātün mefʿūlü fāʿilātün
1.a. Ol ḳadd·i ser-ferāza serv olmaz ise ʿāşıḳ
b. Yonulmaduḳ aġacdur olmaz bir işe lāyıḳ
2.a. Gün yüzinüñ şuʿāʿı yiri göki ṭutaldan
b. Müştāḳıdur melāyik muhtācıdur ẖalāyıḳ
3.a. Aġyār işigüñde yürütmez idi bizi
b. Fiˀl-cümle itlerüñle olmasa āşinālıḳ
4.a. Gülşende gül budaġı güllerle beñzemişdür
b. Bir ẖūb-rūya ki ̮ola boynı ḳulaġı açıḳ
5.a. Yāruñ şeker lebinden ṣorar iseñ Necātī
b. Şīrīn ü ter olubdur şöyle cānuña lāyıḳ

|p275
mefāʿilün feʿilātün mefāʿilün feʿilün
1.a. Benüm sevüm ne virür sende himmet olmayıcaḳ
b. Neye yarar iki başdan maḥabbet olmayıcaḳ
2.a. Riʿāyet eyle ne deñlü gerekse ʿuşşāḳı
b. Ki pādişāh beg olmaz raʿiyyet olmayıcaḳ
3.a. Keñez gelür saña ṣōfī ʿibādet itme velī
b. Güc olur ādeme bir nesne ʿādet olmayıcaḳ
4.a. Şarāb·ı nāb didügüñ nedür nenüñ emidür
b. İçüb içüb kişi mest ü melāmet olmayıcaḳ
5.a. Necātī ayaġı tozın getürimedüñ ele
b. Ne müşkil olur imiş başda devlet olmayıcaḳ

|p276
fāʿilātün fāʿilātün fāʿilātün fāʿilün
1.a. Ten esāsın yıḳdı ḳıldı cān evin ābād ʿışḳ
b. Dilde seng·i hecr ile ṣaldı aġır bünyād ʿışḳ
2.a. Derd ü miḥnet ger bu ise iʿtiḳādum oldürür
b. Çekmedi Mecnūn belā ve görmedi Ferhād ʿışḳ
3.a. Diñle benden ḥāletin mihr ü maḥabbet diyenüñ
b. Miḥnet ü derd ü ġam ü hecre ḳomışlar ad ʿışḳ
4.a. Ḳāmet·i āzāduña şimdi hevā-dār añılur
b. Ne ̮idügini bilmez iken serv ile şimşād ʿışḳ
5.a. Kimi cevr ister kimi luṭf umar eyle kim yarar
b. Fiˀl-ḥaḳīḳa itmemişdür kimseye bir dād ʿışḳ
6.a. ʿIşḳı teˀlif idenüñ ʿuḳbāda olsun rūḥı şād
b. Gerçi dünyāda bizi itmedi bir dem şād ʿışḳ
7.a. Cān ü dille derd·i ʿışḳa nice ḳul olmayayın
b. Ki ̮eyledi dünyā ġamından ben ḳulın āzād ʿışḳ
8.a. Ey Necātī olımaz Ferhād gibi pīşe-gār
b. Her kime kim ṣanʿatinde olmadı üstād ʿışḳ

|p277
fāʿilātün fāʿilātün fāʿilātün fāʿilün
1.a. Derd ile öldüm gider bir kimsenüñ āgāhı yoḳ
b. Mevt gibi rāh·ı ʿışḳuñ āh kim hem-rāhı yoḳ
2.a. Fāriġ ol ey müddeʿī ʿāşıḳ mı dirler aña kim
b. Yer yüzinde seyl·i eşki gökde dūd·ı āhı yoḳ
3.a. İnce belüm ḳıl ḳadar yoḳdur dimişsin dir iseñ
b. Ḥaşe liˀllāh dōstum vallāhi yoḳ biˀllāhi yoḳ
4.a. İşüñ altun olmaġ isterseñ ẖarābāt ehli ol
b. Vay aña kim bencileyin kimse devlet-ẖāhı yoḳ
5.a. Ḳo Necātī ḳapuña sürsün yüzin menʿ itme kim
b. Muḥkem olmaz ḳanġı dīvāruñ ki berg·i kāhı yoḳ

|p278
feʿilātün feʿilātün feʿilātün feʿilün
1.a. Dil sevinür yañaġuñda ẖaṭ·ı ẖōş-bū olıcaḳ
b. Uġrınuñ güni doġar ay ḳarañu olıcaḳ
2.a. Dōstum böyle yabanlar mı gözetmek yaraşur
b. Ġamze·i mest ḥarāmī gözüñ āhū olıcaḳ
3.a. Ḫāk·i kūyuñ var iken cennet añılmaḳ ṣanemā
b. Şuña beñzer ki teyemmüm ideler ṣu olıcaḳ
4.a. ʿĀşıḳ olalı ġam u ġuṣṣadurur hep yidügüm
b. Ki muẖālif yimek ister kişi ṣayru olıcaḳ
5.a. Umaruz kim baḳa bizden yaña ol rūḥ·ı revān
b. ʿAḳabınca işümüz naʿra·i yā-hū olıcaḳ
6.a. Būy·i zülfüñi ṣabādan işidüb nāfe·i Çīn
b. Didi ben Rūma varub neyleyeyüm bū olıcaḳ
7.a. Söze uymaz diyu siz baña delü dimeñ kim
b. İşini ġayre inanmaz kişi uṣlu olıcaḳ
8.a. Ey göñül ben ʿacebā nice gelem kendüme kim
b. Göricek bī-ẖōd olub ölürin ayru olıcaḳ
9.a. Kim ḳabūl ide Necātī seni kim dōst dimiş
b. Varmazam ṣoḥbete şimden gerü ben o olıcaḳ

|p279
mefāʿīlün mefāʿīlün feʿūlün
1.a. Ḳuluñdur meh ḳapuñda ac eger ṭoḳ
b. Ne lāzım söylemek ḳul eksük artuḳ
2.a. Niçün ḳuluñ dura itler uluya
b. Dimez mi ̮idüñ ki ḳulluḳdan ululuḳ
3.a. Depinmesün iñen minberde vāʿiẓ
b. Kimüñle ceng ider aña uyar yoḳ
4.a. Kim inkār eyler ise tūtiyāya
b. Ayaġun tozın ilet gözine ṣoḳ
5.a. Bizi kendüye çeksün zülfüñ az az
b. Selām it bizden ol ṭarrāra çoḳ çoḳ
6.a. Ayaḳ ṭut başuñı ġavġāya ṣalma
b. Göñül āyīnesi olursa donuḳ
7.a. Necātī ḳocalıḳda oldı ʿāşıḳ
b. Dirīġā irdi geç vaḳt irdi ḳonuḳ

|p280
mefʿūlü mefāʿīlü mefāʿīlü feʿūlün
1.a. Göster yüzüñi cevr ü cefā eyleme çoḳluḳ
b. Ey māh yaraşmaz güneşe ki ̮ide ṣovuḳluḳ
2.a. Cān virdi ḳad ü zülfüñe dil mekteb·i ġamda
b. Gūyā ki elif lāma çıḳub itdi ḳonuḳluḳ
3.a. Aç gün yüzüñi aç ki yaşum yaġmurı diñsün
b. Bāşed ki gözümüz göre bir pāre açuḳluḳ
4.a. Gül ruẖlaruñuñ şevḳi yaşum ḳana boyadı
b. Olur çü bahār irse ṣularda bulanıḳluḳ
5.a. Biñ siḥr ider naġmede bülbül gül açılmaz
b. Bād·ı seḥer itdi meger ortada ṣovuḳluḳ
6.a. Fikr·i dehenüñ göñlümi zülfüñe düşürdi
b. Küfre iledür dirler idi ādemi yoḳluḳ
7.a. Ġamzeñ dir imiş hecrden aġladı Necātī
b. Ol kāfiri gör nice virür ḳana ṭanuḳluḳ

|p281
mefʿūlü fāʿilātü mefāʿīlü fāʿilün
1.a. Gül muṣḥafın ṣabā yili açdı varaḳ varaḳ
b. ʿIşḳ āyetini bülbül oḳudı sebaḳ sebaḳ
2.a. Hecrüñle gökde mihr içer zehr ṭās ṭās
b. Mihrüñle lāle yirde yudar ḳan çanaḳ çanaḳ
3.a. Gül-zār·ı ḥüsn içine girüb gūşe-gīrler
b. Āhū gözüñ yataġın ararlar bucaḳ bucaḳ
4.a. Göre ̮idi lāle ẖaddüñi bu luṭf ile senüñ
b. Söge ̮idi ġonca aġzına bülbül varaḳ varaḳ
5.a. Cān gülşeninde zülf ü ʿiẕāruñ hevāsına
b. Reyḥān deste deste semenler ḳucaḳ kucaḳ
6.a. Evvel ḳademde başuñı vir yāra ey göñül
b. Kim nerdübān·ı ʿışḳa çıḳılmaz ayaḳ ayaḳ
7.a. Vaṣf·ı ruẖuñla yazmaġa şiʿrin Necātīnüñ
b. Kāġıd ṭutarlar elde çiçekler ṭabaḳ ṭabaḳ

|p282
mefāʿilün feʿilātün mefāʿilün feʿilün
1.a. Lebüñ leṭāfeti söylense ġoncanuñ sözi yoḳ
b. Sözüñ ḥalāveti añılsa şekkerüñ ṭuzı yoḳ
2.a. ʿAceb nice ḥareket itdi serv ḳāmetüñe
b. Ki nergisüñ anı gülşende görecek gözi yoḳ
3.a. Dehānuñ ile miyānuñdürür eger var ise
b. Vefālaruñ gibi bir adı var kendüzi yoḳ
4.a. Cefā deñizine düşdüm kenāra yoḳ çāre
b. Belā dünine ṣataşdum meded ki gündüzi yoḳ
5.a. Güneş yüzini gürüb eskilendi bedr·i münīr
b. Ṭaña ḳalub ṭapuña gelmege senüñ yüzi yoḳ
6.a. Ḳapuña göz yaşı ilten saʿādet ehli olur
b. Necātīnüñ dimesünler ki gökde yılduzı yoḳ

|PKāf|p283
mefʿūlü fāʿilātü mefāʿīlü fāʿilün
1.a. El-ḥamdü liˀllāh eyledi terk·i cefā ẖaṭuñ
b. Yazdı nigīn·i laʿlüñe naḳş·ı vefā ẖaṭuñ
2.a. Ḥüsnüñ günine göz ḳamaşur baḳamaz idük
b. ʿĀşıḳları esirgedi ey meh-liḳā ẖaṭuñ
3.a. Derc olalı keñaresine dürc·i laʿlüñüñ
b. Yāḳūta ḥarf atar senüñ ey dil-rübā ẖaṭuñ
4.a. Uyub ṣabāya ḳaçmış idi ḳara perçemüñ
b. Efsūn ile çevürdi başın müşg-sā ẖaṭuñ
5.a. Ġavġā bıraḳdı küfr ile īmān arasına
b. Zülf ü ʿiẕār içinde ḳopaldan şehā ẖaṭuñ
6.a. Göñlüm çeküb çevürmesün iñen ikide bir
b. Bir yaña zülf·i ser-keşüñ ü bir yaña ẖaṭuñ
7.a. Āzād olur ẖaṭ ile ḳul olan Necātīyi
b. Āzāde yürür iken ider mübtelā ẖaṭuñ

|p284
mefʿūlü fāʿilātü mefāʿīlü fāʿilün
1.a. Aġlar imiş beni leb·i ẖandāna beñlerüñ
b. Bilsem niçün şehādet ider ḳana beñlerüñ
2.a. Çāk itdi ṭīġ·i miḥnet ile ḳalbi kirpügüñ
b. Dāġ urdı nār·ı ḥasret ile cāna beñlerüñ
3.a. Nāẓırlaruñ gözi bebegi ʿaksidür şehā
b. Āyīne·i cemālde şāhāne beñlerüñ
4.a. Bir hindū idi mıṣr·ı cemāl oldı menzili
b. Ṭañ mı selām virmese sulṭāna beñlerüñ
5.a. Manṣūbe ile sürdi ruẖ üzre piyādesin
b. Şeh-māt itdi ʿālemi ferzāne beñlerüñ
6.a. Ortaya ḳoydı ʿarṣa·i ḥüsnüñde başını
b. İster ki zülfüñi çeke meydāna beñlerüñ
7.a. Bezm·i ruẖuñda sīb·i muṣaffādur ol ẕeḳan
b. Kim görinür içinde siyeh dāne beñlerüñ
8.a. Tesbīḥi oldı mescid ü miḥrāb ehlinüñ
b. Hem-dem olalı zülf·i perīşāna beñlerüñ
9.a. İtdügini Necātīye bir kāfir itmeye
b. Ḥāşā ki beñzer ola müselmāna beñlerüñ

|p285
mefāʿīlün mefāʿīlün feʿūlün
1.a. Elā ey Yūsuf·ı Keʿānı Mıṣruñ
b. ʿAzīzi ʿālemüñ sulṭānı Mıṣruñ
2.a. Gözümden gitmesün ẖaddüñ ẖayāli
b. Kenār·ı Nīl olur seyrānı Mıṣruñ
3.a. Beñüñ beglenmesün ẖaddüñde zīrā
b. Ḥabeş olduġı yoḳ sulṭānı Mıṣruñ
4.a. Şeb·i zülfüñde ḳandīl·i cemālüñ
b. Ḳo yansun kim budur erkānı Mıṣruñ
5.a. Ḫalāṣ olmaz zenaẖdānuñ esīri
b. Müˀebbed ḥabs imiş zındānı Mıṣruñ
6.a. Ṭavāf·ı Kaʿbedür kūyı Necātī
b. Ṣaçı Şāmuñ ruẖ·ı ẖandānı Mıṣruñ

|p286
feʿilātün feʿilātün feʿilātün feʿilün
1.a. O da atarsa seni ḥasreti ol māh-veşüñ
b. Göñül āh eyleme kim yaḳduġı tütmez güneşüñ
2.a. Ruẖlaruñ ḥasretine çāre umarın gülden
b. Hīç saʿy eyleye mi defʿine āteş ʿaṭaşuñ
3.a. Ṭaʿn idermiş boyı āzādelere serv·i çemen
b. Kendüyi bildürüñ ol aḥmaḳa siz de yanaşuñ
4.a. İẖtiyār eyleyicek ʿışḳı özüñden el çek
b. Terk·i cān itmedürür içine girmek ṣavaşuñ
5.a. Zülfi şebdīzine baş ḳoşma Necātī yāruñ
b. Yoḳsa bir gün aṣılur terkiye bī-çāre başuñ

|p287
fāʿilātün fāʿilātün fāʿilātün fāʿilün
1.a. İtmeyince sen boyı serv·i revānı kendümüñ
b. Ey yüzi gül bilmedüm vallāhi cānı kendümüñ
2.a. Ḳāmetüñ gördüm ḳıyāmetler ḳopardum ʿāḳıbet
b. Eyledüm sen fitne·i āẖır zemānı kendümüñ
3.a. Pādişāhum itdügüm ẖōd-rāyluḳlardan meded
b. Kendüzümi eyledüm yolında fānī kendümüñ
4.a. Şemʿ gibi ʿışḳ odına yanayın ḳoñ yanayın
b. Maḥv olınca dünyede nām ü nişānı kendümüñ
5.a. Uşbu ʿışḳ·ı pākden biˀllāhi sōfī saña ne
b. Aṣṣısı var ise dil-dāruñ ziyānı kendümüñ
6.a. Ḳapladum rūy·i zemīni dāne dāne eşk ile
b. Eyleyem gibi gelür cev cev cihānı kendümüñ
7.a. Ortada nesne görinmez ey Necātī yine hīç
b. İdemedüm gitdi ol nāzüg miyānı kendümüñ

|p288
mefʿūlü fāʿilātü mefāʿīlü fāʿilün
1.a. Ey āfitāb-ruẖ düşeli cāna pertevüñ
b. Görinmez oldı gözlerüme zülf·i şeb-revüñ
2.a. Kimdür lebüñde sāye·i ebrūña ẖaṭ diyen
b. Aldanmasun ẖayāline kimse o kec-revüñ
3.a. Şīrīn lebüñden it bize cürʿañ nis̲ār kim
b. Ḫākine cān vire nice Ferhād Ḫusrevüñ
4.a. Mıṣbāh·ı şems ḳāfiye düşmezdi ey ḳamer
b. Kevneyne olmasa mutavassıṭ senüñ ḍavuñ
5.a. Reddüñ yeter derüñde Necātīye dāl kim
b. Kej-rā ḳaşuñla el bir ider zülf·i şeb revüñ

|p289
fāʿilātün fāʿilātün fāʿilātün fāʿilün
1.a. Ey ṣabā zülf·i nigārı ʿanber-efşān eyledüñ
b. Ḫāk olan bī-dillerüñ tozın perīşān eyledüñ
2.a. Yol eri oldur ki ̮ola yāruñ ayaġı ṭopraġı
b. Egledüñ ey ġam beni yolumdan yalan eyledüñ
3.a. Öldüġüm vaḳtin meger ġāˀib namāzın ḳılalar
b. Kim beni ẓaʿf ile nā-peydā vü pinhān eyledüñ
4.a. İşigüñi vaʿde itdüñ itmedüñ gitdi vefā
b. Söz ile ḳaç kez beni sen Mıṣra sulṭān eyledüñ
5.a. Gāh tevbe gāh mey geh muḥtesib ṭutdı beni
b. Bir iki içim şarābı sen baña ḳan eyledüñ
6.a. Cevr·i dil-ber devridür ölmekden āsān nesne yoḳ
b. Müşkilini ʿālemüñ luṭf itdüñ āsān eyledüñ
7.a. Git Necātīden kesil saġlıḳla gelme ey ṭabīb
b. Derde dermān eyle dirdüm derde dermān eyledüñ

|p290
fāʿilātün fāʿilātün fāʿilātün fāʿilün
1.a. Eyledi yüz vech ile āyīne tedbīrüñ senüñ
b. Baġrına basmaġ içün bir laḥẓa taṣvīrüñ senüñ
2.a. Yolı dutsun şimdi bildüm istemezmiş dōstum
b. ʿÖmrümuzunluġın ol zülf·i girih-gīrüñ senüñ
3.a. Sīneme zaẖm·ı ciger-dūz itdügi eylükleri
b. Bir bir arḳamdan çıḳardı ʿāḳıbet tīrüñ senüñ
4.a. Gāh leb geh ḳad añar dil ẖasta cānın gezdürür
b. Kim ecel gibi irer nā-gāh şemşīrüñ senüñ
5.a. Olmuşam ser menzil·i kūy·i melāmetde muḳīm
b. Şükr aña kim dimediler bu degül yirüñ senüñ
6.a. Baş ḳurtarduñ Necātī ayaġı tozında kim
b. ʿArẓ ola ʿizz·i ḥuẓūra ʿöẕr ü taḳṣīrüñ senüñ

|p291
müstefʿilün müstefʿilün müstefʿilün müstefʿilün
1.a. El-ḥaḳ bu sünbül şemmesin bir būstānda görmedük
b. Doġrusı bu ḳad şīvesin serv·i revānda görmedük
2.a. Nergis olan yirde meded ṣalınmasun ol serv-ḳad
b. İzi tozına göz deger çoḳdur cihānda görmedük
3.a. Bir dem şarābuñ ṣoḥbetin iki cihāna virmezüz
b. Kim seyr·i sāġar luṭfını devr·i zemānda görmedük
4.a. Sen ġonca·i ẖandānı ger görürse ḥūrīler diye
b. Bu luṭf ile raʿnā güli bāġ·ı cinānda görmedük
5.a. Ḳaddüñ görüb bād·ı seḥer āb·ı revāna ʿarẓ ider
b. Bu serv·i ẖōş-reftārı biz bir būstānda görmedük
6.a. Ālūde-dāmān olmışuz nice varalum mescide
b. Bir kimse ḳalmadı bizi kūy·i muġānda görmedük
7.a. Kişi ġam·ı cānāneye cānā neye cān virmeye
b. Yanını bekler göñlümüñ bir gün yabanda görmedük
8.a. Dest·i cefā ile felek bükdi belümi yay tek
b. Tīr·i murādı āh kim bir kez nişānda görmedük
9.a. Nāṣiḥ Necātīyem beni menʿ itme beyʿ·i bādeden
b. Gerçi kim aṣṣı görmedük el-ḥaḳ ziyān da görmedük

|p292
fāʿilātün fāʿilātün fāʿilātün fāʿilün
1.a. Āh kim raḥm itmedüñ her dem cefādur işlerüñ
b. Bilmezem neyler beni āẖır senüñ cünbişlerüñ
2.a. Yollara baḳmaġ ile pür-ẖūn olubdur gözlerüm
b. Āh senüñ gec gec gelüb tez tez durub gidişlerüñ
3.a. İşigüñde ḳo beni saña duʿālar ideyin
b. Müstecāb olur duʿāsı dāˀimā dervīşlerüñ
4.a. Sen raḳībe uyuben gözden ıraġ itme beni
b. Dōstum cehd eyle kim yād olmasun bilişlerüñ
5.a. Ey Necātī yāruñ ile dünyede sürdüñ ṣafā
b. Ḥaḳ saña virdi murāduñ ẖayra döndü işlerüñ

|p293
mefʿūlü mefāʿīlü mefāʿīlü feʿūlün
1.a. Baş ḳoşma mey·i nāb ile peymāne degülseñ
b. Hay uyma delü ḳanluya dīvāne degülseñ
2.a. Ol ṭurraları Leylīye Mecnūn olımazsın
b. ʿĀlemde ġam·ı ʿışḳ ile efsāne degülseñ
3.a. Ḳuvvet ṣınayub āteş·i hecr ile ṭutuşma
b. Yanmaġa heves eyleme pervāne degülseñ
4.a. Sürdüñ ruẖ·ı yār üzre vefā beydaḳın ey ẖāl
b. Murġ·ı dil·i miskīne eger dāne degülseñ
5.a. Ey bāde·i gül-çihre müdām al geyersin
b. Bu şīve nedür şāhid·i kāşāne degülseñ
6.a. Diş ḳoparamazsın girih·i zülf·i nigāra
b. Ġam bıçġusı birle mis̲il·i şāne degülseñ
7.a. Dün gice Necātīnüñ iden ṣabrını yaġmā
b. Öldür beni sen gözleri mestāne degülseñ

|p294
fāʿilātün fāʿilātün fāʿilātün fāʿilün
1.a. Bu ġam eyyāmında sāḳī bizi ẖōş-ḥāl eyledüñ
b. Rūzigāra bāde·i gül-gūn ile āl eyledüñ
2.a. İki bükdüñ bu ten·i zerd ü nizārum gūyīyā
b. Murġ·ı cān ayaġına altunlu ẖalẖāl eyledüñ
3.a. Lām·ı zülfüm ḥasreti dāl idiser ḳaddüñ didüñ
b. Üstümüze ey yüzi Muṣḥaf ʿaceb fāl eyledüñ
4.a. Mektebe varub daẖi bir doġru ḥarf ögrenmedüñ
b. Üstüme ḥarf atmaġ ile ḳaddümi dāl eyledüñ
5.a. Yaḳmaduñ ruẖsārına dil virmedüñ laʿline cān
b. Zāhidā işüñ ne mūm itdüñ ne ẖōd bal eyledüñ
6.a. Ḳaddüñ añub serv ṭalın istedüm aṣılmaġa
b. Zülfüñi nāzüglüg ile ḳaddüñe ṭāl eyledüñ
7.a. Yārumı menʿ eyleyüb yarına ṣalduñ ḳatlümi
b. Ey felek bī-çāreler ḥaḳḳında ihmāl eyledüñ
8.a. Ey Necātī şevḳ ile her beyti kim ḳılduñ raḳam
b. Sūz·ı dilden dil-bere bir nāme irsāl eyledüñ

|p295
mefāʿilün feʿilātün mefāʿilün feʿilün
1.a. Bahār mevsimidür gül-sitāna varı görüñ
b. Güli müşāhede eyleñ cemāl·i yārı görüñ
2.a. Behişt·i naḳdi ḳomañ ẖavf idüb cehennemden
b. Ḫudā kerīmdürür cām·ı ẖōş-güvārı görüñ
3.a. Çiçekler ile bisāṭ·ı çemende ḳılmaġa ʿayş
b. Giceyi gündüze ḳatub gelür bahārı görüñ
4.a. Çemende nergis·i şehlāyi ẖōş ṭutuñ zinhār
b. Hemān anı görüñ ol çeşm·i pür-ẖumārı görüñ
5.a. Necātīnüñ sözi budur ki ẖāb·ı ġafletden
b. Ṣadā·yi bülbül ile cānuñuz uyarı görüñ

|p296
1.a. Çeşm·i mestüñe düşer mi dem-be-dem ḳan eylemek
b. Zülfüñe mi ḳaldı ya diller perīşān eylemek
2.a. Çün viṣālüñ gencine cāy itmez idüñ dōstum
b. Ne ̮idi dil maʿmūresin cevrüñle vīrān eylemek
3.a. Ḳapuña gelsün ḳo geh geh ey perī bī-dillerüñ
b. Şehlere ʿādetdürür her hafta dīvān eylemek
4.a. Uyusun tek raḥat ile nergis·i bīmār·ı yār
b. Yüzüm üzre gözlerüm yaşını bārān eylemek
5.a. ʿIşḳ işi müşkil belādur pādişāhum ṭapuña
b. Müşkilini ḳullaruñ āsāndur āsān eylemek
6.a. Ḳanġı ḳanına ṣuṣamış dirilür senüñle kim
b. Bir ṣu içmek deñlü gelmez saña biñ ḳan eylemek
7.a. Zāhidā bu ʿışḳdan ʿāşıḳlara maḳṣūd ne
b. ʿĪd·i vaṣla irişüb cānını ḳurbān eylemek
8.a. Āhumuñ yili yegindür ey boyı serv·i çemen
b. İẖtiyārumla degüldür āh ü efġān eylemek
9.a. ʿIşḳuñı aġyārdan saḳladuġum ʿayb eyleme
b. Yaġı kāfirden gerekdür dīni pinhān eylemek
10.a. Cān dirīġ eyler Necātī dir imiş ol bī-vefā
b. Ölmez isem borcum olsun anı yalan eylemek

|p297
fāʿilātün fāʿilātün fāʿilātün fāʿilün
1.a. Tāb·ı mülden ey perī reng·i ruẖuñ al eyledüñ
b. Kişver·i cāna od urduñ gör nice āl eyledüñ
2.a. Bir kebūterdür havāyī bu dil·i ser-geşte kim
b. Ḥalḳa·i zülfüñden ayaġına ẖalẖāl eyledüñ
3.a. Şehr·i ḥüsn içinde ey sulṭān·ı ẖūbān ad içün
b. Şol elif ḳaddüñ hevāsı ̮ile boyum dāl eyledüñ
4.a. Beñ degüldür gün yüzüñde ey meh·i ẖargeh-nişīn
b. Nūr üzre noḳṭalardur kim adın ẖāl eyledüñ
5.a. Devri zülfüñde bu göñlüm murġını sen ey hümā
b. Ḳanaduñ altına alduñ fāriġüˀl-bāl eyledüñ
6.a. Mest olub gördügine meyl eyler iken āh kim
b. Görmeze urduñ baña geldükde ihmāl eyledüñ
7.a. Yol degüldür rāh·ı ʿışḳ içre Necātī bendeñüñ
b. Ṣırça göñlin ṭaşa çalduñ daẖi pā-māl eyledüñ

|p298
mefʿūlü fāʿilātü mefāʿīlü fāʿilün
1.a. Çeksün belālu bülbülüñ ey gül belālaruñ
b. Her ẖāra hem-dem ol yüri sürsün ṣafālaruñ
2.a. Ben sīnemi siper ḳılıcı bir belā-keşem
b. Sen urduġuñca cānuma tīr·i belālaruñ
3.a. Gözümde ḳanlu yaşlarumuñ ṣorma ḥālini
b. Kim şerḥin eyleyü bilür ol mā-cerālaruñ
4.a. Her ẖaste-dil ḳapuña yüzin sürdügi bu kim
b. Dārüˀş-şifāsıdur işigüñ mübtelālaruñ
5.a. Bīgāne gibi baḳduġuñ oldur Necātīye
b. Kim var hezār bencileyin āşinālaruñ

|p299
mefāʿīlün mefāʿīlün mefāʿīlün mefāʿīlün
1.a. Cemālüñ muṣḥafı ḥaḳḳı mübārek fāldür zülfüñ
b. Ki ṭavūsī mürekkeble yazılmış dāldür zülfüñ
2.a. Meger serv·i bülendüñden yire düşmişdür anañçün
b. Ḳararmış cümle endāmı şikeste-ḥāldür zülfüñ
3.a. Ne cān ile duralım biz siyāset-gāh·ı ʿışḳuñda
b. İki cellāddur ġamzeñ iki çengāldur zülfüñ
4.a. Bu gün urmaḳda ṭutmaḳda ḳati saḥḥārdur ġamzeñ
b. Bu gün aṣmaḳda baṣmaḳda ḳati ḳattāldür zülfüñ
5.a. Necātī her müselmānuñ görür ḳaydını ol kāfir
b. Baña geldükce her dāˀim işi ihmāldür zülfüñ

|p300
fāʿilātün fāʿilātün fāʿilātün fāʿilün
1.a. Cevre māyil olmasun yārı İlāhī kimsenüñ
b. Ẓulmi ʿādet eylemesün pādişāhı kimsenüñ
2.a. Şāhid·i ʿışḳ idi yaşum ḳanlu çıḳarduñ anı
b. Böyle mecrūḥ olmasun yā Rab güvāhı kimsenüñ
3.a. Ben güneh-gārı bu gün menʿ itme ṣōfī içmeden
b. Kim ṣorulmaz kimseden yarın günāhı kimsenüñ
4.a. Ṭaşlar altında ḳalubdur ḳatı göñlündeñ elüm
b. Böyle nā-çār olmasun ḥāli İlāhī kimsenüñ
5.a. Āh ü efġānum bu ḳorḳudan uyutmaz ẖalḳı kim
b. Saña düşinde düşe nā-geh nigāhı kimsenüñ
6.a. Ey güzellik bürcine ẖōrşīd olan yaḳma beni
b. Yirde ḳalmaz çün bilürsin dūd·ı āhı kimsenüñ
7.a. Diñ Necātī ġuṣṣadan ġam çekmesün kim yoḳdürür
b. Āsitān·ı mey-kede gibi penāhı kimsenüñ

|p301
fāʿilātün fāʿilātün fāʿilün
1.a. Cānumuñ cānı degül mi leblerüñ
b. Yüregüm ḳanı degül mi leblerüñ
2.a. Niʿmetüˀllāhī degül mi būseler
b. Şāh Ḫandānı degül mi leblerüñ
3.a. Ḥüsn bezminde ẖaṭ·ı müşgīn ile
b. Rāḥ·ı reyḥānī degül mi leblerüñ
4.a. Ġamzeñüñ ölümlerine dōstum
b. Cānı dermānı degül mi leblerüñ
5.a. Ey Sikender-ḳadr ẖaṭṭ·ı Ḫıẓruñuñ
b. Āb·ı Ḥayvānı degül mi leblerüñ
6.a. Dür dökersin her ḳaçan gelseñ söze
b. Cevherüñ kānı degül mi leblerüñ
7.a. Olıcaḳ sīb·i gül-ābī ġabġabuñ
b. Laʿl·i rümmānı degül mi leblerüñ
8.a. Ẕerrece eksilmeye biñ būseden
b. Ḳudretüñ ẖānı degül mi leblerüñ
9.a. Nola virürse Necātīye ḥayāt
b. Ḳūt·ı Ḥayvānī degül mi leblerüñ

|p302
fāʿilātün fāʿilātün fāʿilātün fāʿilün
1.a. Çün perīler cilve-gāhıdur pıñarı çeşmümüñ
b. Ilı olsa ṭañ degüldür çeşme-sārı çeşmümüñ
2.a. Ḳāmetüñ ʿaksinden ey serv·i dil-ārā·yi çemen
b. Gösterür Ṭūbā mis̲ālin cūy-bārı çeşmümüñ
3.a. Rence ḳılarsañ ḳadem çirkin yüzümüñ üstinde
b. Laʿl ü dürr olsun ayaġuña nis̲ārı çeşmümüñ
4.a. Tā ki ẖaṭṭ·ı ʿārıẓuñ geldi ḳararı başladı
b. Ḳalmadı göñlüm gibi gitdi ḳarārı çeşmümüñ
5.a. Göñlümüñ ṣırça sarāyın ey perī ḥıfẓ itmege
b. Hindū·yi ẖāl·i ruẖuñdur perde-dārı çeşmümüñ
6.a. Ḥalḳa ḥalḳa dām ḳurdum ḳodum ortasında beñ
b. Tā kim ol şeh-bāzı ḥüsn ola şikārı çeşmümüñ
7.a. Yār işiginde Necātī olısar bir bir telef
b. Ḳıymeti gevherleri hep varı varı çeşmümüñ

|p303
mefāʿīlün mefāʿīlün mefāʿīlün mefāʿīlün
1.a. Cefāda ḳati māhirdür cihānı baña ögretmeñ
b. İçi cānān ile pürdür siz anı baña ögretmen
2.a. Elif ḳaddin gözüm yaşı ̮ile ṭıfl iken revān itdüm
b. Yürüñ varuñ siz ol serv·i revānı baña ögretmeñ
3.a. Cemāli muṣḥafın gördüm ruẖ u zülfidürür virdüm
b. Gelüñ siz sūre·i Nūr u Duẖānı baña ögretmeñ
4.a. Ben öldüm girü dirildüm cihān aḥvālini bildüm
b. Ruẖ·i cānān ile ḥūr·ı cinānı baña ögretmeñ
5.a. Nihāl·i ḳadd·i raʿnāsı benüm göñlümde bitmişdür
b. Kim ol Ṭūbādan aʿlādur ḳoñ anı baña ögretmeñ
6.a. Nihāl·i serv-ḳāmetdür ḳıyāmetden ʿalāmetdür
b. Necātī fitne·i āẖır zemānı baña ögretmeñ

|p304
fāʿilātün fāʿilātün fāʿilātün fāʿilün
1.a. Ḫōşdürür dilde ẖayāl·i ẖaṭṭ·ı cānān beslemek
b. Yaraşur zīrā sifāl içinde reyḥān beslemek
2.a. Laʿline cān vir göñül benden bilürseñ kim bu gün
b. Oldürür ger var ise cān üstinde cān beslemek
3.a. Hey ḳıyāmet ḳāmetüñ ṣalındıġını göreli
b. Baġ-bānuñ işidür serv·i ẖırāmān beslemek
4.a. Müşterī çoḳ leblerüñ tiryākine ḥācet degül
b. Boynuña ṣarmaġ içün bir iki s̲uʿbān beslemek
5.a. Yārdan yevmī ġam umarsa Necātī nola kim
b. ʿĀdet·i meşhūrdur ḳulını sulṭān beslemek

|p305
fāʿilātün fāʿilātün fāʿilātün fāʿilün
1.a. Ḫāk·i pāyuña ḳul olduġum ne lāzım ben dimek
b. Bendeye lāyıḳ mıdur sulṭānum evvel ben dimek
2.a. Benlügi terk eyle muṭrib nāleñi dil-sūz ḳıl
b. Bezm·i cāndur ʿayb ola ʿuşşāḳ içinde ten dimek
3.a. Gül yüzüñle ṣaḥn·ı gülşen şöyle zībā oldı kim
b. Dōstum taʿrīf olubdur cennete gülşen dimek
4.a. Pāy-dār olmaz güzellik ravẓa·i cennet gibi
b. Sen bilürsen ey yüzi cennet hele benden dimek
5.a. Ben ḳuluñçün dir imişsin kim baña cānın virür
b. Ölmek olur dōstum olmaz sana yalan(?) dimek
6.a. Ġoncanuñ aġzına baḳarken çemende ʿandelīb
b. Gülşenüñ aḥvālini cāˀiz midür sūsen dimek
7.a. Ġonca-veş cān ü ṣurāḥī hep aġız bir itdiler
b. İç diyu ṣōfī Necātīye ne lāzım sen dimek

|p306
feʿilātün feʿilātün feʿilātün feʿilün
1.a. Didiler dōst saña yār ola didüm daẖi yeg
b. Mūnis ü hem-dem ü dil-dār ola didüm daẖi yeg
2.a. Güli gül-zārı nidersin ruẖ·ı cānānı gözet
b. Cennet olmaz ise dīdār ola didüm daẖi yeg
3.a. Didiler ʿışḳ eri bīmār ola didüm daẖi ẖōş
b. Didiler derd ile nāçār ola didüm daẖi yeg
4.a. Didiler gözlerünüñ ḳanlu yaşınuñ dem ola
b. ʿİvaẓı laʿl·i güher-bār ola didüm daẖi yeg
5.a. Didiler vaḳt ola aġyār aradan götürüle
b. Ol semen-ber gül·i bī-ẖār ola didüm daẖi yeg
6.a. Didiler ol yüzi gül-zār Necātī ġālib
b. Gül·i cennet ḳadarı var ola didüm daẖi yeg

|p307
feʿilātün mefāʿīlün feʿilün
1.a. Derd ile günde biñ keret ölmek
b. Kime yalan ise baña gerçek
2.a. Ḳati eller boyuñ çınarı ḳati
b. Dilek ey serv·i gül-ʿiẕār dilek
3.a. Serv·i yāra ayaḳdaş olmaduñ
b. Ey ṣanevber bu şīveden el çek
4.a. İşte bir būseñe begüm biñ cān
b. Çifte çifte dolular iç baña tek
5.a. Azacuḳ cānlusan Necātī sen
b. Çürʿa·i laʿl·i yārı al tīz çek

|p308
mefāʿīlün mefāʿīlün mefāʿīlün mefāʿīlün
1.a. Dil aldı ḳaṣd·i cān eyler begüm ḳaşuñ gözüñ ġamzeñ
b. Elif ḳaddüm kemān eyler begüm ḳaşuñ gözüñ ġamzeñ
2.a. Ḳamu şehler saña bende ḳul olayın saña ben de
b. Düşürmişdür beni bende begüm ḳaşuñ gözüñ ġamzeñ
3.a. Ḫayālüñ dilde ẖān oldı viṣālüñ tende cān oldı
b. Cihāna dāsitān oldı begüm ḳaşuñ gözüñ ġamzeñ
4.a. Emīrüm şehriyārumdur enīsüm ġam-güsārumdur
b. ʿAzīzüm iẖtiyārumdur begüm ḳaşuñ gözüñ ġamzeñ
5.a. Görelden sen yüzi māhı irürdüm göklere āhı
b. Beni ḳul itdi vallāhi begüm ḳaşuñ gözüñ ġamzeñ
6.a. Ṣaçuñ çīninde ḥayrānem ḳaşuñ yayında ḳurbānem
b. Ne ḳīm buyursa fermānem begüm ḳaşuñ gözüñ ġamzeñ
7.a. Necātī ḳuluñ ey yārˀe yürür ʿışḳuñda āvāre
b. Yüregine urur yara begüm ḳaşuñ gözüñ ġamzeñ

|p309
feʿilātün feʿilātün feʿilātün feʿilün
1.a. Dil kebāb ü ḳabaġum yaşı mey·i nāb gerek
b. Lā-cerem ʿayş·ı müdām itmege esbāb gerek
2.a. Ruẖı şevḳi ̮ile görür ẖaṭṭını zülfinde göñül
b. Giceler seyr·i çemen itmege meh-tāb gerek
3.a. Ṣun lebüñ yoḳsa yaḳar āteş·i laʿlüñ cānı
b. Mey·i kübrādürür ey dōst biraz āb gerek
4.a. Ser·i kūyuñda belüm iki büküb iñledügüm
b. Bu ki gül-zāra şeref virmege dōlāb gerek
5.a. Nideyin görmek ile serv·i çemenden ne biter
b. Baña ol ḳāmeti Ṭūbā lebi ʿunnāb gerek
6.a. Şekkerüñ başına ṣu ḳoydı zülāli lebinüñ
b. Nidelüm ḳandi Necātī bize cüllāb gerek

|p310
fāʿilātün fāʿilātün fāʿilātün fāʿilün
1.a. Sūre·i Kevs̲er ẖaṭuñ ser-çeşme·i cāndur lebüñ
b. Ḳarañuluḳdur ötesi Āb·ı Ḥayvāndur lebüñ
2.a. Ruẖlaruñdur leblerüñi terbiyetler eyleyen
b. Mihr·i raẖşāndur yüzüñ laʿl·i Bedaẖşāndur lebüñ
3.a. Ben ẓaʿīf ü nā-tüvānuñ biñ belāya mübtelā
b. Sen Mesīḥāsan senüñ biñ derde dermāndur lebüñ
4.a. Ucı bulunmaz perīşān-rūziġārumdur ṣaçuñ
b. Aġıza gelmiş benüm cānum gibi cāndur lebüñ
5.a. Siḥr ile aldatmaġa ẖalḳ·ı cihānı dem-be-dem
b. Gāh olur ṭuz gösterür geh şekker-efşāndur lebüñ
6.a. Gül-be-şekkerdür Necātī bu ġazel dirseñ nola
b. Kim şekerdür sözlerüm gül-berg·i ẖandāndur lebüñ

|p311
fāʿilātün fāʿilātün fāʿilātün fāʿilün
1.a. Siḥr ider reftārda serv·i ẖırāmānuñ senüñ
b. Ḳıl yarar güftārda laʿl·i dür-efşānuñ senüñ
2.a. Leblerüñ möhr·i Süleymān olduġı ̮içün ey perī
b. Her yañadan ejdehālardur nigeh-bānuñ senüñ
3.a. Ey kemān-ebrū yüregüm yerine oṭurdı oẖ
b. Baṣdum āẖır baġruma şol ḳanlu peykānuñ senüñ
4.a. Ḳanlu yaş ile doludur gözlerümüñ sāġarı
b. Çeşm·i ser-mestüñ diyelden içeyüm ḳanuñ senüñ
5.a. Meryem-āsā ḳaralar geymiş ṣalınur nāz ile
b. Yirde sürür dāmenin zülf·i perīşānuñ senüñ
6.a. Bülbüli ötdürmez oldı tāze dīvānum benüm
b. Ġoncayı söyletmez oldı laʿl·i ẖandānuñ senüñ
7.a. Şefḳat īmāndanise ey bī-güneh ḳan idici
b. Kāfirem ger var ise bir ẕerre īmānuñ senüñ
8.a. Diş bilermişsin leb·i şīrīn·i yāra vāz gel
b. Ey Necātī döymez ol ṭatluya dendānuñ senüñ

|p312
fāʿilātün fāʿilātün fāʿilātün fāʿilün
1.a. Sāḳiyā ġam leşkerine ḥüsn·i tedbīr eylemek
b. Sāġar·ı meydür ṣurāẖī ̮ile aġız bir eylemek
2.a. ʿĀşıḳam ḳālū belīdan ırma yolumdan beni
b. Kimsenüñ ḥaḳḳı degül taḳdīri taġyīr eylemek
3.a. Borcum olsun cān ü baş üstine ḳurbān olduġum
b. Tīr·i ġamzeñle kemend·i zülfüñe yir eylemek
4.a. Ṭıfl idüñ ẖarc eyledüm ʿömrüm cevān itdüm seni
b. Şimdi yigitlik midür cevrüñ beni pīr eylemek
5.a. Yazmayınca ḥāşiye ẖaṭṭ·ı muʿanber ẖaddüñe
b. Müşkil olur āyet·i ḥüsnüñi tefsīr eylemek
6.a. ʿĀciz·i ser-geşte iken bir ḳılında zülfüñün
b. Ne ̮idi bu bir nā-tüvāna iki zencīr eylemek
7.a. Ḳaṣdi budur kim Necātī ġamzeñe ḳurbān ola
b. Dōstum lāyıḳ degül ẖayr işi teˀẖīr eylemek

|p313
feʿilātün feʿilātün feʿilātün feʿilün
1.a. Şöyle ṣūret virür āyīneye vech·i ḥasenüñ
b. Kim yüzin görse getürür ṣalevāt āyinenüñ
2.a. Lebüñüñ ẖaṭṭı ṣaḥīḥ olmaduġın bilmek içün
b. Ḳalem·i ṣunʿ ḳomış noḳṭa·i şekdür dehenüñ
3.a. Gücenüb kendüyi yirden yire urur sāyeñ
b. Göricek ḳaddüñe öykündügini nārevenüñ
4.a. Ben boyun kim çözicek zülf·i semen-sāñi nesīm
b. Egmedük dil ḳomaya ṭurra·i ʿanber-şikenüñ
5.a. Başın ortaya ḳoyub laʿlüñe ḳaṣd itse şeker
b. Saẖt olur işidüben kānda ʿaḳīḳi yemenüñ
6.a. Ṣaḳınurın ẖaṭ·ı laʿlüñ bu dil·i miskīnden
b. Güzelüm cān otı mıdur lebüñüñ ẖaṭṭı senüñ

|p314
fāʿilātün fāʿilātün fāʿilātün fāʿilün
1.a. Şāẖ·ı güldür sīnem üzre zaẖm·ı şemşīrüñ senüñ
b. Ġoncalar zeyn eylemiş eṭrāfına tīrüñ senüñ
2.a. Ey perī āyīnede kim göre taṣvīrüñ senüñ
b. Āsumān olmış ṣanur ʿĪsī gibi yirüñ senüñ
3.a. Yāy gibi ḳara baġruma çekersem yaraşur
b. Çār ebrū bir güzel mānendidür tīrüñ senüñ
4.a. Sāḳiyā peymāne el virüb alursa dest-yār
b. Şemʿ gibi ṭutuşam olam miyān-gīrüñ senüñ
5.a. Terledüñ ey ẖaṭ mey·i laʿlin gül-efsūn eyledüñ
b. Çoḳ degül ṣōfīlere bu deñlü tezvīrüñ senüñ
6.a. Donadursa ḳarşu ḳarşu şehrüñüñ dil-berlerin
b. Var imiş āyīne gibi ḥüsn·i tedbīrüñ senüñ
7.a. İdemezsen ey göñül mihr ü vefā ile şikār
b. Veh ki āhū·yi perī-zād oldı naẖcīrüñ senüñ
8.a. Oġlan oyuncaġına döndi Necātī ʿışḳ·ı pāk
b. Yoẖsa saña böyle mi taʿlīm ider pīrüñ senüñ

|p315
fāʿilātün fāʿilātün fāʿilātün fāʿilün
1.a. Ṣanʿatidür çeşmüñüñ ser-mest olub ḳan eylemek
b. ʿĀdetidür zülfüñüñ diller perīşān eylemek
2.a. Kaʿbe·i kūyuñ ḥaḳı ̮içün ʿāşıḳuñ bayramıdur
b. Ġamze·i bed-kīşüñe cānını ḳurbān eylemek
3.a. Cān dilersen vaṣluña ey laʿl·i leb bu var mıdur
b. Meẕheb·i ʿĪsāda bayram olsa ḳurbān eylemek
4.a. Ölürem hecr ile göster ʿārıẓuñ kim ẖōş degül
b. Ḫastadan riḥlet deminde ṣuyı pinhān eylemek
5.a. Aġlamazdum cevr·i cānāndan eger kim olmasa
b. Ḳarşuma dāˀim raḳībi böyle ẖandān eylemek
6.a. Ḫāk·i pāyi yār olurken kuḥl·i erbāb·ı naẓar
b. Ey ṣabā lāzım degül ʿazm·ı Ṣafāhān eylemek
7.a. Ey Necātī çünki ser-sebz olmaz imiş bāġ·ı vaṣl
b. Nice bir dōlāb-veş girye ̮ile efġān eylemek

|p316
fāʿilātün fāʿilātün fāʿilātün fāʿilün
1.a. ʿĀşıḳ irdi ʿīd·i vaṣla zāhid eyler daẖi şek
b. Kimine yemek naṣīb olur kimisine emek
2.a. Dōstum laʿlüñ temennāsı göñülden gitmeye
b. Gide gülden reng mülden şevḳ deryādan nemek
3.a. Dāmdur devr·i sipihr ü dānedür cirm·i zemīn
b. Dāne cürminde ṭuyūr u ādem olmış müşterek
4.a. Dil ẖadeng·i ġamzeñ ile pārelensün ġāyeti
b. Sīnede bir ḳanlu peykānuñ ḳoyan adın yürek
5.a. Her kimi görse çeker bir ṣūret ile baġrına
b. Görmedüm ʿālemde āyīne gibi bir yüzi pek
6.a. Birdür ey dervīş ecel çengāline bay ü gedā
b. Kim berāberdür ṣuya döymekde şekkerle nemek
7.a. Ol cevān-baẖtuñ cemālini kemāhī görmege
b. Ay ü günden gözine gözlük ṭutar pīr·i felek
8.a. Gün yüzüñden ayda bir ṣoḥfe yazar māh·ı münīr
b. Girü her bir ṣoḥfesinde var iki üç yirde ḥak
9.a. Şemʿ·i meclis lāf·ı ḥüsn itmezdi ammā bu ṣabāḥ
b. Ölicek ẖasta gibi azıtdı sözin giderek
10.a. İtlerüñe yalvaranlar işigüñde yir bulur
b. Manṣıb·ı ʿālīdür ol olmayıcaḳ olmaz dilek
11.a. Bunca yıldur tīr·i āhı düşman içün ṣaḳlaram
b. Kim dimişler dōstum biñ yıl yaraḳ bir gün gerek
12.a. Zülfüñ ucından Necātīnüñ neler çekdüklerin
b. Biñ yıl olsa ʿömri biñde birin olurdı dimek

|p317
fāʿilātün fāʿilātün fāʿilātün fāʿilün
1.a. Ġonca-veş dervīş olanlar tercemān itmek gerek
b. Ḫırḳada pinhān olanı der-miyān itmek gerek
2.a. Mey gibi el üzre ṭutulmaḳ umanlar kendüyi
b. Pāy-māl·i ẖıdmet·i pīr·i muġān itmek gerek
3.a. Böyle ben mecnūn olınca gitdi ʿaḳl ü gitdi cān
b. Uṣlanınca bir kişi anca ziyān itmek gerek
4.a. Hey ne bilsün şīve·i reftārı serv·i ẖām-dest
b. Bir çoḳ elif bī gibi ol ḥarfi revān itmek gerek
5.a. Şöhret āfetdür dimişler dün ġarībüñdür göñül
b. Dūd u āhı sāye·i şebde nihān itmek gerek
6.a. Ey Necātī ẖaṭṭ ü ẖāl·i yārı gören kimsene
b. İʿtiḳād·ı fitne·i āẖır zemān itmek gerek

|p318
fāʿilātün fāʿilātün fāʿilātün fāʿilün
1.a. Ġamzeñ beni helāk ide göre ṭura gözüñ
b. Ṭurmaya girü ġamze ḳılıcın ura gözüñ
2.a. Biñ vaʿde ide itmeye birin edā lebüñ
b. Biñ nāvek ata atmaya birin ẖaṭā gözüñ
3.a. Ḳāˀil olursam ölmeye menʿ ide leblerüñ
b. Māˀil olursam ölmemege ḳomaya gözüñ
4.a. Ben bu belāya ḳatlanı bilem mi dōstum
b. Bir yaña laʿlüñ ide cefā bir yaña gözüñ
5.a. Çoḳdur Necātī ġamzeleri şīr merd evet
b. Ādem helāk olur baḳışından ḳara gözüñ

|p319
mefāʿilün feʿilātün mefāʿilün feʿilün
1.a. Felekleri oda ursun göñül ḳo nālelerüñ
b. Ben umarın ki görem bir nefesde çoḳ es̲erüñ
2.a. Cihānı oda urursa ʿaceb midür āhum
b. Ḳader ṭutuşdı ḳaẓā ile nālesi seḥerüñ
3.a. Beni ölüm oḳına uġradubdurur ġamzeñ
b. Delindi nāy gibi ṣorma ḥālini cigerüñ
4.a. Beni bu ḥālde gören duʿā diler kim ölem
b. Ne şüphe var bilürüz yüzi ḳutludur seferüñ
5.a. Mis̲āl·i nergis·i şehlā gerekse zerrīn tāc
b. Edeb yolını gözet kendüzüñde ṭut naẓaruñ
6.a. Ne ḳati bī-ẖaber olduñ ḥarīf ṣoḥbetden
b. Şarāb·ı nāb ile sāḳīler aldılar ẖaberüñ
7.a. Necātī beñlerüñ ile lebüñi vaṣf idemez
b. Çekirdegin çıḳarur sözde gerçi kim şekerüñ

|p320
mefʿūlü fāʿilātü mefāʿīlü fāʿilün
1.a. Faṣl·ı bahārdur heves·i sebze-zār idüñ
b. Bir lāle-çihre ile mey·i ẖōş-güvār idüñ
2.a. Bir dem içinde biñ yaşamaḳ ārzū ise
b. Bir laḥẓa serv gibi çemende ḳarār idüñ
3.a. Nergis gibi cihānda gözüñüz baḳar iken
b. Bir serv ayaġına zer ü sīmi nis̲ar idüñ
4.a. Ġonca işāret eyledügi āsitīnle bu
b. Gül dāmenini sırruñuza perde-dār idüñ
5.a. ʿÖẕrini gül diler gibi cümle cerāˀimüñ
b. Bir gūşe·i çemende gelüñ iẖtiyār idüñ
6.a. El-intiẓār eşeddü mineˀl-mevt dür ḥadīs̲
b. Ölen yine dirildi yeter intiẓār idüñ
7.a. Bir yıl idi ki gül gibi pinhān idi ḳadeḥ
b. Vaḳtidürür Necātī gelüñ āşikār idüñ

|p321
feʿilātün feʿilātün feʿilātün feʿilün
1.a. Ḳulıyuz ḳulı melek yüzli melik-zādelerüñ
b. Lebi ġonca beli ince yañaġı sādelerüñ
2.a. Doġrusın mı diyelüm cān ü göñülden ḳulıyuz
b. Serv gibi yirini bekleyen āzādelerüñ
3.a. Gelmedi gelmesin ey dōst gözüñden acı yaş
b. Bilmeseñ ʿayb degül ḥālini üftādelerüñ
4.a. Yār·ı gül çihre gibi ḳırımızı vü al geyer
b. ʿAḳl·ı ʿāciz döyemez şīvesine bādelerüñ
5.a. Daẖi çoḳ başlu olur zülfi ḳaṣīr olduḳca
b. Nice ̮ola ḥāli Necātī cigeri sādelerüñ

|p322
feʿilātün feʿilātün feʿilātün feʿilün
1.a. Gözümüz rūşen idübdür yine ẖāk·i ḳademüñ
b. Ḥamdü liˀllāh bile geldi ḳademüñle keremüñ
2.a. Ḳadd ü zülf ü dehenüñ oldı elif lām ile mīm
b. Ol sebebden dil ü cān leẕẕetin aldı elemüñ
3.a. Hele ben çākerüñe rāḥat·i cāndur cevrüñ
b. Hele ben kemterüñe ẕevḳ u ṣafādur sitemüñ
4.a. Ḥüsn yarenlerinüñ görmemişüz kemligini
b. Meger ey serv·i cefā-pīşe miyānuñla femüñ
5.a. Ben ġamuñ yir idüm evvel sitem·i hercüñ ile
b. Şimdi üşüb beni yir derd ü belā ile ġamuñ
6.a. Vaṣf·ı ḥālüm yazalı zülfüñ ucından ṣanemā
b. Başı derd ile ḳara ḳana boyandı ḳalemüñ
7.a. Şeb·i miḥnetde neler çekdi Necātī dervīş
b. Demüñ olsun senüñ ey bād·ı seḥer-gāh demüñ

|p323
fāʿilātün fāʿilātün fāʿilātün fāʿilün
1.a. Gelmemişdür gelmeyiser döneli çarẖ·ı felek
b. Sencileyin göñli ḳatı bencileyin cānı pek
2.a. Geh cefāsı ḥükm ider mülk·i dile gāhī ġamı
b. Ol iki ẓālim bu bir tīmāra düşdi müşterek
3.a. Yıḳılurdı seyl·i eşkümden binā·yi kāyināt
b. Olmasa ̮idi dūd·ı āhum göklere yir yir direk
4.a. Cevre ḳatlanur diyu yaşumu seyl-āb eyleme
b. Ṣuya döymekde şekerle bir degül midür nemek
5.a. Ḥüsnüñüñ hengāmesin ṭurub temāşā ḳılmaġa
b. Yir bulamayub felek dāmına çıḳdı her melek
6.a. Ayruġın ḳodı Necātī zülfüñ eyler ārzū
b. Baġlamalu oldı bī-çāre ʿimād ipini çek

|p324
feʿilātün feʿilātün feʿilātün feʿilün
1.a. Güzelüm ẖūblar içre saña biz şāh didük
b. Ne didük ḳullarıñuz yarıcuñ Allāh didük
2.a. Ḳāmetüñ mülk·i dili almaġa sancaḳ çekicek
b. Ehl·i diller derilüb bire bir Allāh didük
3.a. Gün yüzüñden uzanub nūr dilerken meh·i nev
b. Gösterüb barmaḳ umar idüñ ola māh didük
4.a. Devlet ü ʿizz ü şeref cāhını biz çāh oḳuduḳ
b. Ẕillet ü faḳr ü ʿanā çāhına biz cāh didük
5.a. Bir nefesdür virelüm yāra Necātī cānı
b. Dutalum ḥasret ile bir ḳatırak āh didük

|p325
mefāʿīlün mefāʿīlün mefāʿīlün mefāʿīlün
1.a. Niçün tercīḥ idersen küfrini zülf·i perīşānuñ
b. Bu veche rūşen iken gün yüzinde nūrı īmānuñ
2.a. Ḫadüñden ẖaṭṭuña varınca cāna nice nīş urdı
b. Güneşden gölgeye iletmez oldı zülf·i s̲uʿbānuñ
3.a. Gözi siḥrine ṭutuldum fiġān ol türk·i ẖūn-rīzüñ
b. Ṣaçı fikrine ṭutuldum meded bir nā-müselmānuñ
4.a. Eline cām alub sāḳī ẖırāmān olsa aydurlar
b. Gül açılmış budaġında yine bir serv·i raʿnānuñ
5.a. Muḳābil olma dil-dāruñ güneş ruẖsārına ey meh
b. İşidürüz müneccimden ki senüñ geçdi devrānuñ
6.a. Ṣanasan penbe ile ṣaḳlanur bir tāze ābīdür
b. Nigārā ġabġabuñ üzre senüñ sīb·i zenaẖdānuñ
7.a. Daġılmasun diyu zülfi ṣınuḳ göñlümi ṣarduḳça
b. Necātī ney gibi daẖi ziyāde oldı efġānuñ

|p326
mefāʿīlün mefāʿīlün mefāʿīlün mefāʿīlün
1.a. Nigārā sende ẖatm olmış güzellik tāzelik terlik
b. Senüñ ḥaḳḳuñdadur ḥaḳḳā serīr·i ḥüsne serverlik
2.a. Ne zībā yārsın yā Rab bu ḥüsn ü ẖulḳ ile sen kim
b. İrişdi reng·i rūyuñdan gül·i ḥamzāya aḥmerlik
3.a. Lebüñden muʿciz·i ʿĪsā irişdi Ḫıẓr u İlyāsa
b. Yüzüñden gün ẓıyā almış ay alnuñdan münevverlik
4.a. İrem bāġına ey gül-rū varur taʿlīm virür her dem
b. Ṣaçuñ reyḥāna sünbüllük ḳadüñ şimşāda ʿarʿarlik
5.a. Eridi nār·ı hecrüñden Necātī pūte·i ġamda
b. Sen anı ġam bucaġında unutduñ ol mıdur erlik

|p327
fāʿilātün fāʿilātün fāʿilātün fāʿilün
1.a. Pārelensün ġam degüldür tīr·i ġamzeñden yürek
b. Sīnemüñ her güşesi doldı ẖadeng·i zenberek
2.a. Ḥüsn miʿrācına ʿāşıḳlar ʿurūc itsün diyu
b. Nerdübān idübdürür zülfeynin eflāke direk
3.a. Ey ẖalīlüm ne ʿaceb ḥüsnüñ gülistānında biz
b. Mezraʿi laʿlüñde cān ekdükce biter mercimek
4.a. Kūyuña varub raḳīb ölmek dilermiş dōstum
b. Ne doñuz ḳurbān olur ne cennete girer eşek
5.a. Bu gice gördüm seg·i kūyuñla mihmān olmışam
b. Sulṭān olmaḳ görinür bize efendi giderek
6.a. Bu Necātīye felek bir taẖt·ı ʿālī urdı kim
b. Ortası firengī aṭlas döşegi pōstı öşek

|p328
mefʿūlü fāʿilātü mefāʿīlü fāʿilün
1.a. Her laḥẓa gün yüzine ṣalar sāye perçemüñ
b. Her gün kemend·i nāz atar aya perçemüñ
2.a. Ṣalın ṣalın ki luṭf ile müşgīn ḥarīrden
b. Ḫılʿat biçübdür ol ḳad·i raˀnāya perçemüñ
3.a. Atışmasun ögütle o ẖasta ̮ile kirpügüñ
b. Ṭolaşmasun esirge bu şeydāya perçemüñ
4.a. Zülfüñ gibi etegine ṣarmaḳ gerek başın
b. İrmek dilerse ol ruẖ·ı zībāya perçemüñ
5.a. Dil-dārlıḳda ṣanʿati başa ileteli
b. Baş egmez oldı zülf·i semen-sāya perçemüñ
6.a. Ḳaç başı var ki zülf·i siyāhuñ ṭurur iken
b. Ol āfitāb·ı ḥüsne ṣala sāye perçemüñ
7.a. Ṣarmış iken ayaġın etegine zülf-vār
b. Ṣaldı Necātīyi yine ġavġāya perçemüñ

|PLām|p329
mefʿūlü fāʿilātü mefāʿīlü fāʿilün
1.a. Ol günden irse tīr·i ġam olma dilā melūl
b. Gökden ne yaġdı kim anı yir itmedi ḳabūl
2.a. Müjġānuñ ile şevḳ·i derūnum olur ziyād
b. Şol ev gibi sūzen·i ẖōrşīd ide duẖūl
3.a. Zülf·i siyāhı baş ege mi ben şikesteye
b. Kim dōst yüz vireli göñüllendi ol fuḍūl
4.a. Ṭūbāyi ḳaddüñ ile gören ey gül·i behişt
b. Ḳaddüñe müntehā didi Ṭūbāya bī-uṣūl
5.a. Bād·ı fenā ġubāruñı tā kim ṣavurmaya
b. Var ey Necātī kūyına ḥasret yaşı ile öl

|p330
mefʿūlü fāʿilātü mefāʿīlü fāʿilün
1.a. İtme hevā·yi serv ile ḳaddin heves göñül
b. Bu ārzūdan el çek ol ümmīdi kes göñül
2.a. Girmeye mi elimüze zencīr·i zülf·i dōst
b. Ḳayduñ göreyin uş senüñ ey bülheves göñül
3.a. Ben her ne dir isem dirin ṣaḳın ki sen
b. ʿIşḳ āteşinden olma cüdā bir nefes göñül
4.a. Her laḥẓa bir nigāh ilesen ben enīs·i ġam
b. Böyle ̮eylemek düşer midi bizümle pes göñül
5.a. Uçmaġa māyil olmadı gül-zāra baḳmadı
b. Bāġ·ı ruẖuñda göreli zülfüñ ḳafes göñül
6.a. Yār içün oldı bunca fiġān ü bu deñlü ah
b. Yardım dürür ḥarāmīye bang·ı ceres göñül
7.a. Şiʿr·i Necātī olsa daẖi itmeye es̲er
b. ʿIşḳ āteşinden olmayıcaḳ muḳtebes göñül

|p331
fāʿilātün fāʿilātün fāʿilātün fāʿilün
1.a. Āsumānīler geyüb gün gibi māhum gitme gel
b. Göklere boyanmasun feryād ü āhum gitme gel
2.a. Hay esirge zülfünüñ zencīrinüñ şeydāların
b. Ḳıyma kendü ḳullaruñdur pādişāhum gitme gel
3.a. El götürüb rūz u şeb derdüñi eylerdüñ ṭaleb
b. Ben elümle itmişem bildüm günāhum gitme gel
4.a. Defter·i naḥnu ḳasemnāde naṣībe yoḳ zevāl
b. Ey belāsı ḳısmet·i luṭf·i İlāhum gitme gel
5.a. Ey beni hecri ̮ile ẖāk iden saña yalvarmaġa
b. Baştan ayaġa dil olmışdur giyāhum gitme gel
6.a. Şemʿ gibi bir nefes bālīnüm üzre ḳıl ḳarār
b. Uş ʿadem ṣaḥrāsına ṭoġruldı rāhum gitme gel
7.a. Dūd·ı āhından Necātī derd-mendüñ yolların
b. Ḳarañuluḳ eyledi baẖt·ı siyāhum gitme gel
8.a. Āfitāb·ı serv-ḳadsin ẓıll·i ʿālī müstedām
b. Devletüm āsāyişüm püşt ü penāhum gitme gel

|p332
mefʿūlü fāʿilātü mefāʿīlü fāʿilün
1.a. Oldı ġam·ı zemāne ile mübtelā göñül
b. Veh bir belā ġam oldı baña bir belā göñül
2.a. Yilter belā·yi ʿışḳa beni yanuma girüb
b. Ḳaṣdi budur ki ata beni ortaya göñül
3.a. Kimden ṭutalum ey yüzi ẖōrşīd gel ayıt
b. Saña güzellik eyledi māhum baña göñül
4.a. Maʿşūḳayı el üzre ṭutarlar duʿā gibi
b. ʿĀşıḳlar arasında budur müddeʿā göñül
5.a. Dil derd-mendi bende çekelden ġurūr ile
b. Baġlamış Allāh Allāh o zülf·i dü-tā göñül
6.a. Aḥsente saña egmedüñ iki cihāna baş
b. Pākīze vü mücerred olan pārsā göñül
7.a. Ferhāda ṣanʿat ögredür oldı Necātīyā
b. Ġam mektebinde oturalı ustaya göñül

|p333
mefʿūlü fāʿilātü mefāʿīlü fāʿilün
1.a. Çün tevbelüsen isteme ey dil şarāb·ı āl
b. Sāḳī sözini sıma ayaġı elüñe al
2.a. Göñlümi zülfi ayaġa urursa ġam degül
b. Bāzār·ı ḥüsn içinde biñin gör birisin al
3.a. Şöyle revāndürür ki alur yürüyivirür
b. Serv·i sihī yazarlar ise ḳaddüñe mis̲āl
4.a. Dünyāda her ne var ise terkindedür hüner
b. Ṣanma ki māl üstüne kef geçmedür kemāl
5.a. Bayram irişdi her kişi beg gibi şādumān
b. Miskīn Necātī muʿtekif·i gūşe·i melāl

|p334
fāʿilātün fāʿilātün fāʿilātün fāʿilün
1.a. Tīrüñ ucından derūn·ı sīne de ḳan oldı gel
b. Yüregüm derd ile zehr-ālūde peykān oldı gel
2.a. Lāleler zındān içinde gündüzin yaḳar çerāġ
b. Bāġ bir üsti açuḳ dil-gīr zındān oldı gel
3.a. Ḫācesinden dün elif ezberleyen dür-dānecik
b. El irişmez şimdi bir serv·i ẖırāmān oldı gel
4.a. Dün gice şeydālara biñ başlu ejderhā olan
b. Hay o bir miskīn imiş bu gün peşīmān oldı gel
5.a. Bir nefesde biñ ölüye cān baġışlar leblerüñ
b. Sen Mesīḥā devletinde ölmek āsān oldı gel

|p335
mefʿūlü fāʿilātü mefāʿīlü fāʿilün
1.a. Ḥaḳḳā budur ki ṣaḥn·ı cihān kem ḳonaḳ degül
b. İllā ki ʿömr ḳāfilesi oturaḳ degül
2.a. Dil-dāra senden olur ise buʿd·i maşrıḳayn
b. Saʿy it göñül ki ʿāşıḳa Baġdād ıraḳ degül
3.a. Eşcār egerçi her varaḳı bir kitābdur
b. İdrāki olmayana cihān bir varaḳ degül
4.a. Ḳullāb gibi kendüye çekmekdürür işi
b. Mestāne ġamzeler gibi zülfüñ ataḳ degül
5.a. Bir dem mi vardur ey gözi ser-mest ü ceng-cūy
b. Ki ̮ol ġamzeler bizüm ile ḳılıc bıçaḳ degül
6.a. Yāruñ ayaġı tozına sürmiş yüzin meger
b. Ayuñ yüzinde görini duran behaḳ degül
7.a. Dünyā ʿulūmı deftere ṣıġmaz egerçi kim
b. ʿIşḳuñ kitābına göre ol bir sebaḳ degül
8.a. Gün yüzüñüñ ḳatında çoḳ alçaḳdürür ḳamer
b. Fiˀl-cümle Kaʿbe beñzedi dirseñ ıraḳ degül
9.a. Eyler Necātī cennet·i der-gāhuñ ārzū
b. Dünyāda gerçi kim bu havā olacaḳ degül

|p336
feʿilātün feʿilātün feʿilātün feʿilün
1.a. Didüm ey dil saña yār ide vefā ẖandān ol
b. Āh idüb derd·i derūn ile didi andan ol
2.a. Baña cānān işigi Kaʿbe saña ey ṣōfī
b. Tek yüzüñ görmeyelüm var Mıṣıra sulṭān ol
3.a. Didüm işigüñe yüzüm süreyin güldi didi
b. İşte baḳ Kaʿbe gerek ḥācī gerek ḳurbān ol
4.a. Hey vefāsuz güzel efġān ile geçdi günümüz
b. Bir gice külbe·i aḥzānumuza mihmān ol
5.a. Ḥasret ü derd ile ey dil beni vīrān itdüñ
b. Göreyin ḥasret ü derd ile seni vīrān ol
6.a. Düşman olduñ ise ḥalḳ ile ḳayırmaz bārī
b. İşigi itleri ile yüri var yārān ol
7.a. Ḳo Necātī ġam·ı cānān ile cānuñ çıḳsun
b. Saña kim didi ki var her güzele ḥayrān ol

|p337
feʿilātün feʿilātün feʿilātün feʿilün
1.a. Zāhidā Kaʿbeye dayanma gel ey gevden al
b. Cān ü dil pīş-keş it işigine evden gel
2.a. Geldi şeh-bāz·ı maḥabbet kim ide cānı şikār
b. Merḥabā ṭāyiri ferẖunde hemīşe sen gel
3.a. Leblerinden dil ü cān būse temennā idicek
b. Lāġ idüb zülf·i siyeh-gārı didi ṭolan gel
4.a. Ruẖı şaṭrenc·ı maḥabbetde beni māt idicek
b. Beydaḳ·ı ẖāl·i siyāhı didi var ögren gel
5.a. Ḥālet·i ʿışḳı Necātīye ṭanışdum didi kim
b. Her cefā-gāra göñül virmeyelüm oġlan gel

|p338
mefʿūlü fāʿilātü mefāʿīlü fāʿilün
1.a. Durub çemende ey gül ü ey serv muttaṣıl
b. Ruẖsār u ḳadd·i yāra dolaşma üzül kesil
2.a. Āb·ı Ḥayātı içdüm ise ey ẖuceste Ḫıẓr
b. Ḫaṭṭ·ı leb·i nigāra berāber dirilme gil
3.a. Gülşende durub oturacaḳ yir bulınmadı
b. Ḳadd ü ʿıẕāruñ ideli serv ü güli ẖacil
4.a. Cismüm belüñ ġamı ile inceldi şöyle kim
b. Vezn eyler iseñ ikisini ola ḳıl be ḳıl
5.a. Münkirdür ehl·i ẖırḳa Necātī maḥabbette
b. Meşhūr nüktedür ki ʿadüvvün limā cehil

|p339
fāʿilātün fāʿilātün fāʿilātün fāʿilün
1.a. Ġāret·i dīn iden ancaḳ zülf·i ʿanber-bū degül
b. Ḫaṭṭ u ẖālüñ daẖi kāfirledürür bir bu degül
2.a. Ḫāb·ı nāz itdügine ol türk·i mestüñ ey göñül
b. Zinhār aldanma kim fitnedür ol uyẖu degül
3.a. ʿIşḳ bāzārında bir dīvāne gördüm çaġırur
b. Leylī zencīrine Mecnūn olmayan uṣlu degül
4.a. Derd ile aġladuġuma hey taraḥḥum eyle kim
b. Ḥasret ile gözlerümden ḳandur aḳan ṣu degül
5.a. Bir birine baş çatub mekr itse zībā ḳaşlaruñ
b. Ḳara baẖtumdur benüm cāẕūdur ol ebrū degül
6.a. Aṣılursam sünbülinden virmeye bir mū baña
b. Ölür isem cānuma bū virmeye bir mū degül
7.a. Ey Necātī çün olur Mecnūna hem-dem her ġazāl
b. Baña ne ̮içün āşinā ol gözleri āhū degül

|p340
feʿilātün feʿilātün feʿilün
1.a. Fāş ider aġzuñı lebüñdeki ẖāl
b. Sırr·ı ġaybı çü noḳta·i remmāl
2.a. İñegüñ çāhı ḥavẓ·ı billūrīn
b. Dudaġuñ çeşme·i revān·ı zülāl
3.a. Başdan geçmedük ẖōd iş yoḳdur
b. Gel kemend·i ṣaçuñı boynuma ṣal
4.a. Ġamze ḳıl ḳaşuñuñ ḳo fitnesini
b. Kişver·i cānı ḳılıcuñ ile al
5.a. ʿIşḳ cāmını ṭut cihāndan geç
b. Ḳıl Necātī mey ile defʿ·i melāl

|p341
mefāʿīlün mefāʿīlün feʿūlün
1.a. Göñül gel ḳul iseñ bir şāh ile ol
b. Belāya ṣabr ḳıl Allāh ile ol
2.a. Yalnuzluḳ bir Allāha yaraşur
b. Göñül sen girye ile āh ile ol
3.a. Şeb·i riḥletdür ey şemʿ·i hidāyet
b. Gele bir laḥẓa ben güm-rāh ile ol
4.a. Anuñ içün çeker işkence zāhid
b. Ki ̮eder iḳrārını ikrāh ile ol
5.a. Eyā ṣōfī ḳalenderdür Necātī
b. Öşünmez manṣıb ile cāh ile ol

|p342
fāʿilātün fāʿilātün fāʿilātün fāʿilün
1.a. Muṭribā ḳavle muẖālif gelme olma bī-ʿamel
b. Başla gül yüzlülerüñ vaṣfında bir rengīn ġazel
2.a. Furṣatı fevt eyleme kim degme kez girmez ele
b. Vaṣl·ı yār·ı bī-naẓīr ü naḳd·i ʿömr·i bī-bedel
3.a. Bil ḳıl üzredür esās·ı ḥüsnüñ itme iʿtimād
b. Rūzigār Ayīne·i İskendere virdi ẖalel
4.a. Ḳāmetüñ şimşādını ayru görürmiş servden
b. Rāstı eksük degüldür çeşm·i aḥvelden ḥivel
5.a. Baş ṣalar ṣōfī gibi yeşil muraḳḳaʿlar geyüb
b. Şöyle beñzer serv gülşende ṣabādan aldı el
6.a. Beni fürḳat öldürür sen benden ayru olıcaḳ
b. Mūma yanmaḳ görinür çün ayrıla andan ʿasel
7.a. Ḫān·ı ḥüsnüñde dehānuñ baẖş·ı ġāyib gibidür
b. Aña bu miskīn Necātī müstaḥiḳdur lā-aḳal

|p343
fāʿilātün fāʿilātün fāʿilātün fāʿilün
1.a. Yanma ey dil derd·i hicrāndan der·i cānāna gel
b. ʿArẓ·ı ḥāl itmek dilerseñ ḥaẓret·i sulṭāna gel
2.a. Ey ġam·ı dil-ber dilerseñ almaġa cānum benüm
b. Gitme dilden bir nefes genc isteyu vīrāna gel
3.a. Didüm ey cān dönmezem tīr·i müjeñden mā-ḥaṣal
b. Didi kim daʿvāyı ḳo ger merd iseñ meydāna gel
4.a. Gice zülfüñden şikāyet idicek cān cevrine
b. Didi ṣabr it ṣubḥa dek sulṭān çıḳar dīvāna gel
5.a. Ey nigār·ı seng-dil raḥm it Necātī bendeñe
b. Kāfir iseñ ẓulmi ḳo şimdengirü īmāna gel

|p344
fāʿilātün fāʿilātün fāʿilātün fāʿilün
1.a. Nāleye āheng iderseñ ey göñül Ferhāda gel
b. Baġruña ṭaşlar baṣub daġlar gibi feryāda gel
2.a. Sen göñülden çıḳduġuñdur ġayr ile yār olduġuñ
b. Eksügüñse ey ḳamer-ruẖ yāda varma yāda gel
3.a. Çekmek isterseñ bu gün bār·ı taʿalluḳdan elüñ
b. Serv gibi sebze-zār·ı ʿāleme āzāde gel
4.a. Çünki maʿmūr eylemezdüñ vaṣl·ı yār ile beni
b. Ey felek diyüb niderdüñ bu ẖarāb-ābāda gel
5.a. Maḥv olur naḳş·ı emel mānende·i naḳş·ı mezār
b. Ḫāk·i pāy·i cān-sitāna ʿārif iseñ sāde gel
6.a. Uñmaduġından bilüñ oldı Necātī pīşe-gār
b. Ṣanʿat ögrenmek eger maḳṣūd ise üstāda gel

|B0|PMīm|p345
fāʿilātün fāʿilātün fāʿilātün fāʿilün
1.a. At kemend-i zülfüñi ben mübtelāya dōstum
b. Kim baş açub durmuşam derd ü belāya dōstum
2.a. Az ḳalubdur kim gözüm yaşı ̮ile āhum āteşi
b. Yirleri ve gökleri vire fenāya dōstum
3.a. Ġonca aġzuñdan ne söz açıldı kim ẖandān olub
b. Gül çıḳardı geydügin virdi ṣabāya dōstum
4.a. Ne revādur kim ıraḳdan baḳar iken āfitāb
b. Āyīne (Ay ine) ḳarşu gele sen meh-liḳāya dōstum
5.a. Gelmeyüb ẖaṭṭ·ı siyeh redd·i belā olmaġ içün
b. Vaṣluñı neẕr eyle luṭf it ben gedāya dōstum
6.a. El götürübdür Necātī kim güzeller olmasun
b. Ḥāẓır ol gel sen daẖi uşbu duʿāya dōstum

|p346
fāʿilātün fāʿilātün fāʿilātün fāʿilün
1.a. Āteş·i ġamdan yanubdur pākdür cismüm benüm
b. Bil ki şol bir āh·ı āteş-nākdür cismüm benüm
2.a. Himmet ile hem-demi ʿĪsā olursam ṭañ mı kim
b. Ehl·i diller ayaġında ẖākdür cismüm benüm
3.a. Bunı bildüm ʿāḳıbet kim hīç nesne bilmedüm
b. Gerçi başdan ayaġa idrākdür cismüm benüm
4.a. Avladı öldürdi ġamzeñ kendüzümden ölmedüm
b. Şeh-süvārā lāyıḳ·ı fitrāḳdür cismüm benüm
5.a. Ey Necātī eyledüm nefs ejdehāsını zebūn
b. Mār-gīr·i dehr içün tiryākdür cismüm benüm

|p347
fāʿilātün fāʿilātün fāʿilātün fāʿilün
1.a. Ey dudaġuñ çeşme-sārı Āb·ı Ḥayvānum benüm
b. Dirlik it ben ḳuluña devletlü sulṭānum benüm
2.a. Serv tek el olmasun maḥşerde dāmānuñ senüñ
b. Ġonca-veş çāk eyleme her dem girībānum benüm
3.a. Sicn·i müˀmin cennet·i kāfirdürür dünyā dimiş
b. İşiden aġyār·ı bī-dīn ile destānum benüm
4.a. Derd olsun şerbet·i dermān içersem ey ṭabīb
b. Cām·ı ġamdan derd olubdur çünki dermānum benüm
5.a. Lāle-zārı düşde dün Ferhāda ṣordum didi kim
b. Her bahār olduḳca yirden cūş ide ḳanum benüm
6.a. Dirmiş ol gül-ruẖ ki yoḳdur ġonca gibi aġzı berk
b. Pisteler dilden düşürmez laʿl·i ẖandānum benüm
7.a. Ey Necātī ʿömre sürer nitekim Āb·ı Ḥayāt
b. Gül gibi pejmürde olmaz tāze dīvānum benüm

|p348
mefāʿīlün mefāʿīlün mefāʿīlün mefāʿīlün
1.a. İşigüñden yüzüm dönerse dönsün bir yaña ḳıblem
b. Ḳapuña doġru geldüm ben senüñ a Kaʿbem a ḳıblem
2.a. Ḳoyub Kaʿbe ḳapuñ ḥāşā dil itmez ġayrıya secde
b. Olubdur gerçi her yirde namāz itmez revā ḳıblem
3.a. Senüñ paşmaġuñ irdügi yire irmez benüm başum
b. Ḳo bārī ideyin secde ıraḳlardan saña ḳıblem
4.a. İki çeşme ṣu iletmek gibidür Kaʿbe şehrine
b. Ḳapuñda bir kez añılsa yaşumdan mā-cerā ḳıblem
5.a. ʿAceb midür dolanursa cemālüñ çevresin zülfüñ
b. Ṭavāf·ı Kaʿbe idermiş işitdük ejdehā ḳıblem
6.a. Ḥarīm·i Kaʿbenüñ el-ḥaḳ Ṣafānuñ adı var ancaḳ
b. Cemālüñ Kaʿbesine baḳ nice virür ṣafā ḳıblem
7.a. Şikāyet eylemiş diyu yeter öldür Necātīyi
b. Aña itdüklerüñ sen de nola bir kez añ a ḳıblem

|p349
fāʿilātün fāʿilātün fāʿilün
1.a. Es-selām ey Şāh·ı merdān es-selām
b. Es-selām ey sırr·ı pinhān es-selām
2.a. Es-selām ey kāşif·i ʿilm·i ledün
b. Es-selām ey cümle bürhān es-selām
3.a. Es-selām ey dürr·i deryā·yi İlāh
b. Es-selām ey gevher·i kān es-selām
4.a. Es-selām ey Ẕāt·ı pāk·i Muṣṭafā
b. Es-selām ey nūr·ı īmān es-selām
5.a. Es-selām ey sāḳī·i kevs̲er imām
b. Es-selām ey ḳıble·i cān es-selām
6.a. Es-selām ey Ḥaydar·ı Düldül-süvār
b. Es-selām ey ẖalḳ·ı Raḥmān es-selām
7.a. Es-selām ey ẓāhir ü bāṭın ʿayān
b. Es-selām ey sırr·ı pinhān es-selām

|p350
fāʿilātün fāʿilātün fāʿilātün fāʿilün
1.a. Ayru düşdüm dōstlar serv·i bülendümden benüm
b. Rāstı ben böyle ummazdum efendümden benüm
2.a. Nice kez ol serv·i ser-keş gördi ayaḳlar raḳīb
b. Dimedi bir kez ki el çek derd-mendümden benüm
3.a. Geydürelden dest·i ḥasret ġam palāsın egnüme
b. Şimdi kendüm yigrenürem kendü kendümden benüm
4.a. Bendler geçdi baña zülf·i siyāh·ı dōst kim
b. Ḫalḳ·ı ʿālem pend alurlar şimdi pendümden benüm
5.a. Ey Necātī saña bu devlet yiter kim ehl·i derd
b. Tāzeler cānını şiʿr·i dil-pesendümden benüm

|p351
feʿilātün feʿilātün feʿilātün feʿilün
1.a. Ben esīrem dile vü dil de saña ey ẖānum
b. Ḳuluñuñ ḳulıyın unutma beni sulṭānum
2.a. Şükür Allāha ki degdi ayaġuñ ṭopraġına
b. Yirde ḳalmaya ben üftāde umarın ḳanum
3.a. Nice aġlamayayın kim idecek bir kez āh
b. Baña yirden göge dek minnet ider efġānum
4.a. Beni yavuz ʿamelüm şuña yetişdürdi kim
b. Derd ile cān çekişem ölmek ola dermānum
5.a. Göñül eglencem idi derdümi yanardum aña
b. Gideli sūẖte dil yoḳ gibidür bir yanum
6.a. Ölem aralmayam ey dōst ġam·ı ʿışḳuñdan
b. Çaḳ ölince umarın bulmayasın yalanum
7.a. Dil cehennem odına ıṣına bī-cāna degül
b. Nireye vara Necātī ʿacebā pāyānum

|p352
fāʿilātün fāʿilātün fāʿilātün fāʿilün
1.a. Ben gedā çoḳ görmüşem ḳapuñda iḥsān delim
b. Yine ol dervāzeye gelmişem Allāh yā kerīm
2.a. Luṭfuña maġrūr olub itdümse güstāẖāne iş
b. Ṣuçumı bildüm şehā estaġfirüˀllāheˀl-ʿaẓīm
3.a. Gel yemīn it bir daẖi bu cürmi itme dir iseñ
b. Pādişāhum tevbe bismiˀllehiˀr-raḥmāniˀr-raḥīm
4.a. Kesme bir sürçen atuñ ayaġını ey şeh-süvār
b. Bī-edeb çoḳ ṣuç ider şāhuñ ḥuẓūrında nedīm
5.a. Merḥamet ḳılmaz iseñ ey dişleri dürr·i ʿAden
b. Ha Necātī ha bir āvāre gözi yaşlu yetīm

|p353
fāʿilātün fāʿilātün fāʿilātün fāʿilün
1.a. Bir gözi āhū ile ḳavl ü ḳarārum var benüm
b. Körlügine seg raḳībüñ ẖōş şikārum var benüm
2.a. ʿÖmr bāṭıldur mey ü maḥbūba hem-dem olmayan
b. Başda sevdā elde cām·ı ẖōş-güvārum var benüm
3.a. Ḥamdü biˀllāh dōstlar ġam düşmanından ḳaçmaġa
b. Gūşe·i mey-ẖāne gibi bir ḥiṣārum var benüm
4.a. Ḳana boyanmış iken göñlüm açar güller gibi
b. Bir cemāli ʿālem-ārā nev-bahārum var benüm
5.a. Çıḳdı yaşum gibi gözümden cihān gevherleri
b. Şol Necātīyem ki dürr·i şāh-vārum var benüm

|p354
mefāʿīlün mefāʿīlün mefāʿīlün mefāʿīlün
1.a. Bugün ḥüsnüñ zemānıdur öpül ʿömrüm ḳocul cānum
b. Güzellik çünki fānīdür öpül ʿömrüm ḳocul cānum
2.a. Öpülmekden çü ḳan olmaz ḳoculmaḳdan ziyān olmaz
b. Güzellik cāvidān olmaz öpül ʿömrüm ḳocul cānum
3.a. Ṣarılmaḳ bir hidāyetdür ḳoculmaḳ ẖōd saʿādetdür
b. Bilürsiz būse ʿādetdür öpül ʿömrüm ḳocul cānum
4.a. Geçer ḳalmaz zemāndur bu güneş gibi ʿayāndur bu
b. Vefāsı yoḳ cihāndur bu öpül ʿömrüm ḳocul cānum
5.a. Baḳub serv·i bülendüñe naẓar ḳıl kendü kendüñe
b. Necātī derd-mendüñe öpül ʿömrüm ḳocul cānum

|p355
feʿilātün feʿilātün feʿilātün feʿilün
1.a. Tūtiyā ister imiş ki ̮ola saña ẖāk·i ḳadem
b. Ġaraẓı bu ki ṣata kendüyi dirhem dirhem
2.a. Ḫaylıdan dīde·i ʿuşşāḳa görünmez olduñ
b. Hey bizüm ile perī şīvesin itme ādem
3.a. Gözlerin ırmaya ẖālün gibi ruẖsāruñdan
b. Ger bu ḥüsn ile göre ẖālüñi İbn·i Edhem
4.a. Miḥnet·i hecrüñ ile çarẖ iki bükdükce belüm
b. Sevgüñüñ riştesi daẖi beter olur muḥkem
5.a. Ser·i kūyında muḳīm olduñ ise itler ile
b. Ey Necātī eyü sen yirüñi bulduñ epsem

|p356
fāʿilātün fāʿilātün fāʿilātün fāʿilün
1.a. Ḫırmen·i māhı yaḳan āh·ı derūnumdur benüm
b. Çarẖ·ı ser-keş dōstlar şimdi zebūnumdur benüm
2.a. Gül yüzi ṭaġıtdı ṣabrum naḳdini bülbül gibi
b. Nev-bahār irişdi hengām·ı cünūnumdur benüm
3.a. ʿIşḳı meydānında yāruñ bir yaluñuz başumı
b. Zülfi çevgānına ṭōp itmek oyunumdur benüm
4.a. Şemʿ·i ruẖsārına iden zülf·i şeb-rengin niḳāb
b. Bilürem baẖt·ı siyāh·ı ser-nigūnumdur benüm
5.a. Ey Necātī ʿışḳ ṣaḥrāsını gül-gūn eyleyen
b. Bilmiş olasın ki eşk·i lāle-gūnumdur benüm

|p357
feʿilātün feʿilātün feʿilātün feʿilün
1.a. Devr·i güldür gelüñüz cām içelüm ʿayş idelüm
b. Nice bir ehl·i riyānuñ sözini işidelüm
2.a. Mescide ḳoymadılar mey-kededen sürdiler āh
b. Ne ḥalāle yarar olduḳ ne ḥarāma nidelüm
3.a. Gül-sitānda baş açuḳ nūş idelüm cām·ı şarāb
b. Nefs atın rişte·i taḳlīd ile nice yedelüm
4.a. Biz ki bu heyet ile ḥüzn·i muṣavver olduḳ
b. Çāre oldur mey içüb kendümüzi unudalum
5.a. Çār dīvār·ı cesed ḳaydını terk eyleyelüm
b. Bāġ·ı tecrīde bu gün gül gibi ẖandān gidelüm
6.a. Bülbüle oḳudalum medḥ ü Necātīye ġazel
b. Bir nefes ẖurrem olalum diyelüm işidelüm

|p358
mefʿūlü fāʿilātü mefāʿīlü fāʿilün
1.a. Zaẖm·ı firāḳ uñulmuş u gitmişdür ey ṣanem
b. Tīrüñle sīne birlige yetmişdür ey ṣanem
2.a. Bezm·i ṣafāda laʿlüñe mānend olunca mey
b. Pīr·i muġān ne cānlar eritmişdür ey ṣanem
3.a. Ḳaddüñ olalı gülşen·i ḥüsn içre ser-ferāz
b. Serv ü ṣanevberüñ işi bitmişdür ey ṣanem
4.a. Bülbül söger ḳulaġını doldurı güllerüñ
b. Beñzer ki vaṣf·ı laʿlüñ işitmişdür ey ṣanem
5.a. Dil leblerüñe gelse ḳoyub zülfiñi ne ṭañ
b. Āşüftelikle cānına yetmişdür ey ṣanem
6.a. Gül ruẖlaruñda sünbülüñ āşüfte göreli
b. Miskīn Necātī ʿaḳlı daġıtmışdur ey ṣanem

|p359
mefāʿīlün mefāʿīlün mefāʿīlün mefāʿīlün
1.a. Sözi cāndan gelen yāruñ leb·i ẖandānını buldum
b. Sözümi cān ile diñleñ ki sözüñ cānını buldum
2.a. Ġam·ı cānāneye cān virmek ile ḳurtılur göñlüm
b. Bi-ḥamdiˀllāh ki ölmeden ġamuñ dermānını buldum
3.a. Belā yolında Mecnūnuñ öñine kim gelür amma
b. Be-cid saʿy eyledüm ardınca oldum yanını buldum
4.a. Baña ser-nāme·i ʿışḳ ile ṭaʿn etmeñ ki bir ḳaç gün
b. Göñül eglencesi mihr ü vefā destānını buldum
5.a. Naṣīḥat-nāmeyi gördüm benüm derdümden oy virmez
b. Necātīnüñ ḳara yazulı bir dīvānını buldum

|p360
mefʿūlü fāʿilātü mefāʿīlü fāʿilün
1.a. Şāmīler itmesün diyü ikide bir hücūm
b. Götürdi zülf ḳāʿidesin yüzden ehl·i Rūm
2.a. Dünyā bütün benüm dise yarım aġız lebüñ
b. Cān·ı ʿazīze itmeye ayruḳ ecel hücūm
3.a. Cānā güzeller aġzuña baḳsa ʿaceb midür
b. İns ü perī nigīn·i Süleymāna oldı mūm
4.a. Hīç ide bile mi lebüñüñ şīvesin Mesīḥ
b. Aġızdan ögrenile mi iḥyā gibi ʿulūm
5.a. Ḫālüñ cefāyı ẖūşe·i zülfüñden ögrenür
b. Üzüme göre ḳararur ey bī-vefā üzüm
6.a. Avlamaġa güzelleri māniʿ olur faḳīh
b. Monlālaruñ şikārda olur liḳāsı şūm
7.a. Ölüm işi Ḥaḳ işidür andan kim incinür
b. Yārı Necātī ġayr ile görmekdürür ölüm

|p361
mefʿūlü fāʿilātü mefāʿīlü fāʿilün
1.a. Şol dem ki zecr·i hecr ile cānāndan ayrılam
b. Göñlüm budur ki cānı virem andan ayrılam
2.a. Cānānedür Mesīḥ-nefes cān içün ne ġam
b. Müşkil budur ki vuṣlat·ı cānāndan ayrılam
3.a. Mecmūʿ nesneden dir idüm ayrılam velī
b. Dimez idüm ki zülf·i perīşāndan ayrılam
4.a. İsterler ise işte ḥarīfāne naḳd·i cān
b. Mümkin midür ki ṣoḥbet·i yārāndan ayrılam
5.a. Ḳul oldum ol şehe nice terk ideyüm anı
b. Ṣanma beni ki ẖıdmet·i sulṭāndan ayrılam
6.a. Zencīr·i zülfi ile zenaẖdānı çāhını
b. Gördüm Necātī ṣanma ki zındāndan ayrılam

|p362
fāʿilātün fāʿilātün fāʿilātün fāʿilün
1.a. ʿIşḳ ile bīdāruñam ṣanma ki ẖābum var benüm
b. Gözüm ü göñlüm açuḳdur fetḥ·i bābum var benüm
2.a. Ḥūr·ı Rıḍvānı añub durma ḳatumda vāʿiẓā
b. Ġayrı dil-berden bilürsen ictinābum var benüm
3.a. Nāṣiḥā ḳo maḥşeri añma yañıldursan beni
b. Şol ḳara zülfi ̮ile yāruñ çoḳ ḥisābum var benüm
4.a. Gözlerüm gün yüzine ḳarşu dolubdur eşk ile
b. İki şīşe günde beslenmiş gül-ābum var benüm
5.a. Sīne ẖālī çeşm ü dil giryān ü biryān gel berü
b. Hem otaġum hem şarābum hem kebābum var benüm
6.a. Ḥasretüm yoḳ sāḳiyā cām·ı cihān-efrūza kim
b. Maḥşer olınca ayıtmaz bir şarābum var benüm
7.a. Defter ü ṭūmāra yazduġum maḥabbet sözlerin
b. Levḥ·i ẖāṭırdan direm ṣanma kitābum var benüm
8.a. Ey Necātī umaram cennetde yarın yir bulam
b. Der-geh·i ʿālīye çünkim intisābum var benüm

|p363
mefāʿilün feʿilātün mefāʿilün feʿilün
1.a. Ḥayāt-baẖş lebüñ mürde cisme cān bilürem
b. Yüzüñ behişt ü ṣaçuñ ʿömr·i cāvidān bilürem
2.a. Yolında ʿömrini ṣarf eyleyeni zülfi gibi
b. Ayaḳlara ṣalar ol şūẖ·ı dil-sitān bilürem
3.a. Dirīġ sīnede ġāyib olan ẖadenglerüñ
b. Nişānını viremez anuñ üstüẖān bilürem
4.a. Ḫaṭuñı kāfir·i Rūm u yüzüñi devr·i ḳamer
b. Gözüñi fitne-ger·i āẖırüˀz-zemān bilürem
5.a. Ayaġı ṭopraġına cān ü baş virüb alsam
b. Yabanda bulmalıdur anı rāyegān bilürem
6.a. Ḳaçan ki sūz·ı derūnum ḳalem ide taḥrīr
b. Fiġān idüb depesinden çıḳa duẖān bilürem
7.a. Lebinden aġzını ṣordum didi ki ben daẖi
b. Necātī sencileyin anı bī-nişān bilürem

|p364
fāʿilātün fāʿilātün fāʿilātün fāʿilün
1.a. ʿĀşıḳ·ı cānāneyem cān ü cihāndan geçmişem
b. Sākin·i meyẖāneyem bāġ·ı cināndan geçmişem
2.a. Müflis·i kūy·i nigārem baña añmañ cenneti
b. Ṭālib·i ruẖṣār·ı yārem gül-sitāndan geçmişem
3.a. Baña ögretmeñ lebi şevḳi ̮ile meyden geçmegi
b. Çoḳ zemān olmışdur ey ṣōfī ben andan geçmişem
4.a. Göreli ruẖsār ile zülf·i dil-āvīzüñ senüñ
b. Cennet·i bāḳī vü ʿömr·i cāvidāndan geçmişem
5.a. Çekme ġamzeñ ẖançerini cānına geçsün diyü
b. Ben ẖōd evvel leblerüñ şevḳi ̮ile cāndan geçmişem
6.a. Göñlüme zülfüñ ṭolaşduġın görüb ġamzeñ didi
b. Hey ben ol bīmār ü zār ü nā-tüvāndan geçmişem
7.a. Ben Necātī lebleri şevḳi ̮ile bī-hūş olmışam
b. Sen beni ṣanma şarāb·ı erġavāndan geçmişem

|p365
fāʿilātün fāʿilātün fāʿilātün fāʿilün
1.a. Ġamzesi tātārlar siḥrinden aġlar gözlerüm
b. Çaḳ şu yaġmur yaġduran boncuġa oẖşar gözlerüm
2.a. Hīçe ṣaymazsın benüm sen bir yumub biñ dökdügüm
b. Uş ḥisābuñ ala şāhum rūz·i maḥşer gözlerüm
3.a. Böyle olmaz nesl·i Ādem sen perīsin yā melek
b. Gör ki gözler görmedügi görki gözler gözlerüm
4.a. Serverā serv·i ser-efrāzuñ bir elden daẖidür
b. Çoḳ zemāndur būstānlarda ṣanevber gözlerüm
5.a. Ḳanlu yaş ile yudum yudum giderdüm ḳarasın
b. Gel ki devlet-ẖāneñe cām olmaḳ ister gözlerüm
6.a. Bir elif bīdur revān itdügi ey serv·i çemen
b. Mekteb·i mihr ü vefāda bunca yıllar gözlerüm
7.a. Ey Necātī aġlamaḳdan vāz geldüm olalı
b. Kīmyā·yi ẖāk·i ʿışḳ ile tüvānger gözlerüm

|p366
feʿilātün feʿilātün feʿilātün feʿilün
1.a. Fikr·i sevdā·yi ser·i zülfüñ ucından güzelüm
b. Ḳıṣṣa·i Leylī vü Mecnūna dönübdür mes̲elüm
2.a. Şevḳ·i ẖōrşīd·i cemālüñde dehānuñdan es̲er
b. Bulmadum ẕerrece hīç oldı ḳamu mā-ḥaṣalum
3.a. Çün lebüñ şerbeti her ẖasta dile emsem olur
b. Anı biz ẖaste-dile luṭf ile buyur emelüm
4.a. Bilmezem nice ḥacerdendürür ey dōst dilüñ
b. Hīç es̲er eylemedi aña füsūn ü ḥiyelüm
5.a. Devr·i ẖaddüñde gelüb zülfüñi maḥv itdi ẖaṭuñ
b. Ey dirīġā dükenüb ʿömrüm irişdi ecelüm
6.a. Nice rengīn dimeyem lāle ruẖuñ medḥini kim
b. Gül gibi ẖurrem olur her kim oḳursa ġazelüm
7.a. Ben Necātī ḳapuñuñ ẖākine yüz sürdügüm ol
b. Umarın bir gün ire ayaġuñ öpmege elüm

|p367
mefāʿīlün mefāʿīlün mefāʿīlün mefāʿīlün
1.a. Fiġān ol ġonca·i ẖurrem baña yār olmadı bir dem
b. Anuñçün gözlerüm seyl-ābı ḳan olub aḳar bir dem
2.a. Çün olduñ vāḳıf aḥvāle sen efġān eyle ben nāle
b. Gel ey ney bezm·i miḥnetde ikimüz idelüm bir dem
3.a. Gül·i ruẖsāruñ olaldan ḳızılı ḳızıl aġı aġ
b. Gözümüñ çeşme-sārından benüm bir yaş aḳar bir dem
4.a. Irılma bir nefes dil ẖastesinüñ başı ucından
b. Gel ey şemʿ·i şeb-efrūzum ki ḳalmışdur hemīn bir dem
5.a. Necātī aġlama bir dem ki yār ile ̮itmedüñ bir dem
b. Bu kim bir yaş aḳar bir dem ola bir dem gibi bir dem

|p368
mefāʿīlün mefāʿīlün mefāʿīlün mefāʿīlün
1.a. Ḳara ṭopraġa ḳarmaġıl ḳayırmaz ḳaḳıyub ḳanum
b. Ḳuluñam ḳapuña geldüm benüm devletlü sulṭānum
2.a. Saña kār itmedi cānā ḳapuñda nāle vü zārum
b. ʿAceb budur ki irişdi yedi iḳlīme efġānum
3.a. Iraġ olalı çeşmümden ḳarañu gündürürür günüm
b. Nola ʿarẓ·ı cemāl itseñ benüm şemʿ·i şebistānum
4.a. Maḥabbet sebze-zārında cemālüñ tāze bāġ iken
b. Vefā ḳıl ʿāşıḳa ḳalmaz geçer dünyā benüm cānum
5.a. Didiler yaraşur yāra hezārān bülbülüñ olsa
b. Necātī didi kūyumda yeter murġ·ı ẖōş-elḥānum

|p369
fāʿilātün fāʿilātün fāʿilātün fāʿilün
1.a. Ḳaddümi bükdüñ ṣaḳın āhumdan ey māhum benüm
b. Yedi ḳat gökden geçer çarẖ oḳıdur āhum benüm
2.a. Aġladuḳca göz yaṣı dūr itdi der-gehden beni
b. Yılduzum barışmadı sen māh ile şāhum benüm
3.a. Yirde ḳaldı ḳanlu yaşum gibi āh·ı derd-nāk
b. Yılduzum yoḳ mı ʿaceb göklerde Allāhum benüm
4.a. Leşker·i fürḳat şebīẖūn eyler iken her gice
b. Ṭālib olur vuṣlata āh·ı seḥer-gāhum benüm
5.a. Ẓulmet·i āẖır zemāndur şemʿ·i devlet olmasa
b. Ey Necātī yola girmez baẖt·ı güm-rāhum benüm

|p370
mefāʿilün feʿilātün mefāʿilün feʿilün
1.a. Gözümde ʿaks·i cemālüñ bahāra beñzetdüm
b. Yaşum bahārda ṭaşmış pıñara beñzetdüm
2.a. Cigerde cemʿ olalı ḳanlu ḳanlu peykānuñ
b. Derūn·ı sīnemi gördüm enāra beñzetdüm
3.a. Görince ḥüsn deñizinde ẖaṭṭuñuñ ḳarasın
b. Necāt sāḥili ṣandum kenāra beñzetdüm
4.a. Ṣaçuñ hevāsı ile yolları muʿaṭṭar ider
b. Nesīmi ḳāfile·i müşg-bāra beñzetdüm
5.a. Güzel görünür ıraḳdan görünse her nesne
b. Anuñ içün güneşi rūy·i yāra beñzetdüm
6.a. Sirişk yaġmurı diñsün ki barḳ·i āhumdan
b. Ḳarañu gicelerümi nehāra beñzetdüm
7.a. Ögerseñ ol ruẖı ög kim Necātī vaṣf ideli
b. Beyān varaḳlarını lāle-zāra beñzetdüm

|p371
mefʿūlü fāʿilātü mefāʿīlü fāʿilün
1.a. Gördüm yüzüñi dīde·i giryāndan el yudum
b. Ṣu gibi göñlüm aḳdı revān andan el yudum
2.a. Gördüm ki gitmeyince göñül yüz yumaz
b. Vurdum cigerde ḳaṭre ḳadar ḳandan el yudum
3.a. Ruẖsār·ı dil-firīb·i ʿaraḳ-rīzüñi görüb
b. Şeb-nemleri ̮ile ṣaḥn·ı gülistāndan el yudum
4.a. Uyub hevāya terk·i diyār eylesem nola
b. Bir ḳaṭreyem ki lücce·i ʿummāndan el yudum
5.a. Zencīr·i zülfüñe ireli dōstum senüñ
b. Divāneyin ki çāh·ı zenaẖdāndan el yudum
6.a. Laʿlüñ yeter Necātīye dünyā ve āẖıret
b. Kevs̲er ṣuyu ̮ile Çeşme·i Ḥayvāndan el yudum

|p372
feʿilātün mefāʿilün feʿilün
1.a. Mevsim·i nev-bahārı gözleyelüm
b. Gül·i ruẖsār·ı yārı gözleyelüm
2.a. Bize serv ü çinārdan ne biter
b. Varalum ḳadd·i yārı gözleyelüm
3.a. Gül ḥayāsuzluḳ itse yüzleyelüm
b. Sāḳī·i gül-ʿiẕārı gözleyelüm
4.a. Şemʿ-vār ortaya atılmayalum
b. Cām gibi kenārı gözleyelüm
5.a. Nice bir aldaya şumāra vire
b. Biz de rūz·i şumārı gözleyelüm
6.a. Ġulġuli şīşenüñ baş aġrısıdur
b. Sāġar·ı bī-ẖumārı gözleyelüm
7.a. Düşdi zevraḳ Necātī baḥr·ı ġama
b. Çāre ne rūzigārı gözleyelüm

|p373
mefʿūlü fāʿilātü mefāʿīlü fāʿilün
1.a. Mey-gūn lebüñ ẖayāli ile ḳan aḳar yaşum
b. Kim didi tīr·i ġamzeñe kim ḳana ḳar yaşum
2.a. Çoḳ yaşasun ki çeşm ü dile baḥr ü ber geçüb
b. Geldi getürdi derd·i derūndan ẖaber yaşum
3.a. Sen servi ḳıldı gülşen·i ḥüsn içre iẖtiyār
b. Ey bī-bedel degüldür iñen bī-naẓar yaşum
4.a. Kuḥl olmaz ise gözlerine ẖāk·i pāy·i dōst
b. Aġlayu aġlayu iki gözden çıḳar yaşum
5.a. Ṣatsın ṣabā ayaġı tozını direm direm
b. Çün ḳaṭre ḳaṭre üstine küvler düşer yaşum
6.a. Ḥaḳḳā ki bir demine viṣālüñ bedel degül
b. Biñ yıl olursa ḥasret ile dōstlar yaşum
7.a. Bir demde çıḳdı göklere āh·ı cihān-güdāz
b. Bir demde eyledi sefer·i baḥr ü ber yaşum
8.a. ʿIşḳuñ dime kim içmemişem bir ṣovuḳ ṣuyın
b. Çekdi Necātī uşda saña mā-ḥaẓar yaşum

|p374
fāʿilātün fāʿilātün fāʿilātün fāʿilün
1.a. Her gün ol ruẖsārı gül-zār·ı cinānı gözlerem
b. Her gice ol zülfi ʿömr·i cāvidānı gözlerem
2.a. Zülf ü ruẖsāruñ firāḳı ̮ile ıraḳlardan durub
b. Gice āteş şuʿlesin gündüz duẖānı gözlerem
3.a. Ḥüsnüñe ins ü melek ḥayrān ü ben dīvāne-vār
b. Geh zemīne baḳaram geh āsumānı gözlerem
4.a. Ḥalḳa gibi gözlerüm ḳapuñda ḳaldı dōstum
b. Fetḥ·i bāb ola diyu ol āsitānı gözlerem
5.a. Nice ṣuna çarẖ çīnī kāse ile nuḳl·i ġam
b. Devr elinden ben ki cām·ı şādumānī gözlerem
6.a. Rāḥat ü ḳahrına dehrüñ baş egüb yalvarmazam
b. Ben Necātī himmet·i Şāh·ı cihānı gözlerem

|p375
mefʿūlü fāʿilātü mefāʿīlü fāʿilün
1.a. Yoluñda ḳurdı dīdelerüm ḥalḳa ḥalḳa dām
b. Ṣayd ide bir naẓar seni ey kebk·i ẖōş-ẖırām
2.a. Raḥm it ki ḳıldı sen gül·i ẖandān firāḳına
b. Yüzüm ṣaḥīfesin cigerüm ḳanı lāle-fām
3.a. Lāyıḳ degül mi şād ola luṭfuñla bir nefes
b. Şol kim duʿā·yi devletüñ eyler ʿaleˀd-devām
4.a. Ṣōfī lebüñ meyinden eger içe bir ḳadeḥ
b. Ẕikri ṣurāḥī ḳulḳuli tesbīḥi ola cām
5.a. Zerrāḳ ṣōfī puẖte ile rīvler ḳılub
b. Bāḳī ḳalan şarāba dilermiş ki diye ẖām
6.a. Luṭf eyle sāḳī mecmaʿ·ı yārān ṭaġılmasun
b. Peyvend eyle silsileyi devr ile müdām
7.a. Dilden giderdi ġam gicesinün ḳarañluġı
b. Ṣaġar hilāli olsa Necātī meh·i temām

|p376
fāʿilātün fāʿilātün fāʿilātün fāʿilün
1.a. Yüz çevürme ḳaçma benden gel berü çoḳ sevdügüm
b. Atasından anasından ilerü çoḳ sevdügüm
2.a. Vay nice aç gözlüyin kim doyımazın görmege
b. Gördügümce artuḳ olur ārzū çoḳ sevdügüm
3.a. Ṣoḥbeti germ itdi sāḳī cürʿa·i cām·ı lebüñ
b. Vardı bir kez öpmege iki dolu çoḳ sevdügüm
4.a. Bir ḥarāret var derūnumda ruẖuñ şevḳi ̮ile kim
b. Dem dem aḳar iki gözden ılı ṣu çoḳ sevdügüm
5.a. Öldüreyin dir imişsen ʿāşıḳ·ı bī-çāreyi
b. Andan utanmaz mısın ilden a bu çoḳ sevdügüm
6.a. Derdüm ile ṣabr itdüm artuḳ eksük söyledüm
b. Az ḳaluban diyeyazdum rū-be-rū çoḳ sevdügüm
7.a. Ayaġa düşmiş Necātīnüñ elin al vaḳtidür
b. Ki ̮eylemişdür göz yaşı başın ḳayu çoḳ sevdügüm

|p377
fāʿilātün fāʿilātün fāʿilātün fāʿilün
1.a. Yā Rab ol düşman baḳışlu yāra ne ̮itdüm ne ̮eyledüm
b. Sevdügümden ġayrı ol dil-dāra ne ̮itdüm ne ̮eyledüm
2.a. Ben gedā bir kimsenüñ yatur itin ḳaldurmadum
b. Yār işiginde olan aġyāra ne ̮itdüm ne ̮eyledüm
3.a. Gül yüzine baḳmadum şimşāduñ adın añmadum
b. Ol ḳamer-ruẖsār ü ẖōş-reftāra ne ̮itdüm ne ̮eyledüm
4.a. Gūşe·i mey-ẖānede geh mest oluram geh ẖumār
b. Böylelikden zāhid·i hüş-yāra ne ̮itdüm ne ̮eyledüm
5.a. Altına aldı ġam ü derd üstüme dönmez felek
b. Rūzigār·ı ẓālim ü ġaddāra ne ̮itdüm ne ̮eyledüm
6.a. Ḳāmet ü zülfe giriftār oldılarsa cān ü dil
b. İtdilerdi buldılar bī-çāre ne ̮itdüm ne ̮eyledüm
7.a. Ādem olmaz ādeme yaḳışmaz ādemden ḳaçar
b. Ben Necātī ol perī-ruẖsāra ne ̮itdüm ne ̮eyledüm

|p378
fāʿilātün fāʿilātün fāʿilātün fāʿilün
1.a. Yāra ne ey müddeʿī çoḳ çoḳ gün āhumdan benüm
b. Yüz çevürmez āyine rūy·i siyāhumdan benüm
2.a. Ey ḳamer biñ yıldürür kim ölenüñ dirler günāh
b. Gel berü öldür beni ḳaçma günāhumdan benüm
3.a. Görinen yılduz degül yir yir delinmişdür felek
b. Gün yüzüñüñ ḥasreti ̮ile tīr·i āhumdan benüm
4.a. Pādişāhum leşker·i miḥnet şebīẖūn itdügin
b. İşidesen bir gün āh·ı ṣubḥ-gāhumdan benüm
5.a. ʿĀşıḳuñ baġrında zehr-ālūd ẖançer olduġın
b. Ḳabrum üstine gelen bilür giyāhumdan benüm
6.a. Zaʿferānın yüzümüñ küynüklü āhumdur ṣatan
b. Līkin ol gül-çihre almaz āh u vāhumdan benüm
7.a. Gözi ögrenmişdürür ʿāşıḳları öldürmege
b. Ey Necātī ẓulm gelmez pādişāhumdan benüm

|PNūn|p379
fāʿilātün fāʿilātün fāʿilātün fāʿilün
1.a. Ey göñül aġyār olana yār dirseñ bilmezin
b. Bī-vefā dil-berlere dil-dār dirseñ bilmezin
2.a. Hem güzel hem pādişehdür bilürin ammā ki sen
b. Ol cefā-gāruñ vefāsı var dirseñ bilmezin
3.a. Bāġ·ı cennet ẖār·ı rehdür ʿāşıḳ·ı dīdār iseñ
b. Sen aña ey bülheves gül-zār dirseñ bilmezin
4.a. Key ẖaṭādur çarẖa isnād·ı vefā ben bildügüm
b. Rūzigāra ẓālim ü ġaddār dirseñ bilmezin
5.a. Ben Necātīyem güzel sevmek olubdur ṣanʿatüm
b. Sen muʿallim ʿāşıḳ·ı bī-kār dirseñ bilmezin

|p380
mefʿūlü fāʿilātü mefāʿīlü fāʿilün
1.a. Olmayayın cemālüñe pervāne yā neyin
b. Yanmayayın firāḳ odına yā ne yanayın
2.a. Başumda od yana dütünüm çaḳ depemdedür
b. Gelsün bu derdi şemʿ·i şebistāna yanayın
3.a. Merdāne ʿışḳ·ı yār ile meydāna girmişem
b. Meydān içinde hecr ile merdāne yanayın
4.a. Zındān içinde çün gice gündüz yanar çerāġ
b. Dünyāda ben de āteş·i hicrāna yanayın
5.a. Ḳanlu cigerden iledeyin ġoncaya ẖaber
b. Dāġ·ı derūnı lāle·i Nuʿmāna yanayın
6.a. Yanaşduġını ḳāmet·i dil-dāra nāreven
b. Ṣaḥn·ı çemende serv·i ẖırāmāna yanayın
7.a. Dāˀim Necātī nāleye āheng ider göñül
b. Tā erġanūn·ı āh ile efġāna yanayın
8.a. Maẖlāṣ gibi Necātīnüñ alçaḳda ḳalduġı
b. Eşʿārum ile defter ü dīvāna yanayın

|p381
mefāʿīlün mefāʿīlün feʿūlün
1.a. Ölürsem sen gözi bīmār elinden
b. Gerekmez Āb·ı Ḫıẓr aġyār elinden
2.a. Ṣabā gibi nice āh itdüm ey gül
b. Alınca dāmenüni ẖār elinden
3.a. Gözüñe cān virüb zülfüñi aldum
b. Ki misk erzān olur tātār elinden
4.a. Beni ey kāküli yollar baṣıcı
b. Ḥarāmī çeşmüñüñ ḳurtar elinden
5.a. Çerāġ irdügine yanar bunı kim
b. Ṭutuşdum ol yüzi gül-nār elinden
6.a. Kime itsem ʿaceb cānā şikāyet
b. Cefā-pīşe olan dil-dār elinden
7.a. Ṣurāḥī gibi ben ḳanlar yudam
b. İçersen sen ayaġ aġyār elinden
8.a. Necātī vaṣf·ı laʿlüñ mi yazar kim
b. Ḳalem zār oldı ḳan aġlar elinden

|p382
mefʿūlü mefāʿīlü mefāʿīlü feʿūlün
1.a. Ey ẖāṭır·ı āşüfte şol iki gözüm aydın
b. Cān gibi göñül şehrine gelmiş gözüñ aydın
2.a. Meh bürcine çıḳ gün gibi ṭoġ luṭf yüzinden
b. Ẓulmet gicesinde ḳoma ʿuşşāḳı ay aydın
3.a. Ser-geşte benüm gibi ne yirde ve ne gökde
b. Zülfüñ ġamı ̮ile oldı seḥer yilleri miskīn
4.a. Ḫāl ü ẖaṭuñuñ ḳıymeti çaḳ Rūm ẖarācı
b. Zülf·i siyehüñ muştuluġī Çīn ile Māçīn
5.a. Ey māh-cebīn saña güneşsen didügin dil
b. Göklerde melekler işidüb eyledi taḥsīn
6.a. Ḫōrşīdi görüb ḥüsnüñe maġrūr olursın
b. Āyīne her-āyīne ider kişiyi ẖōd-bīn
7.a. Şiʿrinde ruẖuñ vaṣfını itdükce Necātī
b. Mecmūʿa·i gül gibi olur sözleri rengīn

|p383
fāʿilātün fāʿilātün fāʿilātün fāʿilün
1.a. Alınubdur lāle rengi ol gül·i sīr-ābdan
b. Ḳuruyubdur laʿl ḳanı ol iki ʿunnābdan
2.a. Āyet·i ḥüsnüñi zāhid oḳuyımaz gerçi kim
b. Ḫaṭṭ u ẖāl eksük ḳomamış noḳṭa vü iʿrābdan
3.a. Ḳaşlaruñ çāh·ı ẕeḳandan rīsmān·ı zülf ile
b. Çekdi göñlüm zevraḳın māhī gibi gīrd-ābdan
4.a. Ġamzeñ oḳları yaġarken ẖōş gelür ölmek baña
b. Ḫasta göñlüm ḥaẓẓ ider bārān olıcaḳ ẖābdan
5.a. Bir bölük bī-çāre bülbül ḳanını sürdüñ yüze
b. Ey gül·i raʿnā ḥaẕer ḳıl dīde·i ẖūn-ābdan
6.a. Aġlamazdum hecrden ey dōst düşman gülmese
b. Ṭaʿn·ı aʿdā artuḳ olur fürḳat·i aḥbābdan
7.a. Ayaġuña yüz sürüb geçmekdürür maḳṣūd·ı eşk
b. Çekme dāmānuñ benüm serv·i revānum ābdan
8.a. Ṭañ namāzı bāṭıl olur maṭlaʿ·ı ẖōrşīdden
b. Zühd esāsı bozılur cām·ı şarāb·ı nābdan
9.a. Dil kebāb ü nuḳl ġam göz yaşı mey hicrān nedīm
b. Ey Necātī ʿayş it eksük nesne yoḳ esbābdan
10.a. Ḫādim ol cān ile dāˀim ol Sikender-ḳadre kim
b. Ḳulları dārātī yegdür şevket·i Dārābdan

|p384
mefʿūlü fāʿilātü mefāʿīlü fāʿilün
1.a. Ey zülfi ḳara kim vara bilür ṣabā yolın
b. Bir demde iki defʿa dolanur Ḫıṭā yolın
2.a. Ne ̮eyler yolında hecr ḥarāmīsi vaṣluñuñ
b. Emn ile şarṭ itdi Ḥicāzuñ Ḫudā yolın
3.a. Āhumı alma kim yedi ḳat gökler ey melek
b. Cehd eyler ise baġlayı bilmez duʿā yolın
4.a. Ġamzeñ ẖadengi gitdi dil ardınca sīneye
b. Ḥaḳ Tañrı açuḳ eylesün ey dil-rübā yolın
5.a. Añdurma ben ġarībe diyār·ı melāmeti
b. Ögretme mübtelāya efendi belā yolın
6.a. Gelmez kināra duẖter·i rez virmez el baña
b. Pīr·i muġāna gerçi yetürdüm ata yolın
7.a. Dār·ı fenāda ayaġı yir baṣmasa ne ṭañ
b. Gösterdiler Necātīye dārüˀl-baḳā yolın

|p385
mefāʿīlün mefāʿīlün feʿūlün
1.a. Emīn olma göñül hicrāndan iñen
b. Bilürsen dōst olmaz eski düşman
2.a. İki yol aġzına gelmiş ġarībem
b. Ara yirinde iki zülfüñüñ ben
3.a. İñende servi silküb ṣarṣma ey bād
b. Anı çoḳ elleme çıḳmadı yirden
4.a. Beni mest eyledüñ fāş oldı ʿışḳuñ
b. Baña senden olubdur saña benden
5.a. Necātī bülbül·i cāna o gülsüz
b. Görinür gülşen·i firdevs külẖan

|p386
mefʿūlü fāʿilātü mefāʿīlü fāʿilün
1.a. Ben üzümüñ ṣuyın severem sōfī dānesin
b. Zīrā kimi ḳızını sever kimi anesin
2.a. Ṣabr ideyin cefāña eyā cevri çoḳ güzel
b. Yā ben ölem firāḳ ile yā sen uṣanasın
3.a. İnsānlıġ eyle ādemīyāna gel ey perī
b. Nūr ile rūşen eyle göñül tāb-ẖānesin
4.a. Sürdüm raḳībi sürmek içün yirlere yüzüm
b. Süre süre getürdüm ola mı zemānesin
5.a. Ey gül severse ṭañ mı zenaẖdānuñı göñül
b. Bülbül cihāna virmez imiş āşiyānesin
6.a. Göricek itüñ izini Allāh sevindi dil
b. Virdiler aña götüri dünyāyı ṣanasın
7.a. Di ġamzeñe ḳomaduġı yirden götürmesün
b. Yıḳub gidemesün dil ü cānuñ ẖızānesin
8.a. Öldürmege bahāne gerekmez Necātīyi
b. Yetmez mi bu bahāne ki sen bī-bahānesin

|p387
feʿilātün feʿilātün feʿilātün feʿilün
1.a. Bir içim ṣu umaruz ẖançer·i bürrānuñdan
b. Nola bir kez içürürseñ ne gider yanuñdan
2.a. Gül·i cennet gibidür dirmek ile eksilmez
b. Būse luṭf eyle bize ġonca·i ẖandānuñdan
3.a. ʿĀlemi ẖurrem iden cürʿa·i iḥsānuñdur
b. Sāḳiyā ṣaḳın unutma bizi iḥsānuñdan
4.a. Yāra cānum dir imişsen öle mi bre raḳīb
b. Ölmez isem seni bīzār ideyin cānuñdan
5.a. Ḳolını çenber idüb pençesini burdı ṣabā
b. Göñlümi alımadı zülf·i perīşānuñdan
6.a. Himmetüñde yine hicrān görinür cān ü dile
b. Ben senüñ ḳurtulımayum gibi hicrānuñdan
7.a. İtlerden bu gün öñ añdı Necātī seni yār
b. Yine mümtāz olasan gibi hep aḳrānuñdan

|p388
fāʿilātün fāʿilātün fāʿilātün fāʿilün
1.a. Ben dururken ġayriye laʿlüñ revān virmek neden
b. Ḳatline ben nā-tüvānuñ böyle cān virmek neden
2.a. Ey ṣabā yabanda mı bulduñ ayaġı ṭopraġın
b. Her göze ol tūtyāyi rāyegān virmek neden
3.a. Degme bir ḥayvāna cānā leblerüñle sünbülüñ
b. Āb·ı Ḥayvān ile ʿömr·i cāvidān virmek neden
4.a. ʿAḳl elinden al göñül şeh-bāzın ey sulṭān·ı ʿışḳ
b. Destine bir rūsitāyīnüñ doġan virmek neden
5.a. Pādişāhā devlet·i derdüñle şākir olmayub
b. Leblerüñden em dileyene emān virmek neden
6.a. Cānlar almaġa gözüñe ḳoşma ḳaşuñ kirpügüñ
b. Mest olanuñ destine tīr ü kemān virmek neden
7.a. Ḫasta ṣorarsa lebüñ ẖōş ola cānā rence ḳıl
b. Bir ḳadem öñden bu ẖayr işe zemān virmek neden
8.a. Ger Necātī göñlin al gel dimedüñse dōstum
b. Dest·i zülfe ẖatem·i laʿlüñ nişān virmek nedem

|p389
feʿilātün mefāʿilün feʿilün
1.a. Beni um didüñ irte yā bir gün
b. Veh ki bir yılcadur baña bir gün
2.a. Bu güne irteye di ṣal beni di
b. Ḫōş gelür öldügüm saña bir gün
3.a. İrteye çıḳmasun bu gün göreyin
b. Saña cān itmeyen fedā bir gün
4.a. Ḳomaz idüm bu günüm irteye ben
b. Baña virse seni Ḫudā bir gün
5.a. Dün de bu gün de görmeyen yārın
b. Şöyle bil görmedi ṣafā bir gün
6.a. Ben gedā çaḳ bu gün gibi bilürin
b. Ki ̮irteden tīz irer belā bir gün
7.a. Günümüz geçdi bu gün irte ile
b. Gülmedük biz Necātīyā bir gün

|p390
fāʿilātün fāʿilātün fāʿilātün fāʿilün
1.a. Baña dirmiş şöyle kendin mübtelā göstermesün
b. İẖtiyār elde ̮ise ḥüsnin dil-rübā göstermesün
2.a. Her kişi izi tozın başına tāc idinmesün
b. Her gedā kendüzini bir pādişā göstermesün
3.a. Ehl·i derdüñ dūd·ı āhından ṣaḳınsın āyīne
b. Yārı ẖōd-bīn itmege iñen ṣafā göstermesün
4.a. Zāhidā dünyā degül meyl eyler isem cennete
b. Sevdügümüñ yüzin Allāhum baña göstermesün
5.a. Sāḳiyā nūḳl·i lebüñ ṣun baġrumuz ezdi şarāb
b. Acımışdur bize nā-geh bir belā göstermesün
6.a. Geh firişte geh perī añmaḳdan ol ise murād
b. Ki ̮anları yār ile bir görem Ḫudā göstermesün
7.a. Būseñe cān vireyin dirmiş Necātī yāra diñ
b. Virür īmānın bile bir dem rıẓā göstermesün

|p391
fāʿilātün fāʿilātün fāʿilātün fāʿilün
1.a. Tā görelden iki şehlā gözlerinüñ ḳarasın
b. Ḳıble·i miḥrāb idindüm ḳaşlarınuñ arasın
2.a. Şol raḳībüñle beni meydāna çekseñ dōstum
b. Ḳulaġınca eyler idüm ol itüñ her pāresin
3.a. Pāre pāre yüregümi rīze rīze baġrumı
b. Tīġ·i hecrüñle nice bir şeḥra şeḥra yarasan
4.a. Zülfi sevdāsına mı düşdüñ yilersin her seḥer
b. Ey ṣabā bencileyin sen de ʿaceb āvāresen
5.a. Ey Necātī kendü luṭfundan ki dil-ber gelmeye
b. Vāy aña kim evlerine varasan yalvarasan

|p392
mefāʿīlün mefāʿīlün mefāʿīlün mefāʿīlün
1.a. Cefā vü cevri ḳo alma dil·i sūzānı sīnemden
b. Od alub ḳanda yaḳarsın perī yüzlüm cehennemden
2.a. Göñül ḳaṣrına geldükce ẖayālüñ bir dem eglenmez
b. Ṣanasın kim od almaġa gelür bu külbe·i ġamdan
3.a. Gözüñ merdümlük eyleyüb her oḳ kim sīneme urdu
b. Ḳaşuñ yayı ġamı anı çıḳardı bir bir arḳamdan
4.a. Yüzüñi ey melek·sīret görürse diye ḥūrīler
b. Bu ṣūretlu beşer gelmiş degüldür nesl·i Ādemden
5.a. Ḫayāli serv·i ḳaddüñüñ dile gelmedi ẖaylıdan
b. Ayaġına ṣu dökmelü olubdur çeşm·i pür-nemden
6.a. Müsāfirdür ṣabā şimdi ayaḳ tozı ile geldi
b. Getürdi göñlüme būy·i vefā ol zülf·i pür-ẖamdan
7.a. Cüdā olmadı sīneñden Necātī nefs·i emmāre
b. Bu rūşen oldı kim kāfir ebed çıḳmaz cehennemden

|p393
fāʿilātün fāʿilātün fāʿilātün fāʿilün
1.a. Cām·ı ʿışḳuñdur dem-ā-dem sırrumı fāş eyleyen
b. Nār·ı şevḳuñdur hemīşe gözlerüm yaş eyleyen
2.a. Öykünürmiş leblerüñe laʿl ü yāḳūt ey ṣanem
b. Ġālibā uşbu günehdür anları ṭaş eyleyen
3.a. Ḫāk·i pāyuña döküb ṣaçdum gözüm gevherlerin
b. Ārzū·yi kīmyādur beni ḳallāş eyleyen
4.a. Āhum ile işigüñ pāk itmege ḳomış beni
b. Bād·ı ṣubḥı gülşenüñ ṣaḥnına ferrāş eyleyen
5.a. Sālik·i rāh·ı ḥaḳīḳatdür Necātī ḳorḳusuz
b. Dil-rübālar ʿışḳını kendüye yoldaş eyleyen

|p394
mefāʿīlün mefāʿīlün feʿūlün
1.a. Gerçi sen bu lebler ile ẖalḳ·ı ʿālem cānısın
b. Ṣorduġum ʿayb eyleme biˀllāh kimüñ cānānısın
2.a. Tāc·ı devletdür meger başuñda miskīn kākülüñ
b. Kim güzeller şāhısın hem ẖūblar sulṭānısın
3.a. Mürdeye cānlar baġışlar söze geldükce lebüñ
b. Anuñ içün saña ʿālem dir ki ādem cānısın
4.a. Gözümüñ nūrı ve göñlümüñ sürūrıdur ṭapuñ
b. Ḫasta göñlüm çāresisin derdümüñ dermānısın
5.a. Ey güneş kendüñi ʿuşşāḳ içre yüksek ṭutma kim
b. Ol ḳamer yüzlü nigāruñ sen de ser-gerdānısın
6.a. Gerçi nāzügdür Necātī ẖūblar ṣayd itmede
b. Diller almaḳda velī sen de cihān fettānısın

|p396
feʿilātün feʿilātün feʿilātün feʿilün
1.a. Ḥaḳ bilür cānumuza geçdi perīşānlıḳdan
b. Ne umar ol ṣaçı kāfir bu müselmānlıḳdan
2.a. Dökmedin devr yire cürʿa gibi ḳanumızı
b. Sāḳiyā nūş idelüm al berü şol ḳanlıḳdan
3.a. Şīve vü nāz ile ʿāşıḳlaruñı öldürigör
b. Ey perī çünki ġaraẓ luṭfdur insānlıḳdan
4.a. Bürüse ḳanlu yaşum cismümi cānum sevinür
b. Ṣol gedā gibi ki ̮alur cāmeyi sulṭānlıḳdan
5.a. ʿĀşıḳuñ yār Necātī ki rıẓāsın gözedür
b. Hīç farḳ itmeye sulṭānlıġı der-bānlıḳdan

|p397
mefāʿīlün mefāʿīlün feʿūlün
1.a. Ḫayāl·i yār öñine mā-ḥaẓardan
b. Dil ü dīdem bulındı ẖuşġ ü terden
2.a. Lebüñ vaṣfın işitmiş ġoncalardan
b. Anuñçün gül açılmış çin seḥerden
3.a. Sevād·ı dīde mülk·i dil senüñdür
b. Neñ eksük pādişāhum baḥr ü berden
4.a. Bu cism ü vaṣl·ı kūy·i yār heyhāt
b. Çıḳılmaz bir ḳıl ile göge yirden
5.a. Eger şīrīn lebüñe öykünürse
b. Göreyin Tañrı dād alsun şekerden
6.a. Yüzüñi gördüm itdüm ʿışḳa bünyād
b. Ki işe ibtidā ẖōşdur seḥerden
7.a. Baña bir būse vir ölsün raḳībüñ
b. Ḫalāṣ ol dōstum ẖayr ile şerden
8.a. Göñül ʿışḳ odına yanar gözüm dir
b. Necātī Ṭañrı ṣaḳlasun beterden

|p398
fāʿilātün mefāʿilün feʿilün
1.a. Dōstum serv-ḳāmet olmışsın
b. Durduġuñla ḳıyāmet olmışsın
2.a. Ġamze vü ẖaṭṭ u ẖāl ü zülf ü ʿiẕār
b. Bre ẓālim ne āfet olmışsın
3.a. Leb·i laʿli şeker-feşānuñ ile
b. Yine kān·ı melāḥat olmışsın
4.a. Ḳanuma aş yirerdi ġamzelerüñ
b. Hele ey dōst rāḥat olmışsın
5.a. Ey Necātī selāmet ehli ̮idüñ
b. Ne ʿacāyib melāmet olmışsın

|p399
mefāʿīlün mefāʿīlün feʿūlün
1.a. Deli ḳanlulara uyduñ delisin
b. Göñül danışmadın öldürmelisin
2.a. Senüñ ẖaṭṭuñ benüm cānum çıḳınca
b. Benüm cānum ölince sevmelisin
3.a. Bu serv ü nergis ile bāġ·ı ḥüsnüñ
b. Bu gün görür gözi ṭutar elisin
4.a. Ne ẖōş derc eylemiş zülf·i siyāhuñ
b. Ġubār üstine reyḥānuñ celīsin
5.a. Necātī ekmel·i ʿālem olursañ
b. Çü yoḳ bir ḥabbe ʿışḳuñ ekmelisin

|p400
feʿilātün feʿilātün feʿilātün feʿilün
1.a. Diler iseñ ki dil·i ẖaste yarasın göresin
b. Ölicek sīnemi ẖançerle yarasın göresin
2.a. Dün gice daḳmış idüñ zülfüñi boynuma didüm
b. Didi düşüñdür ola umma ḳarasın göresin
3.a. Zāhidā ehl·i riyā dūzaẖīdür didigüme
b. Eger inanmaz iseñ uşta varasın göresin
4.a. Ey göñül cevr ü cefādan bu ḳadar şād olduñ
b. Vay eger ẕerre ḳadar mihr ü vefāsın göresin
5.a. Ger Necātī ḳuluña ḳahr ile düşmān idesin
b. Şevḳ ile şām ü seḥer luṭf·ı duʿāsın göresin

|p401
mefʿūlü mefāʿīlü mefāʿīlü feʿūlün
1.a. Dirler lebüñe ẖalḳ Mesīḥā küçücükden
b. Kim oldı Mesīḥā gibi gūyā küçücükden
2.a. Dürler döker ol ḥoḳḳa dehen söze gelince
b. Atmışlar aña lüˀlü·yi lālā küçücükden
3.a. Öldürse vefā dögse ṣafā sögse duʿādur
b. Kişi güzeli sevmeye illā küçücükden
4.a. Cān u dile el uzadacaġını bilürdüm
b. Fettān idi ol serv·i dil-ārā küçücükden
5.a. Arturdı cefā ḳāˀidesin yār egerçi
b. Bilmezdi vefā şīvesini tā küçücükden
6.a. Şimdengirü Allāh bilür nice olur ḥāl
b. İtdi hele ʿālemlere rusvā küçücükden
7.a. Bir ṭoġru elif oḳumadan ey boyı şimşād
b. Ḫāceñ mi didi fitneye başla küçücükden
8.a. Öldür beni gel şimdi ki bir vaḳtin añasın
b. Ki ̮itdügin unutmaz kişi aṣlā küçücükden
9.a. Ol ġonca-dehen sırruñı fāş itdi Necātī
b. Kim gizlü ẖaberler olur ifşā küçücükden

|p402
fāʿilātün fāʿilātün fāʿilātün fāʿilün
1.a. Dōst itdüm çünki cānı derd·i cānān ile ben
b. Bilmiş oluñ düşmanın ölince dermān ile ben
2.a. Ṭutalum ḳan aġlamaḳdan ölem utanmaz mısın
b. Varıcaḳ maḥşerde yarın Ḥaẓrete ḳan ile ben
3.a. Nāme·i ḥasret gelür ʿāşıḳlara çoḳ çoḳ velī
b. Hīç maẓmūn oḳumadum uşbu ʿunvān ile ben
4.a. Cānum ürkerdi güzellerden vefā gelmez diyu
b. Bu ʿacebdür kim ḳul oldum ṭapuña cān ile ben
5.a. Cānı gibi ṣaḳlasun dünyā beni kim hīç olur
b. Genc gibi ülfet itmezsem bu vīrān ile ben
6.a. Ḳo ġurūrı zāhidā dünyā degüldür ber-ḳarār
b. Ne sen īmān ile ḳalursın ne oġlan ile ben
7.a. Rāstı budur ki rusvāy oldı ṣoñ ver dāşum
b. Çıḳışımadum Necātī āh ü efġān ile ben

|p403
mefāʿīlün mefāʿīlün mefāʿīlün mefāʿīlün
1.a. Dilā mülk·i ʿadem yegdür baña bu külbe·i ġamdan
b. Ki cānum cevr·i cānān ile bīzār oldı ʿālemden
2.a. Cehennem ḥālini görmiş gibi şerḥ itdi bir vāʿiẓ
b. Firāḳ·ı dōstān āfet gibi geldi cehennemden
3.a. Ḳadeḥ nūş eyle kim bād·ı havādur ʿāḳıbet sāḳī
b. Ḥabāb·ı mey saña örnek degül mi sāġar·ı Cemden
4.a. Perī yüzlü güzeller hep senüñ aġzuña baḳarlar
b. Begüm saña Süleymānlıḳ müsellemdür bu ẖātemden
5.a. Meger māh·ı muḥarremdür ki yılda bir gelür sāġar
b. Getür şaʿbāna dek sāḳī bize māh·ı muḥarremden
6.a. Göñül ger āhuña āheng iderse Zöhre·i zehrā
b. Yaraşur zīre kim zīrüñ ṣadāsı zār olur bemden
7.a. Necātī cenneti zāhid ögüb göklere çıḳarsa
b. Yirini bekleyen yiger mes̲eldür mā-teḳaddemden

|p404
mefʿūlü mefāʿilün feʿūlün
1.a. Revnaḳ bulalı bu ẖaṭṭ·ı miskīn
b. Yüz yire ḳodı benefşe miskīn
2.a. Yir öpdi şu ʿārıẓuñ öñinde
b. Ḥüsnüñe zemāne itdi taḥsīn
3.a. Āh eyle göñül ki yār her dem
b. Āyīne gibi olur nev-āyīn
4.a. Olmayıcaḳ ey göñül sitāre
b. Ne fāˀide virür eşk·i pervīn
5.a. Gün yüzine māh öykünürmiş
b. Eyü ya Necātī gözüñ aydın

|p405
mefʿūlü fāʿilātü mefāʿīlü fāʿilün
1.a. Zülfüñ ẖamını ʿanber·i sārāya virmezin
b. Laʿlüñ ġamını şādī·i ṣahbāya virmezin
2.a. Cān virüb aṣılursa bu miskīn selāsilüñ
b. Bir ḳılını memālik·i Dārāya virmezin
3.a. Laʿl·i lebüñ ṣafāsını sāġarda bulalı
b. Mey-ẖāneler bucaġını dünyāya virmezin
4.a. İzüñ tozını gün gözine tūtiyā içün
b. Gökden yire inerse Mesīḥāya virmezin
5.a. Gülşende āşiyāne·i bülbül ḳadar yiri
b. Ḳorlarsa baña cennet·i Meˀvāya virmezin
6.a. Ben muʿteḳid degül miyin Allāh ẕikrine
b. Şol deñlü var ki başumı ġavġāya virmezin
7.a. Yoḳdur çemende servüñ eli üzre el velī
b. Reftār·ı yārı serv·i dil-ārāya virmezin
8.a. Eglenmege Necātīyā dīvārı sāyesin
b. Gīsū·yi ḥūr u zülf·i semen-sāya virmezin

|p406
fāʿilātün fāʿilātün fāʿilātün fāʿilün
1.a. Sūz·ı dil beñzüm ṣarardur ey yañaġı erġavān
b. Ġālibā bu vech ile kūyuñda olmaz zaʿferān
2.a. Ḳoşma zülfüñ çeşmüñe ḳıyma giriftār olana
b. Ādem ölür virme ol cellād eline rīsmān
3.a. Zülf ü ruẖsāruñ ıraḳdan görinür baña yaḳın
b. Nite kim gice ̮ile āteş şöyle kim gündüz duẖān
4.a. Ḳaşınuñ yayı ele girmez ṭutuñ kirpik oḳın
b. Ṭoġru ṭutulmayıcaḳ egri bulunmaz bī-gümān
5.a. Çünki ẖāliṣdür Necātīnün yoluñda ḳalbı yoḳ
b. Nice bir seng·i cefā ile idersin imtiḥān

|p407
fāʿilātün fāʿilātün fāʿilātün fāʿilün
1.a. Baġrumuñ yanduġına beñzüm ṣarusıdur nişān
b. Ey yüzi gül lā-cerem küynükde olur zaʿferān
2.a. Ey ṣaçı bīmār yanın beklemekden dil-şikest
b. Ey gözi aẖşama ḳarşu uyumaḳdan nā-tüvān
3.a. Leblerüñden fehm olur çün kim dehānuñ varlıġı
b. Küllü sırrin cāvizeˀl-is̲neyni şāʿ olur ʿayān
4.a. Zülf·i ʿanber-bār ile yār ister örte ruẖların
b. Hīç ola mı şemʿ·i rūşen perde·i şebde nihān
5.a. Ey Necātī şekk ider ʿālem vücūduñdan senüñ
b. Varlıġuñ ʿAnḳā gibi bir ad ḳalmışdur hemān

|p408
fāʿilātün fāʿilātün fāʿilātün fāʿilün
1.a. Sen bu ẖışm·ı çeşm ile ḳan eylemezseñ işte ben
b. Derdümi dünyāya destān eylemezseñ işte ben
2.a. Al ele āyīne ol ḥüsn·i cihān-efrūza baḳ
b. Gül gibi çāk·i girībān eylemezseñ işte ben
3.a. ʿĪd·i eḍḥādur cemālüñ bir nice ʿāşıḳları
b. Kaʿbe·i kūyuñda ḳurbān eylemezseñ işte ben
4.a. Ol güle şeydālanursın ey göñül bülbül gibi
b. Gice gündüz āh ü efġān eylemezseñ işte ben
5.a. Ey Necātīnüñ ümīdi sen bu genc·i ḥüsn ile
b. Ser-be-ser dünyāyı vīrān eylemezseñ işte ben

|p409
mefʿūlü fāʿilātü mefāʿīlü fāʿilün
1.a. Sen ey ẖayāl·i dōst göñülden çıḳar mısın
b. Dil şehrini ya şöyle ısuz ḳor yıḳar mısın
2.a. Cān ile leblerine göñül müşterī iken
b. Baş isteyince būseye almaz bıḳar mısın
3.a. Ey ġam metāʿ·ı kāsid·i hicrānı göñlüme
b. Bön avladum diyu dilegüñce ṭıḳar mısın
4.a. Ortadan alub ey ẖaṭ öte yanuña dili
b. Sen daẖi zülf gibi kenāra çıḳar mısın
5.a. Pīr·i muġānı iñen ögersen Necātīyā
b. Yoḳsa üzüm ṣuyını bilece ṣıḳar mısın

|p410
feʿilātün feʿilātün feʿilātün feʿilün
1.a. Şöyle muḥkem ṭutayın bir daẖi dil-dār etegin
b. Yā elüm ḳatʿ ideler yā keseler yār etegin
2.a. Yaḳasından geçürübdür ser·i zülfin bilürüz
b. Nice çoḳ başludur elden ḳomaz inkār etegin
3.a. Āferīn ol iki ferzāneye kim eyledi çāk
b. Biri ṣaḥrā yaḳasın birisi kühsār etegin
4.a. Nice bir ṭolaşur aḳ boynuña zülfüñ nice bir
b. Yaḳaña dikmedi yā zülf·i siyeh-gār etegin
5.a. Yine gülşende meyüñ ʿaybını setr itmek içün
b. Nola rindāne ṭutarsam yine gül-zār etegin
6.a. Beni öldürme ki Ferhāda felek ḳıyduġına
b. Dögünür ṭolduruban ṭaş ile ṭaġlar etegin
7.a. İşidürüz ki er erden biter ey tāze nihāl
b. Ṭutayın ben de varub ʿāşıḳ olanlar etegin
8.a. Bu Necātī naẓara gelmedi göz yaşı gibi
b. Yire geçdi ṭutalı çeşm·i güher-bār etegin

|p411
fāʿilātün fāʿilātün fāʿilātün fāʿilün
1.a. Ṣoḥbeti germ eylesün gün yüzlü cānān oynasun
b. Mest olan göñüllüler göñül degül cān oynasun
2.a. Hem gelür servüñ elinden hem uṣūline düşer
b. Aya çalsun nāreven serv·i ẖırāmān oynasun
3.a. Ben seni ġayr ile görüb oynamaḳdansa yürek
b. Ey kemān-ebrū güzel yürekde peykān oynasun
4.a. Aġlamaġ ile eger sen servi itmezsem kinār
b. Ṣu yerine dīde·i ẖūn-bārdan ḳan oynasun
5.a. Tāb·ı meyden ʿaks·i ḥüsn·i yār yaḳdı meclisi
b. Sāḳiyā şimdengirü şemʿ·i şebistān oynasun
6.a. Şeh-süvārā ʿādet oldur ẖāk ile oynar yetīm
b. Yollar üzre oynasun ḳo eşk·i ġalṭān oynasun
7.a. İşe güce yaramaz olmışdürür miskīn göñül
b. Vir Necātī anı şimdengirü oġlan oynasun

|p412
feʿilātün feʿilātün feʿilātün feʿilün
1.a. Ḳo göñül būseñe cān ile ẖarīdār olsun
b. Biˀllāh ey ġonca-dehen yoḳ dime bāzār olsun
2.a. Zülfüñ āşüfteleri ḥāline raḥm eylemeyen
b. Göreyin bencileyin derde giriftār olsun
3.a. Būse peymānesinüñ cürʿa·i cān-baẖşından
b. Hele ol piste-dehen yoḳ dimedi var olsun
4.a. Kimse beglerde vefā görmedi dünyā ṭuralı
b. Kim diye sen meh·i bī-mihre vefā-dār olsun
5.a. Öpmege ḳocmaġa yir yoḳ dir iseñ ey yüzi gül
b. Ḳo Necātī ḳuluñı ʿāşıḳ·ı dīdār olsun

|p413
fāʿilātün fāʿilātün fāʿilün
1.a. Ḳıbledür ʿuşşāḳa ol vech·i ḥasen
b. Kaʿbedür her ḳanda göründüñse sen
2.a. Ḳapısar īmān ile Ḳurˀān ile
b. Ḫadd ü ẖaṭṭuñ ḥasretinden cān viren
3.a. Ten gerekmez tīġ·i ġam mecrūḥına
b. Kim şehīd·i ʿışḳa yaraşmaz kefen
4.a. Hey dimezseñ yol baṣar başlar keser
b. Ṭurra·i ṭarrār ü zülf·i pür-şiken
5.a. Aġzın açub ṭaña ḳalur ġoncalar
b. Leblerüñ gülşende vaṣf itdükce ben
6.a. Ḫasta göñüller deminden oldı ṣaġ
b. Göreyin bād·ı ṣabā olsun esen
7.a. Ey Necātī işüñ altun eyledi
b. Kīmyā·yi ʿışḳ ile ol sīm-ten

|p414
mefāʿīlün mefāʿīlün mefāʿīlün mefāʿīlün
1.a. Ḳoġıl ey bāġ-bān būy·i vefā gülden ıraġ olsun
b. Hezārān bülbül ölürse ḳayurmaz kendü ṣaġ olsun
2.a. Yaşum ʿummānın āl ile ḳızıl ḳanlara boyaduñ
b. Yaraduñ göñlüme vallāhi ey ġam yüzüñ aġ olsun
3.a. ʿIvaẓ bir būseye cān almaġ ise alduñ ey dil-ber
b. Bizümle ẖançer·i ġamzeñ yiter ḳılıc bıçaġ olsun
4.a. Şu kim dil-dār eşigine ḳulaġuz oldı dünyāda
b. Dilegüm bu ki ʿuḳbāda aña cennet duraġ olsun
5.a. Necātī mest·i ʿışḳam ben benüm ʿaḳl ile işüm yoḳ
b. Bir iki kez aña didüm hele benden araġ olsun

|p415
feʿilātün feʿilātün feʿilātün feʿilün
1.a. Gerçi gül-zār·ı cihānda gül olur ẖāra yaḳın
b. Ḥaḳ ıraġ eylesün andan ki ̮ola aġyāra yaḳın
2.a. Lebüñ umar varıcaḳ zülfüñe göñlüm gerçi
b. Kişi cāndan keser ümmīd olıcaḳ dāra yaḳın
3.a. Şükr idüb yirlere sürer yüzini sāye gibi
b. Āfitāb oldıġına ḥüsn ile dil-dāra yaḳın
4.a. Ḳati çoḳ başludürür zülfine dolaşma göñül
b. Saña bir bend geçer olma o ṭarrāra yaḳın
5.a. Üzülür gül açılur ġonca gülistāndan eger
b. Bu ẖad ü ẖande ile yār ola gül-zāra yaḳın
6.a. Diledüm būse lebinden didi pes cānuñ idi
b. hele bir şīvedürür bu daẖi iḳrāra yaḳın
7.a. Lebi şevḳi iledür zülfe Necātī göñlin
b. Belī tiryāk olıcaḳ varsa olur māra yaḳın

|p416
mefʿūlü fāʿilātü mefāʿīlü fāʿilün
1.a. Göñlümi sensüz egleyemez serv ile semen
b. Serv ü semen gelür baña tābūt ile kefen
2.a. Sen sīm-ten nigār ile terlik dekeşdürür
b. Bir pīrehenle sebzeye çıḳdıḳca yāsemen
3.a. Ey māh·ı ḥüsn mihr·i felek bezmüñe gelüb
b. Ger şemʿ gibi ḳarşuña yanmazsa uşda ben
4.a. Ṣalma ṣaçuñı çünki vefāsuzdur ol ẕeḳan
b. Bī-āb olınca çāh ne lāzım aña resen
5.a. Cān virme çeşm·i dil-bere dirsüz Necātīye
b. Hey noldı şöyle dirsiñiz ölsün mi yā seven

|p417
fāʿilātün fāʿilātün fāʿilātün fāʿilün
1.a. Göñlümi ḳo ʿışḳuñ ile mübtelā olsun dirin
b. ʿĀḳıbet bir şāha ḳul olur saña olsun dirin
2.a. Hey vefā ḳıl didügüm yavuz ṣanur ṣanma beni
b. Āh ü zārī olmasun medẖ ü s̲enā olsun dirin
3.a. Cümle ʿālem bir yaña ̮idi ʿışḳ ile ben bir yaña
b. Yā İlāhī şimdi ʿālem bir yaña olsun dirin
4.a. Zülfüñ ucından yine göñlümi çaldum yirlere
b. Ḳaḳıduġumdan ne saña ne baña olsun dirin
5.a. Zülfüñe müşgi müşābihdür dise bād·ı ṣabā
b. Ne sen ol ʿālemde ne müşg·i Ḫıṭā olsun dirin
6.a. Nemden incinür benüm şol yār·ı düşman-dōstum
b. Her nice olsun dir ise ẖōş ola olsun dirin
7.a. Kime kīnüñ var ki zülfe böyle yüz virdüñ didüm
b. Didi genc·i ḥüsnüm içre ejdehā olsun dirin
8.a. Ey Necātī ister imiş yıḳılanı yıḳılan
b. Anuñ içün hep güzeller bī-vefā olsun dirin

|p418
fāʿilātün fāʿilātün fāʿilātün fāʿilün
1.a. Gül yüzünde sünbül·i ʿanber-feşānı bilmeyen
b. Oldur ol cennetde ʿömr·i cāvidānı bilmeyen
2.a. Bilmedi ḥüsn āfitābından hilāl olduġumı
b. Yir yüzinde āsumāndan rīsmānı bilmeyen
3.a. Bilmedügi şīve yoḳdur hep bilür bilmezlenür
b. Baña ṣorsun baña ol şūẖ·ı cihānı bilmeyen
4.a. Ḫālini miskīn ṣanursız fitnede bir dānedür
b. Ṣaçları dām·ı belādur bilmez anı bilmeyen
5.a. Cān virür ʿĪsī ṣuyı diyu leb·i ẖandānuña
b. ʿÖmri içinde şarāb·ı erġavānı bilmeyen
6.a. Naġmesinde bülbülüñ fehm·i maʿāni idemez
b. Gül yüzüñ vaṣfında bu ḥüsn·i beyānı bilmeyen
7.a. Ey Necātī ẖaṭṭ u ẖāl·i ḥüsne eylesün naẓar
b. Güzel olub fitne·i āẖır zemānı bilmeyen

|p419
mefāʿīlün mefāʿīlün feʿūlün
1.a. Göricek yāruñ elde oḳ u yasın
b. Benüm çün ẖāce başla oḳu Yā-Sīn
2.a. Ḳıya baḳdı baña şol çeşm·i cādū
b. Bu gün bildüm ḳulına o ḳıyasın
3.a. Kebāb oldı ciger bu ḥasret ile
b. Ki beni bezm·i ẖāṣṣa oḳuyasın
4.a. Bu gün ʿuşşāḳı zāhid ḳo ki yarın
b. Bilesin sen ḥisābuñ oḳuyasın
5.a. Eger ben Āyetüˀl-Kürsī olursam
b. Ne mümkindür beni sen oḳuyasın
6.a. Ümīd·i vaṣl umarken dil-rübādan
b. Raḳīb ile görürseñ oḳıyasın
7.a. Ne yirde var ise ʿuşşāḳ·ı ġam-gīn
b. Necātīnüñ idelüm o ḳıyāsın

|p420
fāʿilātün fāʿilātün fāʿilātün fāʿilün
1.a. Leblerüñ öpdükce sāġar acısın cān acısın
b. Kimseler görmiş degül bunuñ gibi acısın
2.a. Ḥaḳ Teʿālā acısın göstermesün cānānenüñ
b. Ben öleyin işiginde baña cānān acısın
3.a. Acı diller virdi baña işidenler didi kim
b. Biz bu deñlü görmedük gül-berg·i ẖandān acısın
4.a. Ben ṣaçından çekdügüm ben ruẖlarından gördügüm
b. Şerḥ ideyin kāfir aġlasun müselmān acısın
5.a. İremedüm serv·i ḳaddine döküb ṣaçmaġ ile
b. Yaşumuñ gevherlerine baḥr·i ʿUmmān acısın
6.a. Dün eṭibbādan işitdüm ṣabr imiş dermān·ı ʿışḳ
b. Ḳoñ öleyin görmeyeyin bārī dermān acısın
7.a. Ādem olmazmış Necātī kişi gögçek ṭon ile
b. Rengi ẖūb olmaḳ gidermezmiş zaʿafrān acısın

|p421
feʿilātün feʿilātün feʿilātün feʿilün
1.a. Lāle yaḳdı cigerini gül·i ẖandānuñ içün
b. Servler kesdi ḳolın ḳadd·i ẖırāmānuñ içün
2.a. Ṣovuḳ el degdi ṣabādan diyu çoḳ söz didiler
b. Ṣaḥn·ı gülşende bu gün zülf·i perīşānuñ içün
3.a. Didüm öldürdi beni ġamze ẖōş itmiş didi dōst
b. Dōstum böyle dime ġamze·i fettānuñ içün
4.a. Ḳarañudur şeb·i hicrān yolı yañıldı ġarīb
b. Raḥm it ey necm·i hidāyet meh·i tābānuñ içün
5.a. Nefesüñden biraz ey bād·ı ṣabā canlanduḳ
b. Şeb·i ġam ẖastelerini aña dur cānuñ içün
6.a. Ehl·i taḥḳīḳ ruẖuñ dīnine īmān getürür
b. Küfr·i zülf aña ẖalel virmesün īmānuñ içün
7.a. Ey Necātī gözüñ aç al ayaġı ṭopraġını
b. Tūtyā ister iseñ dīde·i giryānuñ içün

|p422
feʿilātün feʿilātün feʿilātün feʿilün
1.a. Nice çeksün kişi her-cāyīlerüñ yarelerin
b. Ben bu ġayretler ile kendüzümi pārelerin
2.a. Ey Mesīḥā dehenüñ ġayb şifā-ẖānesidür
b. Gel dirīġ eyleme bī-çārelerüñ çārelerin
3.a. Ḫaṭuña ̮öykündügi ̮içün ʿanber·i ter ḥaşre degin
b. Yuyımaz yedi deñizler yüzinüñ ḳarelerin
4.a. Ten ile baş ḳılur ẖançerüñ üstine ṣavaş
b. Ben ḳılıcuñla ṭurub ikisini araların
5.a. Vaṣl ile baġrı bütün göñli ẖōş olan ne bilür
b. Tīġ·i ḥasretler ile bende yürek yarelerin
6.a. Ey Necātī leb·i cān-baẖş·ı ṣanem dirisiyüz
b. Gözedür cürʿa·i ġamdan hele āvārelerin

|p423
mefāʿilün feʿilātün mefāʿilün feʿilün
1.a. Neşāṭ u ʿişreti ne ̮eyler ġamuñla hem-dem olan
b. Ḳapuñda cennetüñ adın añar mı ādem olan
2.a. Ḥaḳīḳaten yine bir demdürür ziyāde degül
b. Saʿādeti şu cemīʿ·i zemānda her dem olan
3.a. ʿAceb zemāneye ḳalduḳ geliñüz aġlaşalum
b. Ẕelīldür hüner ü faẓl ile mükerrem olan
4.a. Yeñilenür elemi yatmaz eski ġuṣṣa ile
b. Düşinde bir gice nā-gāh şād ü ẖurrem olan
5.a. Benüm ḳatumda ölüm şerbetidür Āb·ı Ḥayāt
b. Ki bir dem öñce gidendür hemīşe bī-ġam olan
6.a. Didüm hezāra ki biñ söyleyen ölür dirler
b. Didi ne şübhe yiger ġonca gibi epsem olan
7.a. Ecel gelüb sefere nevbetüñdürür diyicek
b. Necātīyā ḳara yayadürür müsellem olan

|p424
feʿilātün feʿilātün feʿilātün feʿilün
1.a. Nice bir ẖān dökeyin bu dil·i biryānumdan
b. Nice bir besleyeyin ġamzelerüñ yanumdan
2.a. Nice bir ġayr ile sen būseye bāzār ṭutub
b. Beni bī-zer diyu bīzār idesin cānumdan
3.a. Bulsa dünyāyı ṭabīb olan iderdi bīmār
b. Dil-berüñ derdi mi var böyle ya dermānumdan
4.a. Kesse mıḳrāẓ·ı ġamuñ başumı ger şemʿ gibi
b. Yine bir baş çıḳa şevḳ ile giribānumdan
5.a. Pistenüñ aġzını ṣoḥbetde bıçaḳlar açamaz
b. Bir söz açılsa benüm ġonca·i ẖandānumdan
6.a. Fürḳatüm dōstlara bitiyecek nesne degül
b. Ḫaberüm alduñ ola nāle vü efġānumdan
7.a. Sen gül·i cennet iseñ ben de cinān bülbüliyem
b. El çek ey serv·i ẖırāmān bir avuc ḳanumdan
8.a. Yatacaḳ yir ḳomaduñ sen saña dīvāne göñül
b. Ki ̮uyumaz ẖalḳ·ı cihān giceler efġānumdan
9.a. Yirüm idinmiş iken sürdi giderdi ḳapudan
b. Bunu ummazdı Necātī ḳulı sulṭānumdan
10.a. Benüm eşʿārdur iden yirümi ṣaff·ı niʿāl
b. Oḳuyan maẖlāṣumı añlaya dīvānumdan

|p425
fāʿilātün fāʿilātün fāʿilātün fāʿilün
1.a. Yāra diñ bī-çāreler ḥaḳḳında tedbīr eylesün
b. Baş açuḳ abdālıyuz tedbīr·i zencīr eylesün
2.a. Mey-kede defʿī ḳapanmasun ölür maẖmūrlar
b. Ḫayra girsün muḥtesib şerr işi teˀẖīr eylesün
3.a. Cennet·i kūyuña ḳoymazsañ bu ṣūretle beni
b. Dōstum gelsün ecel bu vaẓʿı taġyīr eylesün
4.a. Dün gice düşümde gördüm aġlar idüm derd ile
b. Yūsuf·ı Mıṣr·ı melāḥat anı taʿbīr eylesün
5.a. İrmek isterse ḳad·i dil-dāra şimşād·ı çemen
b. Berk baṣsun ayaġın serv ile el bir eylesün
6.a. Zülfi sevdāsında ser-gerdān olan dīvāneler
b. Uyumasun ṣubḥ olınca āh·ı şeb-gīr eylesün
7.a. Cām·ı ʿışḳ ile beni sen pīr iken itdüñ cüvān
b. Ḥaḳ Teʿālā sen cüvānı göreyin pīr eylesün
8.a. Kişi mescidde Necātī oṭurub durmaḳ ḳolay
b. Devleti olan göñülde kendüye yir eylesün

|p426
fāʿilātün fāʿilātün fāʿilātün fāʿilün
1.a. Yā Rab ol düşman baḳışlu yāra ne ̮itdüm neyleyin
b. Sevdügümden ġayrı ol dil-dāra ne ̮itdüm neyleyin
2.a. Ben gedā bir kimsenüñ yatur itin ḳaldurmadum
b. Yār işiginde olan aġyāra ne ̮itdüm neyleyin
3.a. Gūşe·i mey-ẖānede geh mest olurdum geh ẖumār
b. Böylelikden zāhid·i hüş-yāra ne ̮itdüm neyleyin
4.a. Gül yüzine baḳmadum şimşāduñ adın añmadum
b. Ol şeker-güftār ü ḥōş-reftāra ne ̮itdüm neyleyin
5.a. Altına aldı ġam ü derd üstüme dönmez felek
b. Rūzīgār·ı ẓālim ü ġaddāra ne ̮itdüm neyleyin
6.a. Ḳāmet ü zülfe giriftār oldılarsa cān ü dil
b. İtdilerdi buldılar bī-çāre ne ̮itdüm neyleyin
7.a. Ādem olmaz ādeme yaḳışmaz ādemden ḳaçar
b. Ben Necātī ol perī-ruẖsāra ne ̮itdüm neyleyin

|p427
mefʿūlü fāʿilātü mefāʿīlü fāʿilün
1.a. Yārānı ṣōfī ṣavmaʿaya daʿvet itmesün
b. Rıṭl·ı girān elde iken ẖıffet itmesün
2.a. Ġamzeñ bitürdi işümi şimdengirü beni
b. Ḳurtarmaġa belādan ecel minnet itmesün
3.a. Naṣṣ ile vācib oldı meyüñ ḥörmeti bize
b. Zāhidlerüñ elinde ise ḥörmet itmesün
4.a. Naḳḳāş·ı Çīn ki ṣūret·i dil-keş yazar geçer
b. Göñlini saña virüb anı ṣūret itmesün
5.a. Sürdi çıḳardı cennet·i kūyından ol mehüñ
b. Ādem raḳīb·i dīve nice lāʿnet itmesün
6.a. Ḳonduḳ çü zülfi gölgeliginde o meh-ruẖuñ
b. Diñ kārvān·ı ʿömre iñen sürʿat itmesün
7.a. Dil-ber yüzine gül dir imiş ʿandelīb·i bāġ
b. Yüz virmesün iñende güle nisbet itmesün
8.a. Cām·ı cihān-nümā ile Cemşīd·i vaḳt ider
b. Pīr·i muġāna kişi nice ẖıdmet itmesün
9.a. Ḳabrümde bilece dirilüb mūnis olmaġa
b. Derd ü ġamuñla ölmez isem zaḥmet itmesün
10.a. Ṣayrudürür Necātī didiler öget görün
b. Dil-ber yolında ölmek içün ʿillet itmesün

|p428
fāʿilātün fāʿilātün fāʿilātün fāʿilün
1.a. Yār işigidür gedāya menzil ü meˀvā bu gün
b. Yār ile ṭursun ṭurursa dōstlar dünyā bu gün
2.a. Ṣōfī yarın ilte mi alub elümi cennete
b. Çoḳ gören cānāneler işigini baña bu gün
3.a. Nev-bahār ile behişt·i cāvidān oldı cihān
b. Ey ʿaceb ne ̮içün ḥalāl olmaz mey ü ṣahbā bu gün
4.a. Başlamışdur gün gibi ḥüsnüñ cihān-gīr olmaġa
b. Hep senüñdür ʿālem içinde olan ġavġā bugün
5.a. Hecrüñ ile yir yüzinde aġladum şol deñlü kim
b. İki gözümçün ṭoḳuz oldı yedi deryā bu gün
6.a. Sen melek-sīmāya cānlar virdügüm ʿayb itme kim
b. Yirde buldı gökde isterken seni ʿĪsā bu gün
7.a. Ey Necātī ẖançer·i ẖūn-rīz·i yāra teşneyüz
b. Ṣudan artuḳ nesne çekmez göñlümüz ḳaṭʿā bu gün

|p429
feʿilātün feʿilātün feʿilātün feʿilün
1.a. Yüri ferzāne iseñ cānib·i cānāna degin
b. Nola pervāne iseñ şemʿ·i şebistāna degin
2.a. Yüri sen and içe gör biz mey·i nāb ey ṣōfī
b. Saña peymānı ḳomışlar bize peymānedekin
3.a. Yanarın ḥasret·i şevḳ·i ruẖuñ ile yanarın
b. Cān atub gitmez isem ṣaḥn·ı gülistāna degin
4.a. Elüme girmez ise dürr·i şeb-efrūz·i viṣāl
b. Hele seyl-āb ideyin yaşumı ʿummāna degin
5.a. Yine cellād·ı müjeñ sīne·i ẖākīde gelüb
b. Ḳılıcın gömmez idi itmese biñ ḳana degin
6.a. Dildeki rāzı Necātī ile fāş eylemedi
b. Geçmeyince güzelüm ġamzeñ oḳı cāna degin

|p430
feʿilātün feʿilātün feʿilātün feʿilün
1.a. Yine ferzāne göñül ʿışḳ ile bī-hūş olsun
b. Yine dīvānelere cām·ı belā nūş olsun
2.a. Çekeyin sīnemüñ üstine elifler tā kim
b. Giceler ḳadd·i ẖayāline der-āġūş olsun
3.a. Ey muṣavvir eger ol yārı iderseñ taṣvīr
b. Serv-ḳad ġonca dehen sīm-benāgūş olsun
4.a. Sen güzelden beni menʿ itme zihī ẓulm·i ṣarīḥ
b. Devr·i gülde diyeler bülbüle ẖāmūş olsun
5.a. İtüñem sürme ḳapuñdan didüm ol yār didi
b. İtüm olmaġı saña göstereyin oş olsun
6.a. Ehl·i dilden çü cihān boş olısardur yarın
b. Benden ol pīre-zen·i dehr bu gün boş olsun
7.a. Bir ayaḳ ṣun berü ey sāḳī elüñden içelüm
b. Bir nefes ġuṣṣa·i encām ferāmūş olsun
8.a. Ey Necātīye saʿādet güneşi çeşm·i ümīd
b. Pertev·i mihr·i ruẖuñdan nice bir yoş olsun

|p431
fāʿilātün fāʿilātün fāʿilātün fāʿilün
1.a. Yara ne ̮eyler ʿārıẓuñda ey boyı serv·i revān
b. Bir elifdür ol ʿıẕāruñ ortasında bī-gümān
2.a. Yara yoḳdur ʿārıẓuñda ol daẖi bir ġamzedür
b. Cāna oḳ urmaġ içün siḥr ile ey ebrū-kemān
3.a. Yara ṣanmañ ʿārıẓuñ nāzüglügidür şīvedir
b. Cennete yol kesmek ister bir yañaġı gül-sitān
4.a. Yoḳsa ẖaṭ yazmaġ içün mecmūʿasına ḥüsnüñüñ
b. Yir ider mısṭar gibi ol ṭurra·i ʿanber-feşān
5.a. Yā meger kim leşker·i Fürʿavnı iderler helāk
b. Nīl şaḳḳ olmışdürür Mūsā elinde bī-gümān
6.a. Sūre·i Neml ortasında medd·i bismillāhdur
b. Ḫaṭṭ·ı ẖaddüñde çekilmiş ol nişān·ı dil-sitān
7.a. Ṣafḥa·i Keşşāfdur gūyā ẖaṭ·ı ruẖsār·ı dōst
b. Kim çekilmiş sürẖ ile āyātına medd·i beyān
8.a. Tāb·ı meh-tāb üstine pertāb olmışdur şihāb
b. Sūsen·i ʿĪsādürür ẖōrşīde virmiş āsumān
9.a. Defter·i ḥüsnüñi tezyīn itmege ẖaṭ çekdiler
b. Yā ẖaṭuñ yañlış diyu dırnaḳla itdiler nişān
10.a. Ben bilürdüm bu tegel aẖır dikilür yüzüñe
b. Şol nefes kim yaḳalar çāk itdüñ ey ġonca-dehān
11.a. Yara ne ̮eyler ʿārıẓuñda ḥāşe liˀllāh dōstum
b. Kendü kendinden Necātī ṭabʿın eyler imtiḥān

|p432
fāʿilātün fāʿilātün fāʿilātün fāʿilün
1.a. Ḥācet ehlin hep felekler ḳapuña ṣalar bu gün
b. Āsitānuñda biter cümle temennālar bu gün
2.a. Ḥüsn·i āyīnüñledür şimdi niẓām·ı memleket
b. Ḫışm·ı bī-kīnüñledür teskīn·i ġavġālar bu gün
3.a. Şöyle kendüñ ẓulm elini kim teṭāvül diyenüñ
b. Baġlamışdur yolların zülf·i semen-sālar bu gün
4.a. Ey kelāmuñ vaḥy·i münzel gibi nāʿī ṣaġ u ṣol
b. Hīç çıḳmazlar sözüñden iki pāşālar bu gün
5.a. Āsitānuñ ben ġarībi baġrına baṣsa nola
b. İşigüñden barınur aʿlā vü ednālar bu gün
6.a. Ḳaṭrece himmet Necātī bendeden menʿ itme kim
b. Luṭf·ı ṭabʿuñdan ẖacildür yedi deryālar iltifāt
b. Ṭabʿ·ı rūşen gün gibi dünyāyı ārālar bu gün

|p433
fāʿilātün fāʿilātün fāʿilātün fāʿilün
1.a. Bir yüzi gül ġonca-leb dil-dār dirseñ işte sen
b. Sen güle bülbül gibi kim zār dirseñ işte ben
2.a. zülfi ʿanber boyı ʿarʿar serv-ḳadd ü lāle-ẖad
b. Bir semen·ber ġonca-leb dil-dār dirseñ işte sen
3.a. Miḥnet ü derd ü ġam·ı ʿışḳuñla olmış ẖaste-dil
b. Bir belā-keş ʿāşıḳ·ı dīdār dirseñ işte ben
4.a. Hecr ile cān ü göñül mülkini yaġmālar ḳılur
b. Bir ḳaşı yā gözleri mekkār dirseñ işte sen
5.a. her zemānda dir Necātī hay ʿömrüm ḥāṣılı
b. Zülfümüñ dārına kim ber·dār dirseñ işte ben

|p434
mefāʿīlün mefāʿīlün mefāʿīlün mefāʿīlün
1.a. Şehā ġamzeñ ẖadenginden ciger ḳan olmasun nolsun
b. Ḳaşuñuñ yayına cānum yā ḳurbān olmasun nolsun
2.a. Nigārā nār·ı hicrānuñ kebāb itdi dil ü cānı
b. Ġamından şerḥa·i sīnem yā biryān olmasun nolsun
3.a. Çü meydānında ʿışḳuñuñ ḳomışam ortaya başum
b. Anı ṭop itmege zülfüñ yā çevgān olmasun nolsun
4.a. Ḳaçan şehlā gözüñ cānā ḳıya baḳduḳca ẖışm ile
b. Bu ġam-gīn gözüm ey dil-ber yā giryān olmasun nolsun
5.a. Müselsel zülfüñ ucundan Necātī dil-esīr oldı
b. Aña çāh·ı zenaẖdānuñ yā zındān olmasun nolsun

|p435
fāʿilātün fāʿilātün fāʿilātün fāʿilün
1.a. Tā görelden iki şehlā gözlerinüñ ḳarasın
b. Ḳıble·i miḥrāb idindüm ḳaşlarınuñ arasın
2.a. Zülfi sevdāsına mı düşdüñ yilersin her seḥer
b. Ey ṣabā bencileyin sen de ʿaceb āvāresin
3.a. Sen raḳīb ile beni meydāna çekseñ ey ṣanem
b. Ḳulaġınca ider idüm ol itüñ her pāresin
4.a. Pāre pāre rīze rīze vaṣla vaṣla baġrumı
b. Tīġ·ī ġamzeñle nice bir şerḥa şerḥa yarasın
5.a. Ey Necātī kendü luṭfından ki dil-ber gelmeye
b. Vay aña kim evlerine varasın yalvarasın

|p436
fāʿilātün fāʿilātün fāʿilātün fāʿilün
1.a. Ḳıldı ben bī-ṭāliʿi devrān cüdā sen şāhdan
b. Umar iken vaṣluñı şām ü seḥer Allāhdan
2.a. Ṣubḥ-dem her şeb sitārem aġlasam ʿayb itmeñüz
b. Ẕerrece yoḳ ṭāliʿüm mihrinde çün ol māhdan
3.a. Ol ṭabīb·i cān ü dil terk itdi ben dil-ẖasteyi
b. Baña dermān eyleñüz yandum yaḳıldum āhdan
4.a. Āsitān·ı devletüñde bir zemān sulṭān idüm
b. Ben gedāya ẓulm idüb sürdiler ol der-gāhdan
5.a. Sen şehi sevmek Necātī bendeye düşmezdi līk
b. Pādişāhum ʿışḳ farḳ itmez gedāyi şāhdan

|PVāv|p437
fāʿilātün fāʿilātün fāʿilün
1.a. Ey benüm gün yüzlü māhum gel berü
b. Göklere çıḳmasun āhum gel berü
2.a. Ḳıble ḥaḳḳı Kaʿbe yüzüñdür murād
b. Ey ḳapusı secde-ġāhum gel berü
3.a. Ay ü günden alnuñ açuḳ yüzüñ aġ
b. Hey benüm zülfi siyāhum gel berü
4.a. Sensüzin dünyāya baḳmak ṣuç imiş
b. Gel berü bildüm günāhum gel berü
5.a. Olmasun yazuḳ Necātī ḳuluña
b. Ḳıl teraḥḥum pādişāhum gel berü

|p438
mefāʿīlün mefāʿīlün feʿūlün
1.a. Gözüm aġlar o sīm-endāma ḳarşu
b. Yetīm oġlan gibi bayrama ḳarşu
2.a. Yaḳamı yırtarın açma yaḳañı
b. Ḳızıl gül gibi ben bed-nāma ḳarşu
3.a. Göñül kāküllerüñden oldı ġam-gīn
b. Ġarīb ādem gibi aẖşama ḳarşu
4.a. Beni sen ḳıṣṣa-ẖān itdüñ diyu dil
b. İder dil-dār ile hengāme ḳarşu
5.a. Raḳīb ile idersin ṣoḥbet·i ẖāṣ
b. Necātīyi sürersin ʿāma ḳarşu

|p439
mefāʿīlün mefāʿīlün mefāʿīlün mefāʿīlün
1.a. Lebüñ ʿaksi ile yaşum görenler dir ki ḳandur bu
b. Yā ẖōd cām·ı maḥabbetde şarāb·ı erġavāndur bu
2.a. Nola öldüñ ise dil-ber ḳayırmaz bildügüñ itme
b. Benüm cānum benüm ʿömrüm cihāndur bu cihāndur bu
3.a. Getürdiler ṭabībi kim bile derdüm ḳıla dermān
b. El urub nabẓuma didi ġam·ı ʿışḳ·ı fülāndur bu
4.a. ʿAbīr·i Kaʿbe·i kūyın baña ʿıṭrı kefen eyleñ
b. Kim anda ḥūr·ı Rıḍvāna be-ġāyet armaġandur bu
5.a. Didüm cennetde olmaz şeb nedür zülf ü ruẖuñ ya Rab
b. Didi miskīn cinān bāġında ʿömr·i cāvidāndur bu
6.a. Necātī dōstdan cānın dirīġ eyler dimiş düşman
b. Yolında öldügüm vaˀllāhi biˀllāhi yalandur bu
7.a. Egerçi kim bu üslūba dimişdür bir ġazel Saʿdī
b. Ḫayāl·i rūy·i yār ile bir özge gül-sitāndur bu

|p440
feʿilātün feʿilātün feʿilātün feʿilün
1.a. Dimiş idüñ ṣaçuña sünbül·i ẖōş-būdur bu
b. Dōstlar uşda benüm istedügüm budur bu
2.a. Umaram düşde görem yüzini ey Yūsuf·ı ʿahd
b. Ḳulları şāh·ı cihān gösterür uyẖudur bu
3.a. Ey göñül dehr ʿarūsın ṭutamazsın ivme
b. Ġāfil olma ki perī şivelü āhūdur bu
4.a. Būse·i laʿl·i lebüñle geçinür cān ammā
b. Göñlümi ṣorar iseñ ʿāşıḳ·ı pehlūdur bu
5.a. Be Necātī bu ġazel şiʿr degüldür yā nedür
b. Serv-ḳadler ḳademinde bir aḳar ṣudur bu

|p441
mefāʿīlün mefāʿīlün feʿūlün
1.a. Naẓar ḳıldı baña ol çeşm ü ebrū
b. Enīs oldı yine Mecnūna āhū
2.a. Ümīd·i vaṣluñ ile yandı sīnem
b. Ṭamaʿ olmasa olmaz idi ṭamu
3.a. Ne müşg olur ḳara zülfüñ ki hergiz
b. Bulunmaz nāfe·i āhūda bu bū
4.a. Ruẖuñda ẖāl·i fettānuñ görelden
b. Bilindi bu ki batmaz ṣuya cādū
5.a. Gözüñden şöyle bīmār oldı nergis
b. Ki ebr aġzına penbe ̮ile ṣıḳar ṣu
6.a. Raḳībe ṣadr gösterdüñ ḳapuñda
b. Ne gün geldi ki ite dirüz ulu
7.a. Nice ẖūnīdürür ġamzeñ ki her dem
b. Naẓar ḳılduḳca düşer cāna ḳorḳu
8.a. İşigüñden beni sürerken aġyār
b. Ḥaremden bir ḥamāme didi ḳu ḳu
9.a. Necātī ġamzesinden iste ḳaşın
b. Bulunmaz egri ṭutulmazsa ṭoġru

|p443
feʿilātün feʿilātün feʿilātün feʿilün
1.a. Nice kākül nice mū sünbül·i gül-būdur bu
b. Dil·i ʿuşşāḳı perīşān idici budur bu
2.a. Ne göñül ḳodı ne göz ẖāl·i ruẖ u ʿārıẓ·ı dōst
b. Oda yanmaz ṣuya batmaz nice cādūdur bu
3.a. Umarın ḥaşrda cān oynaduġumdan ṭuyalar
b. Māh-rūlar diyeler bir birine odur bu
4.a. yüri yıllarla yilerseñ yetemezsin ey dil
b. Şol cihetden ki perī şivelü āhūdur bu
5.a. Tenüme ayru irer cānuma ayru sitemüñ
b. Tīġ·i ẖūn-rīz·i cefā-pīşeden ayrudur bu
6.a. Gözümüñ penceresin yapmaġa ḥükm eyledi şerʿ
b. Ki nigāruñ ḥarem·i ḥüsnine ḳarşudur bu
7.a. Yine siḥr itdi Necātī nice söz nice ġazel
b. Leb·i dil-ber ṣıfatında bir içim ṣudur bu

|PHāˀ|p444
mefʿūlü mefāʿīlü mefāʿīlü feʿūlün
1.a. Āhum feleke irdi yaşum taḥt·ı s̲erāya
b. Yirden göke dek ḥayf olubdur bu gedāya
2.a. Ten derdi gibi olmaz imiş derd·i dil ü cān
b. Eyyūb daẖi döymeye ben deñlü belāya
3.a. Ḥall olmaz imiş medresede müşkili ʿışḳuñ
b. Maʿlūmdürür mesˀele ġālib ʿulemāya
4.a. Bir gölge ḥarāmīsidürür ẖāl ü ẖaṭuñ kim
b. Ṭurmaz çıḳarur ḥüsn metāʿını behāya
5.a. Vaṣf eyleyimez ḥüsnüñi yıllarla Necātī
b. Āsāndur egerçi güzel ögmek şuʿarāya

|p445
mefʿūlü fāʿilātü mefāʿīlü fāʿilün
1.a. İkide bir cefā elin uzatma bu dile
b. Kim ṭıfl olan eyü degül oynamaġ od ile
2.a. Ey māh-çehre yılduzı düşdi feleklerüñ
b. Āhum şirārı göklere çıḳalı dūd ile
3.a. Ġam mā-cerāsını disün iki gözüm yaşı
b. Dil-dāra ʿarẓ-nāme yazılsun dürūd ile
4.a. Ḫarc eyleme ki ḥabbeye degmez gözüm yaşı
b. Şimdi güzeller avlanur oldı nüḳūd ile
5.a. Rāzuñ nihān ola mı Necātī ki sözlerüñ
b. Meclisler içre oḳunur uş çeng ü ʿūd ile

|p446
mefʿūlün mefāʿīlün feʿūlün
1.a. Olur cānum saña her laḥẓa bende
b. Yaluñuz cān degüldür bile ben de
2.a. Fedādur ey şeh·i ʿālem yoluña
b. Dil ü cānum daẖi ne varsa bende
3.a. Çeker ʿışḳuñla cānum derd ü miḥnet
b. Velī yoḳdur teraḥḥum hīç sende
4.a. Lebüñden utanur laʿl·i Bedaẖşān
b. Ṣaçuñ eyler ẖacil müşgi Ḫutende
5.a. Eger vaṣlına irmek diler iseñ
b. Necātī yār içün baş oyna sen de

|p447
mefʿūlü mefāʿīlü mefāʿīlü feʿūlün
1.a. Ey gül iñen açılma gel aġyār arasında
b. Dāmānuñı ṣaḳla yürüme ẖār arasında
2.a. Laʿlüñle dehānuñ görinür söyledügüñce
b. Bir ġonca iki dāne·i gül-nār arasında
3.a. Dil almaġa puṣuda durur leşkere beñzer
b. Ḫaṭṭ·ı siyehüñ zülf ile ruẖsār arasında
4.a. Laʿlüñe nice beñzedeyin şol güheri kim
b. İpin sürüyüb yürüye bāzār arasında
5.a. Fürḳat gözümüñ acı yaşın ırmaġ idübdür
b. Ṣu sızmaz iken benüm ile yār arasında
6.a. Bir yaña cihān bir yaña cānāne Necātī
b. Ḳaldum nideyin iki sitem-gār arasında

|p448
mefʿūlü fāʿilātü mefāʿīlü fāʿilün
1.a. Ey ṣoḥbet eyledüm diyen ol dil-sitān ile
b. Yalanı şöyle söyle ki bir az inanıla
2.a. Zülfüñ ḳoẖusı ile olur muʿteber nesīm
b. Merġūb olur müsāfir olan armaġan ile
3.a. Öldürme beni bir yaña sen bir yaña zemān
b. Şāyed ola ki bir gün añasın zemān ile
4.a. Ḳan aġlayub günehde bulundumsa ey perī
b. Öldürme ben ḳuluñı yuma ḳanı ḳan ile
5.a. Baġlarlar ise ṭurmaya cennetde zāhidi
b. Görse yüzüni sünbül·i ʿanber-feşān ile
6.a. Bir kez yüzüm ayaġuña sürmege irse el
b. İzüñ tozını datar idüm zaʿferān ile
7.a. Ṭutdı cihānı şöhret·i şiʿrüñ Necātīya
b. Dünyāya ṣıġmaz olduñ o bir ḳaç yalan ile

|p449
fāʿilātün fāʿilātün fāʿilātün fāʿilün
1.a. Atılur çarẖ oḳı gibi tīr·i āhum göklere
b. Ey hilāl-ebrū ṣaḳın kim atdıġum düşmez yire
2.a. Ben beni yirden yire ursam yiridür sāye var
b. Kim ṣalunır dem-be-dem yanuñca bir yüzi ḳara
3.a. Āfitāb·ı ʿālem-ārāyi cemālüñ var iken
b. Ḥüsn bāzārında almaz kimse fels·i aḥmere
4.a. Sāḳiyā ol sāʿid·i sīmīn elinden bir ayaġ
b. Alınur mı düşmeyince ellere ayaḳlara
5.a. Açdı görki defterin ḥüsn ile ol begler begi
b. Sen de tīmār ister iseñ ey göñül geç deftere
6.a. Göñlümi ber-dār iderseñ beñlerüñle zülfe ṣal
b. Ṣuçluyı ādet budur kim aṣdururlar kāfere
7.a. ʿĀlemüñ maʿmūresinden ḳalmadı ṭaş üzre ṭaş
b. Döneli baġruñ ḳara ṭaşa tenüñ aḳ mermere
8.a. Er degül misin Necātī olma dünyāya muṭīʿ
b. ʿAvret iken ol şu ṣūretle muṭīʿ olmaz ere

|p450
feʿilātün feʿilātün feʿilātün feʿilün
1.a. İverin ruẖlaruña gülşen·i cāndur dimege
b. Severin leblerüñe cān·ı cihāndur dimege
2.a. Kim ne dirse disün ol ḳāmete bu şīvelere
b. Hele biz utanuruz serv·i revāndur dimege
3.a. Beni öldürmege ʿahd eyledüñ ammā güç imiş
b. Kerem ehline kişi vaʿde ḳaçandur dimege
4.a. Varayın Kaʿbeye dervīş olayın yüz süreyin
b. Yā Rab ol ḥüsn çerāġın baña yandur dimege
5.a. Şīşe gögsin geçürür leblerüñ öpdükce ḳadeḥ
b. Dili varmaz yüregüm ṭopṭolu ḳandur dimege
6.a. Ḳamu çirkinligi sen kendüñe isnād itdüñ
b. Yüzümüz döyemez āyīna yalandur dimege
7.a. Özenürler elif·i ḳaddüñe serv oḳumaġa
b. Çekinürler ṣaçuña müşg-feşāndur dimege
8.a. Adın añmaġa utanursa Necātīnüñ dōst
b. Ne cihān geçdi begüm bārī fülāndur dimege

|p451
fāʿilātün fāʿilātün fāʿilātün fāʿilün
1.a. Olsa dünyā ṣalınurdum dil-ber·i raʿnā ile
b. Gerçi dil-ber kimseye itmez vefā dünyā ile
2.a. Mihr ü māhı bir eli ̮ile oynadan elma gibi
b. Nār·ı fürḳatde geçürdi günümi eyvā ile
3.a. Ḳor mı ser-keş kākülüñ ṭut kim çekinmek isteyem
b. Ḳor mı ser-ẖōş gözlerüñ mest·i maḥabbet ayıla
4.a. Ḳullaruñdan ṣayılur māh·ı felek ammā güneş
b. Bir ter oġlanıdürür kim ṭutulubdur ay ile
5.a. Tā ki virdi ḳāmet·i dil-ber müˀes̲s̲irden ẖaber
b. Secde-gāh·ı sīne doldı rabbiyüˀl-aʿlā ile
6.a. Ḫāṭıruñ mey-ẖānede sen ẕikr idersen cehr ile
b. Ṣōfī umarsan ki ṣuçuñ baṣıla ġavġā ile
7.a. Ḳandan ol pākīze vü ḳandan Necātī mübtelā
b. Gün geçirmekdür ġaraẓ bir ruẖları zībā ile

|p452
mefʿūlü mefāʿīlü mefāʿīlü feʿūlün
1.a. Ol ġamzesi ẖūn-rīze göñül viren eli ̮ile
b. Ol kimse ʿaceb öle mi kendü eceli ̮ile
2.a. El götürüb isterdi ġamuñ dil idemez il
b. İtdügini kendüye kişi kendü eli ̮ile
3.a. Göz elde midür kim güzele baḳmaya ādem
b. Ādem midür ol ki ̮olmaya hem-dem güzeli ̮ile
4.a. Ey yüzi güneş cennet·i naḳdi ḳodı zāhid
b. El-minnetü liˀllāh ki ḳaldı ʿameli ̮ile
5.a. Avlayımadı sencileyin kime Necātī
b. Ol gözleri ser-mest ġazāli ġazeli ̮ile

|p453
mefʿūlü fāʿilātü mefāʿīlü fāʿilün
1.a. Aġla gözüm firāḳ ile derd ile āh ile
b. Kim yılduzuñ barışmadı gün yüzli māh ile
2.a. Dirler ki dün ġarībüñ olur ey belā-keş āh
b. Dünyā yüzini doldura dūd·i siyāh ile
3.a. Gice gelen ḳapuña güneşdür ḳamer degül
b. Seyr ide çıẖmış işigüñü şeb-külāh ile
4.a. Ḳorḳarın işigüñde gelem bir gün āh idem
b. Odlara yanam ey ṣanem ol bir gün āh ile
5.a. Alınsa ḳaşlaruña ʿaceb olmaya göñül
b. Bir şehr alınur ey ḳamer iki güvāh ile
6.a. Dil beydaḳını eyledi iki ruẖ ile māt
b. Şaṭrenc oynamaḳ güc imiş pādişāh ile
7.a. Dönüb yüzüñe baḳmadı mümkinler olmadı
b. Ṣayd eyleyen Necātī seni bir nigāh ile

|p454
feʿilātün mefāʿilün feʿilün
1.a. Eylenürdük ġamuñda lāle ile
b. Alışa ̮idi oruc piyāle ile
2.a. Ḳış günde helāk ider biñ kez
b. Beni efʿī ṣaçuñ iṭāle ile
3.a. Sāḳī cām·ı ṣabūḥı egleme kim
b. Ḳadeḥ·i lāle doldı jāle ile
4.a. Ṭop yıḳubdur ẖayāl·i ẖāl·i ruẖuñ
b. Bedenüm ḳalʿasın ḥavāle ile
5.a. Ḳaṣd idermiş leb·i nigāra gelüñ
b. Ṭutuşalum yine piyāle ile
6.a. Ne çekerseñ çek ey dil·i miskīn
b. Çıḳışasın ola ki nāle ile
7.a. İşidilsün Necātī āvāzuñ
b. Zīnet it şiʿrüñi telāle ile

|p455
mefʿūlü fāʿilātü mefāʿīlü fāʿilün
1.a. Bārīk didilerse nihāl·i bülendüñe
b. Söz ortañundur ey ṣanem alınma kendüñe
2.a. El virdi ḥüsn devleti yoḳdur ayaḳdaşuñ
b. Meydān senüñdür cevelān vir semendüñe
3.a. Ortaya atma zülf·i siyeh-gāra aldanub
b. Başdan aşubdurur çekerek dil kemendüñe
4.a. Āzādelük bulasıñ içün ey nihāl·i serv
b. Ḳulluḳlar eyle doġruluġ ile efendüñe
5.a. Ḳayġu ḳayıḳlarında unutma Necātīyi
b. Gird-āba atma merḥamet eyle levendüñe

|p456
fāʿilātün fāʿilātün fāʿilātün fāʿilün
1.a. beñzedürken yār işigin ehl·i diller Kaʿbeye
b. Başlamamış idi İbrāhīm·i Āẕer Kaʿbeye
2.a. İşigüñe ḳo doyunca süreyin yüzüm gözüm
b. Çoḳ sürilür çün bilürsen sīm ile zer Kaʿbeye
3.a. Ṭaş işigin secde gāh idinmez isem dōstuñ
b. Ṭaş atanlardan olayın ey birāder Kaʿbeye
4.a. Sen baña gelmek baʿīd ü ben saña varmaḳ muḥāl
b. Kim hümā inmez yire ḳonmaz kebūter Kaʿbeye
5.a. Ḳıble iken dōstum her-cāyī olmaġın güneş
b. Döndürübdür secde-gāhını Peyember Kaʿbeye
6.a. Kūyuña meyl eylerem ġamdan ẖalāṣ olmaġ içün
b. Bellüdür āzād olur varınca çāker Kaʿbeye
7.a. Kūyuña gelmek ile ʿāşıḳ dirilmesün raḳīb
b. Ḥācī olmaz bellüdür varmaġ ile ẖar Kaʿbeye
8.a. Sen yanuñdan sürdügüñce ben işigüñ gözlerem
b. Kim gider ʿādetdürür maʿzūl olanlar Kaʿbeye
9.a. Ey cemālüñden muʿanber kākülüñ tercīʿ·i bend
b. Kim anı daʿvā ile şāʿirler aṣar Kaʿbeye
10.a. Ḫalḳı ḳapuñ itdügi ̮içün miḥnet odından ẖalāṣ
b. Kim görürse dir ki yārab nice beñzer Kaʿbeye
11.a. Yıḳmaḳ ister dōstum düşman Necātī göñlini
b. Ḳoma kim ḳaṣd eyledi göz göre kāfer Kaʿbeye

|p457
feʿilātün feʿilātün feʿilātün feʿilün
1.a. Bir aġız kim diyesen derd ile Allāh Allāh
b. Doldurur yiri göki nūr ile Allāh Allāh
2.a. Gāh olur ẖavf gelür ġālib olur gāh recā
b. Gāh olur ḥasret ile āh iderüz gāh Allāh
3.a. Doġrusın mı diyelüm vāy baña vāy saña
b. İtmese bedraḳa·i luṭfını hem-rāh Allāh
4.a. Ḳamu yirde bulınur gel diyelüm āh Allāh
b. Āh içinde bulınur gel diyelüm āh Allāh
5.a. Ẓulmeti açmaġa ẕikr eyle Necātī ẕikr et
b. Fetḥ ider Rūm ilin āvāze·i Allāh Allāh

|p458
fāʿilātün fāʿilātün fāʿilātün fāʿilün
1.a. Bir gözi āhū ile ḳavl ü ḳarārum var yine
b. Körlügine it raḳībüñ ẖōş şikārum var yine
2.a. ʿÖmri bāṭıldur mey ü maḥbūba hem-dem olmayan
b. Başda sevdā elde cām·ı ẖōş-güvārum var yine
3.a. Ḥamdü biˀllāh dōstlar ġam düşmanından ḳaçmaġa
b. Gūşe·i mey-ẖāne gibi bir ḥiṣārum var yine
4.a. Ḳana boyanmış iken göñlüm açar güller gibi
b. Bir cemāli ʿālem ̮ārā nev-bahārum var yine
5.a. Çıḳdı yaşum gibi çeşmümden cihān gevherleri
b. Şol Necātīyem ki dürr·i şāh-vārum var yine

|p459
feʿilātün feʿilātün feʿilātün feʿilün
1.a. Būse luṭf it saña cān ile ẖarīdār olana
b. Cān yidürmek gerek ey ġonca-dehen yār olana
2.a. Nola ger ṣu gibi ṭaş yaṣdanu ṭopraḳ döşenem
b. Böyle olmaḳ yaraşur ʿāşıḳ·ı dīdār olana
3.a. Benüm aġladuġuma şimdi ḳayırmaz gülüñüz
b. Bir zemān güler idüm ben de giriftār olana
4.a. ʿĀşıḳ·ı ṣādıḳ iseñ baḳma bu dünyā yüzine
b. Ki hümā-himmet olan ḳonmaya murdār olana
5.a. Āh kim olmadı ḳapuñda bir itce raġbet
b. Giceler ṣubḥa degin zār ile bīdār olana
6.a. Ger Necātī ġama düşdü ̮ise ḳo cānı çıḳsun
b. Niye virürdi göñül böyle sitem-gār olana

|p460
mefʿūlü fāʿilātü mefāʿīlü fāʿilün
1.a. Bizi müşerref eyledi cānān geşen gice
b. Nūr ile ṭoldı külbe·i aḥzān geçen gice
2.a. Ẓulmet gice ḳarañluġı sāḳī·i bezm Ḫıẓr
b. Cām·ı mey idi Çeşme·i Ḥayvān geçen gice
3.a. Ben bī-dil ü ġarīb ile aẖşamlamaġ içün
b. Bedr olmış idi ol meh·i tābān geçen gice
4.a. Çoġ aġlasam ʿaceb mi ki gözümdedür daẖi
b. Şol mey ki ṣundı sāḳī·i devrān geçen gice
5.a. Ḳani dehān·ı dōst yüzük gizledükleri
b. Avcumda idi Möhr·i Süleymān geçen gice
6.a. Mihr·i sipihre kellesi ḳızduḳca germ olub
b. Dil uzadurdı şemʿ·i şebistān geçen gice
7.a. Ben şol Necātīyem ki kelāmum leṭāˀifi
b. Sen pādişāhı eyledi ʿuryān geçen gice

|p461
fāʿilātün fāʿilātün fāʿilātün fāʿilün
1.a. Bī-ḳarār eylerdi her dem ġam beni cām olmasa
b. Göñlüm ārām eylemezdi ger dil-ārām olmasa
2.a. Daġlara düşüb yürürdüm dāˀimā Mecnūn gibi
b. Ol ṣaçı Leylī eger bir dem baña rām olmasa
3.a. Pādişāhum rūşen olmazdı sarāyı göñlümüñ
b. Dāġ·ı mihrüñ sīnede yir yir eger cām olmasa
4.a. Puẖteler meyden beni menʿ itmege gör zāhidi
b. İstimāʿ itmek olurdı sözini ẖām olmasa
5.a. Āl ile almaz idüñ göñlin Necātī bendeñüñ
b. Ḳāmetüñ cānā elif zülfüñ eger lām olmasa

|p462
mefʿūlü fāʿilātü mefāʿīlü fāʿilün
1.a. Ḫōrşīd saña beñzemese müşterī ile
b. Baḳmazdı gök yüzine kimesne yiri ile
2.a. Ṣaḳın maḥabbet ehline incinme sevdügüm
b. Bulur metāʿ·ı ḥüsn behā müşterī ile
3.a. Gel ey zemāne Yūsufı müşg ile ṭartalum
b. İzüñ tozını ṣatar iseñ beñzeri ile
4.a. Aġzum egildi būseñe cān al diyu diyu
b. Böyle olur muʿāmele iden perī ile
5.a. Neylersin işigüñde raḳīb ile dōstum
b. Çıḳmadı göke çünki Mesīḥā ẖarı ile
6.a. Nāfe ṣaçuñ hevāsına sevdāya düşmese
b. Ḳalmazdı böyle ṣarılu bir ḳat deri ile
7.a. Bāzār·ı ġamda göz yaşı ṣūret virür saña
b. Kim ṣatılur Necātī ḳumāş ülkeleri ile

|p463
feʿilātün feʿilātün feʿilātün feʿilün
1.a. Bāġ·ı Cennet ne virür ʿāşıḳ·ı dīdārlara
b. Ben o bülbül degülem ki aldana gül-zārlara
2.a. Ḳomazın zülfi kemendin ne çekersem çekeyin
b. Böyle olur dolaşan ṭurrası ṭarrārlara
3.a. Çeşm ü ruẖsārı havāsı ̮ile ne ṭañ nergis ü gül
b. Yüzin ü gözün açub ger gire bāzārlara
4.a. Ḥabb·ı misk ile dehānın pür ider ġonca velī
b. Luṭf ile öykünimez laʿl·i şeker bārlara
5.a. Çek dil-āzārlıgı derd ile cānuñ çıḳsun
b. Neye cān virür idüñ böyle dil-āzārlara
6.a. Meskenet yayını ḳursun dayanub miḥrāba
b. Ṣōfī anca urasan başuñı dīvārlara
7.a. Çeşm ü ġamzeñle bilür ḥāl·i Necātīyi şu kim
b. Ṭuş gelmiş ola Baġdādda ʿayyārlara

|p464
feʿilātün feʿilātün feʿilātün feʿilün
1.a. Būseñe cān vireyin dime dil-ārāmlara
b. Ki güzeller döyemezler iñen ibrām ara
2.a. Şöyle çoḳ ol ṣanemüñ ḥüsni temāşācıları
b. Yir bulımaz çıḳar ay ile güneş damlara
3.a. Göreli luṭf ile sen sīm-beden dellāki
b. Bildük anı ki girermiş perī ḥammām ara
4.a. Ḳaçma bizden ṣanemā ḳaçma ki ʿārifler ile
b. Durub oṭurma gerek serv·i gül endāmlara
5.a. Cām ile rūşen olur ẖāne kim ola ḳarañu
b. Sāḳiyā biz de doḳunsaḳ nola şol cāmlara
6.a. Olduġı ̮içün ḳad ü zülfüñe müşābih āyet
b. Muṣḥaf açub sürerem yüzüm Elif-Lāmlara
7.a. Çün ölem ṭopraġ olam ben beni yirden götürüñ
b. Cürʿalar ẖāküñ olur diñ ḳadeẖ-āşāmlara
8.a. Ḫalḳuñ ardıncadürür ḳaşuñ ü gözüñ ġamzeñ
b. El-ḥaḳ ādem döyemez bu ḳadar iḳdāmlara
9.a. Yine medḥ itdi Necātī senüñ āhū gözüñi
b. Gör ne luṭf ile şeker ḳapladı bādāmlara

|p465
feʿilātün feʿilātün feʿilātün feʿilün
1.a. Yılda bir kerre gelürsüz bu semen zārlara
b. Ey gül ey tāze çemen ʿışḳ ola dīdārlara
2.a. Neyiki ġonca·i mestūr añıcaḳ yār lebin
b. Yaḳalar çāk idüben düşdügi bāzārlara
3.a. Ser·i kūyuñda bilür ġamzelerüñle ḥālüm
b. Şu ki Baġdāda vara ṭuş ola ʿayyārlara
4.a. Aġzınuñ rāyiḥası ̮içün götürür ḥabbüˀl-misk
b. Ġonca hīç öyküne mi laʿl·i şeker-bārlara
5.a. Ḳaşı miḥrābına peyveste sücūd etmez iseñ
b. Ṣōfī anca urasın başuñı dīvārlara
6.a. Zülfi devrinde ayaḳ baṣmamaġ içün dil-dār
b. Bekledür ḥüsni gülistānın iki mārlara
7.a. Şöyle kim Ḥaḳ vire Mecnūn ile Ferhāda ḥayāt
b. Ṣanʿat ögretmek olur iki bī-kārlar
8.a. ʿĀşıḳa piste-dehenler ḳati gülerler idi
b. Muṭṭalıʿ oldı Necātī hep o esrārlara

|p466
fāʿilātün fāʿilātün fāʿilātün fāʿilün
1.a. Bir elif çek sīneme ey yār·ı cānī her gice
b. Tā ki serv·i ḳaddüñ añub ḳocam anı her gice
2.a. ʿIşḳ ġafletden beni bir veche bīdār itdi kim
b. Nāle vü āhum uyarur pās-bānı her gice
3.a. Görünelden reng·i gülde ḥüsn·i dil-berden es̲er
b. Bülbül āvāzı uyutmaz bāġ-bānı her gice
4.a. Şöyle āteş-bāzı·ı ʿışḳ oldum ki āhumdan benüm
b. Atılur gökler yüzine āsumānī her gice
5.a. Zülfüñe baḳan ṣanur kim doġdı maġribden güneş
b. Gösterürse fitne·i āẖır zemānı her gice
6.a. Ḳullaruñ gibi dolañur işigüñ mihr ile māh
b. Beklemek ʿādetdürür şāh·ı cihānı her gice
7.a. Dün ġarībüñdür Necātī ḳo ḳayırmaz āhumuñ
b. Göklere direk direk olsun duẖānı her gice

|p467
feʿilātün feʿilātün feʿilātün feʿilün
1.a. Bu cefādan ki ḳadeḥ aġzuñ öper döne döne
b. Nār·ı ġayretde kebāb oldı ciger döne döne
2.a. Ne revādur bu ki ben ḳāmetümi ḥalḳa ḳılam
b. İnce belüñ ḳoca ḳarşuma kemer döne döne
3.a. Gözlerüm ḳıble-nümā gibi olubdur nola ger
b. İşigüñ cānibine ḳılsa naẓar döne döne
4.a. Sensen ol şāh·ı felek-mertebe kim leyl ü nehār
b. Yüz sürer işigüñe şems ü ḳamer döne döne
5.a. Girye vü zārī ile oldı Necātī dolāb
b. Gül-sitān·ı ser·i kūyuñı ṣular döne döne

|p468
fāʿilātün fāʿilātün fāʿilātün fāʿilün
1.a. Beydaḳ·ı ẖāl·i ruẖuñ kim sürdi oyun üstüme
b. Vaḳtidür ey zülf·i ser-keş üstüme dön üstüme
2.a. Pādişāh·ı vaḳt olam gibi gelür kim dün gice
b. Sāye ṣaldı düşde ol zülf·i hümāyūn üstüne
3.a. ben bir avuc ṭopraġam yā Rab nice ̮idem eşke kim
b. Yumulub geldi gözümden iki Ceyḥūn üstüme
4.a. Serv boyuñ üstine ben biñce ā diksem olur
b. S̲ābit itsün bir vefā ol ḳadd·i mevzūn üstüme
5.a. Ġālib iken leşker·i ẖāl ü ẖaṭuñ ey bī-vefā
b. Ne ẓarūret kim ide her dem şebīẖūñ üstüme
6.a. Ey Necātī zülf·i Şebdīzine yāruñ ben boyun
b. Gelmesün her dem depinüb eşk·i Gül-gūn üstüme

|p469
fāʿilātün fāʿilātün fāʿilātün fāʿilün
1.a. Bir güzel gördüm gelür serv·i ẖırāmān yerlüce
b. ʿĀrıẓı gökler yüzinde māh·ı tābān yerlüce
2.a. Gösterüb laʿli meyinden didi ol kāfir-beçe
b. Bulınur eksük degül isterse yārān yerlüce
3.a. Bir ṭolu nūş it bize ey sāḳī·i meclis-nevāz
b. Cān baġışlar ṣoḥbete ey būsesi cān yerlüce
4.a. Gözümi ṭutsun eger kim ṭutmadı ise gözüm
b. Ayaġuñ ṭopraġını kuḥl·i Ṣafāhān yerlüce
5.a. Nāle·i ṭanbūrdur dünyāda efġān yolluca
b. ʿIşḳ derdidür cihānda derde dermān yerlüce
6.a. Zülfüñ ucından ṭaġıtdı kendüzin sünbül diyen
b. Var ise reyḥāndur ol zülf·i perīşān yerlüce
7.a. Yār işiginde Necātīyi görenler didiler
b. ʿĀlem içinde gedā kim gördi sulṭān yerlüce

|p470
mefʿūlü fāʿilātü mefāʿīlü fāʿilün
1.a. Tā kim ṣaçuñ girihlerin açduñ ṣabā ile
b. ʿÖmrin uzatduñ ehl·i dilüñ ẖōş havā ile
2.a. Meclisler içre sen mey·i ṣāfī ideli nūş
b. Ben bir içim ṣu içemez oldum ṣafā ile
3.a. Biñ biñ belāña ṣabr ider idüm belā budur
b. Bir kez yüzüñi görimezin biñ belā ile
4.a. Āh itdügümce rāḥat olur ṭayanur yürek
b. Yab yab ʿadem diyārına gider ʿaṣā ile
5.a. Seyl-āb·ı eşk içinde meded irdi ẖaṭṭ·ı dōst
b. Çoḳ varṭadan ẖalāṣ olur ādem duʿā ile
6.a. Ger başı ṭaşra olmasa serv·i ḥarīm·i bāġ
b. Dāˀim er oynın oynamaz idi ṣabā ile
7.a. Derd ile añ Necātīyi añarsañ ev ṭabīb
b. Kim başı ẖōş degüldürür anuñ devā ile

|p471
mefʿūlü fāʿilātü mefāʿīlü fāʿilün
1.a. Tā zülfüñüñ her itdügi gelmeye yolına
b. Oḳudı urdı ṭañ yili ṣaġına ṣolına
2.a. Avlatsa cümle ʿālemi zülfüñ ʿaceb mi kim
b. Şeh-bāz·ı ḥüsni devlet ile aldı ḳolına
3.a. Ey serv·i nāz itdüñ elüñden gelenleri
b. Bir daẖi uş benüm gibi bī-çāre bulına
4.a. Ḳaddüñe ḳarşu ḳarṣar elin serv egerçi kim
b. Bu şīveler iñen daẖi düşmez uṣūline
5.a. Ben Yūsufı efendüme beñzer diyem mi hīç
b. Bir kişi bu sözi dimeye kendü ḳulına
6.a. Ehl·i palās ki ̮aṭlas·ı gerdūna ṭaʿn ider
b. Dīvānedür ki baḳmadı ḥāline çulına
7.a. Miskīn Necātī Kaʿbe·i kūyuñ murād ider
b. Ḫarc itdi hep ne buldı ise Tañrı yolına

|p472
feʿilātün feʿilātün feʿilātün feʿilün
1.a. Çıḳalı göklere āhum şereri döne döne
b. Yandı ḳandīl·i sipihrüñ cigeri döne döne
2.a. Ayaġı yir mi baṣar zülfüñe ber-dār olanuñ
b. Ẕevḳ u şevḳ ile virür cān ü seri döne döne
3.a. Şām·ı zülfüñle göñül Mıṣrı ẖarāb oldı diyu
b. Saña iletdi kebūter ẖaberi döne döne
4.a. Sen durub raḳṣ idesen ḳarşuña ben boynum egem
b. İne zülfüñ ḳoca sen sīm-beri döne döne
5.a. Kaʿbe olmasa ḳapuñ ay ile gün leyl ü nehār
b. Eylemezlerdi ṭavāf ol güẕeri döne döne
6.a. Sen olasan diyu yir yir aṣılub āyīneler
b. Gelene gidene eyler naẓarı döne döne
7.a. Ey Necātī yaraşur muṭribi şeh meclisinüñ
b. Raḳṣ urub oḳuya bu şiʿr·i teri döne döne

|p473
fāʿilātün fāʿilātün fāʿilātün fāʿilün
1.a. Cennete dönmişdürür el-ḳıṣṣa yārān Ḳapluca
b. Ol perīler mecmaʿı ser-çeşme·i cān Ḳapluca
2.a. Ayaġına varur ola biñ perī gün başına
b. Var ise bulmışdürür Möhr·i Süleymān Ḳapluca
3.a. Āyīne gibi perī-peyker semen-sīmaları
b. Ḫōş ṣafālarla çeker baġrına ʿuryān Ḳapluca
4.a. ʿĀşıḳ·ı dīdār olub gördügi maḥbūba aḳar
b. Germ olub gün yüzlülerle sürdi devrān Ḳapluca
5.a. Şükr kim ṣaḳalluya cennetde yir yoḳdur dimez
b. Dopdoludur Bāġ·ı Rıḍvān gibi ġılmān Ḳapluca
6.a. Kendüyi vaḳf eyleyüb yollar gözetmezdi müdām
b. Ger Ḫalīlüˀllāh gibi sevmese mihmān Ḳapluca
7.a. Anadan doġma olur her kim gelirse ḳatuña
b. Bārekeˀllāh ey bu gün her derde dermān Ḳapluca
8.a. Çünki sen Bursada olduñ ʿāleme defʿüˀl-melāl
b. Dāˀim ābādān olasın şād ü ẖandān Ḳapluca
9.a. Eski yeñi saña ẖıdmet-gār olımaz gerçi kim
b. Pīr ile pīr olduñ oġlan ile oġlan Ḳapluca
10.a. Kāˀināt içinde Bursacıḳ gibi bir dānesen
b. Dām ider gerçi seni erbāb·ı ʿirfān Ḳapluca
11.a. Vuṣlat·ı cānān ile şād it Necātī müflisi
b. Daẖi müşkiller senüñ ḳatuñda āsān Ḳapluca

|p474
mefʿūlü fāʿilātü mefāʿīlü fāʿilün
1.a. Çeşmüm boyadı çehremi eşk·i revān ile
b. Gūyā firāḳ-nāme yazar yāra ḳan ile
2.a. Güller açıldı ey boyı şimşād ü ẖōş-ẖırām
b. Seyr eyle ṣaḥn·ı sebzeyi serv·i revān ile
3.a. Derd ü ġam ile eyle cihāndan sefer göñül
b. Ḳorḳuludur yoluñ gidegör kārbān ile
4.a. Bilsem ki Ḫıẓr·ı zinde ne cān ile bir görür
b. Āb·ı Ḥayātı ol leb·i şekker-feşān ile
5.a. Rifʿat vire ̮idi ādeme dünyāda bir hüner
b. Gökler yüzine çıḳa idüm ben fiġān ile
6.a. Sen şāhdan irişeli menşūr·ı iltifāt
b. Ṭutdı Necātī ʿālemi nām ü nişān ile

|p475
mefʿūlü mefāʿīlü mefāʿīlü feʿūlün
1.a. Çoḳ fitne olur zülf·i siyeh-gāra uyınca
b. İllerde mes̲eldür bu ki ılanı tüyince
2.a. Ey Yūsuf·ı gül-çihre mes̲eldür atalardan
b. Kim düşman içün ḳuyu ḳazan ḳaza boyınca
3.a. Virdük ayaġı ṭopraġına nāfe·i Çīni
b. Ey bād·ı ṣabā var yirü ẖayr eyle ṭoyınca
4.a. Secde idüb ayruġa getürdüm yüzüme kir
b. Göz yaşı neler çekdi neler anı yuyınca
5.a. O zülf·i siyeh-pūşı ṣabā yili götürsin
b. Meryem gibi dāmānını yirde sürüyince
6.a. ʿArʿar boyuñu öger imiş deprede dilüñ
b. Ey serv·i çemen böyle yirüñde ḳuruyınca
7.a. Ġonca ̮ile ḳati ṣıḳluġı var bülbülüñ ey bād
b. Aġzı ẖaberin aldum anuñ ben ṣoluyınca
8.a. El virmiş iken furṣatı fevt itme Necātī
b. El mi irer ol serv·i revāna büyüyince
9.a. Şīşe şimadan muḥtesibe tevbe ṣımaḳ yeg
b. Getür ayaġı hele bize nāşī duyınca

|p476
fāʿilātün fāʿilātün fāʿilātün fāʿilün
1.a. Ḥamdü liˀllāh oḳur ol ġonca-dehānum gizlüce
b. Gül gibi mecmūʿasından dāsitānum gizlüce
2.a. Ata ana daẖi yāruñ bilmez iken içdügin
b. Ḳana ḳana mey gibi nūş itdi ḳanum gizlüce
3.a. Bezmümüz bir ten gibidür ḳanı mey cānı güzel
b. Cān gibi otursun ol nāzüg-miyānum gizlüce
4.a. Ben ḳarañu gicelerde ṭurmayub āh itdigüm
b. Bu ki gökler yüzine vara duẖānum gizlüce
5.a. Bezm·i cānānı Necātī itme zinhār āşikār
b. Gizlüce ẖōşdur benüm bāġ·ı cinānum gizlüce

|p477
fāʿilātün fāʿilātün fāʿilātün fāʿilün
1.a. Ḫōş cevān itdi cihānuñ pīrini devrān yine
b. Bād·ı nev-rūz ile būstān buldı tāze cān yine
2.a. Virdi zīnet būstāna nitekim bāġ·ı Naʿīm
b. Girye·i ebr·i bahār ile gül·i ẖandān yine
3.a. Gördi ẖūnīn-pīrehen gül Yūsufını lā-cerem
b. Pīr·i Kenʿān gibi ider ʿandelīb efġān yine
4.a. ʿIṭr·ı enfāsı ̮ile āfāḳı muʿaṭṭar ḳılmaġa
b. Açdı gül-zār içre ʿaṭṭār·ı ṣabā dükkān yine
5.a. Ey Necātī furṣatı fevt eyleme mey alı var
b. Ṣaḥn·ı gül-zāra ki ḳurdı şāh·ı gül eyvān yine

|p478
mefʿūlü fāʿilātü mefāʿīlü fāʿilün
1.a. Ḫaclet odı ̮ile nice nice her gün āh āh
b. Böyle yaḳarsa her kişiyi her günāh āh
2.a. Şūr-ābile yuduḳlarum açılmadı dirīġ
b. Göz yaşı ̮ile aġarmadı baẖt·ı siyāh āh
3.a. Āh arasında olmasam öldürür idi ġam
b. Ḥālüm nola ̮idi olmasa āhum penāh āh
4.a. Kūy·i belāda şöyle belürsüz yatur göñül
b. Bulımaz idüm eylemese gāh gāh āh
5.a. Āhum ḥikāyet eyledi sūz·ı derūnumı
b. Ṭutulmadı elif gibi ṭoġrı güvāh āh
6.a. Devlet didüklerinüñ olınca ṣoñında let
b. Olsa ʿaceb mi ʿāḳıbet·i pādişāh āh
7.a. Miskīn Necātī derd ile her şām ü her seḥer
b. Āh it ki āh içinde bulınur İlāh āh

|p479
mefʿūlü mefāʿīlü mefāʿīlü feʿūlün
1.a. Ḫālüñ var iken ẖat nedür ol laʿl·i ter üzre
b. Teşdīd ne lāzım ki ḳoyalar şeker üzre
2.a. Ölümlüsiyüz leblerüñüñ bize ne perhīz
b. Oruc mı ṭutalum begüm andan sefer üzre
3.a. Ey ḳaşı kemān ġamzeler oḳın çekerek ṭut
b. Ḳoma ki düşe bir birine bir ciger üzre
4.a. Göñlüme gözüme yaraduñ ey yüzi ẖōrşīd
b. Şimden girü gel pādişeh ol baḥr ü ber üzre
5.a. Yüzüme düşen göz yaşıdur ṣōfī ne lāzım
b. Kim dāne·i tesbīḥ ṣayam şūr ü şer üzre
6.a. Yüzümde baṣar biri birin eşk·i revānum
b. Bir nice yetīm üşe gelüb düşdi zer üzre
7.a. Söz Yūsufını müşg ile ṭartardı Necātī
b. Ḳıymet ḳosa ṣarrāf·ı cihān bu güher üzre

|p480
mefʿūlü fāʿilātü mefāʿīlü fāʿilün
1.a. Ḫaṭṭ·ı benefşe zeyn olalı laʿl·i nābına
b. Cān virür oldı ẖalḳ benefşe şarābına
2.a. Bozub düzüb niderdi yıl on iki ay felek
b. Ger beñzede ̮idi māhı yüzüñ āfitābına
3.a. Parmaḳ baṣarken aya ʿiẕārında zülf·i dōst
b. Kāfir degül mi ḳāyil olan gün ḥisābına
4.a. Ey ẖāce kime aġlayayın kim ḥakīm·i ʿaḳl
b. Yazmadı ʿışḳ meselesini kitābına
5.a. Ḳırmızı yüzli olmaġ içün ġonca·i çemen
b. Meyl itdi bülbülüñ cigerinüñ kebābına
6.a. Çün işigüñe oldı muʿārıẓ riyāẓ·ı ẖuld
b. Görünmedügi yegdür anuñ kendü bābına
7.a. Kim götürür ki gül yüzine zülf ola niḳāb
b. Bād·ı ṣabā dolaşsa yiridür niḳābına
8.a. İdrāk·ı ʿaḳl erişmeye şerḥ·i cemāline
b. Ḫaṭ yazmaz ise ḥāşiye ḥüsnüñ kitābına
9.a. Hecr āteşine döyse Necātī ʿaceb degül
b. Ögrenür Ādem oġlanı ṭamu ʿaẕābına

|p481
mefʿūlü mefāʿīlü mefāʿīlü feʿūlün
1.a. Ḫaṭṭuñ ruẖ ile zülf·i perīşān arasında
b. Ġavġā gibidür küfr ile īmān arasında
2.a. Cānā ẖaṭ·ı müşgīnüñ ile ol ruẖ·ı rengīn
b. Gül yapraġıdur ṣafḥa·i Ḳurˀān arasında
3.a. Ḳanlu yaşumı çehre·i zerdümde gören dir
b. Bitmiş bir iki lāle zaʿafrān arasında
4.a. Ġamzeñ oḳını çekdi göñül baġrına baṣdı
b. Ṭursun ḳo elif gibi begüm cān arasında
5.a. Kūyuñda seḥer ġulġulin arturdı Necātī
b. Beñzer bu gice yatdı gülistān arasında

|p482
feʿilātün feʿilātün feʿilātün feʿilün
1.a. Didüm ey cān el irer mi ṭuṭaġuñ öpmecüge
b. Gülerek nāz ile didi nola bir kerrecüge
2.a. Ne zevālüñ var ol ayuñ ser·i kūyında diyu
b. Güneşi çarẖ·ı felek ṣoḳdı delükden delüge
3.a. Lāyıḳ odur ki ̮idesin cefā gāh vefā
b. Gel berü rāẓıyüz ey dōst senüñle kesüge
4.a. Ḥasretüm ḳalmaz idi cennete dīdār ḥaḳı
b. Ölmeden yüz süre bilse ̮idüm o ʿālī işige
5.a. Ruẖ·ı dil-ber görinür gözüñe şol vaḳtin kim
b. Od ile ṣu barışa gölge güneşle birike
6.a. Göre ey dōst nice ẕevḳ ile yirler ġamuñı
b. Cān ü dil biri birinden ḳapışa yilteşuke
7.a. Nice dirsin ki benüm nice ̮olacaḳdur ḥālüm
b. Be Necātī saña işüñ olacaġın dedüke

|p483
feʿilātün feʿilātün feʿilātün feʿilün
1.a. Düşeri budur eyā pādişehüm yarlıġa
b. Ḳuluñam ḳalma günāhuma benüm yarlıġa
2.a. Öldürürsin göze göz cevr ü cefā ile beni
b. Ne virürler güzelüm böyle cefā-gārlıġa
3.a. Dil·i vīrānumı yap mihr ü vefā ile didü
b. Seng·i cevr ile hemān başladı miʿmārlıġa
4.a. Beñzer ey dōst ki ẖalḳ eyledi Ḫallāḳ·ı ezel
b. Gülüb oynamaġa seni beni ġam-ẖārlıġa
5.a. Sevmek ey dōst günāh ise eger sen ṣanemi
b. Yoḳ Necātī gibi bir daẖi güneh-gārlıġa

|p484
fāʿilātün fāʿilātün fāʿilātün fāʿilün
1.a. Dilde ʿışḳuñ ḳonmaz idi dīde giryān olmasa
b. Ḫāne·i dervīşe şāh inmezdi bārān olmasa
2.a. ʿIşḳ·ı dil-berdür göñül şehrini maʿmūr eyleyen
b. ʿĀlem içre intiẓām olmazdı sulṭān olmasa
3.a. ʿIşḳ işi vallāhi ġāyet müşḳil imiş dōstlar
b. Ḥasret·i dīdār ile cān virmek āsān olmasa
4.a. Kimse ʿāşıḳ olmaz idi vaṣl·ı cānān olmasa
b. Kimse varmazdı ṭabībe derde dermān olmasa
5.a. Key ẓaʿīf oldı Necātī ẖaste-ḥāli ḳorḳaram
b. Bir gice miskīn ʿadem şehrinde mihmān olmasa

|p485
fāʿilātün fāʿilātün fāʿilātün fāʿilün
1.a. Vardı zülfinden göñül yāruñ leb·i ẖandānına
b. Neylesün miskīn perīşānlıġı yetdi cānına
2.a. Ey beni çāh·ı zenaẖdānda görüb ḥālüm ṣoran
b. Düşdüm uşda ḥasret ile ġamzeler zındānına
3.a. Ṣaḥn·ı meydān·ı maḥabbetde oyunumdur benüm
b. Başumı ṭop eylemek yāruñ ṣaçı çevgānına
4.a. Ṣabr ẖadden geçdi nola laʿlüñe diş bilesem
b. Acıduġından ḳıyar her kişi ṭatlu cānına
5.a. Kendü yirine geçürür ġamzeñi geldükce cān
b. Ḫōşca varur rāstı taʿzīm ider mihmānına
6.a. Nergis·ı bī-çārenüñ ʿālem görünmez gözine
b. Dil-berüñ meftūn olalı ġamze·i fettānına
7.a. Bencileyin ẓaʿfdan cismi görünmez gūyiyā
b. Mübtelādur bād yāruñ zülf·i müşg-efşānına
8.a. Yanına olub ḥabībi ʿarẓ·ı hecr ider raḳīb
b. Ne ̮idelüm varsun ögünsün ḳalur ise yanına
9.a. Cānına